Ukuko na Me vẹ Ọsẹ Mẹ da Rhuẹrẹ Kugbe

AKPỌ MI YERIN JOVWO

Erhorha buebun kpo asan rẹ ame rẹ oragha de shotọ vwẹ asan ọvo rọ kẹrẹ orere rẹ Pagsanjan vwẹ ẹkuotọ rẹ Philippines. Etiyin yen ọsẹ mẹ re se Nardo Leron dia ghwanre. Ọsẹ vẹ oni mẹ ivwiogbere. Ophu mu ọsẹ mẹ mamọ rọ vwọ mrẹ nẹ ihwo ri suẹn, elọkpa, kugbe ihwo re vẹ ọyen gba wian dede, vwo uruemu rẹ ayen vwọ reyọ udi.

Ọsẹ vẹ oni mẹ davwẹngba mamọ vwọ vwẹrote avwanre emọ ẹrenren. Ayen fobọ dia uwevwi-in, kidie ayen ghwọrọ ọke buebun vwọ vwẹrote erọnvwọn rẹ ayen kọn phiyọ igbenu. Ọke buebun na, mẹ vẹ oniọvo mẹ ọmọshare re se Rodelio yen vwẹrote oma rẹ avwanre. Owẹnvwe hwe avwanre mamọ ọke yena. Avwanre mrẹ ọke vwọ heha-a, kidie ghwe vwo nẹ ọke rẹ avwanre vwọ hẹ ẹgbukpe ighwrẹn yen avwanre vwọ wian vwẹ aghwa ọvo. Avwanre muẹ ekrun rẹ ikokodia wan igbenu. Idjerhe na ghwrọrọ kpotọ. Oghwa na da họhọ nọ, kẹ avwanre kpono.

Ọ da avwanre mamọ nẹ ọkieje yen ọsẹ rẹ avwanre vwo hwe avwanre. Jẹ, oni rẹ avwanre ro ji hwe na yen ma da avwanre. Avwanre davwẹngba ra vwọ dobọ rọyen ji, ẹkẹvuọvo, avwanre se ruo-o. Mẹvwẹ vẹ oniọvo mẹ Rodelio da jiroro rẹ avwanre vwo hwe ọsẹ rẹ avwanre kufia siẹrẹ avwanre da ghwanre tedje re. Me guọnọ ọsẹ ro vwo ẹguọnọ rẹ avwanre!

Uruemu rẹ ozighi-egbe rẹ ọsẹ mẹ na da nẹrhẹ ofu dje vwe, mi de muophu vrẹn nẹ uwevwin ọke me vwọ hẹ ẹgbukpe 14. Me dia evunrẹ irhuvwun na vwẹ uvwre ọke evo, ki mi phopho ige yẹrẹ igbo. Ukuotọ rọyen, me da ton iruo phiyọ kerẹ ohwo ro bi okọ. Ke me vwẹ okọ vwo muẹ erhorha kpo asan rẹ ame rẹ oragha de she otọ.

Ikpe evo vwọ wan nu, mi de kpo yunivasiti ọvo rọhẹ Manila. Ẹkẹvuọvo, me nabọ mrẹ ọke vwo se ẹbe-e, kidie mi kpo asan mi de ruiruo vwẹ Pagsanjan vwẹ oba rẹ udughwrẹn. Mi yeren akpọ odedede, ige mi phopho na se si ẹnwan mẹ kpotọ-ọ. Ke me reyọ ihuvwun egangan efa, kerẹ methamphetamines, heroin, kugbe cocaine. Ihuvwun egangan vẹ ọfanrhiẹn egbe yen gba yan. Kasan kasan mi niri eje, ọbẹnvwẹ, oshenyẹ, kugbe ojaẹrio yen me mrẹ. Ọnana da nẹrhẹ mi vwo utuoma kpahen usuon rẹ ẹkuotọ na. Me da nọ Ọghẹnẹ, “Diesorọ akpọ na vwọ dia enẹ?” Ẹga na eje me rare sa kẹ vwẹ ẹkpahọnphiyọ na-a. Ofudjevwe na da nẹrhẹ mi ro evunrẹ ihuvwun egangan ẹreyọ kodophiyọ.

Vwẹ 1972, emọ rẹ isikuru rẹ Philippines da djẹ egbada vwọso usuon. Me da vwomaba ayen vwẹ ọvo re ruru rọ so ozighi mamọ, re de ji mu ihwo evo phiyọ uwodi. Ikpe evo vwọ wan nu, e de ghwoghwo nẹ isodje yen suẹn ẹkuotọ na asaọkiephana.

