ENỌ RẸ IGHENE NỌ
Diesorọ Ọsẹ vẹ Oni mẹ Rhọnvwa kẹ Vwẹ nẹ me Riakpọọ?
Igbeyan wẹn durhie uwe nẹ wọ rhe ipati ọvo vwẹ oba rẹ udughwrẹn na. Wọ da nọ ọsẹ vẹ oni wẹn sẹ wọ sa ra, ayen da kpahen kẹ wẹ goi nẹ, “Ẹjo.” O gbewunuu, kidie ọyen ẹkpahọnphiyọ rẹ ayen je kẹ jovwore.
Vwẹ uyovwinrota nana
Diesorọ ọsẹ vẹ oni mẹ vwọ vwẹ ọkieje vwọ vuẹ vwẹ nẹ ẹjo?
Die mi se ru ọsẹ vẹ oni mẹ vwọ rhọnvwe kẹ vwẹ?
Oborẹ edje wẹn tare
Diesorọ ọsẹ vẹ oni mẹ vwọ vwẹ ọkieje vwọ vuẹ vwẹ nẹ ẹjo?
Ọhọhọre nẹ ọkieje yen ọsẹ vẹ oni wẹn vwọ sian kẹ wẹ, ọyena sa nẹrhẹ wo no nẹ ayen guọnọre nẹ wọ riakpọọ.
Ọtiọyen oma ru eghene rẹ ọmọtẹ ọvo re se Marie ọke ro vwo vwo ifonu rẹsosuọ rọyen. Ọ da ta: “Ọsẹ mẹ vwẹ irhi buebun vwo mu kpahen aplikeshọni me sa danlodu, ihwo rẹ mi se nene ta ota, vẹ ọke mi che nene ayen ta ota te. Jẹ igbeyan mẹ se ru obo ri je ayen eje!”
Obo re roro kpahen: Ọsẹ ri Marie ghene guọnọ dobọ rọyen ji o vwo jẹ akpọ ẹriọ? Die ọfa yen kpokpo ọsẹ na ẹwẹn?
Ispid limiti re phi phiyọ idjerhe sa nẹrhẹ wọ djẹ imoto wẹn kpata te obo wọ guọnọree, ẹkẹvuọvo ọ sẹro wẹn nẹ imuoshọ rẹ idjerhe na; ọtiọyen yen ọ je pha vwọ kẹ irhi rẹ ọsẹ vẹ oni wẹn phi phiyotọ
Davwen ọnana ni: Ru kerẹsiẹ a da mrẹ nẹ wẹ ọsẹ yẹrẹ oni, wo ji vwo eghene rẹ ọmọtẹ yẹrẹ ọmọshare ro ghwe vwẹ ifonu obọ. Erọnvwọn vọ yen che kpokpu we ẹwẹn? Irhi vọ wo che phi phiyotọ wọ sa vwọ sẹro rẹ ọmọ wẹn? Die wọ cha ta ọmọ wẹn da vuẹ wẹ nẹ wọ guọnọre nẹ ọyen riakpọọ?
“Ọkieje yen ọsẹ mẹ vwọ vuẹ vwẹ nẹ, ‘Phi oma wẹn phiyọ ẹdia mẹ kerẹ ọsẹ.’ Ọyena mi ruru na cha vwẹ uko vwọ riẹn ọghanrovwẹ rẹ irhi rọyen vẹ oboresorọ ọ vwọ vwẹ ayen vwo mu. Mi de rhi vwiẹ emọ, mi niro nẹ oborẹ ọsẹ mẹ rhẹro rọyen mie vwe na yen mi ji che rhẹro rọyen mie emọ mẹ.”—Tanya.
Die mi se ru ọsẹ vẹ oni mẹ vwọ rhọnvwe kẹ vwẹ?
“Ovan ghwa erhuvwu vuọvo chaa, ukperẹ ọtiọyen, ọ cha nẹrhẹ oma ghwọrọ owẹ vẹ ọsẹ kugbe oni wẹn. Wo de si isiesi, ọ sa nẹrhẹ ọsẹ vẹ oni wẹn no nẹ wo ji tedjee, ọ me nẹrhẹ ayen gbere ughwru kẹ wẹ.”—Richard.
“Omamọ iroro yehẹ obuko rẹ kurhi kurhi rẹ ọsẹ vẹ oni mẹ phiẹ phiyotọ kẹ vwẹ. Ọ dianẹ ọsẹ vẹ oni mẹ guọnọ dobọ mẹ jẹ mi vwo jẹ akpọ ẹriọọ; ayen guọnọre nẹ me riakpọ vwẹ idjerhe ro shephiyọ—akpọ ẹriọ rọ vrabọ rẹ okpetu.”—Ivy.
Odjekẹ ri Baibọl: “Ẹkpa ri di muẹ van gudu gudu, ẹkẹvuọvo ọvwaghwanre jomaotọ rhivwẹ ophu rọye rọ.”—Isẹ 29:11.
“Mi ruro vwẹ idjerhe rẹ ọsẹ vẹ oni mẹ vwo je nosua nẹ me kerhọ rẹ irhi rẹ ayen phi phiyotọ kpahen ifonu mẹẹ. Me davwẹngba vwọ guọnọ idjerhe mi se vwo si ovuẹ rhe igbeyan mẹ vwẹ ason yẹrẹ danlodu rẹ aplikeshọni rẹ ọsẹ mẹ rhọnvwe phiyọọ. Ukuotọ rọyen, kọ cha rhe riẹn oborẹ mi ruẹ ji siẹ irhi na gan vrẹ obo ri jovwo kidie enẹna ọ rha vwẹroso ovwẹẹ. E vwo hworo ona oborẹ a vwọ sen irhi re phi phiyotọ kẹ avwanre ghwa dia oborẹ ọhọ hephaa.”—Marie.
“Vwo erhiorin. Ọ sa reyọ ọke ọsẹ vẹ oni wẹn ki ru ewene phiyọ irhi rẹ ayen vwo mu, jẹ ayen da mrẹ nẹ wo nene irhi rẹ ayen vwo mu, ọ sa nẹrhẹ ayen kẹ wẹ ugbomọphẹ rẹ wo vwo ru erọnvwọn evo.”—Melinda.
Odjekẹ ri Baibọl: “We muọghọ kẹ esẹ vẹ ini rẹ ovwan vwẹ emu ejobi.”—Kọlose 3:20.
“Re vwo siufu oborẹ wọ guọnọre nẹ e ru kẹ wẹ che se fierere kẹ wẹẹ, yẹrẹ nẹrhẹ wo vwo oborẹ wọ guọnọre naa.”—Natalie.
“Ọsẹ yẹrẹ oni guọnọ mrẹvughe nẹ wo roro emu fiotọ. Ọtiọyena, me da ta ota kẹ ọsẹ vẹ oni mẹ, me davwẹngba vwo ru ọtiọyen vwẹ idjerhe rẹ ayen de se vwo ẹruọ oborẹ me ta na ukperẹ mi vwo si opharo phiyọ. Mi de ru ọnana, kọ nẹrhẹ mi phiẹ kparobọ.”—Joseph.
Odjekẹ ri Baibọl: “Muọghọ kẹ ọsẹ wẹn vẹ oni wẹn.”—Ẹfesọs 6:2.