Emramrẹ Ri Shekpahen Ihwo Rehẹ Odjuvwu

JIHOVA YEN ỌROMEKPENU NA

“Ekete ọvo de mudia vwẹ obo odjuvwu, ohwo ọvo de tidia vwẹ enu rẹ ekete na! Ohwo ro tidia na da họhọ ubioragha ro lo wrowro, aphoro de mu riariẹ ekete na phihọ rọ vwara rhururhuru kerẹ efenudu.”—Ẹvwọphia 4:2, 3.

“Me da mrẹ obo re họhọ erhanre, ko lo muo riariẹ. Kerẹ uhoho rẹ aphoro vwẹ irharheghe vwẹ ẹdẹ rẹ osio, ọtiọye elo rẹ uhoho na epha riariẹ. Ọtiọye ekroma na họhọre urinrin rẹ Ọrovwohwo na.”—Izikiẹl 1:27, 28.

Emramrẹ nana ra vwọ kẹ ọyinkọn Jọn vẹ ọmraro Izikiẹl na, vwẹ erọnvwọn rẹ avwanre riẹnre vwo djisẹ rẹ urinrin rẹ Jihova, Ọghẹnẹ Romekpenu na, erọnvwọn kerẹ ibioragha ri lo wrowro, aphoro, vẹ ekete. E vuẹ avwanre nẹ asan rẹ Jihova hepha na pha yoyovwin ọ vọnre vẹ erhuvwu kugbe ufuoma.

Erọnvwọn nana ra ta kpahen Ọghẹnẹ na rhọnvwephiyọ eta rẹ ọbuine na, ro vwo si: “Ọrovwohwo pha rhuarho; ke ji jiro rhuarho; a djẹ oshọ rọye nọ edjọ ri chekọ na ejobi. Kidie edjọ ri chekọ na ejobi na oma re; ẹkẹvuọvo Ọrovwohwo na re me idjuvwu. Ọghọ vẹ ọrho e hẹ obaro rọye; ogangan vẹ erhuvwu e hẹ enu rẹ ẹshẹ rọye.”—Une Rẹ Ejiro 96:4-6.

Dede nẹ Jihova yen Ọromekpenu na, o durhie avwanre nẹ e bro rhe vwọrẹ ẹrhovwo, ọ je kẹ avwanre imuẹro nẹ ọ cha kerhọ kẹ avwanre. (Une Rẹ Ejiro 65:2) Ọghẹnẹ vwo ẹguọnọ vẹ ọdavwẹ avwanre mamọ te ẹdia rẹ ọyinkọn Jọn de si nẹ, “Ọghẹnẹ hẹ ẹguọnọ.”—1 Jọn 4:8.

JESU VẸ ỌGHẸNẸ YEN HERỌ

“[Odibo Stivin] rọ vwọ vọn vẹ [“ẹwẹn ọfuanfon na,” NW] ọ da tẹrovi odjuvwu ọ da mrẹ urinrin rẹ Ọghẹnẹ na, yẹ Jesu tidia vwẹ obọrhe rẹ Ọghẹnẹ na; ọ da ta, Nighe, me mrẹ idjuvwu ri rhie phihọ, Ọmọ rẹ ohwo de tidia vwẹ obọrhe rẹ Ọghẹnẹ na.”—Iruo Rẹ Iyinkọn Na 7:55, 56.

Isun rẹ Ju rẹ Stivin ta ota kẹ na yen hwe Jesu, ọmọke krẹn vwọ wan nu, Stivin da mrẹ emramrẹ nana. Emramrẹ na djerephia nẹ Jesu herọ yerẹn re, a kpaerọ nushi re, ọ jehẹ ẹdia rode. Vwọ kpahen ọnana, ọyinkọn Pọl de si: “[Jihova] vwọ kparọ [Jesu] nẹ ughwu rhe o de vwo tidia obọrhe rọye vwẹ obo odjuvwu, ro kpenu nọ ivie ejobi kugbe isuesun ejobi kugbe ogangan ejobi kugbe ubrakpọ ejobi, rọ nọ odẹ kodẹ re se ejobi, ọ dianẹ kẹ oge nana ọvo-o ẹkẹvuọvo ji te oge rọ cha.”—Ẹfesọs 1:20, 21.

