Amagidọn Cha Tonphiyọ Vwẹ Izrẹl?​—Die Yen Baibol na Tare?

Amagidọn dia ofovwin ro che djobọte ẹkuotọ evo vwẹ otọrakpọ na ọvo-o, ẹkẹvuọvo Baibol na djere phiyọ ofovwin rọ cha phia uvwre usuon rẹ ihworakpọ eje vẹ Ọghẹnẹ.

• “Eta ri nẹ obọ rẹ emekashe rẹ Idẹbono rhe . . . bru ivie rẹ akpọ na ejobi ra re koko ayen vwọ kẹ ofovwin rẹ ẹdẹ rode rẹ Ọghẹnẹ Ọromevwẹgba na. . . . Ayen de koko ayen kpo asan ra vwẹ Hibru se nẹ Amagidọn.”​—Ẹvwọphia 16:​14, 16.

Ota na “Amagidọn,” nẹ ota ri Hibru na Har Meghid·dohnʹ rhe, ro mudiaphiyọ “Ugbenu ri Mẹgido.” Mẹgido ọyen orere vwẹ Izrẹl rẹ awanre. Fikirẹ ọyena, ihwo evo de vwo imuẹro nẹ ofovwin rẹ Amagidọn cha tonphiyọ vwẹ Izrẹl. Ẹkẹvuọvo, o vwo ekogho ri Mẹgido vuọvo yẹrẹ ekogho efa vwẹ Middle East rọ rho te asan rọ sa gba “ivie rẹ akpọ na ejobi” vẹ isodje raye-en.

“Eka” yẹrẹ eta rẹ idjedje yen e vwo si ọbe rẹ Ẹvwọphia na. (Ẹvwọphia 1:1) Ọ dia asan ọvo kiriguo yen Amagidọn mudiaphiyọ-ọ, ẹkẹvuọvo o mudiaphiyọ ẹdia rẹ akpọneje de che koko vwọso usuon rẹ Ọghẹnẹ, rọ dia ẹvwọsuọ rọ koba rayen.​—Ẹvwọphia 19:​11-16, 19-21.