Rha Yan Womarẹ Esegbuyota

1. Diesorọ oma akpeyeren ri Pọl vwọ vwerhọn ọke ro vwo ni kpuko?

ỌKE vwọ yanran na, ọyinkọn Pọl da riẹn nẹ o rhe che kri e ki hwe ọyeen, ẹkẹvuọvo o vwo oboresorọ oma rẹ akpeyeren rọyen vwọ vwerhọn. O vwo ni kpuko, ọ da ta: “Me djonẹ na toba re, me yọnrọn esegbuyota na.” (2 Tim. 4:6-8) Pọl bru erhiẹn aghwanre vwẹ akpeyeren rọyen rọ vwọ ga Jihova, o de vwo imuẹro nẹ oma rọyen vwerhen Jihova. Avwanre ji se bru omamọ erhiẹn ji vwo aroesiri rẹ Ọghẹnẹ. Mavọ yen e se vwo ru ọtiọyen?

2. Ra vwọ yan womarẹ esegbuyota, die yen o mudiaphiyọ?

² Pọl ta kpahen oma rọyen vẹ Inenikristi efa re fuevun nẹ: ‘Avwanre yan womarẹ esegbuyota ọ dia womarẹ obo ra mrẹẹ.’ (2 Kọr. 5:7) Die yen otọ rẹ eta ri Pọl na? Ọkievo vwẹ Baibol na, ra vwọ “yan” se mudiaphiyọ oborẹ ohwo guọnọ yeren akpọ rọyen wan. Siẹrẹ ohwo de nene obo rọ mrẹ ọvo, ko muẹ erhiẹn ro brẹ kpahen obo rọ mrẹ, obo ro nyo, kugbe oborẹ oma ruo. Vwọ fẹnẹ ọyena, ohwo rọ yan womarẹ esegbuyota, mu erhiẹn rọyen kpahen ẹroẹvwọsuọ ro vwo kpahen Jihova Ọghẹnẹ. Uruemu rọyen djephia nẹ o vwo imuẹro nẹ Ọghẹnẹ cha hwosa kẹ ọyen, nẹ ọ je cha mrẹ erere siẹrẹ o de nene uchebro ri Jihova rọhẹ Baibol na.—Une 119:66; Hib. 11:6.

3. Erere vọ yen no cha siẹrẹ a da yan womarẹ esegbuyota? (2 Kọrẹnt 4:18)

³ Vwọrẹ uyota, avwanre eje mu erhiẹn avwanre kpahen obo ra mrẹ, obo re nyo, kugbe oborẹ oma ruẹ avwanre. Jẹ, ọ da dianẹ oborẹ avwanre mrẹ yẹrẹ nyo ọvo yen avwanre mu ẹwẹn kpahan siẹrẹ avwanre de vwo erhiẹn eghanghanre re che bru, e che vwo ebẹnbẹn. Diesorọ a vwọ ta ọtiọyen? Oborẹ avwanre mrẹ ji nyo sa phiẹn avwanre ọkievo. Ọ rha tobọ dia ọtiọyeen, ọ da dianẹ oborẹ avwanre mrẹ ọvo kọyen avwanre nene, ọnana sa nẹrhẹ a kpairoro vrẹ ọhọre rẹ Ọghẹnẹ yẹrẹ odjekẹ rọyen. (Aghwo. 11:9; Mat. 24:37-39) Ẹkẹvuọvo, siẹrẹ avwanre da yan womarẹ esegbuyota, ke che bru erhiẹn ri “je Ọrovwori na.” (Ẹfe. 5:10) E de nene uchebro rẹ Ọghẹnẹ, ọ kẹ avwanre uvi rẹ omavwerhovwẹn, ọ je nẹrhẹ ẹwẹn rẹ avwanre. (Une 16:8, 9; Aiz. 48:17, 18) Avwanre da yan womarẹ esegbuyota ọkieje, ke che vwo arhọ ri bẹdi bẹdẹ vwẹ obaro na.—Se 2 Kọrẹnt 4:18.

