UKẸCHA VWỌ KẸ ORUA | ORỌNVWE
Oborẹ Udi-ẹda Vroma Sua Vwẹ Orọnvwe
Ọrivẹ orọnvwe wẹn vuẹ wẹ jovwore nẹ udi-ẹda wẹn na vwerhan ọyen omaa? Ọ da dia ọtiọyen, o vwo erọnvwọn evo ro fori nẹ wo roro kpahen.
Vwẹ uyovwinrota nana
Orọnvwe vẹ udi-ẹda vroma gbaa
Uruemu ra vwọ da udi vroma sa so ebẹnbẹn rẹ omakpokpọ sansan kerẹ ọga rẹ ubiudu, irhue ro vwo eka kugbe ikansa. Ẹkẹvuọvo, ọ dia obẹnbẹn rẹ omakpokpọ ọvo yen nẹ udi-ẹda vroma chaa; ọyen obẹnbẹn vwẹ orọnvwe rọ sa so ozighi-egbe vwẹ uwevwin, obẹnbẹn rẹ igho, jẹ evun-ẹfuọn kugbe orọnvwe ẹfan.
Baibol na tare nẹ udi-ẹda vroma “rhovwa kerẹ ọrọdekọ, ọ rhovwa kerẹ utezi.” (Isẹ 23:32) Mavọ yen wọ sa vwọ riẹn sẹ udi yen sun we?
Udi yen sun we?
Enọ rehẹ obotọ na sa cha wẹ uko vwọ riẹn sẹ udi yen sun we:
Wọ mrẹ bẹnbẹn wo vwo sun idi-ẹda wẹn?
Ọkieje wo vwo roro kpahan ọke wọ cha vwọ rhoma da udi?
Wọ je da idi dede nẹ ọ so ebẹnbẹn vwẹ akpeyeren vẹ orọnvwe wẹn re?
Wọ mrẹ nẹ emuọvo shechọ vwẹ oma wẹn siẹrẹ wọ da davwẹngba wọ vwọ dobọ rọyen ji?
Idi-ẹda wẹn na nẹrhẹ owẹ vẹ ọrivẹ rẹ orọnvwe wẹn phraphro?
Ẹgba wo vwo sun idi-ẹda enẹna shekpotọ vrẹ obo ri jovwo?
Wọ bẹbẹ da udi yẹrẹ siẹ udi nẹ vwevunrẹ uwevwin yẹrẹ obẹ iruo?
Ẹkpahọnphiyọ wẹn vwọ kẹ ọvo yẹrẹ evo usun rẹ enọ nana da dia e, kọyen udi yen sun we. Ọ sa dianẹ wo vwo obẹnbẹn ọvo, wẹwẹ ogbaudi.
Kẹnoma kẹ uruemu re vwo guomariase
Ọrivẹ orọnvwe wẹn vuẹ wẹ jovwore nẹ udi ẹda wẹn na vwerhan ọyen omaa? Ọ da dia ọtiọyen, ọ sa dianẹ wọ davwẹngba vwo guomariase je tanẹ o fiemu vuọvoo. Ọ sa dianẹ wo gunro nyẹ ihwo efa ji te ọrivẹ orọnvwe wẹn, ru wọ vwọ tanẹ:
“Wọ da nabọ vwẹrote vwe jovwo, me ra da idii.”
“Wọ da wian owian ọgangan kerẹ ọ mẹvwẹ, wọ je cha da udi.”
“Mi vughe ihwo buebun re da vrẹ vwẹ.”
Wọ da ta eka rẹ eta tiọyen, ọyena rha dia odjephia nẹ udi-ẹda yen ma ghanre kẹ wẹ vwọ vrẹ omavwerhovwẹn rọ cha dia orọnvwe wẹn? Ọ vọ yen fori nẹ ọ ma ghanre kẹ wẹ?
