Ọrivẹ rẹ Orọnvwe Rha Fuevu-un
JẸ EVUN ẹfuọn vwẹ orọnvwe sa guọghọ ohwo totọ. Vwọrẹ uyota, ihwo evo re rọnvwọnre mrẹre nẹ ayen se vwo ghovwo ọrivẹ rẹ orọnvwe rayen ro kurhẹriẹ, rẹ ayen da rhoma ru oyerinkugbe rayen yovwin.a Ẹkẹvuọvo, owenẹ ayen rhoma dia kugbe yẹrẹ ayen ru ọtiọye-en, ọ da ihwo re mrẹvughe nẹ irivẹ rẹ orọnvwe rayen fuevun kẹ aye-en gangan. Mavọ yen ihwo tiọyena se vwo phi ẹdia nana kparobọ?
ẸKPO RẸ BAIBOL RE SA VWẸ UKẸCHA KẸ WẸ
Tobọ vwẹ ẹdia rẹ omaemuophiyọ ayen hepha na, buebun rẹ ihwo re rọnvwọnre, rẹ irivẹ rẹ orọnvwe rayen fuevun kẹ-ẹ mrẹ onẹrhẹvwe vwẹ Baibol na. Ayen yonori nẹ Ọghẹnẹ mrẹ oviẹ rayen, nẹ emiavwe rayen na je da Ọghẹnẹ.—Malakae 2:13-16.
“Ọke rẹ ẹnwan rẹ udu mẹ de rhi buphihọ, uchebro wẹn kọye sasa ẹnwẹ mẹ.”—Une Rẹ Ejiro 94:19.
“Bill da ta: “Mi vwo se owọ rẹ Baibol yena, ke me vwẹ ẹwẹn roro Jihova, ro si emiavwen mẹ no vwọrẹ ẹguọnọ, kirobo rẹ ọsẹ ro vwo ẹguọnọ ruẹ.”
“Ohwo ro vwo ẹguọnọ esiri ọye wo dje ẹguọnọ esiri wẹn kẹ.”—Une Rẹ Ejiro 18:25.
“Carmen rẹ ọshare rọyen fuevun kẹ vwẹ emeranvwe buebu-un da ta: “Ọshare mẹ fuevun kẹ vwẹ-ẹ. Ẹkẹvuọvo, me sa vwẹroso Jihova nẹ ọ cha fuevun kẹ vwẹ. O che ku vwe phiyotọ-ọ.”
“Wa ro ẹnwan rẹ emuọvo-o, ẹkẹvuọvo vwi kemu kemu orẹ kugbe oyare . . . ta ọdavwẹ wẹn kẹ Ọghẹnẹ. Ufuoma rẹ Ọghẹnẹ rọ nọ ẹruọ ejobi, kọ yọnrọn udu vẹ iroro rẹ ovwan.”—Filipae 4:6, 7.
“Sasha da ta: “Me vwariẹn awọreta nana se abọ buebun. Rẹ me vwọ nẹrhovwo ọkieje na, Ọghẹnẹ kọ kẹ vwẹ ufuoma vwẹ akpeyeren.”
O vwo ọkievo oma vwo dino rhọ ihwo ejobi re djunute na. Ẹkẹvuọvo, ayen vwẹroso Jihova Ọghẹnẹ, je mrẹ ẹgba vwo nẹ Ota rọyen. Bill da ta: “Esegbuyota mẹ kọyen nẹrhẹ akpeyeren mẹ vwotọ ọke rọ vwọ họhọ nẹ erọnvwọn ejobi ri chekọ ghwru va vwẹ abọ. Dede nẹ vwẹ ọkievo, ‘me yan vrẹn iyara rẹ uhoho rẹ ughwu,’ jẹ Ọghẹnẹ vẹ ovwẹ herọ.”—Une Rẹ Ejiro 23:4.
a Wọ da guọnọ evuẹ efa kpahen sẹ wo vwo ghovwon yẹrẹ wo vwo ghovwo-on, ni iyovwinreta re vwọ kpahen ohwohwo vwẹ Awake! rẹ April 22, 1999, “When a Mate Is Unfaithful.”