Me da rhoma rhivwin kpo irhuvwun na, vẹ oshọ nẹ e che mu vwe kerẹ ọvo usun rẹ ihwo re vwọso usuon na. Ki mi chuji rere me sa vwọ dẹ ihuvwun egangan, ukuotọ rọyen, ki mi nene edafe vẹ erhorha gbe ọfanrhiẹn. Arhọ mẹ rhe fiemu kẹ vwẹ-ẹ.

Oni mẹ vẹ oniọvo mẹ otete vwọ ton uyono rẹ Baibol phiyọ vẹ Iseri rẹ Jihova, ophu de mu ọsẹ mẹ mamọ. Ọ da torhẹ ẹbe rayen. Ẹkẹvuọvo, ayen davwerhọ rọye-en, ayen de bromaphiyame kerẹ Iseri rẹ Jihova.

Ẹdẹ ọvo, Oseri rẹ Jihova ọvo da vuẹ ọsẹ mẹ oborẹ Baibol ta kpahen ọke rẹ oshenyẹ che vwo nẹ akpọ na riẹriẹriẹ. (Une 72:12-14) Kidie nẹ ive nana je re mamọ, ọsẹ mẹ de brorhiẹn nẹ ọyen cha guọnọ otọ rọyen komobọ. Vwọ vrẹ usuon rẹ oshenyẹ kanre, Baibol na je chọn uko vwọ riẹn oborẹ Ọghẹnẹ guọnọ mie eshare kugbe esẹ. (Ẹfesọs 5:​28; 6:4) O kriri-i, ọ vẹ iniọvo mẹ eje da rhe dia Iseri rẹ Jihova. Jẹ, me riẹn enana re phia na-a, kidie asan mi hepha sheri kẹ ayen mamọ.

OBORẸ BAIBOL NA WENE UVWE WAN

Vwẹ 1978, me da kua kpo Australia. Dede nẹ asan na pha fuefu, obọ ji nabọ yovwo ihwo rehẹ ẹkuotọ na, jẹ, oma se fu vwe vwẹ oboyi-in. Me sa dobọ rẹ uruemu rẹ udi ẹda vroma vẹ ihuvwun egangan ẹreyọ mẹ na ji-i. Vwẹ ukpe yena, Iseri rẹ Jihova de ghwoghwo ota bru vwe rhe. Akpọ rẹ ufuoma rẹ ayen vwẹ Baibol vwo djisẹ rọyen kẹ vwẹ na je vwe mamọ, ẹkẹvuọvo oshọ rayen mu vwe.

O kriri-i, mi de rhivwin kpo Philippines vẹ ẹwẹn re me vwọ dia oboyin vwẹ udughwrẹn evo. Iniọvo mẹ da vuẹ vwẹ nẹ ọsẹ mẹ rhe dia omamọ rẹ ohwo re. Ẹkẹvuọvo, me guọnọ si kẹrẹ-ẹ, kidie ophu rọyen ji mu vwe.

Oniọvo mẹ otete rọ dia ọmọtẹ da vwẹ Baibol vwọ vuẹ vwẹ oboresorọ akpọ na vwọ vọn vẹ oshenyẹ kugbe ojaẹriọ. O gbevwunu mamọ nẹ emeghene rọ ton akpọ phiyọ obọ kọyen rhoma kpahanphiyọ enọ mẹ. Tavwen me ke yanran, ọsẹ mẹ da vwẹ ọbe ọvo kẹ vwẹ, re se You Can Live Forever in Paradise on Earth.a Ọ da ta: “Wọ djẹ-ẹ. Ọbe nana cha chọn wẹ uko vwọ mrẹ oborẹ wọ guọnọ na.” Ọ da je vuẹ vwẹ nẹ me guọnọ Iseri rẹ Jihova siẹrẹ mi de te Australia.