Odjekẹ ri Baibol: ‘Ọshare rọ rọvwọn re ro ẹnwan kpahan . . . oborẹ oma vwọ vwerhen aye rọyen.’—1 Kọrẹnt 7:33.
Obo wo se ru
Ni ọdavwẹ rẹ ọrivẹ orọnvwe wẹn ghanghanre. Ọ da tobọ dianẹ ọrivẹ orọnvwe wẹn siẹ isiesi rẹ ota na gan nọ, diesorọ wo rhe ruẹ ewenee? Wo rhe se ru ọtiọyeen, ku wọ je da dede nẹ ọ nẹrhẹ ọrivẹ wẹn rua ẹnwan—ọyena djerephia nẹ udi-ẹda hirhephiyọ obẹnbẹn re.
Odjekẹ ri Baibol: “E jẹ ohwo ọvuọvo rha guọnọ erhuvwu rẹ ohwo ọfa, ọ dia ọromobọ rọye-en.”—1 Kọrẹnt 10:24.
Hiẹ kpahọn. Isodja se vwo phi ofovwin kparobọ, o fori ọ vwọ riẹn ena rẹ ọvweghrẹn rọyen vwọ họnra. Ọtiọyen ọ je hepha—wo se vwo phi udi rọ dia ọvweghrẹn wẹn na kparobọ, o fori wọ vwọ riẹn obo rọ dia siẹrẹ udi de suẹn ohwo vẹ obo rọ riẹriẹ ihwo vwo she rua ufi. O ji fo nẹ wọ riẹn ena sansan re sa vwẹ ukẹcha kẹ wẹ vwọ kẹnoma kẹ udi-ẹda je dobọ rọyen ji rere wo vwo jẹ ẹvwanriẹn.
Odjekẹ ri Baibol: “Ovwan vwẹ ọkieje vwọ kẹnoma kẹ urhurusivwe rẹ ugboma ro nene ovwan họnra na.”—1 Pita 2:11.
Nokpẹn rẹ ukẹcha. O vwo ọrhuẹrẹphiyotọ rẹ ukẹcha vwọ kẹ ihwo re da udi vroma, ji te oborẹ ayen se vwo siobọ nu udi-ẹda, asan re de sivwin ihwo kugbe họspito. Wọ je sa nokpẹn rẹ ukẹcha mie ugbeyan ro tedje rọ sa cha wẹ uko vwọ riẹn obẹnbẹn rọ nẹrhẹ wọ rha da udii, oma rhe te we otọọ. Ọtiọyena, gbe se ugbeyan wẹn na siẹrẹ urhurusivwe wo vwo rhivwin kpo udi-ẹda da rhoma kọn rhe.
Nokpẹn rẹ ukẹcha mie ihwo re tẹn ona kpahen obẹnbẹn na
Odjekẹ ri Baibol: “Igbeyan vwo ẹguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.”—Isẹ 17:17.
Udi-ẹda vroma ọyen obẹnbẹn rode, wọ cha sa dobọ rọyen jii siẹrẹ wo de se uyovwinrota otete ọvo vwẹ ọbe yẹrẹ wọ da tanẹ, “Me cha davwẹngba vwo si uche re me da kpotọ.” Ẹkẹvuọvo, riẹn nẹ ọ dia omakpokpọ wẹn ọvo yen obo wo ru kpahen udi ẹda cha so okpetu kẹẹ, ọ sa hra orọnvwe wẹn.
Wọ da guọnọ evuẹ efa: Se iyovwinreta rehẹ obotọ na wọ mrẹ oborẹ ihwo efa phi obẹnbẹn rẹ idi-ẹda kparobọ.
“Me Rha Dia Orharhe Ohwo Ọfaa”
Vwọba, ni ividio ‘Ofu Akpọ Mẹ Dje Vwe’
Ukperẹ wo vwo guomariase reyọ ọdavwẹ rẹ ọrivẹ orọnvwe wẹn vwọ kobaro