Hẹl Ghini Herọ? Mavọ Yen Baibol na Djisẹ ri Hẹl Wan?

Ẹkpahọnphiyọ ri Baibol na

Efanfan ri Baibol rẹ Oyibo sansan ri kpo awanre re, kerẹ King James Version, reyọ ota na hẹl vwo ruiruo vwẹ awọreta evo. (Une rẹ Ejiro 16:10; Iruo rẹ Iyinkọn Na 2:27 a) Kirobo rẹ uhoho rọhẹ uyovwinrota nana djephia, ihwo buebun vwo imuẹro nẹ hẹl ọyen ẹtẹrhe rẹ erhanre ra da cha vwẹ oja re irumwemwu bẹdi bẹdẹ. Ẹkẹvuọvo, ọyena yen oborẹ Baibol na yonori?

Vwẹ uyovwinrota nana

Hẹl ọyen asan ra da cha vwẹ oja re ihwo bẹdi bẹdẹ?

Ẹjo. Eta rẹsosuọ ra fan kpo “hẹl” vwẹ efanfan ri Baibol awanre evo (Hibru, “Sheol”; Grik, “Hades”) mudiaphiyọ “Ushi,” rọ dia asan re shi ihwo phiyọ. Baibol na djerephia nẹ ihwo rehẹ evunrẹ “Ushi” rhe yerẹ-ẹn.

Ihwo ri ghwure riẹn emuọvo-o, ayen je rioja rẹ ọmiaovwẹ vuọvo-o. “Vwẹ hẹl, o vwo iruo, yẹrẹ iroro, yẹrẹ aghwanre, yẹrẹ erianriẹ-ẹn.” (Aghwoghwo 9:10, Douay-Rheims Version) Hẹl dia asan rẹ ihwo de do fikirẹ oja ra vwọ re aye-en. Ukperẹ ọtiọyen, Baibol na tare nẹ: “E jẹn oma vo irumwemwu, jẹn ayen rhurhu unu vwevunrẹ ushi [hẹl, Douay-Rheims].”—Une rẹ Ejiro 31:17; King James Version (30:18, Douay-Rheims); Une rẹ Ejiro 115:17.
Ọghẹnẹ tare nẹ ughwu yen osa rẹ umwemwu, ọ dia ojaẹriọ vwevunrẹ ẹtẹrhe rẹ erhanre-e. Ọghẹnẹ vuẹ ọshare rẹsosuọ Adam nẹ, ọ da churhi rẹ Ọghẹnẹ, o che ghwu. (Jẹnẹsis 2:17) Ọ ta ota vuọvo kpahen ojaẹriọ ri bẹdi bẹdẹ vwẹ ẹtẹrhe rẹ erhanre-e. Ọke vwọ yanran rẹ Adam vwo ru umwemwu nu, Ọghẹnẹ da vuẹ obo rọ cha vwọ hwosa kẹ: “Otọ . . . wo nurhe, ekpẹn wo ji che hirhe ra.” (Jẹnẹsis 3:19) O rhe che yerin ọfa-a. Ọ da dianẹ ẹtẹrhe rẹ erhanre yen Ọghẹnẹ che muo Adam phiyọ jovwo, o rhe djunute. Ọghẹnẹ ji rhi wene osa rọ cha hwa kẹ ihwo re churhi rọye-en. Ọke grongron rẹ Adam vwo ru umwemwu nu, Ọghẹnẹ da vwẹ ẹwẹn ọfuanfon rọyen vwo mu ohwo ọvo vwo si: “Osa rẹ umwemwu hẹ ughwu.” (Rom 6:23) O rhe vwo osa ọfa ra cha vwọba-a, kidie “ohwo ro ghwu nure ya rharọ nẹ abe rẹ umwemwu.”—Rom 6:7.
Ọghẹnẹ vwo utuoma kpahen a vwọ vwẹ oja re ihwo bẹdẹ. (Jerimaya 32:35) Uruemu tiọyena vwọso oborẹ Baibol na yonori nẹ “Ọghẹnẹ hẹ ẹguọnọ.” (1 Jọn 4:8) Ọghẹnẹ guọnọre nẹ ẹguọnọ mu avwanre vwọ ga ọyen, ukperẹ oshọ rẹ oja ra cha vwọ re ohwo vwẹ ẹtẹrhe rẹ erhanre bẹdẹ.—Matiu 22:36-38.
Omamọ rẹ ihwo kpo hẹl. Efanfan ri Baibol sansan re vwẹ ota na “hẹl” vwo ruiruo, djere nẹ eshare re fuevun kerẹ Jekọp kugbe Job, rhẹro rọyen nẹ ayen che kpo hẹl. (Jẹnẹsis 37:35; Job 14:13) A tobọ tanẹ uvwre rẹ ọke ri Jesu Kristi vwo ghwu ji vrẹn nẹ ushi, o kpo hẹl. (Iruo rẹ Iyinkọn Na 2:31, 32) O phẹnre dẹn nẹ, efanfan ri Baibol sansan re djunute re na reyọ ota na “hẹl” vwo ruiruo, kidie Ushi yen o mudiaphiyọ.b

