“Me Rha Dia Orharhe Ohwo Ọfaa”

AKPỌ MI YERIN JOVWO

Gomba vwẹ Uganda yen e de vwiẹ vwẹ. Ihwo buebun re dia orere na igbere. Urhukpẹ rẹ ẹlẹtriki hẹ orere naa, ọtiọyena urhukpẹ rẹ obọ kọyen avwanre vwo muẹ vwẹ ason.

Ọsẹ vẹ oni mẹ eghwẹrẹ, ayen kua nẹ Uganda kpo Rwanda. Ayen kọn ikọfi vẹ idibo, ayen je reyọ idibo na vwo ruẹ udi ro muẹ ohwo rẹ ihwo buebun riẹnre mamo re se waragi. Ọsẹ vẹ oni mẹ ji churu ehọ, ẹvwe, esi vẹ inama. Ẹkuruemu rẹ asan mi nurhe vẹ obo ra ghẹre ovwẹ wan nẹrhẹ o muvwẹro nẹ ofori nẹ aye vwomakpotọ kẹ ọshare rọyen ọkieje, nẹ ọ nama ta obo rehẹ ẹwẹn rọyen phiaa.

Me vwọ hẹ ẹgbukpe 23, me da kua kpo Rwanda, oboyin kọyen mẹvwẹ vẹ ihwo efa re me vẹ ayen gbahẹ edje de kpo iklọbu sansan re gbeha. Mi kpo ọvo usun rẹ iklọbu na te ẹdia rẹ ohwo ro vwo asan na da kẹ vwẹ ikadi me vwọ ruọ ọphẹ. Ifimu rẹ ihwo da họnra ji gbe ozighi ji je vwe. Asan re me diare vẹ ighe ri mi niri da nẹrhẹ me rhe dia onogbozighi, ọvwọfanrhiẹn kugbe ọgbaudi.

Vwẹ ukpe ri 2000, mẹvwẹ vẹ eghene aye ọvo re se Skolastique Kabagwira kọyen gba dia, avwanre de vwiẹ emọ erha. Vwo nene obo ri mi yonori me vwọ hẹ eghene, mi rhẹro rọyen nẹ o che shiguẹ vwẹ obaro mẹ siẹrẹ o de yeren uvwe yẹrẹ ọ da guọnọ nokpẹn rẹ orọnvwọn mie vwe. Me je tanẹ ekuakua rẹ avwanre vwori eje emẹ, nẹ obo ri jevwe yen me cha vwẹ ayen vwo ru. Ọke buebun yen mi vwo nẹ uwevwin vwẹ ason, ki mi rhivwin cha vwẹ omarẹ ughọjọ erha rẹ urhiọke, jẹ ọke yena me da udi vroma re. Me da vwẹ obọ teyen ẹchẹ, Skolastique da ghwọrọ ọke o ki rhie ẹchẹ na, ki mi hwe ehwe rẹ ugbobọ.

Vwẹ ọke yena, me vwẹrote ihwo re rhẹrẹ otọ vwẹ ikọmpini ọvo, a je hwa okposa kẹ vwẹ. Vwẹ obẹ uwevwin, Skolastique vuẹ vwẹ nẹ me vwomaba ọyen vwo kpo ẹga ri Pentecostal rọ ra, kidie o rorori nẹ ọnana che wene akpeyeren mẹ. Ẹkẹvuọvo me guọnọ raa. Ukperẹ ọtiọyen, aye ọfa kọyen me vẹ ọyen gba jẹ ọsen. Fikirẹ orharhe rẹ uruemu mi djephia, me ke rha je dia ọvwọfanrhiẹn na, Skolastique de mu emọ na, ọ da kua kpo uwevwin rẹ ọsẹ vẹ oni rọyen.

Ugbeyan rẹ avwanre rọ kpakore da ta ota kẹ vwẹ kpahen oka rẹ akpọ ri mi yerẹn. Ọ da vuẹ vwẹ nẹ mi rhivwin bru Skolastique ra. Ọ tare nẹ ọyen obo ri shephiyọ me vẹ emọ mẹ vwọ dia kugbe. Ọtiọyena vwẹ ukpe ri 2005, me da dobọ rẹ udi ẹda ji, je yanjẹ aye re me vẹ ọyen gba jẹ ọsen na vwo, mi de rhivwin bru Skolastique ra. Avwanre da rọvwọn vwẹ ukpe ri 2006. Ẹkẹvuọvo, me je djoma je ta erharhe eta kẹ aye mẹ.