4. Mavọ yen ohwo sa vwọ riẹn sẹ ọyen yan womarẹ esegbuyota yẹrẹ womarẹ obo ra mrẹ?

⁴ Mavọ yen a sa vwọ riẹn nẹ avwanre yan womarẹ esegbuyota ọ dia womarẹ obo ra mrẹẹ? Vwọrẹ uyota, a sa nọ oma avwanre enọ nana: Erọnvwọn vọ yen sun erhiẹn avwanre? Erọnvwọn ra mrẹ ọvo yen avwanre vwẹrosua? Gbanẹ avwanre vwẹroso uchebro ri Jihova? E gbe jẹ a ta ota kpahen oborẹ avwanre sa vwọ vwẹroso Jihova vwẹ ẹdia erha re pha ghanghanre: siẹrẹ a da guọnọ iruo, a da guọnọ ọrivẹ orọnvwe, yẹrẹ odjekẹ de nẹ obọ rẹ ukoko rhe. Vwẹ ẹdia ọvuọvo, a cha ta ota kpahen obo re se roro kpahen rere e se vwo bru omamọ erhiẹn.

SIẸRẸ A DA GUỌNỌ IRUO

5. Die yen ofori nẹ e roro kpahen siẹrẹ a da guọnọ iruo?

⁵ Avwanre eje guọnọ vwẹrote ọdavwẹ rẹ oma avwanre vẹ ọ rẹ ihwo rẹ orua avwanre. (Aghwo. 7:12; 1 Tim. 5:8) O vwo iruo evo ra da hwa omamọ osa. Ohwo rọ wian vwẹ asan tiọyena sa mrẹ igho vwọ dẹ obo rọ guọnọre nẹ ẹdẹ ra ro ẹdẹ, je mrẹ igho evo vwọ jahwa fikirẹ obaro na. Vwọ kẹ iruo efa, ọ dia ọtiọyen ọ hephaa, ọ sa dianẹ igho ra hwa te emuọvoo, ọnana me nẹrhẹ ohwo vwẹrote oborẹ orua na ma guọnọ. Siẹrẹ avwanre de brorhiẹn sẹ e che rhiabọreyọ iruo, e jẹ a nabọ roro kpahen uchunu rẹ igho ra cha hwa kẹ avwanre. Jẹ, ọ da dianẹ ọyena ọvo yen ohwo na roro vwẹ ẹwẹn, ohwo tiọyena yan womarẹ obo rọ mrẹ ọvo.

6. Mavọ yen a sa vwọ yan womarẹ esegbuyota siẹrẹ a da guọnọ iruo? (Hibru 13:5)

⁶ Ọ da dianẹ avwanre yan womarẹ esegbuyota, e ji che roro sẹ iruo na se gbowọphiyọ oyerinkugbe avwanre vẹ ọ ri Jihova. A sa nọ oma avwanre: ‘A cha guọnọ nẹ mi ru oborẹ Jihova vwo utuoma kpahen vwevunrẹ iruo na?’ (Isẹ 6:16-19) ‘O che gbowọphiyọ ẹga mẹ je nẹrhẹ mi sherabọ kẹ orua mẹ ọke grongron?’ (Fil. 1:10) Ọ da dianẹ ẹkpahọnphiyọ rẹ enọ nana e, o che yovwin a vwọ yanjẹ iruo tiọyena vwo, ọ da tobọ dianẹ iruo bẹn ẹmrẹ. Kidie avwanre yan womarẹ esegbuyota, avwanre ki brorhiẹn ri djephia nẹ a vwẹroso Jihova nẹ ọ cha vwẹrote ọdavwẹ rẹ avwanre.—Mat. 6:33; se Hibru 13:5.

7-8. Idjerhe vọ yen oniọvo ọvo vwẹ South America vwọ yan womarẹ esegbuyota? (Ni uhoho na.)