Die yen itẹ ri Jesu kperi kpahen ọdafe na vẹ Lazarọs mudiaphiyọ?

Jesu yen kpe itẹ nana, a je niyẹnrẹn rọyen phiyọ ọbe ri Luk 16:19-31. Itẹ eyen idje ri yono iyota eghanghanre yẹrẹ nẹrhẹ avwanre riẹn ẹro rẹ Ọghẹnẹ vwo ni emu. Itẹ rẹ ọdafe na vẹ Lazarọs dia ikuegbe rẹ obo re ghene phia-a. (Matiu 13:34) Wo se vwo yono kpobarophiyọ kpahen itẹ nana, ni uyovwinrota na “Ono Yen Lazarọs vẹ Ọdafe Na?”

Ohwo dahẹ hẹl, ko mudiaphiyọ nẹ ọ hẹrioma nẹ Ọghẹnẹ?

Ẹjo. Uyono ro yonori nẹ ihwo ri ghwure riẹnre nẹ ayen hẹrioma nẹ Ọghẹnẹ vwọso Baibol na. Baibol na djere phephẹn nẹ, ihwo ri ghwuru riẹn emuọvo-o.—Une rẹ Ejiro 146:3, 4; Aghwoghwo 9:5.

O vwo ohwo re siobọnu nẹ evunrẹ hẹl jovwo re?

E. Baibol na nabọ niyẹnrẹn rẹ ihwo irhinrin ri kpo Ushi (ra fan phiyọ “hẹl” vwẹ Baibol evo) ra je kpare nẹ ushi rhe akpọ.c Ọ da dianẹ ayen riẹn obo re phia kẹ ayen, ayen vwọ hẹ evunrẹ hẹl, mane ayen rha vuẹ ihwo kpahen oborẹ ayen rhiẹromrẹ. Ọ vwerhoma nẹ o vwo ohwo vuọvo vwẹ usun rayen rọ tare nẹ ọyen rioja rẹ emuọvo-o. Diesorọ? Kirobo rẹ Baibol na yonori, ayen pha kerẹ ihwo re vwerhẹn “ovwerhẹ” okokodo re riẹn obo re phia-a.—Jọn 11:11-14; 1 Kọrẹnt 15:3-6.

a Buebun rẹ efanfan ri Baibol rẹ Oyibo reyọ ota na “hẹl” vwo ruiruo-o, vwẹ Iruo rẹ Iyinkọn Na 2:27. Ukperẹ ọtiọyen, evo vwẹ eta kerẹ “ushi,” (New Century Version); “orho rẹ erivwin,” (New International Version); “irivwin” (The Passion Translation) vwo ruiruo. Efa vwẹ ota ri Grik na “Hades” vwo ruiruo.—Holman Christian Standard Bible, NET Bible, New American Standard Bible, English Standard Version.

b Ni ekpeti na “Eta ri Baibol vwẹ ejajẹ rẹsosuọ.”

c Ni 1 Ivie 17:17-24; 2 Ivie 4:32-37; 13:20, 21; Matiu 28:5, 6; Luk 7:11-17; 8:40-56; Jọn 11:38-44; Iruo rẹ Iyinkọn Na 9:36-42; Iruo rẹ Iyinkọn Na 20:7-12.

Ẹkpo ri Baibol ri shekpahen hẹl yẹrẹ Ushi

Job 14:13: “E manẹ wo sivwe nu vwẹ Erivwi [“hẹl,” Douay-Rheims Version] . . . manẹ we bru ọke kẹ vwẹ, wọ vwọ karohọ ovwẹ!”

Obo ro Mudiaphiyọ: Job rọ dia ọshare rọ fuevun na riẹnre nẹ hẹl (Ushi) che phioba phiyọ ojaẹriọ rọyen, ọ je riẹn nẹ Ọghẹnẹ sa kpare ọyen nẹ hẹl rhe, kọyen Ushi.

