Oghwọrọ Da Phia

Ọ DA dianẹ oghwọrọ phia kẹ wẹ jovwo re, wo che vwo ẹruọ rẹ oborẹ ihwo rẹ oghwọrọ phia kẹ rhiẹromrẹ: oshọ, ẹwẹn ivivẹ kpahen obo re phiare na, ẹwẹn ro tighiri vẹ ẹwan. Ofu dje ihwo buebun rẹ oghwọrọ phia kẹ te ẹdia rẹ ayen rhe vwo owenvwe rẹ ayen vwo ru emu vuọvo ọfa-a.

Ọ da dianẹ oghwọrọ je nẹrhẹ erọnvwọn eje va wẹ abọ jovwo re, wo se roro nẹ wo rhe che se chirakon rẹ ebẹnbẹn na-a. Wọ sa tobọ roro nẹ o rhe vwo oboresorọ wo vwo yeri-in. Ẹkẹvuọvo, Baibol na tare nẹ akpọ fo eyeren, o vwo oboresorọ wo vwo vwo iphiẹrophiyọ nẹ erọnvwọn che yovwin vwẹ obaro na.

UYOTA RẸ BAIBOL NA NẸRHẸ E VWO IPHIẸROPHIYỌ

Aghwoghwo 7:8 da ta: “Oba rẹ emu yovwi nọ ẹtuọhọ rọye.” Oghwọrọ da ghwa phia nu, wo se no nẹ akpọ rhe fo eyere-en. Ẹkẹvuọvo, wo de vwo edirin, wọ sa wian rere erọnvwọn vwọ rhoma shephiyọ.

Baibol na tare nẹ ọke cha, “e gbi nyo umri rẹ oviẹ . . . kugbe ekperẹ rẹ enu ebro-o.” (Aizaya 65:19) Ọnana cha phia ọke rẹ Uvie rẹ Ọghẹnẹ de wene akpọ na phiyọ iparadaisi nu. (Une Rẹ Ejiro 37:11, 29) Oghwọrọ rha cha dia ọfa-a. Kemiavwe kemiavwe ro chekọ che no bẹdẹ, kidie Ọghẹnẹ Romevwẹgba na veri: “Ekuakua rẹ awanre na a gbe karophihọ aye-en eyẹ iroro gbe ra-a.”—Aizaya 65:17.

Di roro: Ọmemama na ru ọrhuẹrẹphiyotọ rọ vwọ kẹ wẹ “iphiẹrohọ” ọke rọ cha na, kọyen akpọ rẹ ufuoma vwevunrẹ otọ rẹ usuon rọyen. (Jerimaya 29:11) Uyota nana ghene sa nẹrhẹ akpọ fo eyeren? Sally re djunute vwẹ uyovwinrota ra vwọ tonphiyọ na da ta, “Wo de roro kpahan erọnvwọn iyoyovwin rẹ Uvie rẹ Ọghẹnẹ che ru kẹ avwanre vwẹ obaro na, ọnana sa nẹrhẹ wọ kpairoro vrẹ obo re phiare vwẹ obuko, je tẹnrovi obaro na.”

O rhe fo nẹ wo yono kpahen oborẹ Uvie rẹ Ọghẹnẹ che ru kẹ ihworakpọ kẹrẹkpẹ? Wo de ru ọtiọyen, wọ cha mrẹ nẹ, dede nẹ oghwọrọ phia kẹ wẹ, akpọ ji fo eyeren enẹna rẹ wọ vwọ rhẹro rẹ akpọ rẹ oghwọrọ cha kanre vwẹ obaro na. Jẹ tavwen ọke yena ki te, Baibol na vwo odjekẹ re sa vwẹ ukẹcha kẹ avwanre enẹna ọke rẹ oghwọrọ da phia nu. Roro kpahen evo krẹn.