Die Yen Baibol na Ta Kpahen Orọnvwe?

Ẹkpahọnphiyọ ri Baibol na

Ọghẹnẹ vwọ ma aye gbe ọshare rẹsosuọ nu, o de ku ayen kugbe vwẹ orọnvwe. Ọ vwẹ orọnvwe vwo mu kerẹ oyerinkugbe oghẹresan vwẹ uvwre rẹ aye vẹ ọshare, kerẹ asan rẹ orua da sa tonphiyọ.​—Jẹnẹsis 1:​27, 28; 2:18.

Ọghẹnẹ guọnọre nẹ eya gbe eshare re rọvwọnre vwo omavwerhovwẹn. (Isẹ 5:18) Ọ vwẹ iwan vẹ odjekẹ vwọ phia vwẹ Baibol na re sa cha orua uko vwo vwo omavwerhovwẹn.

Vwẹ uyovwinrota nana

• Die yen iwan rẹ Ọghẹnẹ kpahen orọnvwe?

• Kẹ omaẹhẹriẹ vẹ orọnvwe-ẹfan vwo?

• E che ru ẹbe orọnvwe tavwen Ọghẹnẹ ki rhiabọreyọ?

• Ẹdia vẹ oghwa vọ yen Ọghẹnẹ vwọ kẹ eya gbe eshare?

• Ọghẹnẹ guọnọre nẹ eya gbe eshare re rọvwọnre vwẹ ọke nana vwiẹ emọ?

• Mavọ yen Baibol na sa vwọ cha vwẹ uko vwẹ orọnvwe mẹ?

• Ẹkpo ri Baibol ri shekpahen orọnvwe

Die yen iwan rẹ Ọghẹnẹ kpahen orọnvwe?

Nẹ ọtonphiyọ rhe, Ọghẹnẹ ruro rere orọnvwe vwọ dia oyerinkugbe rẹ ọshare ọvo vẹ aye ọvo. (Jẹnẹsis 2:24) Ọghẹnẹ rhọnvwephiyọ orọnvwe rẹ ọshare yẹrẹ aye da rọvwọn vrẹ ohwo ọvo-o, uruemu rẹ ọshare vẹ ọshare yẹrẹ aye vẹ aye vwọ mroma, yẹrẹ eya gbe eshare vwọ dia kuẹgbe jẹ ayen rọvwọnre-e. (1 Kọrẹnt 6:9; 1 Tẹsalonaika 4:3) Jesu yono idibo rọyen nẹ ayen nene iwan rẹ Ọghẹnẹ phi phiyotọ kpahen orọnvwe nẹ ọtonphiyọ rhe.​—Mak 10:​6-8.

Vwẹ ẹro rẹ Ọghẹnẹ, orọnvwe ọyen oyerinkugbe ri bẹdi bẹdẹ. Siẹrẹ aye gbe ọshare da rọvwọn, ayen ve kẹ ohwohwo nẹ ayen cha fuevun kẹ ohwohwo je dia kugbe vwẹ uchọke rẹ ayen dia akpọ na kri te. Ọghẹnẹ rhẹro rọyen nẹ ayen che ru nene ive yena.​—Mak 10:9.

Kẹ omaẹhẹriẹ vẹ orọnvwe-ẹfan vwo?

O se vwo ọkievo rẹ aye gbe ọshare vwọ hẹrioma, kerẹ ọke rẹ ọvo vwẹ usun rayen de kpo oyan rọ vwọ vwẹrote emu ri kpregede rọ phiare vwẹ orua rọyen. Ẹkẹvuọvo Baibol na jiri omaẹhẹriẹ fikirẹ ebẹnbẹn rehẹ orọnvwe-e. Ukperẹ ọtiọyen, o jiriro kẹ eya gbe eshare rehẹ ẹdia tiọyena nẹ ayen davwẹngba rẹ ayen vwọ rhuẹrẹ kugbe.​—1 Kọrẹnt 7:10.

Orọnvwọn ọvuọvo ri Baibol na rhọnvwere nẹ ọ sa nẹrhẹ orọnvwe fan yen siẹrẹ ọvo usun rẹ ihwo ivẹ na de gbe igberadja. (Matiu 19:9) Ọtiọyena, ọ da dianẹ aye gbe ọshare brorhiẹn rẹ ayen vwọ hẹrioma yẹrẹ fan orọnvwe jẹ ọ dianẹ kẹ ọvo vwẹ usun rayen na gbe igberadja-a, o vwo ọvuọvo vwẹ usun rayen ri Baibol na rhọnvwe kẹ nẹ ọ sa kọn phiyọ yẹrẹ rọvwọn ohwo ọfa-a.​—Matiu 5:32; 1 Kọrẹnt 7:11.

E che ru ẹbe orọnvwe tavwen Ọghẹnẹ ki rhiabọreyọ?

Ọghẹnẹ guọnọre nẹ Inenikristi muọghọ kẹ irhi rẹ ẹkuotọ ri shekpahen orọnvwe. (Taitọs 3:1) Ọ da dianẹ aye gbe ọshare se ru ẹbe phiyọ orọnvwe rayen, ọyena che djephia nẹ ayen muọghọ kẹ ogangan rẹ usuon rẹ ẹkuotọ na kugbe iwan rẹ Ọghẹnẹ nẹ e jẹ orọnvwe dia rhirin rhirin.a

Ẹdia vẹ oghwa vọ yen Baibol na tare nẹ o te eya vẹ eshare?

