Ono Yen Ọghẹnẹ?

Ihwo buebun tare nẹ ayen se Ọghẹnẹ gbuyota. Ẹkẹvuọvo, gba nọ ayen nẹ ono yen Ọghẹnẹ, ẹkpahọnphiyọ sansan yen ayen cha vwọphia. Evo tare nẹ Ọghẹnẹ ọyen oguẹdjọ rọ djoma, rọ guọnọ ihwo ro che gboja kẹ fikirẹ oruchọ rayen. Efa tare nẹ ọyen Ọghẹnẹ ro vwo ẹguọnọ, ro ji vwo ghovwon ihwo, otoro oborẹ ayen ruru-u. Efa je herọ re tare nẹ Ọghẹnẹ sheri kẹ avwanre, ọ je davwerhọn rẹ avwanre-e. Fikirẹ ẹkpahọnphiyọ sansan tiọyena, ihwo buebun se roro nẹ a cha sa riẹn oka rẹ ohwo rẹ Ọghẹnẹ hepha-a.

Ọghanre a vwọ riẹn oka ohwo rẹ Ọghẹnẹ hepha? E, ọghanre. Siẹrẹ wọ da nabọ riẹn oka rẹ ohwo rẹ Ọghẹnẹ hepha, ọ cha nẹrhẹ wo yeren akpọ rẹ omavwerhovwẹn. (Iruo Rẹ Iyinkọn Na 17:26-28) Siẹrẹ wo de sikẹre Ọghẹnẹ, ko che vwo ẹguọnọ wẹn, je vwẹ ukẹcha kẹ wẹ. (Jems 4:8) Ọ rọ marho, erianriẹn rẹ Ọghẹnẹ sa nẹrhẹ wo vwo arhọ rẹ bẹdẹ.—Jọn 17:3.

Mavọ wọ sa vwọ riẹn Ọghẹnẹ? Vwẹ ẹwẹn roro ohwo rẹ wọ nabọ riẹn, ugbeyan rọ kẹre owẹ mamọ. Mavọ yen ugbeyan yena vwọ tonphiyọ? Ọ sa dianẹ wo ke vughe odẹ rẹ ohwo na, iruemu rọyen, obo ri je vẹ obo ri miovwon ivun, ọtiọyen ji te obo ro rure vẹ obo rọ guọnọ ru kugbe erọnvwọn efa. Wo yono kpahen ohwo na, kọyen nẹrhẹ wo rhi sikẹrẹ.

Vwẹ idjerhe vuọvo na, avwanre sa rhe riẹn Ọghẹnẹ siẹrẹ e de roro kpahen erọnvwọn nana:

• DIE YEN ODẸ RẸ ỌGHẸNẸ?

• OKA RẸ OHWO VỌ YEN Ọ HEPHA

• DIE YEN ỌGHẸNẸ RURE?

• DIE YEN ỌGHẸNẸ CHE RU?

• ERERE VỌ YEN CHE NORHE SIẸRẸ WỌ DA RIẸN ỌGHẸNẸ?

E si imagazini nana rere ọ vwọ vwẹ ẹkpahọnphiyọ rẹ Baibol vwọphia kpahen enọ nana. Iyovwinreta nana cha vwẹ ukẹcha kẹ wẹ vwo yono kpahen Ọghẹnẹ, kugbe erere rẹ wọ cha mrẹ siẹrẹ wo de vwo mu ugbeyan.