Iseri ri Jihova Vwobọ Vwẹ Irueru rẹ Ẹga Efa?

Kerẹ Iseri ri Jihova, oma vwerhen avwanre siẹrẹ avwanre vẹ ihwo ri nẹ ẹga sansan rhe da ta eta ri shekpahen esegbuyota, ẹkẹvuọvo avwanre vwobọ vwẹ irueru rẹ ẹga efaa, kọyen ra vwọ ga ẹga vẹ ihwo rẹ esegbuyota rayen fẹnẹ ọ rẹ avwanre. Baibol na djere kẹ avwanre nẹ Inenikristi rẹ uyota “vwo ẹwẹn ọvo kugbe iroro ọvo,” jẹ emuọvo rọ sa nẹrhẹ ayen ru ọtiọyen yen esegbuyota ọvuọvo rẹ ayen vwori. (1 Kọrẹnt 1:10; Ẹfesọs 4:16; Filipae 2:2) Ọnana vrẹ a de vwọ rhọnvwephiyọ iruemu eghanghanre kerẹ ẹguọnọ, erorokẹ kugbe evwoghovwo. E mu esegbuyota avwanre kpahen erianriẹn ọgbagba ro nẹ Baibol na rhe, kidie ababọ rọyen esegbuyota rẹ avwanre cha dia ofefe.—Rom 10:2, 3.

Baibol na reyọ a vwọ vwomaba ihwo rẹ esegbuyota rayen fẹnẹ ọ rẹ avwanre vwo dje erọnvwọn ivẹ re fẹnẹre, orukugbe nana che miovwin esegbuyota rẹ Onenikristi. (2 Kọrẹnt 6:14-17) Ọtiọyena, Jesu rhọnvwe kẹ idibo rọyen nẹ ayen vwobọ vwẹ irueru rẹ ẹga efaa. (Matiu 12:30; Jọn 14:6) Vwẹ idjerhe vuọvo na, Ọghẹnẹ womarẹ Mosis vwọ vwẹ urhi kẹ ihwo rẹ Izrẹl nẹ ayen vwomaba ẹga rẹ irere re kẹrẹ ayeen. (Eyanno 34:11-14) Ọke vwọ yanran na, ihwo rẹ Izrẹl re fuevun da sen ukẹcha rọ sa nẹrhẹ irueru rẹ ẹga rayen vẹ ọ rẹ ihwo efa ku kugbe.—Ẹzra 4:1-3.

Iseri ri Jihova nene ihwo rẹ esegbuyota rayen fẹnẹre ta ota kuẹgbe?

E. Kerẹ ọyinkọn Pọl, avwanre vwo owenvwe rẹ avwanre vwo vwo ẹruọ rẹ oborẹ “ihwo buebun” roro vẹ oborẹ ayen segbuyota vwẹ iruo rẹ aghwoghwo avwanre na. (1 Kọrẹnt 9:19-22) Siẹrẹ avwanre da nene ihwo efa ta ota kuẹgbe, avwanre davwẹngba vwọ reyọ uchebro ri Baibol rọ tare nẹ e dje “ọghọ okokodo” vwọ kẹ ihwo efa vwo ruiruo.—1 Pita 3:15.