ẸKPAHỌNPHIYỌ RẸ ENỌ RẸ BAIBOL NA
E se vwo ghovwo imwemwu rẹ avwanre?
Re vwo ru obo ri je Ọghẹnẹ ghwa gan nọ-ọ
Kirobo rẹ Baibol na tare, ihworakpọ eje irumwemwu. Avwanre riuku rẹ umwemwu mie ọshare rẹsosuọ na, Adam. Jẹ ọkievo, avwanre sa viẹ diekpọvwẹ kpahẹn oruchọ evo rẹ avwanre ruru. Ọmọ rẹ Ọghẹnẹ Jesu Kristi, hwosa rẹ umwemwu rẹ avwanre womarẹ ughwu rọyen. Ughwu rẹ ọtanhirhe rọyen nẹrhẹ uphẹn rẹ evwoghovwo rhiephiyọ kẹ avwanre. Ọnana okẹ ro nẹ obọ rẹ Ọghẹnẹ rhe.—Se Rom 3:23, 24.
Ihwo evo ru imwemwu egangan kẹ ayen vwẹ ẹwẹn roro sẹ Ọghẹnẹ se vwo ghovwo ayen. Ọ vwerhoma nẹ Baibol na tare nẹ, “ọbara ri Jesu Ọmọ rọye . . . hworhẹ avwanre nẹ umwemwu ejobi.” (1 Jọn 1:7) Avwanre de kurhẹrhiẹ nẹ otọ rẹ ẹwẹn rhe, Jihova muegbe rọ vwọ reyọ vwo ghovwo imwemwu egangan dede.—Se Aizaya 1:18.
Die yen ofori nẹ e ru a sa vwọ mrẹ evwoghovwo?
Avwanre da guọnọ nẹ Jihova vwo ghovwo avwanre, ofori nẹ e yono kpahọn je riẹn idjerhe rọyen, odjekẹ rọyen kugbe obo rọ guọnọ mie avwanre. (Jọn 17:3) Jihova reyọ vwo ghovwo ihwo ri kurhẹrhiẹ nẹ imwemwu rayen ji ru ewene.—Se Iruo Rẹ Iyinkọn Na 3:19.
Re vwo ru obo ri je Ọghẹnẹ ghwa gan nọ-ọ. Jihova vwo ẹruọ rẹ ovwiẹrẹ rẹ avwanre. Ọyen ohwo vẹ erorokẹ kugbe aruẹdọn. Uruemu esiri rọyen na rha nẹrhẹ wo vwo ẹwẹn wo vwo yono kpahen obo re vwerhọn oma?—Se Une Rẹ Ejiro 103:13, 14.