Kẹ ọ da Rha Dianẹ Ihwo Gun Iguegun Kpahen Ovwẹ Vwo? Kọ da Rha Dianẹ Ihwo ta Ota Kaphen Ovwẹ Vwo?

Oboresorọ ọ vwọ da ohwo

Iguegun evo miovwo ohwo—kerẹ udje, a vwẹ arudo gun iguegun rẹ efian kpahen owẹ re vwo miovwo odẹ wẹn. Ọ da tobọ dianẹ iguegun na ghwe fiemu ọvoo, ọ je da ohwo—ma rho ọ da dia ohwo rọ kẹrẹ owẹ yen gun iguegun na!—Une rẹ Ejiro 55:12-14.

“Me mrẹrẹ nẹ ugbeyan ọvo ta erharhe eta kpahen ovwẹ vwẹ obuko nẹ me davwerhọn rẹ ihwo efaa. Ọ da vwe mamọ! Me nama vwo ẹruọ rẹ oboresorọ rọ vwọ ta ota tiọyeen.”—Ashley.

Uyota: Ọ da tobọ dianẹ ohwo ro gun iguegun na ugbeyan rọ kẹre yẹrẹ ohwo ọfa, ọ vwerhen oma a da riẹn nẹ ihwo efa ta eta erharhe eta kpahen owẹẹ.

Orharhe iyẹnrẹn—ọ dia ọkieje yen wọ cha sa vwọ dobọ rọyen jii

O vwo oboresorọ ihwo vwo gun iguegun, enana evo usun rayen:

Uvi rẹ ọdavwẹ. A ma ihworakpọ vẹ ẹwẹn rẹ oyerinkugbe. Ọtiọyena, ọ dia obo re chọre ra vwọ ta ota kẹ yẹrẹ (kpahen) ohwohwoo. Vwọrẹ uyota, Baibol na jiriro kẹ avwanre nẹ a “guọnọ erhuvwu” rẹ ihwo efa.—Filipae 2:4.

“Ọkieje yen ọ vwọ vwerhen ohwo oma siẹrẹ a da ta ota kpahen ihwo efa!”—Bianca.

“Vwọ kẹ vwẹ, me guọnọ riẹn obo re phia vwẹ akpeyeren rẹ ihwo efa, me me je vuẹ ihwo efa kpahen ayen. Me riẹn oboresorọ mi vwo ruẹ ọtiọyeen—jẹ ọ vwerhen ovwẹ oma.”—Katie.

Ofudjevwe. Vwẹ ọke rẹ awanre, o vwo ihwo re “vwẹ ọke urovwoma rayen vwo ruẹ orọnvwọn ọfa vrẹ ọ rẹ ayen vwọ ta ota kpahan yẹrẹ kerhọ rẹ orọnvwọn kpokpọ-ọ.” (Iruo rẹ Iyinkọn Na 17:21) Ọtiọyen ọ je hepha nonẹna!

“Ọkievo orọnvwọn vuọvo rọ sasa ohwo oma ra herọọ, ihwo ke jẹ ọdẹ rọ sa nẹrhẹ ihwo ta ota.”—Joanna.

Oshọ. O vwo oboresorọ, Baibol na vwo si avwanre orhọ nẹ a reyọ oma rẹ avwanre vwọ vwanvwe ihwo efaa. (Galesha 6:4) Ọ da ohwo mamọ nẹ, ihwo evo niro nẹ ayen sa vrabọ rẹ oshọ rayen womarẹ ayen vwo gun efian kpahen ihwo efa.

“Erharhe iguegun nẹrhẹ a riẹn oka rẹ ohwo ogu-iguegun na hepha. Vwẹ obevun rayen, ọkieje yen ayen vwọ rioma kpahen ohwo rẹ ayen gun iguegun kpahan na. Ọtiọyena, kẹ ayen gun iguegun nene asan eje oma vwọ vwerhen ayen, vẹ ẹwẹn nẹ ayen yovwin vrẹ ohwo na.”—Phil.

Uyota: O vwo obo rọ wanree, ọkieje yen ihwo cha vwọ ta ota kpahen ihwo efa—ọtiọyen ji te we.

Omamọ iyẹnrẹn—wo jẹ o mu we rọọ

Wọ cha sa dobọ rẹ iguegun eje re gun kpahen owẹ jii, ẹkẹvuọvo wo se brorhiẹn rẹ oborẹ wo che ru. Wo de nyo nẹ a ta ota kpahen owẹ vwo nene asan eje, erọnvwọn ivẹ yen a guọnọ mie we ọ da hanvwe.