• Oghwa rẹ ayen che koko mu. E jẹ eya gbe eshare nene ohwohwo yerin vwọrẹ ẹguọnọ vẹ ọghọ. (Ẹfesọs 5:33) E jẹ ayen ru ọdavwẹ rẹ ehware rẹ ohwohwo vwẹ idjerhe rẹ ẹguọnọ, ayen me je kẹnoma kẹ koka koka ri jẹ evun ẹfuọn. (1 Kọrẹnt 7:3; Hibru 13:4) Ọ da dianẹ ayen vwiẹ emọ, aye gbe ọshare yen vwo oghwa rẹ ayen vwọ yọnrọn ayen ghwanre.​—Isẹ 6:20.

  

  Baibol na ghwa nabọ djisẹ rẹ oborẹ eya gbe eshare cha ghare iruo ra vwọ vwẹrote orua na kugbe iruo rẹ uwevwin na wa-an. Ayen se koko brorhiẹn rẹ obo ri me shephiyọ vwọ kẹ orua rayen.

• Iruo ro te ọshare. Baibol na tare nẹ “ọshare yen uyovwin rẹ aye rọyen.” (Ẹfesọs 5:23) E sere uyovwin kidie ọyen ofori nẹ o sun orua rọyen ji brorhiẹn ri che fierere kẹ aye vẹ emọ rọyen.

  

  Ọ me davwẹngba vwọ mrẹvughe nẹ ọ vwẹrote ọdavwẹ rẹ ugboma rayen, o ji ruẹ obo re cha nẹrhẹ oma vwerhen ayen kugbe obo re cha nẹrhẹ oyerinkugbe rayen vẹ Jihova ganphiyọ. (1 Timoti 5:8) O djephia nẹ ọ vwẹ ẹro ọghanghanre vwo nẹ iwan vẹ ẹgba rẹ aye rọyen womarẹ o vwo nene wian kuẹgbe kpẹkpẹkpẹ, je nabọ roro kpahan iroroẹjẹ rọ vwọ phia kugbe edavwẹ rọyen ọke ro de brorhiẹn. (Isẹ 31:​11, 28) Baibol na tare nẹ ofori nẹ ọshare mu oghwa ro tere vwẹ idjerhe rẹ ẹguọnọ.​—Kọlose 3:19.

• Iruo ro te aye. Baibol na tare nẹ “aye . . . muọghọ okokodo vwọ kẹ ọshare rọyen.” (Ẹfesọs 5:33) Oma vwerhen Ọghẹnẹ siẹrẹ aye de muọghọ kẹ ọshare rọyen fikirẹ ẹdia rẹ Ọghẹnẹ vwọ kẹ ọshare na.

  

  O vwo oghwa rọ vwọ vwẹ ukẹcha kẹ ọshare rọyen, ọ me cha uko vwo bru omamọ orhiẹn ji bicha ẹdia rẹ ọgbuyovwin rọyen. (Jẹnẹsis 2:18) Baibol na nabọ ta omamọ rẹ ota kpahen aye ro muẹ oghwa ọghanghanre ro tere vwẹ orọnvwe.​—Isẹ 31:10.

Ọghẹnẹ jurhi nẹ eya gbe eshare re rọvwọnre vwẹ ọke nana vwiẹ emọ?

Ẹjo. Vwẹ ọke rọ wanre, Ọghẹnẹ vwẹ iji kẹ idibo rọyen evo nẹ ayen vwiẹ emọ. (Jẹnẹsis 1:28; 9:1) Ẹkẹvuọvo iji yena shekpahen Inenikristi-i. O vwo ọke vuọvo ri Jesu vwọ vwẹ iji kẹ idibo rọyen nẹ ayen vwiẹ emọ-ọ. O ji vwo ọvuọvo vwẹ usun rẹ idibo rọyen rẹsosuọ rọ tare nẹ eya gbe eshare re rọvwọnre vwiẹ emọ-ọ. Ihwo ivẹ re rọvwọnre yen che brorhiẹn sẹ ayen che vwiẹ emọ yẹrẹ ayen che vwiẹ-ẹ.

Mavọ yen Baibol na sa vwọ cha vwẹ uko vwẹ orọnvwe mẹ?

Odjekẹ sansan hẹ Baibol na re sa vwẹ ukẹcha kẹ ihwo re rọvwọnre vwọ ton orọnvwe rayen phiyọ yoyovwin. Odjekẹ sansan rehẹ Baibol na je sa vwẹ ukẹcha kẹ ihwo re rọvwọnre vwọ kẹnoma kẹ yẹrẹ phi ebẹnbẹn kparobọ.

Odjekẹ ri Baibol sa vwẹ ukẹcha kẹ ihwo re rọvwọnre . . .

• vwo dje uvi rẹ ẹguọnọ phia.​—1 Kọrẹnt 13:​4-7; Kọlose 3:14.

• vwo yerin ghene ebẹnbẹn.​—1 Kọrẹnt 10:24.

• vwọ dia ihwo re nabọ kerhọ.​—Jems 1:19.

• vwo dje ọghọ phia.​—Rom 12:10.

• vwọ reyọ vwo ghovwo.​—1 Pita 4:8.

• vwọ fuevun.​—Mak 10:9.

• vwo vwo edirin.​—Ẹfesọs 4:​2, 3.

• vwọ wian kugbe.​—Aghwoghwo 4:9.

• vwo ru oyerinkugbe rayen ganphiyọ.​—Une ri Solomọn 8:7.