ẸBẸRE 6
Job Yọnregan
Eshu nọ enọ kpahen ọyọnregan ri Job vwẹ obaro Ọghẹnẹ, ẹkẹvuọvo Job fuevun kẹ Jihova
OHWORAKPỌ sa fuevun kẹ Ọghẹnẹ siẹrẹ a da davwọni, ọ da tobọ dianẹ o che fiabọ rẹ ekuakua rẹ akpeyeren? A nọ onọ yena, je mrẹ ẹkpahọnphiyọ rọyen womarẹ ọshare ọvo re se Job.
Ọke rẹ emọ rẹ Izrẹl je vwọ hẹ Ijipt, Job dia asan re se Arabia nonẹna. Job vẹ Ebraham firi. Vwẹ ọke yena, Ọghẹnẹ vẹ emekashe na da vwoma vwẹ odjuvwu, Eshu jehẹ usun rayen. Vwẹ omẹvwa yena, Jihova djephia nẹ o vwo uduefiogbere kpahen evun-ẹfuọn rẹ odibo rọyen Job. Vwọrẹ uyota, Jihova tare nẹ o vwo ohwo vuọvo rẹ ọyọnregan rọyen gan te ọ rẹ Job vwori-i. Ẹkẹvuọvo Eshu tare nẹ Job ga Ọghẹnẹ kidie nẹ Ọghẹnẹ bruba kẹ, je sẹro rọyen. Eshu nẹ e de mie Job ekuakua ro vwori eje, ọ cha hanrhe Ọghẹnẹ.
Ọghẹnẹ da vwẹ uphẹn kẹ Eshu nẹ ọ reyọ efe, emọ kugbe omakpokpọ ri Job mie. Job riẹnre nẹ Eshu yen so ọdavwini na-a, ọtiọyena, o rhe se vwo ẹruọ rẹ oboresorọ Ọghẹnẹ vwọ vwẹ uphẹn kẹ nẹ ọ rioja-a. Dedena, Job hanrhe Ọghẹnẹ-ẹ.
Erharhe igbeyan erha ri Job de bro rhe. Vwẹ eta rẹ ayen tare re si phiyọ ọbe ri Job, igbeyan rọyen na guọnọre nẹ Job roro nẹ Ọghẹnẹ yen vwẹ oja vwọ riọ fikirẹ umwemwu ro ruru vwẹ odjahọn. Ayen je tanẹ Ọghẹnẹ vwo omavwerhovwẹn kpahen idibo rọye-en, ọ je vwẹroso aye-en. Job sen iroro ọchọchọ rayen na. Vẹ imuẹro, Job tare nẹ ọ cha yọnregan re te ọke rẹ ughwu rọyen!
Ẹkẹvuọvo Job dje oma rọyen phiyọ ọvwata. Ọyena ororochọ. Eghene re se Elihu rọ kerhọ rẹ eta rayen, da rhe tota. Elihu ghwọku Job, kidie Job mrẹ Jihova Ọghẹnẹ kerẹ Osun rọ rho vrẹ ihworakpọ-ọ. Elihu je ghwọku erharhe igbeyan ri Job na.
Jihova Ọghẹnẹ da tota kẹ Job, rọ vwọ kpọ iroro rọyen vi. Womarẹ igbunu rẹ emama, Jihova yono Job oborẹ ihworakpọ hanvwe te siẹrẹ a da vwẹ ayen vwọ vwanvwen ọrho rẹ Ọghẹnẹ. Job reyọ ọkpọvi ro nẹ obọ rẹ Ọghẹnẹ rhe na. Jihova, rọ vọnre vẹ “arodọvwẹ” na da nẹrhẹ Job vwo omakpokpọ, o de rhi fe ọhwọhwọ ivẹ vrẹ obo ri jovwo, o de ji vwiẹ emọ ihwe. (Jems 5:11) Kidie nẹ Job yọnregan ọke ravwọ davwọni, kọ sa kpahenphiyọ ota rẹ Eshu ta kẹ Ọghẹnẹ, rọvwọ tanẹ ihworakpọ cha sa fuevun ga Ọghẹnẹ siẹrẹ ayen de hirharoku ọdavwini-i.
—E muro kpahen ọbe ri Job.