Wo se Vwo Imuẹro nẹ Jihova Cha Vwẹ Ọbọngan Vwọ kẹ Wẹ

1. Djisẹ ẹdia rẹ ihwo ri Ju re mu kpo ighuvwu na hepha.

VWẸ ẹwẹn roro oborẹ oma ru ihwo ri Ju re mu kpo ighuvwu vwẹ Babilọn. Ayen mrẹ orere rayen ra guọghọ totọ. Fikirẹ imwemwu rayen kugbe e rẹ esẹ rayen ride, e de mu ayen vwo nẹ ẹkuotọ rayen vwo kpo ẹkuotọ ọrhorha. (2 Ikun 36:15, 16, 20, 21) Uyota nẹ, ihwo rẹ Izrẹl vwo ugbomọphẹ ayen vwo yeren akpọ ji ru obo rẹ ayen guọnọre vwẹ Babilọn. (Jer. 29:4-7) Dedena, ọ dia ọyen akpọ vwọ lọhọ vwọ kẹ ayen kirobo rẹ ayen guọnọree. Ẹro vọ yen ayen vwo ni ẹdia rẹ ayen hepha na? Jokaphiyọ oborẹ ọvo usun ihwo re mu kpo ighuvwu na tare: “Vwẹ oma rẹ urhie ri Babilọn, etiyin me tidia ma da viẹ, vwẹ ọke ma da karohọ Zayọn.” (Une 137:1) Ihwo ri Ju ri she ọkuọrọn na guọnọ uchebro, kẹ tivọ ayen da sa mrẹ?

2-3. (a) Die yen Jihova ru vwọ kẹ ihwo ri Ju re mu kpo ighuvwu na? (b) Die yen a cha ta ota kpahen vwẹ uyono nana?

² Jihova ọyen “Ọghẹnẹ rẹ uchebro ejobi.” (2 Kọr. 1:3) Kerẹ Ọghẹnẹ ro vwo ẹguọnọ, oma vwerhọn rọ vwọ vwẹ uchebro vwọ kẹ idibo rọyen. Jihova riẹnre nẹ evo usun ihwo re mu kpo ighuvwu na, che rhiabọreyọ ọghwọku rọyen ji rhivwin bro rhe. (Aiz. 59:20) Ọtiọyena, vwẹ ikpe re vrẹ ujorin tavwen e ki rhi mu ihwo ri Ju kpo ighuvwu, Jihova da vwẹ ẹwẹn ọfuanfon rọyen vwo mu ọmraro Aizaya vwo si ọbe ra vwẹ odẹ rọyen vwo se. Diesorọ o vwo sio? Aizaya da ta: “‘Bruche, bru ihwo mẹ uche, eriyin Ọghẹnẹ wẹn tare.” (Aiz. 40:1) Womarẹ isiesi rẹ ọmraro na, Jihova da vwẹ uchebro rẹ ihwo ri Ju re mu kpo ighuvwu na guọnọre vwọ kẹ ayen.

³ Kerẹ ihwo re mu kpo ighuvwu na, avwanre je guọnọ uchebro nọke ra ruọke. Vwẹ uyono nana, a cha ta ota kpahen idjerhe erha rẹ Jihova vwọ vwẹ uchebro vwọ kẹ ihwo re mu kpo ighuvwu na: (1) O veri nẹ ọyen che vwo ghovwo ihwo ri kurhẹriẹ, (2) ọ kẹ ihwo rọyen iphiẹrophiyọ (3) o si oshọ nẹ ayen oma. Ra cha vwọ ta ota kpahen ẹkpo nana, jokaphiyọ erere ra sa mrẹ vwo nẹ eta ri Jihova re vọnre vẹ imuẹro na.