⁷ Jokaphiyọ oborẹ Javier,a oniọvo ọvo vwẹ South America, mrẹ obo rọ ghanre te ra vwọ yan womarẹ esegbuyota. Ọ da ta: “Me mrẹ omamọ iruo ọvo ra da cha hwa okposa kẹ vwẹ rẹ igho rọyen vwẹ asakuivẹ bun vrẹ obo ra hwa kẹ vwẹ jovwo, rẹ oma rọyen je vwerhen ovwẹ mamọ.” Ẹkẹvuọvo, Javier vwo owenvwe ro vwo ruiruo ọkobaro. Ọ da vwọba: “E de se vwe bru ohwo rọ vwẹrote akon iruo na rere ọ sa vwọ nọ vwẹ enọ. Tavwen a ke nọ vwẹ enọ, me da nẹrhovwo kẹ ukẹcha, vẹ imuẹro nẹ Jihova yen riẹn obo ri me yovwin kẹ vwẹ. Me guọnọ yan obaro ememerha, jẹ ọ da dianẹ iruo nana cha kẹ vwẹ uphẹn ri mi vwo ru bunphiyọ vwẹ ẹga ri Jihovaa, me rha guọnọọ.”

⁸ Javier da ta: “Ọke ra vwọ nọ vwẹ enọ na, ohwo rọ vwẹrote iruo na da vuẹ vwẹ nẹ ọkieje yen me cha vwọ wian ọke vrẹ. Me da vwomakpotọ vuẹ nẹ mi che se ru ọtiọyeen fikirẹ ẹga mẹ.” Ọtiọyena, Javier da sen iruo na. Ẹdidjana ivẹ vwọ wan nu, ọ da ton iruo ọkobaro phiyọ. Vwẹ oba rẹ ukpe vuọvo yena, ọ da mrẹ iruo rẹ ubrọke. Ọ da ta: “Jihova nyo ẹrhovwo mẹ je kẹ vwẹ iruo rọ vẹ iruo rẹ ọkobaro mẹ gbe shephiyọ. Oma vwerhen ovwẹ me vwọ mrẹ iruo rọ kẹ vwẹ ọke vwọ ga Jihova vẹ iniọvo mẹ.”

9. Die yen wo yono nẹ obo re phia kẹ Trésor rhe?

⁹ Kẹ, a da rha mrẹvughe nẹ iruo rẹ avwanre vwori enẹna vwẹ uphẹn kẹ avwanre vwọ yan womarẹ esegbuyotaa vwo? Roro kpahen obo re phia kẹ Trésor, ro nẹ Congo rhe. Ọ tare nẹ: “A fobọ mrẹ ọkpọ rẹ iruo kpokpọ ri mi vwori naa. Igho ra hwa kẹ vwẹ vwẹ asakuerha soso vwo bun vrẹ ọ ra hwa kẹ vwẹ jovwo, ọtiọyen ihwo ji muọghọ kẹ vwẹ.” Ẹkẹvuọvo, Trésor ko gbe ẹdẹ rẹ uyono kidie ọ wian ọke vrẹ. O ji hirharoku okeke ro vwo gun efian fikirẹ irueru ọghware re ruẹ vwẹ etiyin. Trésor guọnọ yanjẹ iruo na vwo, kọ ro ẹnwan nẹ ọyen che fiabọ rẹ iruo. Die yen vwẹ ukẹcha kẹ? Ọ da ta: “Habakọk 3:17-19 nẹrhẹ me riẹn nẹ ọ da tobọ dianẹ igho ra hwa kẹ vwẹ rhe te emuọvoo, Jihova cha vwẹrote vwe vwẹ idjerhe ọvo yẹrẹ ọfa. Ọtiọyena, mi de siobọnẹ iruo na.” Ukuotọ rọyen ọ da ta: “Vwẹ iruo ra da hwa okposa kẹ ohwo, ihwo re reyọ ihwo phiyọ iruo guọnọre nẹ ihwo rẹ ayen reyọ phiyọ iruo na gbobọnyẹ kemu kemu vwo ruiruo na, tobọ te ọke rọ vẹ orua rọyen ghwọrọ kuẹgbe vẹ ọke rọ vwọ ga ẹga. Oma vwerhen ovwẹ nẹ me sẹro rẹ oyerinkugbe re me vẹ Jihova kugbe orua mẹ vwori. Ẹgbukpe ọvo vwọ wan nu, Jihova da cha vwẹ uko vwọ mrẹ iruo rọ vwẹ uphẹn kẹ vwẹ vwo yeren akpọ ri kekpe je mrẹ ọke vwo ruiruo vwẹ ẹga ri Jihova. Siẹrẹ e de phi Jihova phiyọ ẹdia rẹsosuọ, ọmọke yen avwanre che vwo muabọ rẹ igho, ẹkẹvuọvo Jihova cha vwẹrote avwanre.” Uyota nẹ, siẹrẹ a da vwẹroso uchebro ri Jihova vẹ ive rọyen, ka cha yan womarẹ esegbuyota ọkieje ko ji che bruba kẹ avwanre.