Une rẹ Ejiro 145:20: “Ọrovwohwo sẹro rayen otu re guọnerọ ejobi; ẹkẹvuọvo ihwo umwemwu ejobi ka ghwọrọ ayen.”

Obo ro Mudiaphiyọ: Ọghẹnẹ cha ghwọrọ yẹrẹ si ihwo umwemwu no riẹriẹriẹ. O che mu ayen ọkpokpọ phiyọ hẹl ọ vwọ vwẹ oja re aye-en.

Aghwoghwo 9:10: “Kidie Ushi [“hẹl,” Douay-Rheims Version] wọ cha ra na, o vwo iruo-o eyẹ iroro-o eyẹ erianriẹ-ẹn eyẹ aghwanre-e.”

Obo ro Mudiaphiyọ: Ihwo rehẹ Ushi, yẹrẹ hẹl, riẹn emuọvo-o, ọtiọyena, ayen cha sa rioja-a. O muẹro nẹ, ihwo rẹ owọrota nana ta ota kpahen, ji churobọ si emamọ rẹ ihwo.

Iruo rẹ Iyinkọn Na 2:31: “Ọ mraro kpahen evrẹnushi ri Kristi na, nẹ a yan jovwo vwẹ hẹli-i.”—King James Version.

Obo ro Mudiaphiyọ: Jesu Kristi kpo hẹl (Ushi) ọke ro vwo ghwu.

Rom 6:23: “Osa rẹ umwemwu hẹ ughwu.”

Obo ro Mudiaphiyọ: Ughwu, yen osa rẹ umwemwu, ọ dia ojaẹriọ vwevunrẹ ẹtẹrhe rẹ erhanre-e.

Ẹvwọphia 20:13: “Ughwu kugbe hẹl da vwẹ irivwi rehẹ evun rayen kpahen otọ.”—King James Version.

Obo ro Mudiaphiyọ: Ihwo rehẹ hẹl ghwure. Ayen che rhivwin rhe akpọ womarẹ evrẹnushi.

Ẹvwọphia 20:14: “E che do Ughwu kugbe hẹl phiyọ ẹtẹrhe rẹ erhanre na.”—King James Version.

Obo ro Mudiaphiyọ: A da kpare ihwo nẹ hẹl (Ushi) nu, ka cha ghwọrọ hẹl bẹdẹ, kerẹsiẹ a da mrẹ nẹ a vwẹ erhanre torhẹ. Nẹ etiyin yanran, ughwu ro nẹ obuko rẹ umwemwu rẹ Adam rhe rha cha dia-a.—Rom 5:12.

Eta ri Baibol vwẹ ejajẹ rẹsosuọ

Kirobo re djere vwẹ obotọ, efeta ri Baibol so otighi womarẹ ayen vwọ reyọ ota na “hẹl” vwo ruiruo vwẹ asan rẹ ejajẹ rẹsosuọ na de mudiaphiyọ erọnvwọn efa. Vwẹ ẹdia evo, ọ họhọre nẹ ayen guọnọ titi uyono na nẹ irumwemwu rẹ ihwo cha torhẹ bẹdẹ, ọ dia a cha ghwọrọ aye-en.

Sheol (Hibru) ᾅδης(Grik Hades), שְׁאוֹל

Obo ro mudiaphiyọ: Ushi ghevweghe re shi ihwo phiyọ.—Une rẹ Ejiro 16:10; Iruo rẹ Iyinkọn Na 2:31

Obo ra fanrọ phiyọ: Ushi, hẹl, ukpotọ (King James Version); orho rẹ erivwin (New International Version)
Gehina (Grik γέεννα)

Obo ro mudiaphiyọ: Oghwọrọ ri bẹdẹ.—Matiu 5:30

Obo ra fanrọ phiyọ: Gehina; hẹl (King James Version, New International Version)
Tartarọs (Grik ταρταρόω)

Obo ro mudiaphiyọ: Ẹdia rẹ ophọphọvwe rẹ emekashe rẹ Idẹbono re dia emekashe rẹ umwemwu hepha.—2 Pita 2:4

Obo ra fanrọ phiyọ: Tartarọs; hẹl (King James Version, New International Version); hẹl otete (Douay-Rheims Version)
Apoleia (Grik ἀπώλεια)

Obo ro mudiaphiyọ: Oghwọrọ.—Matiu 7:13

Obo ra fanrọ phiyọ: Oghwọrọ; hẹl (Good News Bible)
Pyr (Grik πῦρ)

