Olimpiki na sa Ghene Ghwa Okugbe Rhe?​—Die Yen Baibol na Tare?

Vwẹ Olimpiki ri 2024 na, ihwo ri bun te omarẹ oduima iyorin yen che nughe rẹ ihwo ri nẹ ẹkuotọ 206 rhe re heha rẹ Olimpiki na. Thomas Bach rọ dia iprẹsidẹnti rẹ Olimpiki na tare nẹ, “Avwanre hẹ ẹbẹre ọvo rẹ irueru rọ cha ghwa ufuoma rhe. E je brọghọ phiyọ iroro ra vwọphia womarẹ Olimpiki na, nẹ ihworakpọ na eje yerin kugbe vwọrẹ ufuoma, dede nẹ avwanre fẹnẹ ohwohwo.”

Olimpiki na ghene sa ghwa ufuoma vẹ okugbe rhe? Ufuoma vẹ okugbe ghene sa dia?

Ọ sa ghwa ufuoma vẹ okugbe rhe?

Olimpiki rẹ enukpe na mu ihwo vwo roro kpahen erọnvwọn efa vwọ vrẹ a de vwọ heha. Ọ kanrunumu eta ri churobọ si uturhi rẹ ohwo ọvuọvo vwori, omaẹfẹnẹ, utuoma kpahen ihwo fikirẹ oborẹ ayen segbuyota, vẹ ẹro re vwo nẹ eya.

Ehaẹha re ruẹ vwẹ akpọ na eje kerẹ Olimpiki na nẹrhẹ oma vwerhan ihwo. Ẹkẹvuọvo, a je mrẹvughe nẹ ehaẹha tiọna ji mu ihwo vwo ru obo re cha so ohẹriẹ vwẹ uvwre rayen, kọyen o titi uruemu rẹ ohẹriẹ ukperẹ ufuoma vẹ okugbe.

Baibol na mraro kpahen uruemu rẹ ihwo che djephia rọ cha nẹrhẹ ọ bẹn e vwo yerin vwọrẹ ufuoma nonẹna. (2 Timoti 3:​1-5) Wo se vwo yono kpobarophiyọ kpahen aroẹmrẹ nana, se uyovwinrota na “Baibol Mraro Oborẹ Ihwo Roro Emu Wan vẹ Oborẹ Ayen Ruẹ Nonẹna?”

Uvi rẹ iphiẹrophiyọ rẹ ufuoma vẹ okugbe vwẹ akpọ na

Baibol na ta ota kpahen ufuoma vẹ okugbe rọ cha dia akpọ na eje. O veri nẹ okugbe cha dia vwọ kẹ ihwo eje vwẹ otọ rẹ “Uvie rẹ Ọghẹnẹ,” rọ dia usuon rọyen rọhẹ obodjuvwu.​—Luk 4:43; Matiu 6:10.

Jesu Kristi rọ dia Ovie rẹ Uvie yena, cha nẹrhẹ ufuoma dia akpọ na eje. Baibol na da ta:

• “Ọvwata dia buebu, rere ufuoma bu.”​—Une rẹ Ejiro 72:7.

• “O sivwi ọ rẹ akpọ bẹn vwẹ ọke ro de kperi se . . . Nẹ oshenyẹ vẹ ogbarogba ọ tan arhọ rayen nurhe.”​—Une rẹ Ejiro 72:​12, 14.

Nonẹna, iyono ri Jesu kuẹ iduduru rẹ ihwo rehẹ ẹkuotọ ri te 239 kugbe re. Kerẹ Inenikristi, Iseri ri Jihova vwẹ akpọ na eje yerẹn kuẹgbe vwọrẹ ufuoma. Wọ sa vwọ mrẹ oborẹ ayen ruo wan, se Uwevwin Orhẹrẹ ro vwo uyovwinrota na “E se Phi Utuoma Kparobọ.”