JIHOVA VWO GHOVWO AVWANRE FIKIRẸ ARODỌNVWẸ RỌYEN

4. Idjerhe vọ yen Jihova vwo djephia nẹ ọyen Ọghẹnẹ ro gbe arodọnvwẹ? (Aizaya 55:7)

⁴ Jihova ọyen “Ọsẹ rẹ arodọnvwẹ.” (2 Kọr. 1:3) O dje uruemu yena phia ọke ro vwo ve nẹ, ọyen che vwo ghovwo ihwo ri Ju ri kurhẹriẹ re mu kpo ighuvwu. (Se Aizaya 55:7.) Ọ da ta: “Vwẹ ẹguọnọ ri bẹdẹ ke Me re ehrọre wẹ.” (Aiz. 54:8) Idjerhe vọ yen Jihova che vwo gbe arodọnvwẹ? Dede nẹ ihwo ri Ju na je cha rioja rẹ imwemwu rẹ ayen ruru, jẹ Jihova veri nẹ ayen cha dia Babilọn rhiriin. Ayen cha dia ighuvwu vwẹ ọmọke evo. (Aiz. 40:2) Eta nana nẹrhẹ ẹwẹn rẹ ihwo ri Ju evo ri kurhẹriẹ totọ!

5. Diesorọ e vwo vwo imuẹro nẹ Jihova cha vwẹ imwemwu avwanre vwo ghovwo avwanre vwọ vrẹ ihwo ri Ju re mu kpo ighuvwu?

⁵ Die yen avwanre yonori? Jihova vwo owenvwe rọ vwọ reyọ vwo ghovwo idibo rọyen kakare. Nonẹna, avwanre vwo imuẹro nẹ Jihova cha vwẹ imwemwu avwanre vwo ghovwo avwanre vrẹ ihwo ri Ju re mu kpo ighuvwu. Diesorọ a vwọ ta ọtiọyen? Avwanre riẹn obo ri Jihova ruru rọ sa vwọ vwẹ imwemwu avwanre vwo ghovwo avwanre. Ikpe ujorin buebun rẹ Aizaya vwọ ta ota kpahen evwoghovwo ri Jihova nu, Jihova de ji ọmọ rọyen ro vwo ẹguọnọ kpahen rhe otọrakpọ na, rọ vwọ vwẹ arhọ rọyen kpahotọ vwọ kẹ irumwemwu ri kurhẹriẹ. Izobo nana nẹrhẹ e se “phoro” imwemwu avwanre no kakare. (Iruo 3:19; Aiz. 1:18; Ẹfe. 1:7) Jihova ghini Ọghẹnẹ ro gbe arodọnvwẹ!

6. Erere vọ yen a sa mrẹ siẹrẹ a da tẹnrovi arodọnvwẹ ri Jihova? (Ni uhoho na.)

⁶ Eta ri Jihova rehẹ Aizaya 55:7 sa vwẹ ọbọngan kẹ avwanre ọ da dianẹ ẹwẹn brẹ hwe avwanre. Ẹwẹn rẹ evo vwẹ usun avwanre na se kpokpo ayen fikirẹ oborẹ ayen ruru vwẹ obuko re dede nẹ ayen kurhẹriẹ re. Ọ sa dia ọtiọyen, ma rho ọ da dianẹ ayen je rioja rẹ oborẹ ayen ruru vwẹ obuko re. Jẹ, a da fan imwemwu avwanre ji ku obọ rhẹriẹ, e se vwo imuẹro nẹ Jihova vwo ghovwo avwanre. Jihova de vwo ghovwo, ọ rha karophiyọ imwemwu avwanre ọfaa. (Ni Jerimaya 31:34.) Ọtiọyena, ọ da dianẹ Jihova rha karophiyọ imwemwu rẹ avwanre ruru vwẹ obuko ree, o ji fo nẹ avwanre kpairoro vrẹ ayen. Obo re ma ghanre kẹ Jihova yen oborẹ avwanre ruẹ enẹna, ọ dia oruchọ rẹ avwanre ruru vwẹ obuko ree. (Izi. 33:14-16) O rhe che krii, Ọsẹ avwanre rọ vọnre vẹ arodọnvwẹ na, ko che si avwanre nẹ oja eje avwanre ria fikirẹ oborẹ avwanre ruru.

