Obo Wọ sa Vwọ Dia Akpọ Kpokpọ Na

Iyovwinreta re wanre na djerephia nẹ kẹrẹkpẹ Ọghẹnẹ che phioba phiyọ eyeren rẹ ọbrabra nana vẹ ebẹnbẹn re herọ. O se mu avwanre ẹro nẹ ọnana cha phia. Diesorọ? Kidie Ota rẹ Ọghẹnẹ rọ dia Baibol na tare nẹ,

“Akpọ na cha wanvrẹn.”—1 JỌN 2:17.

Avwanre se vwo imuẹro nẹ o ji vwo ihwo ri che sivwinrhọ kidie ẹkpo ri Baibol re djunute vwẹ obenu na je ta nẹ,

“Ohwo ro ru ọhọre rẹ Ọghẹnẹ kọ dia bẹdẹ.”

Ọtiọyena, e se vwo sivwinrhọ, ofori nẹ e ru ọhọre rẹ Ọghẹnẹ. A sa vwọ riẹn oborẹ ọhọre rẹ Ọghẹnẹ hepha, ko fori nẹ e ke yono kpahọn tavwen.

WO SE SIVWINRHỌ WAN OBA RẸ EYEREN NANA SIẸRẸ WỌ DA “RIẸN” ỌGHẸNẸ

Jesu da ta: “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na.” (Jọn 17:3) Avwanre da guọnọ sivwinrhọ wan oba rẹ eyeren nana je dia bẹdẹ, ko fori nẹ a “riẹn” Ọghẹnẹ. Ọnana vrẹ e di vwo vwo imuẹro nẹ Ọghẹnẹ herọ, yẹrẹ a vwọ riẹn erọnvwọn evo kpahọn. Ofori nẹ a vwẹ ugbeyan muo. Wọ da guọnọ nẹ ugbeyan ru wo muru tọn, ko fori nẹ wẹ vẹ ugbeyan wẹn na ghwọrọ ọke kugbe. Ọtiọyen yen ugbeyan rẹ avwanre vẹ Ọghẹnẹ je hepha. Roro kpahen iyono eghanghanre evo rẹ avwanre yono vwo nẹ Baibol na rhe, re chọn avwanre uko vwo vwo uvi rẹ oyerinkugbe vẹ Ọghẹnẹ.

SE OTA RẸ ỌGHẸNẸ RỌ DIA BAIBOL NA ỌKIEJE

Ọkieje yen avwanre vwọ riemu rere a sa vwọ dia. Ẹkẹvuọvo, Jesu da ta: “Ohwo sa vwẹ emu ọvo rhọ-ọ, jokpa rẹ ota ro nẹ unu rẹ Ọghẹnẹ rhe.”—Matiu 4:4.

Nonẹna, avwanre se Ota rẹ Ọghẹnẹ vwẹ Baibol na. Wo vwo yono Baibol na ye, ku wọ cha riẹn oborẹ Ọghẹnẹ ru wanre, obo ro ruẹ enẹna vẹ obo ro che ru vwẹ obaro na.

YARE UKẸCHA MIE ỌGHẸNẸ

Die yen wo se ru ọ da dianẹ wọ guọnọ ru obo re vwerhen Ọghẹnẹ ivun jẹ wọ mrẹ bẹnbẹn wọ vwọ kẹnoma kẹ obo re brare? Ọ da dia ọtiọyen, wọ da riẹn Ọghẹnẹ, ọnana cha vwẹ ukẹcha vwọ kẹ wẹ.

Roro kpahen aye ọvo re se Sakura ro yeren akpọ rẹ ọfanrhiẹn. Ọke rọ vwọ ton uyono ri Baibol phiyọ, o de rhi yono kpahen iji rẹ Ọghẹnẹ rọ tare nẹ, “Si oma nẹ ọfanrhiẹ.” (1 Kọrẹnt 6:18) Sakura da yare ukẹcha mie Ọghẹnẹ nẹ ọ kẹ ọyen ẹgba, ọ da dobọ rẹ uruemu ọbrabra nana ji. Ẹkẹvuọvo, o ji nene edavwini muabọ. Ọ da ta: “Ọke rẹ iroro rẹ ọfanrhiẹn da ro ẹwẹn mẹ, ke me ta ọdavwẹ mẹ eje vwọ kẹ Jihova vwẹ erhovwo, kidie me riẹnre nẹ mẹvwẹ ọvo che se phi ebẹnbẹn nana kparobọ-ọ. Ẹrhovwo nẹrhẹ mi sikẹre Jihova.” Kerẹ Sakura, iduduru rẹ ihwo buebun yen yono kpahen Jihova. Ọ kẹ ayen ẹgba rẹ ayen guọnọre rere ayen se vwo ru ewene vwẹ akpeyeren rayen ji ru obo re vwerhọn oma.—Filipae 4:13.

Wọ vwọ riẹn Ọghẹnẹ phiyọ ye, ọtiọyen ‘Ọghẹnẹ je cha riẹn’ wẹ kerẹ uvi rẹ ugbeyan. (Galesha 4:9; Une Rẹ Ejiro 25:14) Ọke yena, ku wo che sivwinrhọ je dia akpọ kpokpọ na. Ẹkẹvuọvo, mavọ yen akpọ kpokpọ na cha dia? Uyovwinrota rọ vwọ kpahen ọnana cha ta ota kpahọn.