Ihworakpọ Sivwinrhọ Vwẹ Ọke Oghwe Na

IHWORAKPỌ vwo buẹnphiyọ na, jẹ umwemwu vẹ umiovwo ji buẹnphiyọ. Inọk rọ dia ọmraro vuọvo rọ herọ ọke yena vwẹ orhọ-esio vwọ kẹ ihwo nẹ Ọghẹnẹ cha ghwọrọ irumwemwu na. Dedena, jẹ umiovwo ganphiyọ. Emekashe evo de gbevwọso Jihova rẹ ayen vwọ yanjẹ ẹdia rayen vwo vwẹ odjuvwu, ayen de wene oma kpo ihworakpọ, ayen da rọvwọn eya ri je ayen. Fikirẹ orọnvwe nana ro shephiyọ-ọ na, ayen ki rhi vwiẹ erhuanran re se Nefilim ri shenyẹ ihwo. Erhuanran na ke rhe nẹrhẹ ozighi vẹ ohwekufia rhi bunphiyọ. Ọ da da Ọghẹnẹ mamọ nẹ otọrakpọ na rhi miovwin phiyọ.

Inọk vwo ghwu nu, ọshare ọvo da vwomaphia. Odẹ rọyen Noa. Noa vẹ orua rọyen davwẹngba vwo ru obo ri yovwirin obaro rẹ Ọghẹnẹ. Ọghẹnẹ guọnọ sivwin Noa vẹ eranvwe na ọke ro vwo brorhiẹn nẹ ọ cha ghwọrọ irumwemwu nẹ otọrakpọ na. Ọghẹnẹ da vuẹ Noa nẹ ọ kare okọ rode. Okọ na kọyen o che vwo sivwin Noa vẹ orua rọyen kugbe koka koka rẹ eranvwe. Noa nyupho rẹ Ọghẹnẹ. Uvwre rẹ ikpe ri Noa vwọ kare okọ na, o ji ru “aghwoghwo rẹ ọvwata.” (2 Pita 2:5) Ọ kẹ ihwo orhọ-esio kpahen Oghwe rọ cha na, ẹkẹvuọvo ayen kerhọ-ọ. Ọke rhi vwo te, Noa vẹ orua rọyen kugbe eranvwe na da ro okọ na. Ọghẹnẹ da kanre ẹchẹ rẹ okọ na. Osio na da ton ẹrhọ phiyọ.

Osio na da rhọ vwẹ ẹdẹ 40, Oghwe de ku akpọ na eje. Irumwemwu na eje de ghwu. Emeranvwe evo vwọ wan nu, ame na kọ rhe kpọ te asan rẹ okọ na da daji vwẹ enu rẹ ugbenu ọvo. Noa, orua rọyen kugbe eranvwe na dia evunrẹ okọ na te ẹgbukpe ọvo ayen ki wontọ nẹ evun rọyen. Noa de ze izobo vwọ kpẹvwẹ Jihova. Ọghẹnẹ rhiabọreyọ izobo na ro vwo ve kẹ Noa vẹ orua rọyen nẹ, Ọ rha cha vwẹ oghwe vwọ ghwọrọ akpọ na ọfa-a. O vwo mu ayen ẹro, Ọghẹnẹ da vwẹ aphoro vwo mu rere ọ vwọ karophiyọ uve ro ve kẹ ayen na.

Oghwe na vwọ wan nu, Ọghẹnẹ da vwẹ irhi kpokpọ kẹ ihworakpọ. Ọ vuẹ ayen nẹ ayen sa re eranvwe. Ẹkẹvuọvo, o si ayen orhọ nẹ ayen re ọbara na-a. Ọ da je vwẹ urhi ọfa vwọ kẹ emọ rẹ Noa nẹ ayen vwiẹ rere ayen hrabọ nene akpọ na eje, ẹkẹvuọvo evo usun rayen yan nene urhi yena-a. Ayen de kuomakugbe ọshare ọvo rọ reyọ oma rọyen vwo ru onini re se Nimrod, ayen da ton ẹbọn rẹ orere rode ọvo phiyọ vwẹ Babẹl ra rhe riẹn phiyọ Babilọn. Iroro rayen, ọyen ayen vwo gbevwọso urhi rẹ Ọghẹnẹ rọ tare nẹ ayen hrabọ nene akpọ na. Ẹkẹvuọvo Ọghẹnẹ de yanghan ejajẹ rayen, ayen ke jẹ ejajẹ sansan. Rọvwọ dianẹ ayen rhe se vwo ẹruọ rẹ ohwohwo na-a, kẹ ayen rhe yanjẹ ebanbọn na vwo, ayen da rhe hrabọ.

​—E muro kpahen Jẹnẹsis uyovwin 6 re te 11; Jude 14, 15.