Die Yen Baibol na ta Kpahen Ẹse-eruo?
Ẹkpahọnphiyọ rẹ Baibol na.
Baibol na jiri uruemu ra vwọ kokẹ ghwologhwolo, e mi ji ru ọtiọyen nẹ otọ rẹ ẹwẹn rhe. Ọ je tanẹ okẹ tiọyena fierere kẹ ọkokẹ na kugbe ọ ra kẹ re. (Isẹ 11:25; Luk 6:38) Jesu da ta: “Ẹrhovwo herọ kẹ ọkokẹ nọ ohwo ra kẹ.”—Iruo Rẹ Iyinkọn Na 20:35.
Oka rẹ ẹse-eruo vọ yen fierere kẹ ohwo?
Ẹse-eruo se fierere kẹ ohwo siẹrẹ o de nẹ otọ rẹ ẹwẹn rhe. Baibol na da ta: “Ohwo ọvuọvo mi ru kirobo rẹ udu rọye dje kẹ, ọ dia ọ rẹ iguegu-u eyẹ ẹgbahọ-ọ, kidie Ọghẹnẹ guọnọ okẹ rẹ ivun avwerhe.”—2 Kọrẹnt 9:7.
Ẹse-eruo ro nẹ otọ rẹ ẹwẹn rhe, ọyen ẹbẹre ọvo rẹ “omamọ rẹ egagọ” yẹrẹ ẹga rẹ Ọghẹnẹ rhiabọreyọ. (Jems 1:27) Ohwo rọ kokẹ ghwologhwolo nene Oghẹnẹ wian kuẹgbe, kidie Ọghẹnẹ ni okẹ tiọyena kerẹ ẹse re ru kẹ ọyen. (Isẹ 19:17) Baibol na tare nẹ Ọghẹnẹ komobọ yen cha hwosa kẹ.—Luk 14:12-14.
Oka rẹ ẹse-eruo vọ yen chọre?
Siẹrẹ e de ruẹse na fikirẹ erere romobọ. kerẹ udje, siẹrẹ e de ruo vẹ ẹwẹn nẹ:
Ihwo che jiri avwanre.—Matiu 6:2.
E che ruẹse kẹ avwanre rhivwin.—Luk 14:12-14.
A sa vwẹ ẹse na vwọ dẹ usivwin.—Une Rẹ Ejiro 49:6, 7.
A da vwẹ ẹse na vwo titi irueru yẹrẹ iruemu ri tu Ọghẹnẹ oma. Kerẹ udje, ọ chọre ra vwọ kẹ ohwo igho nẹ o vwo phi idjogba, reyọ ihuvwun egangan, yẹrẹ da udi vroma. (1 Kọrẹnt 6:9, 10; 2 Kọrẹnt 7:1) Ọ je chọ ra vwọ vwẹ igho kẹ ọvwiẹrẹ, rọ rhọnvwe wian rere ọ sa vwọ vwẹrote oma rọye-en.—2 Tẹsalonaika 3:10.
Ẹse na da nẹrhẹ a kpairoro vrẹ ẹroevwote rẹ orua rẹ ohwo. Baibol na tare nẹ igbuyovwin rẹ orua vwẹrote evwruwevwin rayen. (1 Timoti 5:8) Ofori nẹ ọgbuyovwin rẹ orua ruẹse kẹ ihwo efa te asan rẹ orua rọyen da rioja-a. Jesu tobọ ghwọku ihwo evo re rhọnvwe vwẹrote esẹ vẹ ini rayen re kpakore-e. Ayen tarẹ nẹ emu rẹ ayen vwori ejobi “a vwe rọ kẹ Ọghẹnẹ.”—Mak 7:9-13.