A DA GUỌNỌ ỌRIVẸ ORỌNVWE

10. Siẹrẹ a da guọnọ ọrivẹ rẹ orọnvwe, die yen sa nẹrhẹ a yan womarẹ obo ra mrẹ?

¹⁰ Orọnvwe ọyen okẹ ro nẹ obọ ri Jihova rhe, ọ chọre ohwo da guọnọ rọvwọọn. Siẹrẹ ohwo da guọnọ ọrivẹ rẹ orọnvwe, oniọvo aye se vwo oniso rẹ uruemu, ekroma, ẹro ihwo efa vwo nẹ oniọvo ọshare na, obo rọ ghwọrọ igho wan, oghwa ro muẹ vwẹ orua rọyen, kugbe sẹ ọ nẹrhẹ oma vwerhọn.b Erọnvwọn nana pha ghanghanre. Ẹkẹvuọvo, ọ da dianẹ erọnvwọn nana ọvo yen o roro vwẹ ẹwẹn, ọ sa dianẹ ọ yan womarẹ obo rọ mrẹ.

11. Mavọ yen a sa vwọ yan womarẹ esegbuyota siẹrẹ a da guọnọ ọrivẹ rẹ orọnvwe? (1 Kọrẹnt 7:39)

¹¹ A mrẹ vwo dje omavwerhovwẹn ri Jihovaa siẹrẹ ọ da mrẹ iniọvo eya vẹ eshare ri nene odjekẹ rọyen ọke rẹ ayen da guọnọ ọrivẹ orọnvwe! Kerẹ udje, ayen nene odjekẹ ri Jihova rọ tare nẹ ayen hẹrhẹ vrẹ ọke rẹ urhurusivwe ehware ma vwọ gan vwẹ oma rẹ ighene, ọ da tobọ dianẹ ayen “tedje” re tavwen ayen ke ton oyan ra vwọ kọnphiyọ ohwohwo phiyọ. (1 Kọr. 7:36) Ayen nabọ fuẹrẹn sẹ ohwo rẹ ayen guọnọ rọvwọn na vwẹ iruemu rẹ Jihova tare nẹ a guọnọ mie omamọ aye vẹ omamọ ọshare. (Isẹ 31:10-13, 26-28; Ẹfe. 5:33; 1 Tim. 5:8) Ọ da dianẹ ohwo rọ dia Oseri ri Jihovaa dje ẹwẹn rẹ orọnvwe phia, ayen ki nene odjekẹ ri Baibol rọ tare nẹ a rọvwọn “evunrẹ Ọrovwori na ọvo,” kirobo rọ hepha vwẹ 1 Kọrẹnt 7:39. (Se.) Ayen ke yan womarẹ esegbuyota vẹ imuẹro nẹ Jihova sa vwẹrote ọdavwẹ rayen vrẹ kohwo kohwo.—Une 55:22.

