Akpeyeren mẹ braphiyọ braphiyọ

AKPỌ MI YERIN JOVWO:

Ekogho ra riẹn phiyọ asan rẹ inogbozighi vọnre ra da je reyọ ihuvwun egangan mamọ vwẹ Los Angeles, California, U.S.A. yen a da yọnrọn ovwẹ ghwanre. Emọ esan yen ọsẹ vẹ oni mẹ vwiẹre, mẹvwẹ yen ọmọ rivẹ vwẹ usun rẹ ayen.

Oni mẹ yọnrọn avwanre ghwanre vwẹ ishọshi rẹ ẹvanjẹlizim. Ẹkẹvuọvo, ọke me vwọ hẹ eghene, akpeyeren rẹ aro ivẹ yen mi yerẹn. Me vwomaba ikuaya rẹ ishọshi na vwọ sune vwẹ ẹdidjana rode. Vwẹ ẹdẹ ichekọ vwẹ udughwrẹn na, mi kpo ipati, reyọ ihuvwun ji gbe ọfanrhiẹn.

Ophu ri djọghrọ djọghrọ mu vwe mamọ. Kemu kemu re me mrẹre yen me vwọ họnra. Oborẹ mi yonori vwẹ ishọshi chọn vwẹ uko-o. Ke me ta, “Ihriẹriọ ọ rẹ Ọrovwohwo—mẹvwẹ yen ekuakua rẹ ohọnre rọyen!” Me vwọ hẹ isikuru rode vwẹ ikpe re kpahen 1960, Ẹko rẹ oseghe rẹ usuon re se Black Panther ra riẹn phiyọ ẹko rọ vwẹ ohohọnre vwọ kpahanphiyọ eta ri shekpahen uturhi rẹ ohwo de rhi je vwe. Me da vwomaba ukoko rẹ emọ rẹ isikuru ri titi uturhi romobọ. Avwanre nudje vwẹ ọke sansan, ọkieje yen udje na vwọ nẹrhẹ a kanre isikuru vwọrẹ ọmọke.

Ọ họhọre nẹ udje sa nẹrhẹ uruemu rẹ ozighi mẹ na kpotọ-ọ. Imwemwu re ruẹ fikirẹ utuoma keyen mi vwobọ vwọ. Kerẹ udje, vwẹ ẹdẹ ọvo mẹ vẹ igbeyan mẹ de ni ifimu ro shekpahen oja rẹ ihwo rẹ America vwọ re eviẹn ri nẹ Africa rhe. Fikirẹ orhiẹn ehuhu yena, avwanre ki tuẹn ehwe rẹ ighene re dia ihwo efuanfon phiyọ vwẹ isinima na. Avwanre de ji kpo ekogho rẹ ihwo efuanfon hepha, rẹ avwanre vwọ guọnọ ihwo avwanre che hwe.

Mẹ vẹ iniọvo mẹ evo nabọ gbe ozighi mamọ ọke me vwọ joma te ẹgbukpe 20 re. Avwanre gbevwọso usuon. Oniọvo mẹ otete ọvo hẹ ẹko rẹ emọ ri gbe ozighi ro titiri mamọ, me je vwomaba ayen. Akpeyeren mẹ kọ rhoma braphiyọ.

OBORẸ BAIBOL NA VWO WENE AKPEYEREN MẸ:

Ọsẹ vẹ oni rẹ ugbeyan mẹ ọvo Iseri ri Jihova. Ayen durhie uvwe kpo omẹvwa rayen, mi de rhiabọreyọ edurhie na. Ghwe vwo nẹ ọtonphiyọ, me ghwa mrẹ oborẹ Iseri na vwọ fẹnẹ ihwo efa. Ayen ihwo eje vwo Baibol na, ayen ji rhie vwẹ omẹvwa na. A tobọ ghare eta vwọ kẹ ighene vwẹ uyono na! Oma vwerhen ovwẹ me vwọ riẹn nẹ Ọghẹnẹ vwo odẹ re se Jihova, mi ji nyo ihwo re reyọ vwo se. (Une Rẹ Ejiro 83:18) Ihwo ri nẹ ẹkuotọ sansan rhe yehẹ evunrẹ ukoko na, ẹkẹvuọvo ayen fẹnẹ ohwohwo-o.

Ẹsosuọ, me guọnọ nene Iseri na yono Baibol na-a, dedena omẹvwa rayen je vwe. Ason ọvo, me vwọ hẹ omẹvwa rẹ Iseri ri Jihova, ẹko rẹ igbeyan mẹ evo de kpo isho. Etiyin yen ayen de hwe eghene ọvo ghwu kidie ọ rhọnvwe kẹ ayen ijakẹti rọyen ra vwẹ ophiẹ vwo ru-u. Ẹdẹ rọ vwọ kpahọn, ayen da vwẹ ohwo rẹ ayen hweri na vwọ yeya. Ayen nama roro nẹ oborẹ ayen ruru na brare-e. Re vwo mu ayen kpo aguare, e de brorhiẹn hwe evo usun rayen nẹ ayen cha dia ẹkanrọ te ẹdẹ ughwu. Vwọrẹ uyota, oma vwerhen ovwẹ nẹ me vẹ ayen yan usun vwẹ ason yena-a. Mi de brorhiẹn mi vwo wene akpeyeren mẹ ji tuẹn uyono ri Baibol phiyọ.

