UYOVWINROTA RẸ ỌBE NA | EMRAMRẸ RI SHEKPAHEN ODJUVWU
Enọ Kpahen Ihwo Rẹ Ẹwẹn Vẹ Asan Rẹ Ayen Dia
Wo roro kpahen ihwo rẹ ẹwẹn vẹ asan rẹ ayen dia dẹvure? Ọ da dia ọtiọyen, riẹn nẹ ọ diẹ owẹ ọvo-o. Ikpe uriorin buebun re, ọyen ihwo vwo roro kpahọn. Ihwo evo vwo imuẹro nẹ esẹ ride avwanre ri ghwure yen dia asan rẹ ihwo rẹ ẹwẹn hepha, o ji fo nẹ e muọghọ kẹ ayen. Efa vwẹ ẹro roro nẹ ọyen asan rẹ ufuoma, rọ hepha dọe, re se odjuvwu; emamọ ihwo ri ghwure vẹ emekashe yen dia oboyin. Efa je herọ ri roro nẹ ọnana asan rẹ eghene buebun dia.
Ihwo buebun je tanẹ a cha sa riẹn emu vuọvo kpahen odjuvwu-u kidie o ji vwo ohwo ro nẹ oboyin rhe rọ sa vuẹ avwanre kpahọ-ọn. Ọyena ororochọ. Jesu Kristi ka dia odjuvwu jovwo, asan rẹ ihwo rẹ ẹwẹn hepha, ọ ke rhe otọrakpọ na. Ọ tarọ phephẹn vwọ kẹ ilori ẹga rẹ ẹgbukpe ujorin ẹsosuọ nẹ, “Mi nẹ obo odjuvwu rhe, rhi ru ọhọre mẹ-ẹ, ẹkẹvuọvo ọhọre rẹ ọ ro ji vwe rhe.” Ọtiọyena, oborẹ Jesu rhiẹromrẹ ọyen ọ vuẹ iyinkọn rọyen, rọ vwọ ta: “Vwẹ uwevwi rẹ Ọsẹ mẹ ivun buebu herọ.”—Jọn 6:38; 14:2.
Ọghẹnẹ yehẹ Ọsẹ rẹ Jesu, odẹ rọyen Jihova. Odjuvwu ọyen “uwevwi” rẹ Jihova hepha. (Une Rẹ Ejiro 83:18) Ọtiọyena, o rhe vwo ohwo vuọvo ro se djisẹ rẹ odjuvwu vwọ vrẹ Jihova Ọghẹnẹ vẹ Jesu Kristi-i. Ayen vwẹ evuẹ buebun phia kpahen odjuvwu womarẹ emramrẹ rẹ ayen vwọ kẹ ihwo re fuevun vwẹ ọke awanre.
Uyovwinrota rọ vwọ kpahen ọnana djekpahen ẹkpo rẹ Baibol sansan ri djisẹ rẹ oborẹ ihwo mrẹre vwẹ emramrẹ buebun. Wọ vwọ fuẹrẹn emramrẹ nana, karophiyọ nẹ odjuvwu fẹnẹ otọrakpọ na, ro vwo erọnvwọn ra mrẹ yẹrẹ djobọte. Ọtiọyena, Ọghẹnẹ da vwẹ eta rẹ avwanre se vwo ẹruọ rọyen vwo djisẹ rẹ odjuvwu ukperẹ ọ vwọ vwẹ eta rẹ emekashe ọvo se vwo ẹruọ rọyen vwo dje. Emramrẹ nana cha chọn wẹ uko vwọ riẹn ihwo re dia “ivun buebu” rehẹ odjuvwu na.