Baibol na djere fiotọ nẹ Jesu hẹ ẹdia ro kpenu, ọ je vuẹ avwanre nẹ o vwo ọdavwẹ avwanre mamọ kerẹ Jihova. Ọke rọ vwọ hẹ otọrakpọ na, Jesu sivwin ihwo, ọ je kpare i ri ghwuru vrẹn. Womarẹ ughwu rọyen, o djerephia nẹ o vwo ẹguọnọ okokodo kpahen Ọghẹnẹ vẹ ihworakpọ. (Ẹfesọs 2:4, 5) Ọ vwọ hẹ obọrhen rẹ Ọghẹnẹ na, Jesu che sun otọrakpọ na ji ku ebruphiyọ gbidiki ku ihwo ri nyẹme kẹrẹkpẹ.

EMEKASHE GBE ODIBO KẸ ỌGHẸNẸ

“[Ọmraro Daniẹl] vwo nore, a da ghan ekete phihọ etiyin ọvo rọ herọ nẹ awanre rhe de tidia evun rọye . . . uriori uriori re ga, uriori ihwe kugbe uriori ihwe mudia vwẹ obaro rọye.”—Daniẹl 7:9, 10.

Vwẹ emramrẹ rẹ odjuvwu nana, Daniẹl mrẹ emekashe buebun ọ dia ọvuọvo-o. Emramrẹ nana gberunu mamọ! Emekashe, eyen ihwo rẹ ẹwẹn re vọnre vẹ urinrin, aghwanre kugbe ẹgba. Evo ga kerẹ seraf, efa ke rha hẹ chẹrobim. Baibol na djunute emekashe vrẹ abọ 250.

Emekashe dia ihworakpọ ri ke yerin vwẹ akpọ na jovwo-o. Ọghẹnẹ ma emekashe na ọke grongron tavwen ọ ke ma ohworakpọ. Emekashe na rhiẹromrẹ ọke ra vwọ ma akpọ na, ayen de kperi vẹ aghọghọ.—Job 38:4-7.

Idjerhe ọvo emekashe vwo gbe odibo kẹ Ọghẹnẹ ọyehẹ ayen vwo vwobọ vwẹ iruo ọghanghanre re ruẹ vwẹ otọrakpọ na, rọ dia aghwoghwo rẹ iyẹnrẹn esiri rẹ Uvie rẹ Ọghẹnẹ. (Matiu 24:14) E dje iruo rayen vwẹ owian nana vwọ kẹ ọyinkọn Jọn, ro siri nẹ, “Me da mrẹ amakashe ọfa rọ rhan vwẹ uherevie rẹ odjuvwu, ọ vẹ iyẹnrẹ esiri ri bẹdẹ na ro ghwoghwo kẹ ayen otu re dia akpọ na, kẹgborho kẹgborho kugbe orua korua kugbe ephẹrẹ kephẹrẹ kugbe ohwo kohwo.” (Ẹvwọphia 14:6) Dede nẹ emekashe na ta ota kẹ ihworakpọ nonẹna kirobo ayen ruẹ vwẹ ọke awanre-e, ayen je chọn avwanre uko vwọ ghwa iyẹnrẹn esiri na rhe ihwo ri vwo omamọ rẹ ẹwẹn.

ESHU SUẸN IDUDURU RẸ IHWO GHWRẸ

“Ofovwi de rhi she vwẹ obo odjuvwu, Maekẹl [Jesu Kristi] vẹ emakashe rọye ki nene Okpodje na họnra; Okpodje na vẹ emakashe rọye je ghwa họnra, ẹkẹvuọvo e di phi ayen kua a gbe mrẹ asan vwẹ obo odjuvwu rọ gba aye-en. A da djẹ Okpodje rode na rhe otọ, ọrọdekọ rẹ awanre na, re se Idẹbono kugbe Ukọn na, ọphiẹn rẹ akpọ na ejobi—a da djẹ vẹ emakashe rọye ejobi wotọ.”—Ẹvwọphia 12:7-9.

O vwo ọke ọvo rẹ ufuoma vwọ kanre odjuvwu. Vwẹ ọtonphiyọ rẹ ikuegbe rẹ ohworakpọ, ọvo usun rẹ emekashe na da guọnọ nẹ a ga ọyen, fikirẹ ọnana, ko gbevwọso Jihova, ọ da rhe dia Eshu, ro mudiaphiyọ “Ọ rọ Vwọsua.” Emekashe efa je vwomaba vwẹ ẹvwọsuọ nana, a da rhe riẹn ayen phiyọ emekashe rẹ Idẹbono. Fikirẹ umwemwu rayen, ayen da vwọso Jihova mamọ, ji sun ihworakpọ vwẹ idjerhe rọ vwọso ọ rẹ Jihova.

