Ga Jihova vẹ Aghọghọ Ọkieje
ẸDẸ vọ yen wọ mrẹ aghọghọ rọ ma rho kparobọ vwẹ akpeyeren wẹn? Ẹdẹ wọ rọvwọnre gbanẹ ẹdẹ wo vwiẹ ọmọkpako wẹn? Ẹdẹ wo bromaphiyame? Ọnana sa ghene dia ẹdẹ rọ ma ghanre, rọ je ma kẹ wẹ aghọghọ vwẹ akpeyeren wẹn. Vwẹ ẹdẹ yena, oma vwerhen iniọvo wẹn mamọ rẹ ayen vwọ mrẹ nẹ wo djephia kẹ Ọghẹnẹ nẹ wo vwo ẹguọnọ rọyen vẹ ubiudu wẹn, oma wẹn, iroro kugbe ẹgba wẹn ejobi!—Mak 12:30.
Ọ sa dianẹ wọ mrẹ aghọghọ rode vwẹ ẹga rẹ Jihova rhanvwẹn ọke wo vwo bromaphiyame. Ẹkẹvuọvo, aghọghọ rẹ iniọvo evo va ayen abọ re. Diesorọ? Die yen nẹrhẹ avwanre je vwọ ga Jihova vẹ aghọghọ?
OBORESORỌ AGHỌGHỌ RẸ EVO VWỌ VA AYEN ABỌ
Ovuẹ rẹ Uvie na kẹ avwanre aghọghọ rode. Diesorọ? Kidie Jihova veri nẹ Uvie na che phi oba phiyọ akpọ rẹ umwemwu nana kẹrẹkpẹ, je hwarhiẹ akpọ kpokpọ rhe. Zẹfanaya 1:14 da vuẹ avwanre: “Ẹdẹ rode rẹ Ọrovwohwo na si kẹri re ọ kẹrire ọ cha vẹ okpakpa!” Jẹ avwanre de roro nẹ a hẹrhẹ krinọ re, ọnana sa nẹrhẹ aghọghọ rẹ avwanre va avwanre abọ. Ọ je sa nẹrhẹ oruru avwanre vwẹ ẹga rẹ Ọghẹnẹ shekpotọ.—Isẹ 13:12.
Avwanre vẹ iniọvo na da ghwọrọ ọke kuẹgbe, ọ cha chọn avwanre uko vwọ ga Jihova vẹ aghọghọ ọkieje. Ọ sa dianẹ omamọ rẹ uruemu rẹ ihwo rẹ Jihova yen si avwanre ro ẹga uyota, je chọn avwanre uko vwọ ga Ọghẹnẹ vẹ aghọghọ. (1 Pita 2:12) Ẹkẹvuọvo, die yen sa phia ọ da dianẹ a ghwọku oniọvo avwanre ọvo fikirẹ umwemwu ro ruru? Ọnana sa nẹrhẹ ẹwẹn rẹ iniọvo evo kuọrọn vwẹ ukoko na, ọ me je nẹrhẹ aghọghọ rayen va ayen abọ.
Ẹvwọtua rẹ ekuakua rẹ akpeyeren sa nẹrhẹ aghọghọ avwanre va avwanre abọ. Idjerhe vọ? Akpọ rẹ Eshu nana davwẹngba rọ vwọ phiẹn avwanre vwọ dẹ erọnvwọn ra ghene guọnọ-ọ. Kẹ ofori nẹ a karophiyọ eta rẹ Jesu: “Ohwo sa ga inini ivẹ-ẹ, ọ da dia ọtiọye kọ dia avwebọ kẹ ọvo, ọ me rha dia avwiorọvwe kẹ ọrivẹ; eyẹ ko si kẹre ọvo ko sheri kẹ ọrivẹ: Wọ sa ga Ọghẹnẹ vẹ ẹdjọ kugbe-e.” (Matiu 6:24) A cha sa ga Jihova vẹ aghọghọ, ji vwo kemu kemu rehẹ akpọ na-a.