ORỌNVWỌN 1: Kpairoro vrẹ. Obo ri me yovwin ọkieje yen a vwọ kpairoro vrẹ—ma rho ọ da dianẹ o fiemu ọvoo. Ru nene odjekẹ ri Baibol na: “Wọ fobọ mu ophu-u.”—Aghwoghwo 7:9.

“Ihwo gun iguegun nene asan eje nẹ me vẹ ọmọshare ọvo kọnphiyọ ohwohwo—jẹ me vẹ ọyen je rhe mrẹ ohwohwo dẹvoo! O gbevwenu mamọ tẹ ẹdia mi di vwo ru ehwẹ.”—Elise.

“Omamọ rẹ odẹ yen ekpọfia ra vwọ họnra vwọso iguegun. Ọ da tobọ dianẹ a ta eta ebrabra kpahen owẹ nene asan eje, wo de vwo omamọ odẹ, imihwo krẹn yen che vwo imuero kpahọn. O che kri uyota na ke cha vwomaphiaa.”—Allison.

Iroroẹjẹ: (1) Si obo ra ta kpahen owẹ na phiyotọ (2) oborẹ oma ru we. Siẹrẹ wo de “nene udu wẹn gbe iku” nu, wọ Sa mrẹ lọlọhọ wọ vwọ kpairoro vrẹ.—Une rẹ Ejiro 4:4.

ORỌNVWỌN 2: Bru ohwo rọ tuẹn iguegun na phiyọ ra. Vwẹ ẹdia evo, wo se no nẹ iguegun na brare mamọ nẹ o fori wo vwo nene ohwo rọ ton rọ phiyọ ta ota.

“Wo de bru ihwo ri gun iguegun kpahọn owẹ na ra, ayen sa riẹn nẹ iguegun na te obọ rẹ ohwo rẹ ayen guẹn na re. Vwọba, wo si fun ota na womarẹ wọ vwọ nabọ rhuẹrẹ obẹnbẹn na phiyọ.”—Elise.

Tavwen wo ki bru ogu-iguegun na ra, fuẹrẹn odjekẹ ri Baibol rehẹ obotọ na wọ je nọ oma wẹn enọ re vwọ kpahọn na.

• “Wọ da kpahe ota tavwe wo ki nyo, ọye ẹkpa.” (Isẹ 18:13) ‘Me ghene riẹn uyota rẹ erọnvwọn na eje? Gbanẹ ohwo rọ vuẹ vwẹ kpahen iguegun na vwo ẹruọ rẹ obo ro nyorii?’

• “Kohwo kohwo fobọ nyo, ọ fobọ ta ota-a, ọ fobọ muophu-u.” (Jems 1:19) ‘Ọna yen ọke ro fori mi bru ogu-iguegun na ra? O mu vwẹ ẹro nẹ me ghene vwẹ ẹro rẹ abavo vwo ni ota na? Gbanẹ me vwẹ ọke kẹ oma mẹ rere ẹwẹn mẹ nabọ totọ tavwen?’

• “Oborẹ wọ guọnọre nẹ ihwo nene uwe yerin wan ji nene ayen yerin ọtiọyen.” (Matiu 7:12, NET Bible) ‘Ọ da diẹ omẹvwẹ yen ẹdia tioyen, mavọ yen me guọnọre nẹ a ta ota kẹ vwẹ wan? Oka asan vọ yen me guọnọre nẹ a da ta ota kpahen obẹnbẹn na? Oka rẹ eta vẹ uruemu vọ yen me yovwin?’

Iroroẹjẹ: Tavwen wo ki bru ogu-iguegun na ra, si obo ru wọ cha ta phiyotọ. Gba hẹrhẹ udughwrẹn ọvo yẹrẹ ivẹ, rere wọ rhoma se obo ru wo si phiyotọ na, sẹ asan ọvo herọ rọ guọnọ ewene. Vwọba, nene ọsẹ vẹ oni wẹn yẹrẹ ugbeyan ro tedje ta ota kpahen obo ru wọ guọnọ ruẹ na, wọ je nokpẹn rẹ uchebro mie ayen.

Uyota: Iguegun ọyen ọvo usun rẹ erọnvwọn buebun re che sun vwẹ akpeyereen. Jẹ ọ dia ọyen o vwo fo nẹ wọ rhọnvwe kẹ nẹ o sun wee!