Die Yen Baibol na Ta Kpahen A Vwọ Torhẹ Orivwin?
Ẹkpahọnphiyọ rẹ Baibol na
Baibol na vwẹ odjekẹ vuọvo phia kpahen uruemu ra vwọ torhẹ orivwi-in. Baibol na vwẹ iji vuọvo phia kpahen e vwo shi orivwin yẹrẹ torhẹ-ẹ.
Ẹkẹvuọvo, Baibol na niyẹnrẹn rẹ idibo rẹ Ọghẹnẹ re fuevun ri shi irivwin rayen. Kerẹ udje, Ebraham davwẹngba rọ sa vwọ dẹ asan ro che shi aye rọyen Sera phiyọ.—Jẹnẹsis 23:2-20; 49:29-32.
Baibol na ji djunute ihwo re fuevun re torhẹ irivwin rayen. Kerẹ udje, ọke rẹ Ovie rẹ Izrẹl Sọl vẹ emọ rọyen erha vwo ghwu vwẹ ofovwin, a ka yanjẹ irivwin rayen vwo vwẹ otọ rẹ ivwighrẹn, a da phọphọ irivwin na. Ọke rẹ egba rẹ ofovwin rẹ ihwo rẹ Izrẹl vwo nyo, ayen de re mu irivwin rẹ Sọl vẹ emọ rọyen, ayen da torhẹ ayen, ji shi esuanso rayen. (1 Samuẹl 31:8-13) Baibol na djerephia nẹ obo re ru kẹ orivwin rẹ Sọl vẹ emọ rọyen na shephiyọ.—2 Samuẹl 2:4-6.
Ororochọ kpahen a vwọ torhẹ orivwin
Ororochọ: Ẹtorhẹ rẹ orivwin dje ọghọ kẹ ugboma na-a.
Uyota: Baibol na tare nẹ ihwo ri ghwuru rhivwin kpo ekpẹn, ọyen obo re ghwa phia kẹ ohwo ro ghwuru, ọke rẹ ugboma na de gbon nu. (Jẹnẹsis 3:19) Ẹtorhẹ tobọ nẹrhẹ ọ phẹrẹ, kidie ọ hirhe ugboma na phiyọ iwurhie yẹrẹ ekpẹn.
Ororochọ: Vwẹ ọke awanre, ihwo re mrẹ ẹroesiri rẹ Ọghẹnẹ-ẹ yen a torhẹre ọke ayen vwo ghwu.
Uyota: A torhẹ ugboma rẹ ihwo evo re fuevu-un kerẹ Ekan vẹ orua rọyen. (Joshua 7:25) Ẹkẹvuọvo, ọnana dia obo ra fobọ mrẹ-ẹ, kidie ọfẹnẹ oborẹ urhi na tare. (Urhi Rivẹ 21:22, 23) Kirobo ra tare vwẹ obenu, a tobọ torhẹ ugboma rẹ ihwo evo re fuevun kẹ Ọghẹnẹ kerẹ ọ rẹ ọmọ rẹ Ovie Sọl Jonatan, ọke ro vwo ghwu nu.
Ororochọ: Ẹtorhẹ rẹ orivwin cha nẹrhẹ Ọghẹnẹ sa rhọvwọn ohwo ro ghwuru-u.
Uyota: Owenẹ e shi ohwo ro ghwuru, a torherẹ, o ghwru phiyọ abadi, yẹrẹ eranvwe re djoma re rọ, Ọghẹnẹ sa rhọvwọn. (Ẹvwọphia 20:13) Ọromevwẹgba na sa rhoma kẹ ohwo ro ghwuru ugboma kpokpọ.—1 Kọrẹnt 15:35, 38.