OBORẸ BAIBOL NA WENE UVWE WAN

Vwẹ ukpe ri 2008, ọvo usun rẹ Iseri ri Jihova re se Joël de rhi ghwoghwo ota kẹ vwẹ vwẹ uwevwin rẹ avwanre, me da kerhọ kẹ ovuẹ rọyen. Emeranvwe buebun yen ọ vẹ Oseri ọfa re se Bonaventure vwo bru vwe rhe ọkieje, je nabọ dje kpahen Baibol na kodo. Me nọ enọ buebun, ma rho vwọ kpahen ọbe rẹ Ẹvwọphia. Me davwẹngba vwo djephia kẹ Iseri na nẹ iyono rayen gbaree. Kerẹ udje, me nọre nẹ diesorọ ayen vwọ tanẹ “otu gbidigbidi” ra ta ota kpahen vwẹ ọbe rẹ Ẹvwọphia 7:9 cha dia otọrakpọ na, jẹ owọrota na tare nẹ ayen “mudia obaro rẹ ekete [rẹ Ọghẹnẹ] na kugbe obaro rẹ Omogodẹ na,” Jesu Kristi. Joël nabọ kpahenphiyọ enọ mẹ. Kerẹ udje, o dje Aizaya 66:1 kẹ vwẹ, vwẹ ẹkpo ri Baibol yena Ọghẹnẹ tare nẹ akpọ na ọyen asan rọ “ghwẹ awọ kpaha.” Ọtiọyena, otu gbidigbidi na ghini mudia otọrakpọ na vwẹ obaro rẹ ekete rẹ Ọghẹnẹ. Mi de se Une rẹ Ejiro 37:29, rọ tare nẹ ọvwata cha re ughwẹ rẹ otọ na.

Ọke vwọ yanran na, mi de rhiabọreyọ uyono ri Baibol. Ọtiọyena Bonaventure de yono uvwe vẹ Skolastique. Avwanre vwo yono Baibol na, mi de rhi vwo owenvwe mi vwo ru ewene vwẹ akpeyeren mẹ. Mi yono obo re muọghọ kẹ aye mẹ. Me rha guọnọ nẹ o shiguẹ vwẹ obaro mẹ siẹrẹ o de yeren uvwe yẹrẹ nokpẹn rẹ orọnvwọn mie vwee, me gbe je tanẹ ekuakua rẹ avwanre vwori eje emẹẹ. Mi gbi ji nẹ ifimu re de gbe ozighii. Ọ lọhọre re vwo ru ewene nana ejee kidie ọ guọnọ obọdẹn rẹ omaẹriẹnsuo kugbe omaevwokpotọ.

Vwẹ ikpe evo re wanre, mi mu Christian ọmọ mẹ ọkpako bru ihwo rẹ orua mẹ ra vwẹ Uganda nẹ o nene ayen dia. Ẹkẹvuọvo mi rhi vwo se Urhi Rivẹ 6:4-7 nu, me da rhe mrẹvughe nẹ ọyen oghwa ro te vwe vẹ aye mẹ avwanre vwọ vwẹrote emọ rẹ avwanre ji yono ayen kpahen odjekẹ rẹ Ọghẹnẹ. Oma vwerhen avwanre vẹ ọmọshare rẹ avwanre ọke rẹ avwanre vwo muo rhe uwevwin!

ERERE RE ME MRẸRE

Mi yonori nẹ Jihova, Ọghẹnẹ rẹ arodọnvwẹ, mi ji vwo esegbuyota nẹ o vwo ghovwo uvwe fikirẹ erharhe rẹ iruemu ri mi djephia vwẹ obuko re. Oma vwerhen ovwẹ nẹ Skolastique vwomaba vwẹ vwẹ uyono ri Baibol na. Avwanre da vwomakpahotọ kẹ Jihova ji bromaphiyame vwẹ December 4, 2010. Enẹna avwanre vwẹroso ohwohwo, oma je vwerhen avwanre kidie orua rẹ avwanre vwẹ odjekẹ ri Baibol vwo ruiruo. Oma vwerhen aye mẹ mamọ nẹ me rha vwẹriẹ asan ọfa mi de nẹ iruo chaa. Oma je vwerhọn nẹ mi muọghọ kẹ, nẹ mi ji brorhiẹn komobọ nẹ me cha kẹnoma kẹ udi ọgangan, nẹ me rha cha dia orharhe rẹ ohwo ọfaa. Vwẹ ukpe ri 2015, a da vwẹ ovwẹ mu ọkpako vwẹ ukoko rẹ avwanre. Erha usun rẹ emọ avwanre iyorin bromaphiyame re.

Ọke rẹ me vẹ Iseri ri Jihova vwo yono Baibol na, o dia mi di gbe nene oborẹ ayen yono uvwee. Ẹkẹvuọvo oborẹ ayen reyọ Baibol na vwọ kpahenphiyọ enọ mẹ wan yen te vwe ẹwẹn. Me vẹ Skolastique da rhe mrẹvughe nẹ ofori nẹ ihwo re ga Ọghẹnẹ rẹ uyota na yeren akpọ nene iwan rọyen eje, ọ dia e rẹ avwanre ghwa guọnọ ọvoo. Me kpẹvwẹ Jihova mamọ nẹ o si vwe te oma nẹ asaọkiephana mẹvwẹ jẹ ọvo usun rẹ ihwo rẹ orua rọyen re vwẹ ẹga kẹ. Mi vwo roro kpahen oka rẹ akpọ mi yerin jovwo, ko rhi muvwẹro nẹ womarẹ ukẹcha rẹ Ọghẹnẹ, kohwo kohwo ro vwo ẹwẹn esiri se ru ewene ji ru obo re vwerhan Ọghẹnẹ oma.