12. Die yen wo yono nẹ udje ri Rosa rhe?

¹² Roro kpahen obo re phia kẹ Rosa, ọkobaro vwẹ Colombia. Abọ buebun yen iruo rọyen nẹrhẹ ọ mrẹ ọshare ọvo rọ dia Oserii, ayen de rhi vughe ohwohwo. Rosa de rhi je ọshare na. Ọ da ta: “Ọ họhọ omamọ ohwo. Ọ vwomakpahotọ kẹ irueru rẹ orere rọyen, o ji vwo omamọ uruemu. Obo ro dje uruemu esiri kẹ vwẹ je vwe. O vwo iruemu re me guọnọre vwẹ oma rẹ ọshare, jokparẹ ọ dia Oseri ri Jihovaa.” Ọ da vwọba: “Ọ bẹnre me vwọ sen kẹ kidie ọyen obo re me je guọnọ. Vwẹ ọke yena, mẹvwẹ hẹ ẹdia rẹ ọruvwohwo me je guọnọ rọvwọn, jẹ me sa mrẹ ohwo vuọvo vwevunrẹ ukoko naa.” Dedena, Rosa tẹnrovi obo rọ sa mrẹ ọvoo. O roro kpahen obo re cha phia kẹ oyerinkugbe rọyen vẹ ọ ri Jihova siẹrẹ o de brorhiẹn rọ vẹ ọyen vwọ kọnphiyọ ohwohwo. Ọtiọyena, o de phioba phiyọ oyerinkugbe rayen na ji muomaphiyọ iruo rẹ ukoko na. Ọmọke krẹn vwọ wan nu, e de durhie kpo Isikuru rẹ Ihwo ri Ghwoghwo Uvie na, enẹna ọ ga kerẹ ọkobaro oghẹresan. Rosa da ta: “Jihova kẹ vwẹ ebruphiyọ buebun re nẹrhẹ oma nabọ vwerhen ovwẹ.” Dede nẹ, ọ bẹn ra vwọ yan womarẹ esegbuyota siẹrẹ a da ta ota kpahen erọnvwọn re niri ghanghanre vwẹ ubiudu, jẹ e de ru ọtiọyen, ọkieje ọ vwọ ghwa erere cha.

ODJEKẸ DE NẸ OBỌ RẸ UKOKO RHE

13. Die yen sa nẹrhẹ avwanre yan womarẹ esegbuyota siẹrẹ odjekẹ de nẹ ukoko bru avwanre rhe?

¹³ Ọkieje yen odjekẹ vwo nẹ obọ rẹ ekpako, oniruo okinriariẹ, oghọn ukoko kugbe Ẹko Rọvwẹrote kpahen oborẹ avwanre vwẹ ẹga kẹ Jihova wan. Kẹ, ọ da rha dianẹ avwanre vwo ẹruọ oboresorọ a vwọ vwẹ odjekẹ na phiaa vwo? E se vwo ẹwẹn ivivẹ sẹ odjekẹ na cha ghwa erhuvwu rhe avwanre. A sa tobọ tẹnrovi jẹgba rẹ iniọvo re vwẹ odjekẹ na phia.

14. Die yen cha vwẹ ukẹcha kẹ avwanre vwọ yan womarẹ esegbuyota siẹrẹ odjekẹ de nẹ ukoko rhe? (Hibru 13:17)

¹⁴ Siẹrẹ a da yan womarẹ esegbuyota, e che vwo imuẹro nẹ Jihova yen sun ukoko na, nẹ ọ je riẹn ẹdia rẹ avwanre. Fikirẹ ọtiọyena, avwanre rhe hwọke e ki nene odjekẹẹ, ke ji ruẹ ọtiọyen vẹ ẹwẹn abavo. (Se Hibru 13:17.) Siẹrẹ avwanre de nene odjekẹ, ọnana toroba okugbe rẹ ukoko na. (Ẹfe. 4:2, 3) Avwanre vwẹroso Jihova je riẹn nẹ dede nẹ ihwo re kobaro vwẹ ukoko na eyen ihwo re gbaree, e de nyẹme, Jihova che ku ebruphiyọ rọyen ku avwanre. (1 Sam. 15:22) Ọke vwọ yanran na, ọ cha rhuẹrẹ kemu kemu re guọnọ ọkpọvi phiyọ.—Maika 7:7.

15-16. Die yen vwẹ ukẹcha kẹ oniọvo ọvo vwọ yan womarẹ esegbuyota dede nẹ o vwo ẹwẹn ivivẹ kpahen odjekẹ ra vwọ phia? (Ni uhoho na.)

