Ẹro Vọ Yin Jihova Vwo Ni Vwe?
1. Idjerhe vọ yẹn Baibol na vwọ họhọ ughegbe?
1 Abọ ibro wo nẹ ughegbe? Buebun ravwanre ruẹ ọtiọyen kẹdẹ kẹdẹ rere avwanre vwọ mrẹ asan ro fori nẹ avwanre kpọvi vwẹ oma ravwanre. A vwẹ Baibol na vwo dje ughegbe. Isese ri Baibol chọn avwanre uko vwọ mrẹ oka rohwo rẹ avwanre hepha vwẹ obevun. Oka rẹ ohwo rẹ avwanre hepha vwẹ obevun ọyen Jihova nẹ. (1 Sam. 16:7; Jems 1:22-24) Ota rẹ Ọghẹnẹ se ‘vughe iroro vẹ omeru rọ hẹ evun rẹ udu na.’ (Hib. 4:12) Mavọ yẹn isese ri Baibol vẹ evwo roro kpahen obo re seri sa chọn avwanre uko vwọ mrẹ asan rẹ avwanre da guọnọ ọkpọvi rere a sa vwọ diẹ uvi rẹ ighwoghwota?—Une 1:1-3.
2. Mavọ yẹn Baibol na sa vwọ chọn avwanre uko vwọ fuẹrẹn oma ravwanre ni?
2 Reyẹ Baibol na Vwọ Wian Kerẹ Ughegbe: Ikuegbe ri Baibol kpahen idibo ri Jihova ri fuevun yono avwanre kpahen uruemu ri je. Kerẹ udje, Devid dje oruru ro vwo kpahen odẹ rẹ Ọghẹnẹ phia. (1 Sam. 17:45, 46) Aizaya fiudugbere ghwoghwo kẹ ihwo re guọnọ kerhọ-ọ. (Aiz. 6:8, 9) Fikirẹ ẹguọnọ ri Jesu vwo kpahen ọsẹ rọyen, kọyen sorọ iruo aghwoghwo na vwọ diẹ emu omavwerhovwẹn kẹ ukpe rọ vwọ diẹ oghwa. (Jọn 4:34) Inene-ri-Kristi rẹ ẹgbukpe ujorin ẹsosuọ ghwoghwota rẹ Ọghẹnẹ vẹ oruru, ayen vwẹroso Jihova, ayen ji brorhiẹn rẹ ayen vwo ghwoghwo ota na vwọrẹ jẹ obọ ẹdajo. (Iruo 5:41, 42; 2 Kọr. 4:1; 2 Tim. 4:17) Siẹrẹ avwanre de roro kpahen idje nana, kẹ avwanre sa fuẹrẹn oma ravwanre ni, vwẹ idjerhe rọ sa nẹrhẹ e ru yovwin phiyọ vwẹ ẹga rẹ avwanre vwọ kẹ Ọghẹnẹ.
3. Diesorọ avwanre vwo ru ewene kpakpata?
3 Wian Kpahen Ẹdia ru Wo de Shekpotọ: Erere che se te avwanre obọ-ọ, siẹrẹ e de ni ughegbe nu e mi chukoku ẹdia ri fori nẹ a kpọvi vwẹ oma ravwanre. Avwanre sa rẹ Jihova nẹ ọ chọn avwanre uko vwọ vwẹ ubiẹro abavo vwo ni oma ravwanre ji ru ewene vwẹ asan rẹ avwanre de shekpotọ. (Une 139:23, 24; Luk 11:13) Rọvwọ dianẹ ọke ro chekọ rhe gro-on na, jẹ arhọ rihwo hẹ evunrẹ ẹdia rẹ imwoshọ, ko fori nẹ avwanre ru ewene kpakpata.—1 Kọr. 7:29; 1 Tim. 4:16.
4. Erere vọ yin che te ohwo yena ro se Ota rẹ Ọghẹnẹ nu o de ru nene obo ro seri?
4 Oka rohwo rẹ avwanre hepha vwẹ obevun ọyen Jihova nẹ, ọ diẹ omaẹvwọphia ravwanre-e. (1 Pita 3:3, 4) Erere vọ yin che te ohwo yena ro se Ota rẹ Ọghẹnẹ nu o de ru nene obo ro seri? Ọ ‘dia ohwo ro nyo nẹ ọ me chọrọ ẹro-o, ẹkẹvuọvo ọhwo ro nyo nu o de ru nene, ko vwo ebruba vwẹ iruo rọyen.’ (Jems 1:25) Avwanre cha diẹ uvi rẹ ighwoghwota rẹ oma vwerhan keridie avwanre ‘dje urinrin rẹ Jihova phia.’—2 Kọr. 3:18.