Riẹn Ẹdia ri Jesu Vwẹ Ọrhuẹrẹphiyotọ rẹ Ọghẹnẹ

“NẸ OTỌ rhe Ọghẹnẹ vwọ ma odjuvwu vẹ akpọ,” kemu kemu rọ mare na “[yovwiri] gangan.” (Jẹn. 1:1, 31) Jihova ma ihworakpọ vẹ omamọ iphiẹrophiyọ kpahen obaro na. Ẹkẹvuọvo, ẹvwọsua rọ vwomaphia vwẹ Idẹn gbowọphiyọ omavwerhovwẹn rẹ ohworakpọ vwẹ ọmọke. Dedena, ọhọre ri Jihova vwọ kẹ otọrakpọ na vẹ ihworakpọ ji rhi wene-e. Ọghẹnẹ djerephia nẹ usivwin cha dia vwọ kẹ emọ rẹ Adam ri nyẹme. A cha rhoma vwẹ ẹga rẹ uyota vwo mu, Ọghẹnẹ kọ cha ghwọrọ ohwo umwemwu na vẹ iruo rọyen eje. (Jẹn. 3:15) Erọnvwọn eje cha rhoma dia “[yoyovwin] gangan.” Jihova che ru ọnana womarẹ ọmọ rọyen, Jesu Kristi. (1 Jọn 3:8) Ọtiọyena, ọ pha ghanghanre ra vwọ mrẹ ẹdia rẹ Jesu hepha vwẹ ọrhuẹrẹphiyotọ rẹ Ọghẹnẹ.—Iruo 4:12; Fil. 2:9, 11.

ẸDIA RẸ JESU HEPHA

² E de roro kpahen ẹdia rẹ Jesu hepha vwẹ ọrhuẹrẹphiyotọ rẹ Ọghẹnẹ, a cha mrẹvughe nẹ ẹdia rọyen pha buebun. Jesu ọyen Osivwin rẹ ihworakpọ, Orherẹn Rode, Ọgbuyovwin rẹ Ukoko rẹ Inenikristi, kugbe Ovie rẹ Uvie rẹ Ọghẹnẹ asaọkiephana. E de roro kpahen ẹdia nana eje, ọ cha nẹrhẹ ọdavwaro re vwo kpahen ọrhuẹrẹphiyotọ rẹ Ọghẹnẹ ganphiyọ, ọ je cha nẹrhẹ ẹguọnọ re vwo kpahen Jesu Kristi kodophiyọ. Baibol na djisẹ rẹ ẹdia nana evo.

³ Ọke rẹ Jesu vwọ hẹ otọrakpọ na, ọ da rhe dia phephẹn nẹ ihworakpọ vẹ Ọghẹnẹ sa rhoma rhuẹrẹkugbe womarẹ Jesu. (Jọn 14:6) Jesu yen Osivwin rẹ ihworakpọ kọyensorọ ọ vwọ vwẹ oma rọyen kpahotọ vwọ tan ihwo buebun hirhe. (Mat. 20:28) Ọtiọyena, Jesu ru vrẹ ra vwọ dia udje rẹ omamọ uruemu. Ọyehẹ ohwo rẹ Ọghẹnẹ che vwo ru ọhọre rọyen gba vwọ kẹ ihworakpọ. Ọyen ọvo yen sa nẹrhẹ a rhoma mrẹ aroesiri rẹ Ọghẹnẹ. (Iruo 5:31; 2 Kọr. 5:18, 19) Ughwu ri Jesu vẹ evrẹnushi rọyen yen rhie idjerhe phiyọ vwọ kẹ ihworakpọ ri nyẹme rere ayen vwo rhiẹromrẹ ebruphiyọ ri bẹdẹ vwẹ otọ rẹ usuon rẹ Uvie rẹ Ọghẹnẹ.

