Wọ Karophiyọ?

Wọ nabọ frẹkotọ se iyovwinreta re vwomaphia vwẹ Uwevwin Orhẹrẹ rẹ enukpe na re? Ọ da dia ọtiọyen, gba davwẹngba sẹ wọ sa kpahenphiyọ enọ nana:

Die yen mu avwanre vwọ vwẹ urinrin kẹ Jihova?

Avwanre ru ọtiọyen fikirẹ ọghọ okokodo avwanre muẹ vwọ kẹ kugbe ẹguọnọ avwanre vwo kpahọn. Avwanre je vwẹ urinrin kẹ kidie avwanre guọnọre nẹ ihwo efa riẹn.—w25.01, aruọbe 3.

Siẹrẹ ohwo de gbe avwanre ku, mavọ avwanre sa vwọ reyọ vwo ghovwo?

Ọ dia a cha kpairoro vrẹ obo re da avwanre naa; jẹ e de si ophu nẹ evun, a rha cha vwẹ ẹwẹn rẹ ọkon vwo nene ihwo efa yeriin, ọnana je cha nẹrhẹ e ru obo ri yovwirin.—w25.02, aruẹbe 15-16.

Diesorọ odibo ri Jesu re se Mak vwọ dia omamọ udje vwọ kẹ ighene eshare?

Mak nabọ rhiabọreyọ owian ra vwọ kẹ. Dede nẹ ivun miovwin Mak, ji no nẹ e ku ọyen phiyotọ, ọ dia ọyen ọ vwọ sen nẹ ọyen rha cha sa wiaan. Ọ mrẹ erere vwo nẹ oyerinkugbe ọkpẹkpẹkpẹ rọ vẹ Pọl kugbe iniọvo ri tedje gbe vwo.—w25.04, aruọbe 27.

Ọrhọ yen otọ rẹ eta ri Jesu na: “Mi dje odẹ wẹn kẹ ayen re”? (Jọn 17:26)

Idibo rọyen riẹn odẹ rẹ Ọghẹnẹ jovwo re. Ẹkẹvuọvo Jesu dje oka rẹ Ohwo ri Jihova hepha phia phephẹn, ọtiọyen ji te ọhọre, irueru vẹ iruemu Rọyen.—w25.05, aruẹbe 20-21.

Die yen avwanre cha mrẹvughe a da riẹn asan rẹ ẹgba avwanre teri?

Avwanre cha mrẹvughe nẹ o vwo erọnvwọn buebun rẹ avwanre riẹnree. Kerẹ udje, avwanre riẹn ọke oba na cha vwọ rhee yẹrẹ oborẹ Jihova che ru erọnvwọn wan ọke yenaa. Avwanre riẹn obo re cha phia odẹ rọ cha naa yẹrẹ nabọ vwo ẹruọ rẹ oborẹ Jihova riẹn avwanre tee.—w25.06, aruẹbe 15-18.

Die yen sa vwẹ ukẹcha kẹ avwanre vwọ mrẹ erere vwo nẹ uyovwinrota yẹrẹ ota rotu?

A sa nọ oma avwanre nẹ: ‘Imuẹro vọ yen a vwọphia rọ nẹrhẹ ihwo ra ta ota kẹ na se uyota ri Baibol gbuyota? O vwo udje me sa reyọ vwo ruiruo mi de yono ohwo ọfa kpahen uyota nana? Ono yen se vwo omavwerhovwẹn kpahen uyovwinrota nana, kẹ ọke vọ yen me vẹ ọyen sa vwọ ta ota kpahọn?’—w25.07, aruọbe 19.

Die yen e se yono kpahen evwoghovwo rẹ Ọghẹnẹ womarẹ obo ro nene Devid yerin wan?

Dede nẹ Devid ru imwemwu egangan, Jihova vwo ghovwo ro vwo kurhẹriẹ nẹ otọ rẹ ubiudu rhe. (1 Ivie 9:4, 5) Siẹrẹ Jihova de vwo ghovwo avwanre, kọ ghwa họhọ nẹ ọ kpairoro vrẹ imwemwu rẹ avwanre, o rhe kere ayen ba avwanre obọ vwẹ obaroo.—w25.08, aruọbe 17.

Die yen wo se ru ọ da dianẹ ohwo ọvo wọ vwẹ Baibol yono mrẹ bẹnbẹn ro vwo vwo ẹruọ rẹ ẹkpo ọvo?

Ọ da mrẹ bẹnbẹn ro vwo vwo ẹruọ rẹ ẹkpo ri Baibol ọvo rẹ wọ nabọ dje fiotọ, gba yanjẹ ẹkpo re bẹn kẹ na vwo, wo ru ọrhuẹrẹphiyotọ rẹ ovwan vwọ rhoma rhivwin kpo ayen ọke ọfa.—w25.09, aruọbe 24.

Baibol na tare nẹ umwemwu vwo “ẹgba rẹ ophiẹnvwe.” (Hib. 3:13) Vwẹ idjerhe vọ?

Umwemwu se mu avwanre vwo ru obo re chọre. Ọ je sa nẹrhẹ e vwo ẹwẹn ivivẹ ọkieje sẹ Ọghẹnẹ ghini vwo ẹguọnọ rẹ avwanre.—w25.10, aruọbe 16.

Erọnvwọn erha vọ yen sa nẹrhẹ ẹrhovwo avwanre ghwotọphiyọ?

(1) E se roro kpahen iruemu ri Jihova. (2) Avwanre se roro kpahen oborẹ avwanre hirharokuẹ ji djunute vwẹ ẹrhovwo, kerẹ oborẹ avwanre se vwo ghovwo ohwo ọvo ro gbe avwanre ku. (3) Avwanre sa ghwọrọ ọke vwọ nẹrhovwo. Ọnana sa nẹrhẹ a ta iroro rọhẹ ubiudu avwanre eje.—w25.10, aruẹbe 19-20.

Idjerhe vọ yen a sa vwọ vwẹ ukẹcha kẹ ihwo re kpakore?

A sa kọn bru ayen ra yẹrẹ vwẹ ifonu vwo se ayen. E ji se nene ayen ọke rẹ ayen da ra mrẹ idọktọ. Yẹrẹ e se nene ayen wian vwẹ iruo rẹ aghwoghwo na vwẹ idjerhe sansan.—w25.11, aruẹbe 6-7.

Erhọ yen odjekẹ evo ra guọnọre orọnvwe wẹn se brọghọ phiyọ Ọghẹnẹ oma?

Ru orọnvwe wẹn nene urhi. Jẹ irueru rẹ orọnvwe na dje omamọ rẹ ẹwẹn ọfuanfon na phia. Jẹ irhuon vẹ osẹnvwe wẹn dia ọ rẹ abavo, wọ je kẹnoma kẹ ẹkuruemu re vwọso Baibol na. Jẹ ota wẹn nabọ phẹn ọke wo de muegbe rẹ irueru rẹ orọnvwe na.—w25.12, aruẹbe 21-24.