Obo ro mudiaphiyọ: Erhanre rẹ aruakpọ yẹrẹ ọ rẹ udje.—Luk 17:29; Jud 23

Obo ra fanrọ phiyọ: Erhanre; erhanre ri hẹl (God’s Word Translation)

Oborẹ uyono rẹ ẹtẹrhe rẹ erhanre tonphiyọ wan

Ọ tonphiyọ nẹ obọ rẹ egọẹdjọ: Ihwo rẹ Ijipt rẹ ọke awanre vwo esegbuyota kpahen ẹtẹrhe rẹ erhanre. Ọbe rọ ta ota kpahen irivwin re se Book Ȧm-Ṭuat (Amduat), rẹ igbikuegbe tare nẹ e siri omarẹ ẹgbukpe ujorin 16 a ke rhe mrẹ ọke ri Kristi, tare nẹ ihwo re “che do phiyọ ukpotọ rẹ erhanre na; . . . cha sa djẹ vrabọ rẹ erhanre na-a.”—The Egyptian Heaven and Hell.

Inenikristi rẹ ẹgbukpe ujorin rẹsosuọ vwẹ uyono tiọyen vwọphia-a: “Ọ vwerhoma nẹ vwẹ Ọphọ Ọkpokpọ na, a mrẹ uyono rẹ ẹtẹrhe rẹ erhanre vwẹ iyono rẹ [Inenikristi rẹ egbukpe ujorin rẹsosuọ] na-a.”—A Dictionary of Christian Theology.

Iyono rẹ ihwo ri Grik shọrọ ro ẹga: “Vwo nẹ uherevie rẹ ẹgbukpe ujorin 2 vwẹ ọke ri Kristi yanran yen Inenikristi ri vwo erianriẹn evo kpahen iyono rẹ ihwo ri Grik vwo no nẹ, ofori e vwo yono iyono rẹ ẹga vwo nene oborẹ ihwo ri Grik segbuyota . . . Uyono ro me je ayen yen Platonism [iyono ri Plato].” (Encyclopædia Britannica) Uyono nana churobọ si esegbuyota re vwo kpahen a vwọ vwẹ oja re ihwo vwẹ erhanre siẹrẹ ayen de ghwu nu. “Ohwo ọvo vwẹ usun rẹ ihwo ri Grik eje ri yono ẹbe kodo ro titi uyono ri Hẹl rẹ ihwo me vwo imuẹro kpahen yen Plato.”— Histoire des enfers (The History of Hell).

A reyọ ẹtẹrhe rẹ erhanre vwo djephia nẹ o shephiyọ re vwo gboja kẹ ihwo: Vwẹ uvwre rẹ ọke ra riẹnphiyọ Spanish Inquisition, a torhẹ ihwo re brorhiẹn hwe nẹ e vwọso iyono rẹ ẹga mu urhe “vwo djudje rẹ oborẹ ayen che rhierọmrẹ vwẹ ẹtẹrhe rẹ erhanre,” vẹ ẹwẹn nẹ ayen che kurhẹriẹ tavwen ayen ki ghwu. (The Spanish Inquisition, ri Jean Plaidy siri) Ọtiọyen yen Queen Mary I rẹ England ruru rọ vwọ torhẹ ihwo ri kpo ishọshi ri Protestant ri te omarẹ 300 mu urhe, kidie kirobo ra tare, o segbuyota nẹ, “rọ vwọ dianẹ a cha torhẹ ihwo re vwọso iyono rẹ ẹga vwẹ ẹtẹrhe rẹ erhanre bẹdi bẹdẹ na, kọyen o shephiyọ ra vwọ vwẹrokere idjerhe rẹ Ọghẹnẹ che vwo gboja kẹ irumwemwu womarẹ a vwọ torhẹ ayen vwẹ otọrakpọ na.”—Universal History, rẹ Alexander Tytler siri.

Ewene rẹ ọke nana: Oborẹ ishọshi evo djisẹ rẹ hẹl rhe muoshọ te obo ri jovwo-o, ọ dia kidie nẹ ayen segbuyota nẹ ẹtẹrhe rẹ erhanre uyono rẹ efia-an, ẹkẹvuọvo kidie nẹ ayen guọnọ ru obo re cha nẹrhẹ oma vwerhen ihwo rẹ ẹga rayen. (2 Timoti 4:3) “Ihwo guọnọ sikẹrẹ Ọghẹnẹ rọ pha dẹndẹn ra je sa rua . . . Nonẹna, a fobọ nyo ihwo re ta ota kpahen umwemwu kugbe abe-e.”—Professor Jackson W. Carroll.