ẸBẸRE 7
Ọghẹnẹ Sivwin Emọ rẹ Izrẹl Vwo nẹ Eviẹn
Jihova reyọ ọtiekọ vwọ ghwiẹ Ijipt, Mosis de sun emọ rẹ Izrẹl vwo nẹ otọ rẹ Ijipt. Ọghẹnẹ vwẹ Urhi vwọkẹ emọ rẹ Izrẹl womarẹ Mosis
VWẸ ikpe buebun rẹ emọ Izrẹl dia otọ rẹ Ijipt, akpọ yovwẹn ayen, ayen ji bunphiyọ. Ẹkẹvuọvo, a da rhe vwẹ Fero kpokpọ vwo mu. Fero nana vughe Josẹf kakaka-a. Oshọ mu osun nana rọ djoma na kidie emọ rẹ Izrẹl na buẹnphiyọ, ọ da vwẹ ayen ru eviẹn, ọ da je vwẹ urhi mu nẹ e do emeshare re ghwe vwiẹ phiyọ Urhie ri Nile. Ẹkẹvuọvo aye ọvo de fiudugberi sivwin ọmọ rọyen. O muro phiyọ akpẹrẹ o de re sionu vwẹ ẹgo rẹ urhie na. Ọmọtẹ ri Fero da mrẹ ọmọ na, o de se Mosis, ọ da ghẹrẹ ghwanre vwẹ uwevwin rẹ ovie rẹ Ijipt.
Mosis vwo te ẹgbukpe 40, ko rhi she ro okpetu ọke rọ vwọ chochọ rẹ ohwo rẹ Izrẹl ọvo vwo nẹ obọ rẹ ohwo rẹ Ijipt. Mosis da djẹ kpo ẹkuotọ oshesheri ọvo. Ro vwo te ẹgbukpe 80, Jihova da vuẹ nẹ o rhivwin kpo Ijipt, ọ ra vuẹ Fero nẹ o siobọnu ihwo rọyen.
Fero senre kare kare. Ọghẹnẹ da reyọ ọtiekọ ihwe vwọ ghwiẹ Ijipt. Kọke kọke ri Mosis da vwomaphia vwẹ obaro ri Fero rere o vwo sivwon nẹ ọtiekọ ọfa rọ cha, Fero mi ru uyovwin gangan rọ vwọ jẹ Mosis vẹ Jihova fia. Ukuotọ rọyen, ọtiekọ rihwe na de hwe emọ ekpako rẹ ihwo rẹ Ijipt, jokparẹ erua ri nyupho ri Jihova re vwẹ ọbara rẹ omogodẹ revwo ze izobo na vwo ghworo anurhoro rayen. Amakashe rẹ Jihova ji rhe na da wanvrẹ anurhoro rẹ ihwo nana. Kukpe kukpe kọyen emọ rẹ Izrẹl vwo ruẹ ẹkarophiyọ rẹ usivwin nana womarẹ orẹ re se Ọwanvrẹn.
Ọmọshare ọkpako ri Fero vwo ghwu nu, ọ da vuẹ Mosis vẹ emọ rẹ Izrẹl nẹ ayen vrẹn nẹ Ijipt. Emọ rẹ Izrẹl de siomakoko kpatakpata rẹ ayen vwo vrẹn nẹ Ijipt. Ẹkẹvuọvo, Fero de wene ẹwẹn. Ọ vẹ isodje rọyen da vwọ tua ayen. Kọ rhe họhọ nẹ e ke emọ rẹ Izrẹl dje Abadi Ọvwavware na. Jihova da hẹriẹ Abadi Ọvwavware na, emọ rẹ Izrẹl da yan wan otọ ọyaya vwẹ uvwre rẹ igbẹhẹ rẹ ame ivẹ! Ọke rẹ ihwo rẹ Ijipt vwọ họrhọ nene ayen, Ọghẹnẹ de siobọnu ame na, Fero vẹ isodje rọyen de ghwu phiyọ ame na.
Ọke vwọ yanran na, Jihova de nene emọ rẹ Izrẹl re ọphọ vwẹ Ugbenu ri Sinae. Womarẹ Mosis, Ọghẹnẹ da vwẹ irhi vwọkẹ emọ rẹ Izrẹl, ri sun ayen, je sẹro rẹ ayen vwẹ kẹdia kẹdia rẹ akpeyeren rayen. Emọ rẹ Izrẹl de rhiabọreyọ usuon rẹ Ọghẹnẹ, Jihova ko nene ayen dia, o ji che ruo rere ayen dia ebruphiyọ vwọ kẹ ẹgborho efa.
Ẹkẹvuọvo, buebun rẹ ayen dje esegbuyota phia kpahen Ọghẹnẹ-ẹ. Ọtiọyena, Jihova da nẹrhẹ ayen ghoro vwẹ aton na ẹgbukpe 40. O vwo te ọke ọvo, Mosis da vwẹ Joshua vwo mu nẹ o sun ayen. Ukuotọ rọyen, emọ rẹ Izrẹl de muegbe rẹ ayen vwọ ro otọ rẹ Ọghẹnẹ ve kẹ Ebraham na.
—E muro kpahen Eyanno; Livitikọs; Ukeri; Urhi Rivẹ; Une Rẹ Ejiro 136:10-15; Iruo Rẹ Iyinkọn Na 7:17-36.