GHỌGHỌ VWẸ ẸGA RẸ JIHOVA
Ẹga rẹ Jihova diẹ oghwa vwọ kẹ ihwo ri vwo ẹguọnọ rọye-en. (1 Jọn 5:3) Karophiyọ oborẹ Jesu tare: “Bru vwe rhe ihwo rẹ owian kugbe oghwa bẹn, Me kẹ ufuoma. Mu urhekpe mẹ ghwa re wo yono uruemu mẹ; kidie me pha vworovworo fuefu vwe udu mẹ, ke wo mrẹ ufuoma vwọ kẹ erhi wẹn. Kidie urhekpe mẹ pha frae, oghwa mẹ ọ phapharhe.” (Matiu 11:28-30) Ra vwọ dia Onenikristi rẹ uyota kẹ ohwo ufuoma vẹ aghọghọ. Vwọrẹ uyota, o vwo erọnvwọn buebun re kẹ avwanre aghọghọ vwẹ ẹga rẹ Jihova. E jẹ a fuẹrẹn erha.—Habakọk 3:18.
Avwanre ga Ohwo rọ kẹ avwanre arhọ, Ọghẹnẹ rẹ oma vwerhan. (Iruo Rẹ Iyinkọn Na 17:28; 1 Timoti 1:11) Avwanre riẹnre nẹ Ọghẹnẹ yen vwo arhọ avwanre. Ọtiọyena, e jẹ a ga vẹ aghọghọ ọkieje, otoro obo ro krite avwanre bromaphiyame re-e.
Héctor karophiyọ iphiẹrophiyọ rẹ Uvie na, je ga sasasa, ọnana yen nẹrhẹ ọ sẹro rẹ aghọghọ rọyen
Kerẹ udje, Héctor ga Jihova kerẹ iniruo ro kiẹn vwẹ ẹgbukpe 40. “Vwẹ evun rẹ ọghwo” rọyen, ọ je ga Jihova vẹ omavwerhovwẹn. (Une Rẹ Ejiro 92:12-14) Ọga rẹ aye rọyen si iruo rọyen kpuko vwẹ ẹga rẹ Jihova, jẹ aghọghọ rẹ Héctor va ra abọ-ọ. Ọ da ta: “Me sẹro rẹ aghọghọ mẹ vwẹ ẹga rẹ Jihova, dede nẹ ọ da vwẹ mamọ nẹ ọga rẹ aye mẹ miovwẹnphiyọ, ọ je lọhọ me vwọ vwẹrote-e. Ofori mi vwo vwo ẹguọnọ okokodo kpahen Jihova je ga vẹ ẹwẹn mẹ eje kidie ọyen kẹ vwẹ arhọ, o ji vwo oboresorọ ọ vwọ ma ohworakpọ. Me davwẹngba mi vwo ruiruo aghwoghwo na vẹ oruru, je sẹro rẹ iphiẹrophiyọ rẹ Uvie na vwevunrẹ ẹwẹn mẹ rere aghọghọ mẹ vwo ju vwe abọ ẹva.”
Jihova kẹ avwanre izobo ọtanhirhe rọ nẹrhẹ avwanre se yeren akpọ rẹ omavwerhovwẹn. Vwọrẹ uyota, “Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo je ghwọrọ ẹkẹvuọvo ko vwo arhọ ri bẹdẹ.” (Jọn 3:16) E de vwo esegbuyota kpahen okẹ rẹ ọtanhirhe rẹ Ọghẹnẹ kẹ avwanre na, ke se vwo evwoghovwo rẹ imwemwu avwanre kugbe arhọ rẹ bẹdẹ. Ọnana ghene orọnvwọn oyoyovwin rọ sa kẹ avwanre aghọghọ! Idavwaro re vwo kpahen ọtanhirhe na che mu avwanre vwọ ga Jihova vẹ aghọghọ.
Jesús ru akpọ rọyen lọhọ, ọ da ga Jihova vẹ aghọghọ vwẹ ikpe buebun rhire na
Oniọvo ọvo re se Jesús, rọ dia Mexico, da ta: “Mẹvwẹ ọviẹn vwọ kẹ iruo mẹ, me wian nẹ urhiọke re te ason dede nẹ ọ ghwa dia oborẹ ikọpini na vuẹ vwẹ-ẹ. Mi ruo me vwọ mrẹ igho buebun. Mi de rhi yono kpahen Jihova vẹ obo rọ vwẹ Ọmọ ọghanghanre rọyen vwọ kẹ ihworakpọ. Mi vwo owenvwe ọgangan me vwọ ga. Ọtiọyena, me da vwomakpahotọ kẹ Jihova, ji siobọnu iruo na dede nẹ ẹgbukpe 28 me wian kẹ ikọpini na re, me da ton iruo rẹ ẹga ọkieje phiyọ.” Eriyin Jesús vwọ ton ẹga rẹ Jihova phiyọ vẹ aghọghọ.