7. Die yen che mu avwanre vwo bru ekpako na ra e de ru umwemwu ra rhọnvwe ta phiaa?

⁷ Die yen ofori nẹ e ru ẹwẹn de brẹ hwe avwanre fikirẹ umwemwu re ruru ra ta phiaa? Baibol na jiriro kẹ avwanre nẹ e bru ekpako na ra vwọ kẹ ukẹcha. (Jems 5:14, 15) Dedena, ọ bẹn ra vwọ rhọvwọn oruchọ rẹ avwanre. E de kurhẹriẹ je karophiyọ nẹ Jihova kugbe eshare nana ro vwo mu na che gbe arodọnvwẹ kẹ avwanre, ọnana cha nẹrhẹ e bru ayen ra. Roro kpahen oborẹ oniọvo ọshare re se Arthur,a rẹ ẹwẹn obrorhiẹn rọyen kpokpori mamọ fikirẹ obo ro ruru tare, “Omarẹ ẹgbukpe ọvo yen mi vwo ni ughe rẹ ihoho ihwo re banphiyọ jẹ mi vwo nyo ota ro shekpahen ẹwẹn obrorhiẹn nu, me da fan imwemwu mẹ vwọ kẹ aye mẹ kugbe ekpako na. Ọyena vwọ wan nu, ẹwẹn mẹ de rhi totọ jẹ mi ji muomaphiyọ fikirẹ obo ri mi ruru na. Ekpako na karophiyọ ovwẹ nẹ Jihova je rhe sen vwẹẹ, nẹ ọ ghwọku avwanre kidie nẹ o vwo ẹguọnọ avwanre. Eta rẹ avwerhen rayen na te vwe ubiudu je nẹrhẹ me kpọ iroro mẹ vi.” Asaọkiephana, Arthur ga kerẹ ọkobaro ọkieje kugbe odibo rowian. Mavọ yen ọ vwerhoma te ra vwọ riẹn nẹ Jihova che gbe arodọnvwẹ kẹ avwanre siẹrẹ e de kurhẹriẹ!

JIHOVA KẸ AVWANRE IPHIẸROPHIYỌ

8. (a) Iphiẹrophiyọ vọ yen Jihova vwọ kẹ ihwo ri Ju re mu kpo ighuvwu? (b) Vwo nene obo rehẹ Aizaya 40:29-31, die yen iphiẹrophiyọ se ru vwẹ oma rẹ ihwo ri Ju ri kurhẹriẹ na?

⁸ Vwẹ ẹro rẹ ihworakpọ, iphiẹrophiyọ herọ vwọ kẹ ihwo ri Ju re mu kpo ighuvwu naa. A riẹn Ẹgba rẹ Usuon ri Babilọn nẹ ayen siobọnẹ eviẹn rayen kpoo. (Aiz. 14:17) Dedena, Jihova da vwẹ iphiẹrophiyọ vwọ kẹ ihwo rọyen. O veri nẹ e che siobọnẹ ihwo rọyen, nẹ o vwo emu vuọvo rọ cha dobọ rayen jii. (Aiz. 44:26; 55:12) Vwẹ ẹro ri Jihova, Babilọn pha kerẹ iwurhie. (Aiz. 40:15) E de phopho, odju ko muo yanran. Die yen iphiẹrophiyọ se ru vwẹ oma rẹ ihwo ri Ju re mu kpo ighuvwu na? Ọ cha vwẹ ọbọngan vwọ kẹ ayen. O ji vwo orọnvwọn ọfa iphiẹrophiyọ se ru vwẹ oma rayen. Aizaya de si: “Ihwo re hẹrhẹ Ọrovwohwo cha rhiọ ogangan rayen.” (Se Aizaya 40:29-31.) Iphiẹrophiyọ cha vwẹ ẹgba kẹ ayen; ayen ke cha “tan ibekpe kerẹ ugo.”