Mi nene uchebro rẹ ọsẹ mẹ, me da mrẹ Ọguan Ruvie ọvo rọ kẹrẹ uwevwin mẹ vwẹ Brisbane. Mi de rhiabọreyọ uyono rẹ Baibol. Womarẹ aroẹmrẹ rẹ Baibol na, kerẹ e rehẹ Daniẹl uyovwin 7 kugbe Aizaya uyovwin 9, me da rhe riẹn nẹ Uvie rẹ Ọghẹnẹ rọ dia usuon ro brorhiẹn rẹ abavo yen che sun avwanre vwẹ ọke rọ cha obaro. Me da je mrẹvughe nẹ avwanre cha riavwerhen rẹ Paradaisi vwẹ otọrakpọ na. Me riẹnre nẹ me cha davwẹngba vwo sun ophu mẹ, siobọnu ọfanrhiẹn egbe, ji dobọ rẹ ihuvwun egangan ẹreyọ ji, tavwen me ke sa dia ugbeyan rẹ Ọghẹnẹ. Me da fan oyerinkugbe mẹ vẹ ọmọtẹ re me vẹ ọyen gba dia uwevwin, ji dobọ rẹ ihuvwun egangan ẹreyọ ji. Ẹroẹvwọsuọ mẹ kpahen Jihova vwọ ganphiyọ ye, ke me nẹrhovwo vwo rhe, rere ọ chọn vwẹ uko vwo ru ewene efa.

Ememerha na, mi de rhi noso nẹ oborẹ mi yono na ghini vwo ẹgba ro se vwo wene ohwo. Baibol na tare nẹ e se ku “ohwo ọkpokpọ” na phiyọ siẹrẹ avwanre da nabọ davwẹngba vwo ru ọtiọyen. (Kọlose 3:9, 10) Ẹgbaẹdavwọn mẹ da nẹrhẹ mi rhi mrẹvughe nẹ ewene ra tare nẹ ọsẹ mẹ ruru na sa ghene dia uyota. Ukperẹ ophu kugbe utuoma, mi de rhi vwo ẹwẹn rẹ me vẹ ọyen vwọ rhuẹrẹ kugbe. Ukuotọ rọyen, mi de vwo ghovwo, je kpairoro vrẹ utuoma ri mi vwo kpahọn nẹ ọkiemọ rhe.

ERERE RE ME MRẸRE

Nẹ ọke eghene rhe yen mi vwo nene ihwo ri gbe ozighi yẹrẹ ruẹ erọnvwọn ebrabra efa. Ota rẹ Baibol na rugba vwẹ uyovwin mẹ, kidie orharhe igbeyan yen sun vwe ghwru. (1 Kọrẹnt 15:33) Enẹna, mi vwo igbeyan ra sa vwẹroso vwẹ ohri rẹ Iseri rẹ Jihova, ayen je nabọ chọn vwẹ uko vwọ dia omamọ rẹ ohwo. Etiyin me da je mrẹ avwebọ mẹ Loretta. Avwanre ihwo ivẹ na yono ihwo efa oborẹ Baibol na sa vwọ chọn ayen uko.

Womarẹ ukẹcha rẹ Baibol na, ọsẹ mẹ da rhe dia oka rẹ ohwo ri mi rorori nẹ ọ cha sa dia bẹdẹ-ẹ. Ọ da rhe dia uvi rẹ ọshare vwọ kẹ oni mẹ, kugbe Onenikristi rọ pha fuefu, rọ je vwomakpotọ. Me vwọ mrẹ ọsẹ mẹ ọke mi vwo bromaphiyame kerẹ Oseri rẹ Jihova vwẹ 1987 nu, ọ da gbane ovwẹ. Ọnana yen obọ rẹsosuọ ro tu vwo ru ọtiọyen!

Ọsẹ vẹ oni mẹ nabọ wian kugbe vwẹ ikpe re vrẹ 35, rẹ ayen vwọ vwẹ Baibol na vwo dje iphiẹrophiyọ rayen kẹ ihwo efa. A da rhe riẹn ọsẹ mẹ phiyọ ohwo dẹndẹn rọ nabọ vwẹ ukẹcha kẹ ihwo efa. Me je davwẹngba vwọ nabọ muọghọ, ji dje ẹguọnọ kẹ. Oma vwerhen ovwẹ nẹ mẹvwẹ ọmọ rọyen! Dede nẹ o ghwuru vwẹ ukpe rẹ 2016, oma je vwerhen ovwẹ kọke kọke me da karophiyọ, kidie avwanre ihwo ivẹ ru ewene womarẹ ukẹcha rẹ Baibol na. Mi rhe vwo upe rẹ utuoma ro rhe vwe devure-e. Oma je nabọ vwerhen ovwẹ nẹ me sa mrẹ Jihova vughe, rọ dia Ọsẹ mẹ rọhẹ obo odjuvwu. O veri nẹ ọyen che phioba phiyọ kemu kemu rọ sua ohra vwevunrẹ orua vwẹ akpọneje.