Eshu vẹ emekashe rọyen pha brabra mamọ. Ayen ivwighrẹn rẹ ihworakpọ, ayen toroba ojaẹriọ rọhẹ otọrakpọ na. Kerẹ udje, Eshu yen hwe uchuru vẹ idibo rẹ Job, rọ dia ọvwata. Ọ vwẹ “odju rode” vwọ teyẹn uwevwin rẹ emọ ihwe rẹ Job hepha she, ayen de ghwu. Vwọba, Eshu da je vwẹ irubẹ re miavwan mamọ, ri ji vwo “era ri gbo ọnrhe bru Job nẹ ẹhẹrhowọ re te ekrekruyovwi rọye.”—Job 1:7-19; 2:7.

O rhe che kri-i, a cha ghwọrọ Eshu. Ọ vwọ dianẹ a djẹrẹ rhe otọrakpọ na nure na, ọ riẹnre nẹ “ọke rọye pha krẹkrẹ.” (Ẹvwọphia 12:12) Oghwọrọ yen hẹrhẹ, ọyena ghine omamọ iyẹnrẹn dẹn!

IHWO RI NẸ OTỌRAKPỌ NA RHE

“[Jesu] tan ihwo hirhe kẹ Ọghẹnẹ nẹ orua korua kugbe ephẹrẹ kugbe ihwo kugbe ẹgborho, ọ da vwẹ ayen ru uvie kugbe irherẹn kẹ Ọghẹnẹ rẹ avwanre, kẹ ayen cha re vwẹ akpọ na.”—Ẹvwọphia 5:9, 10.

Kirobo ra kpare Jesu nẹ akpọ kpo odjuvwu na, ọtiọyen a je cha kpare ihwo evo kpo odjuvwu. Jesu da vuẹ iyinkọn rọyen: “Me ra rhuẹrẹ asan kẹ ovwan . . . , mi ji rhivwi cha cha reyọ ovwan kẹ oma mẹ, rere asan re me epha ovwan je dia etiyin rhe.”—Jọn 14:2, 3.

O vwo oboresorọ ihwo nana vwo kpo odjuvwu. Ayen cha vwomaba Jesu vwẹ usuon rẹ Uvie na ro che sun otọrakpọ na ejobi, je ghwa ebruba rhe ihwo eje re cha dia akpọ na. Ọnana yen Uvie rẹ Jesu vuẹ idibo rọyen nẹ ayen nẹrhovwo kpahen vwẹ ẹrhovwo rẹ udje na: “Ọsẹ rẹ avwanre rọ hẹ obo odjuvwu, Jẹn avwanre vwẹ ọghọ kẹ odẹ wẹn. Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.”—Matiu 6:9, 10.

OBORẸ IHWO RI CHE KPO ODJUVWU NA CHE RU

“Mi [ọyinkọn Jọn] de nyo urhuru rode ọvo ro nẹ obo ekete na rhe tanẹ, Nighe, Ọghẹnẹ rhe bọn uwevwi rọye kugbe ihwo rẹ akpọ. . . . Ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a, kidie emu rẹ awanre na wanvrẹn nure.”—Ẹvwọphia 21:3, 4.

Emramrẹ nana eje rionbọ kpo ọke rẹ Uvie rẹ Ọghẹnẹ, rẹ Jesu vẹ ihwo ra kpare nẹ akpọ na kpo odjuvwu che sun na, cha vwọ ghwọrọ usuon rẹ Eshu ji ru akpọ na phiyọ iparadaisi. Erọnvwọn eje re so ọmiaovwẹ vẹ odjadja kẹ ihworakpọ rha cha dia-a. Ughwu dede ji che no.

Kẹ, oduduru rẹ ihwo ri ghwuru jẹ a cha kpare ayen nẹ ushi kpo odjuvwu-u na vwo? Vwẹ ọke rọ cha na, a cha kpare ayen rhe otọrakpọ na vwẹ Iparadaisi vẹ iphiẹrophiyọ rẹ arhọ rẹ bẹdẹ bẹdẹ.—Luk 23:43.