Vwẹ Ughegbe Ruiruo Vwẹ Idjerhe Abavo

Ọyinkọn Jems reyọ Baibol na vwo dje ughegbe rọ nẹrhẹ a mrẹ oka rẹ ohwo ra hepha vwẹ obevun. (Jems 1:22-25) Mavọ yen a sa vwọ vwẹ Baibol na ruiruo kerẹ ughegbe?

Nabọ frẹkotọ se. Siẹrẹ a da gẹrẹ oma nẹ ughegbe, e se gbẹro kẹ inuhu evo re tanmu oma avwanre, e de jẹ ayen e sio no oma. Ọtiọyen Baibol na je hepha, e se vwo vwo oniso rẹ asan ro fori nẹ e de ru ewene ra guọnọre, ko fori nẹ a nabọ jomaotọ se Ota rẹ Ọghẹnẹ.

Tẹnrovi oma wẹn ukperẹ ihwo efa. E de mu ughegbe phiyọ oka rẹ asan, a sa reyọ vwọ mrẹ asan re chọre vwẹ oma rẹ ihwo efa. Vwẹ idjerhe vuọvo na, a je sa reyọ Baibol na vwọ mrẹ oruchọ rẹ ihwo efa. Jẹ, e de ru ọtiọyen a gbe cha mrẹ asan ro fori nẹ avwanre komobọ de ru ewenee.

Dia ohwo rọ nuẹ. Ọ da dianẹ e de nẹ ughegbe obo re chọre ọvo kọyen avwanre mrẹ, ofu se dje avwanre. Ọtiọyena, siẹrẹ avwanre de se Baibol na, e jẹ avwanre dia ihwo re nuẹ, e rhe ruẹ vrẹ oborẹ Jihova guọnọ miẹ avwanree.​—Jems 3:17.