Re Vwo Ruẹ Uyono Womarẹ Vidio Kọnfrẹsin

Igomẹti buebun vwẹ akpọ na jurhi nẹ ihwo rhe mudia kẹrẹ ohwohwo ganọ-ọ yẹrẹ ihwo buebun rhe siomakoko-o. Iseri ri Jihova brorhiẹn rẹ ayen vwo nene irhi nana dedena je ga Jihova kugbe vẹ omaẹkẹnẹ ra guọnọre. E se vwo ru ọnana, ikoko buebun ke reyọ aplikeshọne rẹ vidio kọnfrẹsin kerẹ Zoom vwo ruẹ iyono rayen.

Rere iyono na sa vwọ nabọ ghwotọ, Ẹko Rọvwẹrote na da rhọnvwe nẹ a vwẹ usunrẹ utoro rẹ avwanre vwọ dẹ akantu ri Zoom rẹ ikoko na vwo ru uyono. Ọrhuẹrẹphiyotọ nana vwẹ ukẹcha vwọ kẹ ikoko evo re sa dẹ akantu-u kidie e ghanre te $15-$20 yẹrẹ vrẹ ọtiọyen dede. Ikoko tiọyena ke vwẹ akantu ri Zoom rọphẹ rẹ imihwo ọvo sa rua vwo ruẹ uyono jẹ oka ri Zoom nana ghwa ga-an. Ẹkẹvuọvo asaọkiephana, ikoko eje re reyọ akantu ri Zoom rẹ ukoko na vwo ruiruo nabọ riavwerhẹn rọyen kidie ọ pha lọlọhọ, ihwo buebun je sa kọnẹti fiẹ uyono na ẹsiẹvo. Enẹna, ikoko re vrẹ 65,000 vwẹ ẹkuotọ re bun vrẹ 170 yen vwẹ akantu ri Zoom rẹ ukoko na vwo ruiruo.

Ukoko ri Kairagi rọhẹ Manado, North Sulawesi vwẹ Indonesia yanjẹ akantu ri Zoom rọphẹ rẹ ayen vwo ruiruo jovwo, vwọ rhe ọ rẹ ukoko na. Oniọvo Hadi Santoso da ta: “Iniọvo buebun re ghwa riẹn obo ra nyẹ ifonu ọtiọye-en sa nabọ riavwerhẹn rẹ ẹbẹre buebun rẹ uyono na enẹna, kidie uyono na rhe brẹdje ra da rhoma kọnẹti abọ buebu-un, obọ vuọvo kọyen ayen kọnẹti fiẹ uyono na.”

Lester Jijón, Jr., ọkpako vwẹ ukoko ri Guayacanes Oeste rọhẹ Guayaquil vwẹ Ecuador da ta: “Iniọvo buebun cha sa dẹ ilaisẹnsi rẹ Zoom rere ihwo rẹ ukoko na eje sa vwọ kọnẹti fiẹ uyono na-a kidie ayen igbere. Oma vwerhen ovwẹ mamọ nẹ fikirẹ akantu ri Zoom rẹ ukoko na, avwanre ki se durhie ihwo odedede nẹ e rhe kọnẹti fiẹ uyono na, kidie o rhe vwo nẹ ihwo re kọnẹti na bunọ-ọ.”

Johnson Mwanza, ọkpako ọvo vwẹ ukoko rẹ Ngwerere North rọhẹ Lusaka vwẹ Zambia de si: “Iniọvo buebun tare ọke buebun nẹ ‘ọrhuẹrẹphiyotọ ri Zoom rẹ ukoko na nẹrhẹ iniọvo na sikẹre ohwohwo phiyọ, oyen jẹ odjephia nẹ Jihova vwo ẹguọnọ rẹ avwanre, ọ je vwẹrote avwanre.’”

Usun rẹ igho ra vwọ jahwa fikirẹ oghwọrọ ri kpregede yen da vwọ dẹ akantu ri Zoom rẹ ukoko na. Itetoro re ru fikirẹ iruo Akpọeje na yen a wan mrẹ igho tiọyena. Ihwo buebun ruẹ itetoro tiọyen womarẹ donate.jw.org. Wẹ kobiruo rẹ utoro rẹ ghwologhwolo wẹn rọ nẹrhẹ a sa vwẹ ukẹcha kẹ otu re guọnọ ukẹcha vwẹ akpọneje.—2 Kọrẹnt 8:14.