ENỌ RẸ IGHENE NỌ
Die Yen Mi se ru Me da Churhi rẹ Ọsẹ vẹ Oni mẹ Vwo Mu?
Erua buebun vwo irhi vwẹ orua rayen, ọkiọvo ọ sa dia urhi ro shekpahen ọke ro fori nẹ e vwo te uwevwin, uchọke ro fori nẹ a ghwọrọ phiyọ ifonu, itablẹti yẹrẹ ikọmputa, vẹ obo re che nene ihwo yerin wan.
Ọ da rha dianẹ wọ churhi ọvo re vwo mu vwẹ orua wẹn vwo? Wọ cha sa rhẹriẹ obo re phiare na-a, ẹkẹvuọvo, o vwo obo wo se ru o vwo jẹ braphiyọ. Uyovwinrota nana che dje obo wo se ru kẹ wẹ.
Obo ro fori nẹ wo ru-u
Ọsẹ yẹrẹ oni wẹn rha riẹn nẹ wọ churhi ọvo rẹ ayen vwo mu-u, ọnana sa nẹrhẹ wo hirharoku ọdavwini wo vwo si oruchọ wẹn nu.
Vwẹ ọke rẹ ayen da riẹn nẹ wọ churhi re vwo mu, wo se hirharoku ọdavwini wo vwo guomariase yẹrẹ guon nyẹ ohwo ọfa.
O vwo ọvuọvo vwẹ usun ivẹ na ro yovwiri-in. Diesorọ? Kidie e vwo rhurhu oruchọ rẹ ohwo ji guomariase dia oborẹ ọhọ hepha-a. Ọnana ghwe djephia kẹ ọsẹ vẹ oni wẹn nẹ wo ji rhi tedje-e.
“Efian ẹvwọrọn cha sa rhuẹrẹ emu na phiyọ-ọ. Ọke vwo yanran na, ayen cha mrẹ uyota rẹ ota na vughe, ọnana kọ cha nẹrhẹ ọghwọku rẹ ayen cha vwọ kẹ wẹ gan vrẹ obo ro fori nẹ ọ dia mane ku wọ ta uyota jovwo.”—Diana.
Owọẹjẹ ro shephiyọ
Rhọnvwe oruchọ wẹn. Baibol na da ta: “Ohwo ro si ogbeku rọye nu che se yovwi-i.” (Isẹ 28:13) Ọsẹ vẹ oni wẹn riẹnre nẹ wọ gbare-e, ẹkẹvuọvo, ayen guọnọre nẹ wọ dia ohwo rẹ uyota.
“Ọsẹ vẹ oni wẹn se vwo ghovwo uwe wọ da ta uyota. Ayen je cha vwẹroso owẹ phiyọ siẹrẹ wọ da ta uyota kẹ ayen.”—Olivia.
ovwunu. Baibol na da ta: “Vwẹ omaevwokpotọ ru amwa vwo rhuo.” (1 Pita 5:5) Omaevwokpotọ yen che mu we vwo yovwunu nẹ “wọ ghwọ-ọ” ukperẹ wo vwo guomariase.
“Ohwo de guomariase ọkieje, ẹwẹn obrorhiẹn rọyen rhe kpokpo gan nọ ọke ro de ruchọ-ọ. Ọke vwọ yanran na, ẹwẹn obrorhiẹn rọyen mi ghwudirhẹn, o gbi che rhe kpokpo ọke ro de ru obo re brare-e.”—Heather.
Rhiabọreyọ ọghwọku na. Baibol na da ta: “Nyo uyono.” (Isẹ 8:33) Kẹnọma kẹ unuebro, wo mi rhiabọreyọ koka koka rẹ ọghwọku rẹ ọsẹ yẹrẹ oni wẹn vwọ kẹ wẹ.
“Wo de brenu vwọ kpahen ọghwọku ra vwọ kẹ wẹ, ọnana cha nẹrhẹ ọghwọku na rhoma ganphiyọ. Rhiabọreyọ ọghwọku na, wo mi ji si ẹwẹn vwo nẹ obo re va wẹ abọ.”—Jason.
Ru obo re cha nẹrhẹ ayen rhoma vwẹroso owẹ. Baibol na da ta: “Ku oma rẹ ovwan rẹ awanre na kugbe uruemu rẹ ovwan rẹ awanre na . . . kufia.” (Ẹfesọs 4:22) Rhe ruẹ obo ri yoma rere ọsẹ vẹ oni wẹn sa vwọ rhoma vwẹroso owẹ.
“Wo de brorhiẹn rẹ aghwanre ọkieje ji djephia kẹ ọsẹ vẹ oni wẹn nẹ wọ cha vwariẹn oruchọ yena ọfa-a, kẹ ayen cha vwẹroso owẹ ukuko na.”—Karen.
IROROẸJẸ: Ru vrẹ oborẹ ayen vuẹ wẹ nẹ wo ru, rere ayen sa vwọ vwẹroso owẹ. Kerẹ udje, vwẹ ọke rẹ wo de kpo asan, jẹ ọsẹ vẹ oni wẹn riẹn ọke ru wo che vwo te uwevwin—ọ da tobọ dianẹ wọ cha dia kri-i. Ọnana cha nẹrhẹ ayen riẹn nẹ wọ guọnọre nẹ ayen rhoma vwẹroso owẹ.