Ono Yen Maekẹl Onotu rẹ Emekashe Na?

Ẹkpahọnphiyọ ri Baibol na

Ihwo rẹ ẹga evo vwẹ odẹ na “Maekẹl Ọfuanfon” vwo se Maekẹl, rọ dia odẹ re mu ke Jesu tavwen ọ ke rhe akpọ kugbe ọke ro vwo ghwu nu.a Maekẹl nene Eshu phraphro ọke rẹ Mosis vwo ghwu nu, ọ je vwẹ ukẹcha kẹ amakashe ọvo vwọ vwẹ ovuẹ rẹ Ọghẹnẹ vwọ kẹ ọmraro Daniẹl. (Daniẹl 10:13, 21; Jud 9) Maekẹl ru nene oborẹ odẹ rọyen mudiaphiyọ—“Ono Yen Họhọ Ọghẹnẹ?”—rọ vwọ chochọn rẹ usuon rẹ Ọghẹnẹ je họnre vwọso ivwighrẹn rẹ Ọghẹnẹ.—Daniẹl 12:1; Ẹvwọphia 12:7.

Roro kpahen obo re sa nẹrhẹ a tanẹ Jesu yen Maekẹl rọ dia onotu rẹ emekashe na.

• Maekẹl yen “onotu rẹ emakashe na.” (Jud 9) awọreta ivẹ ọvo yen odova na “onotu rẹ emakashe” ro mudiaphiyọ “olori rẹ emekashe na,” da vwomaphia vwẹ Baibol na. Vwẹ ẹdia ivẹ na, ota na shekpahen emu ọvo, ro djerephia nẹ amakashe ọvuọvo yen vwo odova yena. Ọvo vwẹ usun rẹ awọreta na tare nẹ Jesu ro vrẹnushi na “che wotọ nẹ odjuvwu rhe vẹ edo, kugbe urhuru rẹ onotu rẹ emekashe.” (1 Tẹsalonaika 4:16) Jesu vwo “urhuru rẹ onotu rẹ emekashe” kidie ọyehẹ onotu rẹ emekashe na, Maekẹl.

• Maekẹl yen suẹn ẹko rẹ emekashe buebun. ’Maekẹl vẹ emakashe rọye nene Okpodje na họnre,’ rọ dia Eshu. (Ẹvwọphia 12:7) Maekẹl vwo ẹgba mamọ vwẹ obo odjuvwu, kọyensorọ e vwo se “ọvo vwẹ usun rẹ isun na” kugbe “osun rode na.” (Daniẹl 10:13, 21; 12:1) Edova yena nẹrhẹ Maekẹl dia “onotu ro jurhi rẹ emekashe na,” kirobo rẹ New Testament scholar David E. Aune tare.

  Ohwo ọvuọvo yen Baibol na tare nẹ o vwo ẹgba vwẹ enu rẹ emekashe buebun na. O dje ọke “ra da cha vwẹ Ọrovwohwo Jesu vẹ emakashe rọye ride na re la kerẹ ẹkuerhanre phia nẹ odjuvwu.” (2 Tẹsalonaika 1:7, 8; Matiu 16:27) Jesu “kpo obo odjuvwu. . . , emakashe, otu ri suẹn kugbe ogangan ejobi da vwẹ oma kpotọ kẹ.” (1 Pita 3:21, 22) Ọ cha dia emu rẹ aghwanre-e siẹrẹ Ọghẹnẹ da vwẹ Jesu vẹ Maekẹl vwo mu kerẹ isun rẹ emekashe re vwọso ohwohwo. Ukperẹ ọtiọyen, aghwanre herọ siẹrẹ a da rhọnvwe nẹ edẹ ivẹ nana, rọ dia Jesu vẹ Maekẹl ọyen odẹ rẹ ohwo ọvuọvo.

• Maekẹl “che vrẹn rhe” vwẹ “ọke rẹ ukpokpogho” rode. (Daniẹl 12:1) Vwẹ ọbe ri Daniẹl, a reyọ ota na “vrẹn rhe” vwo djisẹ rẹ ovie rọ vrẹn rere o se vwo ru emu oghẹresan. (Daniẹl 11:2-4, 21) Jesu Kristi re seri “Ota rẹ Ọghẹnẹ na,” che ru emu oghẹresan kerẹ “Ovie rẹ ivie” rọ cha vwọ ghwọrọ ivwighrẹn rẹ Ọghẹnẹ eje ji sivwin ihwo rẹ Ọghẹnẹ. (Ẹvwọphia 19:11-16) O che ru ọnana vwẹ ọke rẹ “ukpokpogho ride. . . , ra je mrẹ oghẹre rọye dẹvo-o.”—Matiu 24:21, 42.