⁴ Jesu, ọyen Orherẹn Rode rọ riẹn “ọdavwẹ rẹ avwanre,” rọ je tan idibo rọyen rehẹ otọrakpọ na vwo nẹ umwemwu. Ọyinkọn Pọl da ta: “Avwanre vwo orherẹn rode ro jẹ ọdavwẹ rẹ avwanre ẹriẹ-ẹn, ẹkẹvuọvo ọ rẹ avwanre vwori na je vwẹ ohwo ra davwini dẹvure kerẹ ekpuyovwi rẹ avwanre, yo ru umwemwu-u.” Pọl de jiro kẹ ihwo ri vwo esegbuyota kpahen Jesu Kristi nẹ ayen rhiabọreyọ ọrhuẹrẹphiyotọ nana, ayen vẹ Ọghẹnẹ sa vwọ rhuẹrẹkugbe, rọ vwọ ta: “E gbe jẹ avwanre sikẹre ekete rẹ ẹserọphẹ na vẹ ẹroẹvwọsuọ, rere avwanre mrẹ arodọvwẹ reyọ kugbe ẹserọphẹ rọ cha avwanre uko vwẹ ọke rẹ ọbẹnvwẹ.”—Hib. 4:14-16; 1 Jọn 2:2.

⁵ Jesu, ọyen Ọgbuyovwin rẹ Ukoko rẹ Inenikristi na. Kerẹ idibo rọyen rẹ ẹgbukpe ujorin rẹsosuọ, nonẹna, avwanre je guọnọ osun rọ dia ohworakpọ-ọ. Jesu reyọ odjekẹ vwọphia womarẹ ẹwẹn ọfuanfon na kugbe ekpako re cha niyẹnrẹn vwọ kẹ vẹ Ọsẹ rọyen kpahen oborẹ ayen vwẹrote uchuru rẹ Ọghẹnẹ wan. (Hib. 13:17; 1 Pita 5:2, 3) Jihova vwọ ta ota kpahen Jesu vwọrẹ aroẹmrẹ, ọ da ta: “Nighere, Mi vwi ro se oseri kẹ ihwo na, Osun kugbe onotu vwọ kẹ ihwo ejobi.” (Aiz. 55:4) Jesu ru orugba rẹ aroẹmrẹ nana ọke rọ vwọ vuẹ idibo rọyen: “We jẹ ohwo se ovwan onini-i: Kidie ohwo ọvo ọye hẹ onini rẹ ovwan, ohwo yena hẹ Kristi.”—Mat. 23:10.

⁶ Jesu dje iroro nana phia vẹ owenvwe rọ vwọ chọn avwanre uko ọke ro vwo durhie avwanre: “Bru vwe rhe ihwo rẹ owian kugbe oghwa bẹn, Me kẹ ufuoma. Mu urhekpe mẹ ghwa re wo yono uruemu mẹ; kidie me pha vworovworo fuefu vwẹ udu mẹ, ke wọ mrẹ ufuoma vwọ kẹ erhi wẹn. Kidie urhekpe mẹ pha frae, oghwa mẹ ọ phapharhe.” (Mat. 11:28-30) Jesu sun ukoko na dẹndẹn vwẹ idjerhe ihwo de vwo urovwoma, ọ vwẹ idjerhe nana vwo dje oma rọyen kerẹ “osuigegede rẹ esiri” vwọrẹ ẹroevwokere rẹ Ọsẹ rọyen, Jihova.—Jọn 10:11; Aiz. 40:11.

⁷ Vwẹ ileta rẹsosuọ rẹ Pọl si vwo rhe ihwo ri Kọrẹnt, o de dje ẹdia ọfa rẹ Jesu hepha vwẹ eta nana: “Kidie ọ re rhiri bẹsiẹ rọ vwọ vwẹ ivwighrẹ rọye hwa otọ kẹ chiyi. Ọke ra da vwẹ emu na ejobi hwa otọ kẹ chiyi nu, ekpuyovwi rẹ Ọmọ na kọ je vwẹ oma kpotọ kẹ ohwo rọ vwẹ emu na ejobi hwa otọ kẹ chiyi na, rere Ọghẹnẹ vwọ dia kemu kemu kẹ ohwo ọvuọvo.” (1 Kọr. 15:25, 28) Tavwen Jesu ke rhe akpọ na, ọ ka dia “onotu rẹ ọwena” vwọ kẹ Ọghẹnẹ, ọyehẹ emama rẹsosuọ rẹ Ọghẹnẹ mare eje. (Isẹ 8:22-31) Ọke rẹ Ọghẹnẹ vwo ji Jesu rhe akpọ na, o ru ọhọre rẹ Ọghẹnẹ ọkieje. O chirakon te oba, ji fuevun kẹ Ọsẹ rọyen te ẹdia rẹ ughwu. (Jọn 4:34; 15:10) Kidie nẹ Jesu fuevun te ẹdia rẹ ughwu, Ọghẹnẹ da kparọ nushi vwo kpo odjuvwu je reyọ vwo mu Ovie rẹ Uvie rẹ odjuvwu na. (Iruo 2:32-36) Ọtiọyena, Ọghẹnẹ da vwẹ iruo rode vwọ kẹ Jesu Kristi ro vwo sun emekashe buebun vwo si usuon rẹ ihworakpọ vẹ imwemwu ejobi vwo nẹ akpọ na. (Isẹ 2:21, 22; 2 Tẹsa. 1:6-9; Ẹvwọ. 19:11-21; 20:1-3) Ọke yena, Uvie rẹ Ọghẹnẹ rẹ Jesu dia Ovie rọyen kọyen ọvo cha dia usuon ro che sun akpọneje.—Ẹvwọ. 11:15.