Avwanre vwo omamọ uruemu rọ kẹ avwanre aghọghọ. Wọ sa karophiyọ oborẹ akpọ wẹn hepha wọ ke rhe mrẹ Jihova vughe? Ọyinkọn Pọl vwẹ ẹkarophiyọ kẹ Inenikristi rehẹ Rom nẹ ayen “eviẹn rẹ umwemwu jovwo,” ẹkẹvuọvo ayen rhe dia “ọviẹn kẹ ọvwata.” Ayen rhẹro rẹ arhọ rẹ bẹdẹ, kidie ayen kẹnoma kẹ umwemwu. (Rom 6:17-22) Avwanre je vrabọ rẹ ọmiaovwẹ ro nẹ ọfanrhiẹn vẹ ozighi cha kidie e nene irhi rẹ Jihova. Ọnana ghene kẹ avwanre aghọghọ!
“Ikpe me vwọ ga Jihova yen ma kẹ vwẹ aghọghọ vwẹ akpeyeren mẹ.”—Jaime
Kerẹ udje, Jaime ọyen ohwo ro vwo imuẹro kpahen uyono rẹ erọnvwọn mamarhe, ọ je sen nẹ Ọghẹnẹ herọ, ọ ke rha je dia ohwo ro djubi. Ọ da rhe ton uyono ẹra phiyọ, ẹguọnọ re dje kẹ de te ubiudu rọyen mamọ. Jaime da nẹrhovwo kẹ Jihova nẹ ọ chọn uko vwo vwo imuẹro kpahọn rere o se vwo wene akpeyeren rọyen. Ọ da ta: “Memerha na, me da rhe mrẹvughe nẹ Ọghẹnẹ herọ, Ọsẹ ro vwo ẹguọnọ vẹ arodọnvwẹ. Irhi rẹ Jihova sẹro mẹ. Ọ da diane mi wene akpeyeren mẹ-ẹ, manẹ je hwe vwe re kirobo re hwe igbeyan mẹ rẹ me vẹ ayen gbe djubi jovwo. Ikpe me vwọ ga Jihova yen ma kẹ vwẹ aghọghọ vwẹ akpeyeren mẹ.”
WO JẸ OMA RHỌ WẸ-Ẹ!
Die yen ofori nẹ avwanre ru ra vwọ hẹrhẹ oba rẹ akpọ umwemwu nana? Karophiyọ, avwanre ru ọhọre rẹ Ọghẹnẹ, je rhẹro rẹ arhọ rẹ bẹdẹ. “E jẹn oma rẹ iruo esiri rhọ avwanre-e, kidie vwẹ ọmọke wobọ avwanre che vun, ọ da dianẹ Uvwerhi gbe ro avwanre-e.” (Galesha 6:8, 9) Womarẹ ukẹcha rẹ Jihova, e jẹ e chirakon, je davwẹngba vwo vwo iruemu re sa nẹrhẹ avwanre vrabọ rẹ “ukpokpogho rode na,” je ga Jihova vẹ aghọghọ ọkieje.—Ẹvwọphia 7:9, 13, 14; Jems 1:2-4.
Avwanre vwo imuẹro nẹ Jihova cha kẹ avwanre osaẹhwa fikirẹ akoechiro avwanre kidie ọ riẹn iruo rẹ avwanre ru kẹ vẹ ẹguọnọ re dje kẹ odẹ rọyen. A da ga Jihova vẹ aghọghọ ọkieje, ka cha họhọ ọbuine Devid, rọ tare nẹ, “Mi phi Ọrovwohwo phihọ obaro mẹ vwẹ ọke ejobi; fikiridie ọ hẹ obọrhe mẹ, mi gbi se ghwie-e. Fiki rẹ ọtiọye na udu mẹ kọ ghọghọ, oma kọ vwerhe erhi mẹ; oma mẹ kọ dia egbemọphẹ.”—Une Rẹ Ejiro 16:8, 9.