UKẸCHA VWỌ KẸ ORUA | ORỌNVWE
Obo ra sa Vwọ Kẹnoma kẹ Omaẹriọ Vwẹ Orọnvwe
Omavwerhovwẹn cha sa dia orọnvwe ọ da dianẹ ihwo ivẹ re rọvwọnre na sa vwẹroso omoma raye-en. Kẹ, mavọ yen a sa vwọ kẹnoma kẹ omaẹriọ ro vwo otọ-ọ?
Vwẹ uyovwinrota nana
Die yen omaẹriọ?
Avwanre rioma siẹrẹ e de vwo imuẹro nẹ ọrivẹ rẹ orọnvwe avwanre je ohwo ọvo, yẹrẹ ohwo ọvo je ọrivẹ orọnvwe avwanre vwẹ idjerhe ro je fo. Ọ sa nẹrhẹ e roro nẹ orọnvwe avwanre hẹ ẹdia rẹ imuoshọ. Ọ da dia iroro nana yen so omaẹriọ na, kọyen ọnana omaẹriọ ro shephiyọ. Kidie nẹ orọnvwe ọyen oyerinkugbe rẹ ọkpẹkpẹkpẹ vwẹ uvwre rẹ ihwo ivẹ, ọtiọyena, ofori nẹ ihwo ivẹ re rọvwọnre na ru oborẹ ẹgba rayen muru eje sa vwọ sẹro rẹ orọnvwe rayen.
Odjekẹ ri Baibol: “Ayen rha dia ivẹ ọfa-a, ẹkẹvuọvo kẹ ugboma ọvo. . . . Oborẹ Ọghẹnẹ tan kugbe nu, e jẹ ohwo vuọvo hẹriẹ-ẹ.”—Matiu 19:6.
“Ọ da dianẹ orọnvwe wẹn hẹ ẹdia rẹ imuoshọ, omaẹriọ sa họhọ obo ri si ohwo orhọn vwẹ ọke erhanre rọ sa so imuoshọ kẹ ohwo da la, ọ me nẹrhẹ wọ jowọ wo vwo fuen.”—Benjamin.
Ẹkẹvuọvo, vwọ kẹ omaẹriọ ro fori-i, ẹwẹn rẹ mi rorori vẹ oshọ ro vwo otọ-ọ yen ghwa cha. E de ghini vwo ẹguọnọ rẹ ọrivẹ rẹ orọnvwe rẹ avwanre, a cha kẹnoma kẹ oka rẹ omaẹriọ tiọyena. (1 Kọrẹnt 13:4, 7) Dr. Robert L. Leahy de si: “Obo ri nẹ obuko rẹ [omaẹriọ ro fori-i] cha, sa guọghọ oyerinkugbe ru wo niri ghanghanre na.”a
Die yen sa so omaẹriọ ro fori-i?
Omaẹriọ ro je fo sa vwomaphia ọ da dianẹ ohwo rẹ wọ ka rọvwọn jovwo fuevun kẹ wẹ-ẹ. Yẹrẹ ọ sa dianẹ orọnvwe rẹ oni vẹ ọsẹ wẹn hrare fikirẹ jẹ evun-ẹfuọn, ọ me nẹrhẹ oshọ mu wẹ nẹ emu ọtiọyena je sa phia kẹ wẹ.
“Ọke me vwọ hẹ omotete, ọsẹ mẹ fuevun kẹ oni mẹ-ẹ, ọtiọyen, a vwọ vwẹroso ohwo da rhe dia bẹnbẹn vwọ kẹ vwẹ. Ọnana djobọte vwe mamọ tẹdia me vwọ vwẹroso ọshare mẹ ọkievo da rhe dia bẹnbẹn kẹ vwẹ.”—Melissa.
Orọnvwọn ọfa rọ je sa suọ: Oshọ rẹ orọnvwe wẹn vwọ hra sa nẹrhẹ wo fobọ roro nẹ ohwo guọnọ reyọ ọshare yẹrẹ aye wẹn mie we. Wo sa tobọ vuẹ oma wẹn nẹ a da vwẹ uphẹn kẹ ọrivẹ rẹ orọnvwe wẹn, ọ sa yanjẹ uwe vwo vwọ kẹ ohwo ọfa.
“Ugbeyan rẹ ọshare mẹ vuẹ ọshare mẹ nẹ ọ vwẹ ukẹcha vwọ kẹ ọyen vwẹ ẹdia ọghanghanre ọvo vwẹ irueru rẹ orọnvwe rọyen, ọnana mudiaphiyọ nẹ ọ vẹ aye ọfa che gbeha kugbe. Ọyena ghwe shephiyọ kẹ vwẹ-ẹ. Ọtiọyena, me da vuẹ nẹ ọ sen.”—Naomi.