9. Die yen nẹrhẹ ihwo ri Ju re mu kpo ighuvwu na vwẹroso ive ri Jihova?

⁹ Jihova je vwẹ imuẹro kẹ ihwo ri Ju re mu kpo ighuvwu na oboresorọ ayen vwọ vwẹroso ive rọyen. Vwẹ idjerhe vọ? Roro kpahen aroẹmrẹ buebun ri rugba re. Kerẹ udje, ayen mrẹ ọke ihwo rẹ Asiria vwo phiẹ uvwiẹ ihwe rẹ ihwo rẹ Izrẹl kua ji mu ayen kpo ighuvwu. (Aiz. 8:4) Ayen je mrẹ ọke rẹ ihwo ri Babilọn vwọ ghwọrọ Jerusalẹm totọ ji mu ihwo rayen kpo ighuvwu. (Aiz. 39:5-7) Vwọba, ayen mrẹ ọke re vwo rhuẹro rẹ Ovie Zẹdikaya ji muo kpo Babilọn. (Jer. 39:7; Izi. 12:12, 13) Kemu kemu ri Jihova tare eje rugba. (Aiz. 42:9; 46:10) Aroẹmrẹ nana eje re djunute na ru esegbuyota rayen gan nẹ ive ri Jihova rọ tare nẹ e che siobọnẹ ayen kpo ji che rugba!

10. Vwẹ ẹdẹ re koba na, die yen sa cha avwanre uko vwo ru iphiẹrophiyọ avwanre gan?

¹⁰ Die yen avwanre yonori? Siẹrẹ e de she ọkuọrọn, iphiẹrophiyọ re vwo kpahen obaro na sa vwẹ ọbọngan kẹ avwanre je nẹrhẹ e vwo ẹgba. Avwanre yerẹn vwẹ ọke ọgangan rọ pha bẹnbẹn ji hirharokuẹ ivwighrẹn ri vwo ẹgba mamọ. Dedena, e jẹ ofu dje avwanree. Jihova kẹ avwanre uvi rẹ iphiẹrophiyọ—ọyen a vwọ dia iparadaisi vwọrẹ ufuoma kugbe ofuvwegbe. Ofori nẹ a tẹnrovi iphiẹrophiyọ na vwẹ evun rẹ ẹwẹn kugbe ubiudu rẹ avwanre. E rhe ru ọtiọyeen, iphiẹrophiyọ avwanre kọ cha họhọ otọ oyoyovwin ra wan ovakpo rọ pha bisibisi gẹrẹ ẹro nẹ. Kẹ, mavọ yen e se vwo “ru ovakpo na fon” yẹrẹ ru iphiẹrophiyọ avwanre gan? A sa rhuẹrẹ ọke phiyọ ọkieje vwo roro kpahen oborẹ akpeyeren avwanre cha dia vwẹ akpọ ọkpokpọ na. E se se ẹbe, ni ividio je kerhọ rẹ ine re ta ota kpahen iphiẹrophiyọ avwanre. Avwanre je sa nẹrhovwo rhe Jihova kpahen ive rẹ avwanre rhẹro rọyen nẹ o ru kẹ avwanre vwẹ iparadaisi.

11. Die yen vwẹ ukẹcha kẹ oniọvo aye ọvo rọ muọga rọ bẹn esivwo vwọ rhoma vwo ẹgba?

¹¹ Roro kpahen oborẹ iphiẹrophiyọ vwẹ ọbọngan vẹ ẹgba vwọ kẹ oniọvo aye ọvo re se Joy, ro nene ọga rọ bẹn esivwo muabọ. Ọ da ta: “Ọke rẹ ebẹnbẹn mẹ de mu vwe rọ, ke me ta ọdavwẹ mẹ eje kẹ Jihova, kidie me riẹnre nẹ o vwo ẹruọ mẹ. Jihova kpahenphiyọ ẹrhovwo mẹ womarẹ ọ vwọ kẹ vwẹ ‘ẹgba rọ vrẹ ẹgba.’” (2 Kọr. 4:7) Joy je vwẹ ẹwẹn roro ọke rọ cha vwọ dia akpọ ọkpokpọ na rẹ ohwo vuọvo rha cha tanẹ: “Me mwọga-a.” (Aiz. 33:24) Siẹrẹ a da ta ọdavwẹ rẹ avwanre kẹ Jihova je tẹnrovi iphiẹrophiyọ rẹ avwanre na, a cha mrẹ ẹgba vwo chirakon.