OBORẸ ỌMRẸVUGHE RẸ ẸDIA RỌYEN NA MUDIAPHIYỌ

⁸ Jesu Kristi rọ dia oniru rẹ avwanre na pha gbagba. A vwẹ iruo rẹ ẹroevwote rẹ avwanre vwọ kẹ. A ke sa mrẹ erere vwo nẹ ẹroevwote rọyen, ofori nẹ a fuevun kẹ Jihova je yan nene ukoko rọyen kpẹkpẹkpẹ.

⁹ Idibo ri Jesu vwẹ ẹgbukpe ujorin rẹsosuọ nabọ mrẹ ẹdia rẹ Jesu hepha vughe vwẹ ọrhuẹrẹphiyotọ rẹ Ọghẹnẹ. Ayen dje ọnana phia rẹ ayen vwọ wiankugbe vwẹ otọ rẹ usuon ri Jesu, je vwomakpotọ vwọ kẹ odjekẹ rọyen womarẹ ẹwẹn ọfuanfon na. (Iruo 15:12-21) Ọyinkọn Pọl djunute oyerinkugbe rẹ ukoko rẹ Inenikristi ra jẹreyọ na ọke ro vwo si: “Ta uyota na vwẹ ẹguọnọ, avwanre ke rho bro ra vwẹ idjerhe kidjerhe re te ohwo na rọ hẹ uyovwi na, re te Kristi, oma rọye ọye oma na ejobi, da tan kugbe a da rhuọ kugbe vwẹ uriẹn kuriẹn ejobi ra vwọ kẹ, ọke rẹ abọ ọvuọvo de ru iruo yoyovwi re, oma na kọ riẹn rhua ọ me rhe bọn oma rọye phihọ ẹguọnọ.”—Ẹfe. 4:15, 16.

¹⁰ Iniọvo rehẹ ukoko na da wiankuẹgbe vwẹ otọ rẹ usuon ri Jesu, ke che rhiẹromrẹ ẹyan obaro, vẹ ẹguọnọ, rọ dia “ufi ro churu ihwo kugbe.”—Jọn 10:16; Kọl. 3:14; 1 Kọr. 12:14-26.

¹¹ Kirobo rẹ Baibol na mraro rọyen, erọnvwọn re phia nonẹna djerephia nẹ a vwẹ ogangan rẹ usuon vwọ kẹ Jesu Kristi rhanvwẹ 1914. O suẹn vwẹ ohri rẹ ivwighrẹn rọyen asaọkiephana. (Une 2:1-12; 110:1, 2) Die yen ọnana mudiaphiyọ vwọ kẹ ihwo re dia otọrakpọ na nonẹna? O rhe che kri-i, Jesu ko che dje ẹgba rọyen phia kerẹ Ovie rẹ ivie kugbe Ọrovwori rẹ irivwori ọke rọ cha vwọ ghwọrọ ivwighrẹn rọyen. (Ẹvwọ. 11:15; 12:10; 19:16) Ọke yena, ive rẹ usivwin rẹ Jihova veri vwẹ ọtonphiyọ rẹ ẹvwọsuọ rẹ ohworakpọ ko che rugba vwọ kẹ ihwo ri che rhiẹromrẹ aroesiri ri Jesu. (Mat. 25:34) Ọnana emu rẹ aghọghọ ra vwọ mrẹ ẹdia rẹ Jesu hepha vughe vwẹ ọrhuẹrẹphiyotọ rẹ Ọghẹnẹ! E jẹ avwanre kuomakugbe vwo ruiruo rẹ ẹga na vwẹ akpọneje vwẹ otọ rẹ usuọn ri Jesu vwẹ ẹdẹ re koba na.