Irueru rẹ orọnvwe fẹnẹre vwẹ ẹkuotọ sansan, ọtiọyena, ofori nẹ Inenikristi nene odjekẹ ri Baibol na. A sa tanẹ ọhọ hẹ obo ri Naomi ruru vwẹ ẹdia yena? Ro vwo roro kpahọn enẹna, ọ de no nẹ o ghwe fo rọ vwọ rioma-a. Ọ da ta: “Oshọ rẹ orọnvwe mẹ vwọ hra yen mu vwe vwẹ ọke yena. Mi rorori nẹ ọshare mẹ vwẹ ovwẹ vwọ vwanvwan eya efa, ẹkẹvuọvo, ọ dia ọtiọyen yen ọ hepha-a.”
O toro obo re sa suọ-ọ, omaẹriọ ro fori-i sa nẹrhẹ wo roro nẹ, yẹrẹ tobọ vuẹ ọrivẹ orọnvwe wẹn nẹ ọ fuevun kẹ wẹ-ẹ. Ọka rẹ ẹwẹn tiọyena cha so ebẹnbẹn vwẹ orọnvwe wẹn, tobọ te omakpokpọ wẹn.
Odjekẹ ri Baibol: “Omaẹriọ pha kerẹ ọga rẹ ikansa.”—Isẹ 14:30, Easy-to-Read Version.
Mavọ yen wo se vwo sun omaẹriọ wẹn?
Ru ẹroẹvwọsuọ wẹn ganphiyọ. Ukperẹ wọ vwọ guọnọ eka rẹ jẹ evun-ẹfuọn, roro kpahen erọnvwọn rẹ ọrivẹ orọnvwe wẹn ru wanre re sa nẹrhẹ wọ vwẹrosuọ.
“Mi roro kpahen iruemu iyoyovwin rẹ ọshare mẹ vwori. Ọdavwẹ ro vwo kpahen ihwo yen muo vwo nene ihwo efa ghwọrọ ọke kuẹgbe, ọ dia orharhe rẹ ẹwẹ-ẹn. Ke me karophiyọ oma mẹ nẹ orọnvwe rẹ ọsẹ vẹ oni mẹ dia orọnvwe mẹ-ẹ.”—Melissa.
Odjekẹ ri Baibol: “Ẹguọnọ . . . se emu ejobi gbuyota.”—1 Korẹnt 13:4, 7.
Wo se ẹwẹn rẹ mi rorori gbuyota-a. Dr. Leahy, ra ta ota kpahen jovwore na de si: “Vwẹ ọke evo, avwanre vwo imuẹro nẹ e de roro kpahen orọnvwọn, ọyena odjephia nẹ orọnvwọn yena uyota. Ẹkẹvuọvo, e di vwo vwo imuẹro nẹ orọnvwọn dia uyota, che se mudiaphiyọ nẹ uyota yen o ghini ruẹ-ẹ.”b
“Ebẹnbẹn ro fori nẹ a kẹnoma kẹ jovwo vwẹ orọnvwe rẹ avwanre sa vwomaphia siẹrẹ a da fuẹrẹn ẹdia ọvo je vwẹ ẹwẹn roro nẹ emu ọbrabra ọvo phia.”—Nadine.
Odjekẹ ri Baibol: “E jẹ ihwo ejobi mrẹvughe nẹ ovwan ihwo re nuẹ.”—Filipae 4:5.
Ovwan ta ota vwọ kpahen ọdavwẹ rẹ ovwan. O toro obo re nẹrhẹ wo vwo ẹwẹn rẹ omaẹriọ-ọ, wẹ vẹ ọrivẹ orọnvwe wẹn ta ota kpahen obo re so omaẹriọ na, rere ovwan gbere ughwru ro shephiyọ kpahen oborẹ ovwan se ru vwọ kẹnoma kẹ.
“Ọke rẹ ovwan da ta ota, vwo vwẹ ẹwẹn nẹ ọ dia ọrivẹ orọnvwe wẹn guọnọ ru obo re che da wẹ-ẹ, ukperẹ ọtiọyen, ọ je davwẹngba rọ vwọ rhuẹrẹ ẹdia na phiyọ. Kọn phiyọ ẹwẹn nẹ ọrivẹ orọnvwe wẹn vwo omamọ rẹ ẹwẹn. Ọ sa dianẹ kidie wo mu ẹwẹn phiyọ ẹdia na nọ, ku wo rhẹro obo re vrẹ ẹgba rọyen na. Yẹrẹ ọrivẹ orọnvwe wẹn sa rhe mrẹvughe nẹ ọ nene uwe ghwọrọ ọke kuẹgbe kirobo ro fori-i.”—Ciara.
Odjekẹ ri Baibol: “E jẹ ohwo ọvuọvo rha guọnọ erhuvwu rẹ ohwo ọfa, ọ dia ọromobọ rọye-en.”—1 Kọrẹnt 10:24.