Ọ vwọ dianẹ mi yerẹn akpọ ra da fẹnẹ ihwo jovwo, me da rhe mrẹ obo ri gbevwunu vwẹ oma rẹ Iseri na. Kerẹ udje, ọke Oseri ọvo rọ dia oyibo vwo kpo asan, ọ da yanjẹ emọ rọyen vwo vwọ kẹ orua ọfa re dia ihwo ibiebi. Vwọba, orua rẹ oyibo ọvo da reyọ eghene ọvo rọ dia ohwo obiebi rọ guọnọ asan rọ cha dia phiyọ uwevwin rayen. O de rhi muvwẹro nẹ Iseri ri Jihova yen ghini ruẹ nene eta ri Jesu rọ tare vwẹ Jọn 13:35: “Vwẹ oma rẹ ọnana kọye ihwo ejobi vwọ riẹn nẹ ovwan ghine idibo mẹ, ọ da dianẹ ovwan guọnọ ohwohwo.” O muvwẹro nẹ me ghene mrẹ obọdẹn rẹ iniọvo re.

Womarẹ uyono ri Baibol na, me da rhe mrẹvughe nẹ ofori nẹ mi wene iroro mẹ. Mi de rhi wene iroro mẹ, ọ dianẹ mi vwo vwo ufuoma ọvo-o, ẹkẹvuọvo ji vwo ọmrẹvughe nẹ ọnana yen omamọ rẹ akpeyeren (Rom 12:2) Ememerha na, me da yan obaro. Vwẹ January 1974, mi de bromaphiyame kerẹ Oseri ri Jihova.

Me vwọ tobọ bromaphiyame nu, me je wian kpahen ophu ri djọghrọ djọghrọ mẹ na. Kerẹ udje, o vwo ọke ọvo me vwọ hẹ iruo rẹ nuwevwin kpo uwevwin, me da vwọ tua oji ọvo ro cho iredio rọhẹ imoto mẹ. Mi vwo siẹkẹrẹ oji na re, o de do iredio na phiyotọ ọ da djẹ. Me vwọ vuẹ ihwo me vẹ ayen gba hẹ iruo aghwoghwo na kpahen oborẹ me vwọ reyọ iredio mẹ rhivwin, ọkpako ọvo vwẹ ẹko na da nọ vwẹ, “Stephen, ọ da dianẹ wọ yọnrọn oji na, die yen wo rhe ru?” Onọ yena nẹrhẹ mi roro iroro ji mu uvwe vwọ wian kpahen oborẹ me sa vwọ dia ohwo rẹ ufuoma phiyọ.

Vwẹ October 1974, me da tuẹn iruo ẹga ọkieje phiyọ, inọke 100 yen me ghwọrọ vwo yono ihwo Baibol na kemeranvwe kemeranvwe. Ọke vwọ yanran na, mi de vwo uphẹn me vwọ vwomakpahotọ vwẹ esiri rẹ ukoko rẹ Iseri ri Jihova vwẹ Brooklyn, New York. Vwẹ 1978, me de rhivwin kpo Los Angeles ra vwẹrote oni mẹ rọ muọga. Ẹgbukpe ivẹ vwọ wan nu, me da rọvwọn aye mẹ ọghanghanre, Aarhonda. O ghini bicha vwẹ ọke oni mẹ vwọ muọga rhi te ọke oni mẹ vwo ghwu. Ọke vwọ yanran na, me vẹ Aarhonda de kpo Isikuru ri Gilead, e de ji avwanre kpo Panama, asan rẹ avwanre da ga kerẹ imishọnare.

Rhanvwẹ ọke mi vwo bromaphiyame, mi rhiẹromrẹ erọnvwọn re sa nẹrhẹ mi muophu djọghrọ djọghrọ. Mi yono obo me sa vwọ kẹnoma kẹ ihwo re guọnọ kpare ovwẹ ophu, me je davwẹngba vwo fuẹn ẹdia na. Ihwo buebun ji te aye mẹ jiri uvwe kpahen oborẹ me rhuẹrẹ ẹdia nana eje phiyọ wan. Ọ tobọ gbevwunu dede! Ọ dia ẹgba romobọ mẹ mi vwo ru ewene nana-a. Ukperẹ ọtiọyen, o muvwẹro dẹn nẹ ẹgba rẹ Ota rẹ Ọghẹnẹ rọ dia Baibol na yen nẹrhẹ mi se ru ewene nana.—Hibru 4:12.

ERERE ME MRẸRE:

Baibol na nẹrhẹ akpeyeren mẹ vwo otọ, o ji yono uvwe obo me sa vwọ ghene dia ohwo rẹ ufuoma. Mi gbi hwe ihwo-o, ukperẹ ọtiọyen ke me vwẹ ukẹcha vwọ kẹ ayen vwọ riẹn uyota na. Me tobọ reyọ Baibol na vwo yono ohwo rọ dia ọvweghrẹn mẹ vwẹ isikuru jovwo! Ro vwo bromaphiyame nu, uwevwin vuọvo kọyen avwanre ihwo ivẹ na diare vwẹ ọmọke. Rhi te ọke nana, avwanre ihwo ivẹ na jẹ igbeyan. Asaọkiephana, me vẹ aye mẹ chọn ihwo re vrẹ 80 uko vwọ dia Iseri ri Jihova womarẹ avwanre vwọ reyọ Baibol na vwo yono ayen.

Me kpẹvwẹ Jihova rọ nẹrhẹ akpeyeren mẹ vwo otọ rọ je nẹrhẹ mi vwo omavwerhovwẹn vwẹ uvwre rẹ iniọvo akpọeje.