12. Diesorọ a vwọ vwẹroso ive ri Jihova? (Ni uhoho na.)

¹² Kirobo ri Jihova vwẹ imuẹro vwọ kẹ ihwo ri Ju re mu kpo ighuvwu re sa vwọ vwẹroso ive rọyen na, ọtiọyen ọ je vwẹ imuẹro kẹ avwanre nonẹna. Roro kpahen aroẹmrẹ buebun rẹ avwanre mrẹre ri rugba re. Kerẹ udje, avwanre mrẹ ẹgba rẹ usuon rẹ “ẹbẹre ọvo ganre, ẹbẹre ọvo ghwẹ.” (Dan. 2:42, 43) Avwanre ji nyo kpahan ‘etọ ri kpogho vwẹ asan sansan,’ ji ghwoghwo iyẹnrẹn esiri na vwẹ “ẹgborho na eje.” (Mat. 24:7, 14) Aroẹmrẹ nana kugbe efa buebun ruẹ esegbuyota rẹ avwanre gan nẹ ive ri Jihova eje che rugba.

JIHOVA SI OSHỌ NẸ AVWANRE OMA

13. (a) Ebẹnbẹn vọ yen ihwo ri Ju che hirharoku ọke rẹ ukpo rayen de siẹkẹrẹ re? (b) Vwo nene obo re djisẹ rọyen vwẹ Aizaya 41:10-13, idjerhe vọ yen Jihova vwọ vwẹ ọbọngan vwọ kẹ ihwo ri Ju re mu kpo ighuvwu?

¹³ Dede nẹ Jihova vwo uvi rẹ iphiẹrophiyọ vwọ kẹ ihwo ri Ju re mu kpo ighuvwu vwẹ Babilọn, ọ riẹnre nẹ ayen che hirharoku ebẹnbẹn ọke re de che siobọnẹ ayen. Jihova tarọ jovwo nẹ ọke re che vwo siobọnẹ ayen kpo de siẹkẹrẹ re, ovie ọvo ro vwo ẹgba cha kpare ofovwin rhe Babilọn kugbe ibrotọ re riarierẹ phiyọ. (Aiz. 41:2-5) Kẹ, ofori nẹ oshọ mu ihwo ri Ju? Ikpe buebun tavwen ọnana ke rhe phia, Jihova vwẹ ọbọngan kẹ ihwo rọyen rọ vwọ tanẹ: “Wọ djẹ oshọ-ọ, kidie me vẹ owẹ herọ, wo jẹ ofu dje we-e, kidie Mẹvwẹ Ọghẹnẹ wẹn.” (Se Aizaya 41:10-13.) Die yen o mudiaphiyọ rọ vwọ tanẹ “Mẹvwẹ Ọghẹnẹ wẹn”? Ọ dia ọ karophiyọ ihwo ri Ju nẹ ayen vwẹ ẹga kẹ ọyeen—kidie ayen riẹnre nẹ ọyen obo ro fori nẹ ayen ru. Ukperẹ ọtiọyen, ọ karophiyọ ayen nẹ ọ vẹ ayen herọ nẹ ọ je cha vwẹ ukẹcha kẹ ayen.—Une 118:6.

14. Ọrhọ yen idjerhe ọfa Jihova vwo si oshọ nẹ ihwo ri Ju re mu kpo ighuvwu na oma?

¹⁴ Jihova ji si oshọ nẹ ihwo ri Ju re mu kpo ighuvwu na oma rọ vwọ karophiyọ ayen kpahen erianriẹn kugbe ẹgba rọyen rọ basaan. Ọ vuẹ ihwo ri Ju re mu kpo ighuvwu na nẹ ayen nẹ isio rehẹ idjuvwu na. Ọ je ta kẹ ayen nẹ ọ dia ọyen de ma isio na ọvoo nẹ ọyen je riẹn odẹ rayen eje ọvuọvo. (Aiz. 40:25-28) Ọ da dianẹ Jihova riẹn odẹ rẹ isio na ọvuọvo, kọyen ọ je riẹn odẹ rẹ idibo rọyen ọvuọvo! Jihova de vwo ẹgba rọ vwọ ma isio na, kọyen o ji vwo ẹgba rọ vwọ vwẹ ukẹcha kẹ ihwo rọyen. Ọtiọyena, ihwo ri Ju re mu kpo ighuvwu vwo emu vuọvo rẹ ayen cha ro ẹnwan kpahen yẹrẹ djoshọ rọyeen.