¹⁵ Roro kpahen obo re phiare ro dje erere ro no cha siẹrẹ a da yan womarẹ esegbuyota. Dede nẹ ephẹrẹ ri Spanish yen ihwo buebun ma jẹ vwẹ Peru, jẹ emotọ buebun ephẹrẹ rayen yen ayen jẹ. Ọvo usun rẹ ephẹrẹ nana yen Quechua. Vwẹ ikpe buebun rhire na, yen iniọvo re jẹ ephẹrẹ ri Quechua na vwọ guọnọ ihwo efa re jẹ ephẹrẹ ri Quechua vwẹ ekogho rẹ ayen de ghwoghwo. Ẹkẹvuọvo, rere e se vwo ru nene oborẹ usuon tare, e de ru ewene phiyọ ona rẹ obo re se vwo te ihwo na. (Rom 13:1) Fikirẹ ewene na, evo ki roro nẹ ọnana che gbowọphiyọ iruo rẹ aghwoghwo rọhẹ ekogho na. Kidie nẹ iniọvo na nene odjekẹ na, Jihova de bruba ẹgbaẹdavwọn rayen, ayen da mrẹ ihwo buebun re jẹ ephẹrẹ ri Quechua.

¹⁶ Kevin, ọkpako ọvo vwẹ ukoko ri Quechua, jehẹ usun rẹ ihwo evo ri vwo ọdavwẹ nana. Ọ da ta: “Ki mi roro, ‘Mavọ yen a cha vwọ mrẹ ihwo re jẹ ephẹrẹ ri Quechua?’ ” Die kọyen Kevin ruru? Ọ da ta: “Ẹwẹn mẹ da djẹ kpo obo rehẹ Isẹ 3:5. Ẹwẹn mẹ ji kpo Mosis. Jihova vuẹrẹ nẹ o sun ihwo rẹ Izrẹl nẹ Ijipt vwo kpo Urhie Ọvwavware na, rọ cha nẹrhẹ ọ lọhọ kẹ ihwo rẹ Ijipt rẹ obọ rayen se vwo te ayen. Dedena, o nyupho ri Jihova, o de sivwin ayen vwọrẹ igbevwunu.” (Eyan. 14:1, 2, 9-11, 21, 22) Kevin vwo owenvwe ro vwo ru ewene vwẹ iruo aghwoghwo rọyen. Die kọyen nẹ obuko rọyen rhe? Ọ da ta: “Oborẹ Jihova bruba kẹ avwanre wan gbevwunu. Vwẹ obuko re, avwanre yan mamọ vwẹ iruo rẹ aghwoghwo na, jẹ ọkiọvo ohwo ọvo yẹrẹ ivẹ re jẹ ephẹrẹ ri Quechua yen avwanre mrẹ. Enẹna avwanre ke tẹnroviẹ ekogho rẹ ihwo re jẹ ephẹrẹ ri Quechua hepha. Fikirẹ ọnana, avwanre ke mrẹ ihwo ta ota kẹ, orhivwinbrura buebun vẹ ihwo re nene yono Baibol na. Ihwo re cha uyono de rhi bunphiyọ.” Vwọrẹ uyota, siẹrẹ a da yan womarẹ esegbuyota, ọkieje yen Jihova vwo brẹba vwọ kẹ avwanre.

17. Die yen wo yono nẹ uyono nana rhe?

¹⁷ Avwanre ta ota kpahen ẹdia erha ro de fo nẹ a vwẹroso Jihova. Jẹ o ji fo nẹ a yan womarẹ esegbuyota vwẹ kẹdia kẹdia vwẹ akpeyeren, ọke ra da sanẹ erọnvwọn ra vwọ diotọ yẹrẹ a da sasa oma, siẹrẹ e de brorhiẹn rẹ asan re yono ẹbe te kugbe obo ra yọnrọn emọ wan. Korhiẹn korhiẹn rẹ avwanre brẹ, e jẹ e mu ẹwẹn kpahan obo ra mrẹ ọvoo, ẹkẹvuọvo e jẹ a tẹnrovi oyerinkugbe avwanre vẹ ọ ri Jihova, uchebro rọyen kugbe ive rọyen nẹ ọ cha vwẹrote avwanre. E de ru ọtiọyen, avwanre ke sa “yan vwẹ odẹ rẹ Ọrovwohwo Ọghẹnẹ rẹ avwanre bẹdi bẹdẹ.”—Maika 4:5.