Die Yen Aroẹmrẹ?

Ẹkpahọnphiyọ ri Baibol na

Aroẹmrẹ ọyen ovuẹ ro nẹ obọ rẹ Ọghẹnẹ rhe yẹrẹ oborẹ Ọghẹnẹ vwọ phia kẹ ohwo. Baibol na tare nẹ emraro rẹ “ẹwẹn ọfuanfon muru yen ta ota ro nẹ obọ rẹ Ọghẹnẹ rhe.” (2 Pita 1:20, 21) Ọtiọyena, ọmraro ọyen ohwo rọ vuẹ ihwo efa kpahen ovuẹ ro nẹ obọ rẹ Ọghẹnẹ rhe.—Iruo rẹ Iyinkọn Na 3:18.

Idjerhe vọ yen ovuẹ rẹ Ọghẹnẹ vwo te emraro na obọ?

Idjerhe sansan yen Ọghẹnẹ vwọ vwẹ ovuẹ vwọ kẹ emraro na:

• Womarẹ isiesi. Ọghẹnẹ reyọ ona nana vwo ruiruo vwẹ ọke rọ vwọ vwẹ Iji Ihwe ro si phiyotọ vwọ kẹ Mosis.—Eyanno 31:18.

• Ọ ta ota kẹ ayen womarẹ emekashe. Kerẹ udje, Ọghẹnẹ womarẹ amakashe vwọ vwẹ odjekẹ kẹ Mosis kpahen ovuẹ rọ cha vwọ kẹ Fero rọ dia ovie rẹ Ijipt. (Eyanno 3:2-4, 10) Ọ da dianẹ ovuẹ na ghanre mamọ, Ọghẹnẹ kọ vuẹ emekashe na nẹ ayen vwọphia kirobo rọ tarọ, o ru ọnana vwẹ ọke rọ vwọ vuẹ Mosis nẹ: “Si eta nana phiyotọ kidie vwo nene eta nana, ọyen mẹ vẹ owẹ kugbe Izrẹl cha vwọ re ọphọ.”—Eyanno 34:27.a

• Emramrẹ. Ọkievo Ọghẹnẹ vwẹ emramrẹ vwọ nẹ emraro na vwẹ ọke ovwerhẹn da nabọ nẹ ayen ẹro re. (Aizaya 1:1; Izikiẹl 1:1) Evo usun rẹ emramrẹ na muẹro dẹn te ẹdia rẹ ihwo ra vwẹ ayen vwọ nẹ na, ke mrẹ oma rayen vwẹ evun rọyen. (Luk 9:28-36; Ẹvwọphia 1:10-17) Vwẹ ọke efa, Ọghẹnẹ ruo rere ọ vwọ họhọ nẹ ohwo na vwerhẹn, ọ me vwẹ emramrẹ vwọ nẹ. (Iruo rẹ Iyinkọn Na 10:10, 11; 22:17-21) Ọghẹnẹ je vwẹ ovuẹ rọyen vwọphia ke emraro rọyen womarẹ evwerhẹn.—Daniẹl 7:1; Iruo rẹ Iyinkọn Na 16:9, 10.

• Ọghẹnẹ sun iroro rayen. Ọghẹnẹ sun iroro rẹ emraro rọyen rere ayen sa vwọ vwẹ ovuẹ rọyen vwọphia. Ọyensorọ Baibol na vwọ ta: “Isiesi Ọfuanfon na eje ẹwẹn rẹ Ọghẹnẹ yen e vwo sio.” (2 Timoti 3:16) Ọghẹnẹ reyọ ẹwẹn ọfuanfon rọyen vwo phi iroro rọyen phiyọ ẹwẹn rẹ idibo rọyen. Ovuẹ na ọ rẹ Ọghẹnẹ, ẹkẹvuọvo emraro na vwẹ ovuẹ na vwọphia vwẹ eta romobọ rayen.—2 Samuẹl 23:1, 2.

Ọkieje yen aroẹmrẹ vwo shekpahen obo re cha phia vwẹ obaro na?

Ẹjo, ọ dia obo re cha phia vwẹ obaro ọvo yen aroẹmrẹ ri Baibol na ta ota kpaheen. Ẹkẹvuọvo, evuẹ buebun ri nẹ obọ rẹ Ọghẹnẹ rhe shekpahen obo re cha phia vwẹ obaro na, ọ da tobọ dianẹ evuẹ nana vwomaphia phiọguun. Kerẹ udje, abọ buebun yen emraro rẹ Ọghẹnẹ vwo si ihwo rẹ Izrẹl awanre erhọ fikirẹ imwemwu rayen. Orhọesio yena djisẹ rẹ ebruphiyọ rẹ ayen cha mrẹ vwẹ obaro na siẹrẹ ayen de ru nene kugbe ebẹnbẹn rẹ ayen che rhiẹromrẹ ayen rhe ru nene orhọesio naa. (Jerimaya 25:4-6) Ojẹ rẹ ayen jẹre yen che dje oborẹ akpeyeren rayen cha dia.—Urhi Rivẹ 30:19, 20.

Idje rẹ aroẹmrẹ ri Baibol ri shekpahen obo re cha phia vwẹ obaro naa

• O vwo ọke ọvo rẹ Ihwo rẹ Izrẹl vwọ nokpẹn rẹ ukẹcha rẹ Ọghẹnẹ, o de ji ọmraro rọyen bru ayen ra ra vuẹ ayen nẹ kidie nẹ ayen yan nene iji rọyeen, ọyensorọ Ọ rha vwo ukẹcha vwọ kẹ ayeen.—Iguẹdjọ 6:6-10.

• Ọke rẹ Jesu vwo nene aye ọvo rọ dia ohwo ri Sameria ta ota, ọ da vuẹ obo ro yeren akpọ wan vwẹ obuko re, rọ dia oborẹ Ọghẹnẹ ọvo sa vwọ phia kẹ Jesu. Aye na riẹnre nẹ Jesu ọmraro dede nẹ Jesu vuẹrẹ erọnvwọn kpahen obaro naa.—Jọn 4:17-19.

• Ọke ra vwọ reyọ Jesu vwo guẹdjọ, ivwighrẹn rọyen de rhurhu opharo rọyen, ghwiẹ opharo je tanẹ: “Mraro! Ono yen ghwiẹ wẹ?” Ọ dia ayen vuẹ Jesu nẹ ọ ta ota kpahen obaro naa ẹkẹvuọvo ayen vuẹ nẹ ọ womarẹ ẹgba rẹ Ọghẹnẹ vwọ vuẹ ayen ohwo rọ ghwiẹ rẹ.—Luk 22:63, 64.