15. Idjerhe vọ yen Ọghẹnẹ vwo muegbe rẹ ihwo ri Ju rehẹ ighuvwu hẹrhẹ obo re cha vwẹ obaro?

¹⁵ Jihova ji muegbe rẹ ihwo rọyen kpahan obo re cha vwẹ obaro. Vwẹ ẹbẹre rẹsosuọ rẹ ọbe rẹ Aizaya, Ọghẹnẹ da vuẹ ihwo rọyen: “Ro ivun wẹn, re wo bi ẹchẹ gbe oma; Si oma wẹn nu emerha bẹsiẹ rẹ ophu rọye vwo fue.” (Aiz. 26:20) Ọ sa dianẹ ẹkpo ri Baibol nana ke rugba ọke Ovie Sairọs vwo phi Babilọn kparobọ. Ogbikuegbe ri Grik awanre ọvo tare nẹ ọke ri Sairọs vwọ ro Babilọn, ọ “da vuẹ [isodje rọyen] nẹ kohwo kohwo rẹ ayen mrẹ vwẹ otafe ayen hwe.” Vwẹ ẹwẹn roro oborẹ oshọ che mu ihwo re dia Babilọn te! Ẹkẹvuọvo, ọ sa dianẹ ihwo ri Ju rehẹ ighuvwu vwẹ Babilọn vrabọ rẹ ohwekufia nana kidie ayen nene iji ri Jihova.

16. Diesorọ o rhe fo ra vwọ djoshọ rẹ obo re cha vwẹ obaro naa? (Ni uhoho na.)

¹⁶ Die yen avwanre yonori? O rhe che krii, avwanre ki che hirharoku ukpokpogho rọ ma rho kparobọ vwẹ ikuegbe rẹ ihworakpọ. Ọ da tonphiyọ, oshọ vẹ otighi kọ cha ro ihworakpọ eje oma. Jẹ ọ dia ọtiọyen ọ cha dia vwọ kẹ ihwo ri Jihovaa. Avwanre riẹnre nẹ Jihova ọyen Ọghẹnẹ rẹ avwanre. Avwanre cha vwẹrosuọ kidie “usivwin rẹ [avwanre] sikẹre re.” (Luk 21:28) Ọ da tobọ dianẹ okugbe rẹ ẹgborho na vwọso avwanre dede, e che mudia gan. Jihova cha reyọ emekashe rọyen vwọ chochọn rẹ avwanre, ọ je cha kẹ avwanre odjekẹ ri che sivwin arhọ rẹ avwanre. Mavọ yen odjekẹ ọtiọyena cha wan te avwanre obọ? Avwanre je rhe riẹẹn. Ẹkẹvuọvo, ọ sa dianẹ odjekẹ tiọyena che te avwanre obọ womarẹ ikoko rẹ avwanre. Eyena sa dia “ivun,” rẹ avwanre cha djẹ ro a da sa mrẹ usivwin. Mavọ yen avwanre se vwo muegbe hẹrhẹ obo re cha vwẹ obaro na? Ofori nẹ e sikẹre iniọvo rẹ avwanre phiyọ, nene odjekẹ ro nẹ ukoko ri Jihova cha, ji vwo imuẹro nẹ Jihova yen suẹn ukoko na.—Hib. 10:24, 25; 13:17.

17. Mavọ yen a sa vwọ vwẹroso Jihova nẹ ọ cha kẹ avwanre ọbọngan?

¹⁷ Dede nẹ akpeyeren ghwa lọhọ kẹ ihwo ri Ju re mu kpo ighuvwu vwẹ Babilọnii, Jihova kẹ ayen ọbọngan rẹ ayen guọnọre. O ji che ru ọtiọyen kẹ avwanre. Ọtiọyena o toro obo re cha vwẹ obaroo, vwẹroso Jihova nẹ ọ cha vwẹ ọbọngan vwọ kẹ wẹ ọkieje. Eriyina, vwẹrosọ arodọnvwẹ rọyen. Ru iphiẹrophiyọ wẹn ganphiyọ. Karophiyọ nẹ kidie nẹ Jihova yen Ọghẹnẹ wẹn, o vwo emu vuọvo ro fori nẹ wọ djoshọ rọyeen.