Die Yen Baibol na ta Kpahen Uruemu ra Vwọ Vwẹ Ekuakua Gbe Opharo, ji Kuẹ Orọnvwọn Ohọre, Erhọ, vẹ e rẹ Abọ Phiyọ?
Oborẹ Baibol na tare
Dede nẹ Baibol na ghwa ta ota kpahọ-ọn, jẹ ọ dia ọ vwọso uruemu ra vwọ vwẹ ekuakua gbe opharo, yẹrẹ kuẹ orọnvwọn ohọre, erhọ, vẹ e rẹ abọ phiyọ-ọ. Ẹkẹvuọvo, ukperẹ ọ vwọ tẹnrovi erhuvwu rẹ ugboma, Baibol na jiri “evwarha ri jẹghwọrọ re dẹndẹn bọrọ bọrọ.”—1 Pita 3:3, 4.
A vwọso uruemu ra vwọ vwẹ ekuakua rhuẹrẹ oma-a
Eya ri fuevun vwẹ Baibol na vwẹ ekuakua sansan vwọ rhuẹrẹ oma. Rebeka, rọ rọvwọn Aizik, ku isa rẹ oro, erọnvwọn abọ, vẹ ekuakua eghanghanre efa phiyọ oma, re dia oborẹ Ebraham rọ dia Ọsẹ orọnvwe rọyen vwọ kẹ. (Jẹnẹsis 24:22, 30, 53) Ẹsta rhọnvwere nẹ “e ghworo” ọyen ọke ro vwo muegbe vwọ kẹ ẹdia rọyen kerẹ aye rẹ Ovie ri Pẹsha. (Ẹsta 2:7, 9, 12) Ọnana churobọ si ori re vwo ghworo oma, kugbe ekuakua efa ra vwọ rhuẹrẹ opharo na.”—New International Version; Easy-to-Read Version.
A vwẹ ekuakua ra vwọ rhuẹrẹ oma vwo ru udje rẹ erọnvwọn iyoyovwin vwẹ Baibol na. Kerẹ udje, a vwẹ ohwo rọ vwẹ omamọ uchebro kẹ ihwo vwo dje “isa rẹ oro . . . kẹ erhọn ro nyo ẹme.” (Isẹ 25:12) Vwọba, Ọghẹnẹ je vwẹ oborẹ ọyen vwẹrote ẹgborho rẹ Izrẹl vwo dje ọshare rọ vwẹ orọnvwọn ohọre, e rẹ abọ, vẹ e rẹ erhọ vwọ rhuẹrẹ ọpha rọyen fia. Ekuakua nana nẹrhẹ ẹgborho na dia “yoyovwi.”—Izikiẹl 16:11-13.
Ororochọ vwọ kpahen ekuakua ra vwọ rhuẹrẹ oma
Ororochọ: Baibol na vwọso “ẹtoeme [kugbe] iro re vwo gidi oma” vwẹ 1 Pita 3:3.
Uyota: Eta re riarierẹ phiyọ djerephia nẹ ẹkpo ri Baibol yena di vwẹ erhuvwu rẹ ugboma vwọ vwanvwe oka rẹ ohwo ra hepha vwẹ ẹro rẹ Ọghẹnẹ. (1 Pita 3:3-6) A je vwẹ eta tiọyena vwo ruiruo vwẹ asan efa vwẹ Baibol na.—1 Samuẹl 16:7; Isẹ 11:22; 31:30; 1 Timoti 2:9, 10.
Ororochọ: Rọ vwọ dianẹ ọvwuvumwemwu rẹ aye ovie re se Jẹzibẹl si “amiẹro” na, kọyen ọ chọre ra vwọ reyọ ekuakua vwo gbe opharo rẹ ohwo.—2 Ivie 9:30.
Uyota: Ọ dia obo rọ vwọ rhuẹrẹ oma rọyen yen nẹrhẹ e brorhien hwe-e, ẹkẹvuọvo e ru ọtiọyen kidie ozighẹ o ruẹ, o ji vwobọ vwẹ ureumu rẹ orhan.—2 Ivie 9:7, 22, 36, 37.