Diesorọ Utuoma Vwọ Vọn Asan Eje?—Die Yen Baibol na Tare?

Eta rẹ ebrabra, ozighi egbe, uruemu rẹ omaẹfẹnẹ, vẹ ofovwin vọn evunrẹ iyẹnrẹn.

“Eta rẹ ebrabra rhe vọn sosha midia vrẹ obo ri jovwo enẹna fikirẹ ọhọnre rọhẹ uvwre rẹ Israel vẹ Gaza, kugbe fikirẹ ihwo ri jiri uruemu ozighi egbe vẹ utuoma.”—The New York Times, November 15, 2023.
“Rhanvwẹ emeranvwe ri October 7th, eta rẹ ebrabra vẹ uruemu rẹ ozighi egbe kọ rhoma braphiyọ vrẹ obo ri jovwo fikirẹ uruemu rẹ omaẹfẹnẹ re herọ.”—Dennis Francis, iprẹsidẹnti ri United Nations General Assembly, November 3, 2023.

Ọ dia nonẹ yen eta rẹ ebrabra, ozighi egbe vẹ ofovwin vwọ hẹrọ-ọ. Vwọrẹ uyota, Baibol na djisẹ rẹ ihwo evo vwẹ ọke awanre re vwẹ “ota ọbrabra sa ohwo kerẹ edada” ri ji vwobọ vwẹ ofovwin vẹ ozighi egbe. (Une rẹ Ejiro 64:3; 120:7; 140:1) Baibol na djere fiotọ nẹ o vwo oboresorọ utuoma rẹ avwanre mrẹ nonẹna vwọ herọ.

Utuoma ọyen oka rẹ ọke avwanre na

Baibol na ta ota kpahen iroro ivẹ re sorọ utuoma vwọ vọn asan eje nonẹna.

1. Ọ mrarọ rẹ ọke rọ cha, nẹ “ẹguọnọ rẹ ihwo buebun ko che djiro.” (Matiu 24:12) Ukperẹ e vwo dje ẹguọnọ phia, uruemu rẹ utuoma kọyen ihwo djephia.—2 Timoti 3:1-5.
2. Obọ rẹ Idẹbono rọ dia Eshu na yen ẹwẹn rẹ utuoma ọgangan rọhẹ akpọ na nonẹna nurhe. Baibol na tare nẹ “akpọ na eje hẹ obọ rẹ ohwo umwemwu na.”—1 Jọn 5:19; Ẹvwọphia 12:9, 12.

Ẹkẹvuọvo, Baibol na je ta nẹ o rhe che kri-i, Ọghẹnẹ ko che phioba phiyọ kemu kemu rọ ghwa utuoma cha vwo no. Vwọba, o che si ọmiaovwẹ rẹ utuoma soro vwo no. Baibol na de ve:

Ọghẹnẹ “che rien ameoviẹ eje vwo nẹ ẹro rayen, ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a. Erọnvwọn awanre na wanvrẹ re.”—Ẹvwọphia 21:4.