Ukẹcha rẹ Obo re se Vwo Yono Ọkieje
WỌ MRẸ bẹnbẹn wo se vwo ru uyono romobọ je mrẹ omavwerhovwẹn? Ọtiọyen avwanre eje ruẹ ọkievo. Ẹkẹvuọvo, roro kpahen erọnvwọn efa rẹ avwanre ruẹ kọke kọke, kerẹ ra vwọ họ oma rẹ ohwo. Ẹhọ guọnọ ọke kugbe ẹgbaẹdavwọn, jẹ wọ da họ nu oma na kọ dia riẹin! Eyono ri Baibol na je sa nẹrhẹ oma rẹ avwanre dia riẹin. (Ẹf 5:26) E jẹ a fuẹrẹn iroroẹjẹ evo re sa vwẹ ukẹcha phia:
Rhuẹrẹ ọke phiyọ. Uyono ri Baibol romobọ ọyen usun rẹ “erọnvwọn re ma ghanre” ro fori nẹ Onenikristi gbobọnyẹẹ. (Fil 1:10) Rere ọrhuẹrẹphiyotọ ru wo ruru na vwo jẹ uwe ẹro ẹchọrọ, diesorọ wọ rha vwọ tamuẹ asan ru wọ da sa mrẹ, kerẹ ophapha yẹrẹ ẹchẹ rẹ ifrijii? Wo se phi alamu phiyọ ifonu wẹn nẹ ọ karophiyọ owẹ tavwen ọke rẹ uyono ki te.
Nuẹ nene ọdavwẹ wẹn. Ọ lọhọ kẹ wẹ wo vwo mu ẹwẹn phiyọ uyono na ọke grongron gbanẹ vwẹ ọmọke krẹn? Wẹwẹ yen riẹn ẹdia ro me yovwin kẹ wẹ. Ọtiọyena, vwo ọnana vwẹ ẹwẹn siẹrẹ wo de ru ọrhuẹrẹphiyotọ rẹ uyono na. Ọ da dianẹ oma rha kpare owẹ ọke ru wo de che ru uyonoo, diesorọ wo rhe ruo omarẹ ibrẹro ihwee? Wọ da reyọ ọmọke kprẹn vwo yono, o yovwin vrẹ kakaka. Wọ da je tuọnphiyọ nu, owenvwe ru wo vwo ruo kọ cha rha ganphiyọ.—Fil 2:13.
Sane iyovwinreta ru wo che yono kpahen phiyotọ. Wọ cha sa vwẹ “ọke wẹ vwo ruiruo vwẹ idjerhe ro me yovwin” siẹrẹ wo de chidia te ọtọ nu, wo ki roro kpahen obo ru wo che yono kpaheen. (Ẹf 5:16) Ọtiọyena diesorọ wo rhe si iyovwinreta ru wọ guọnọ yono kpahen na phiyotọọ? Ọ da dianẹ onọ ọvo djẹ ro wẹ ẹwẹn, sio phiyotọ. Siẹrẹ wo de kuẹ uyono na phiyọ nu, wọ sa vwẹ ẹkpo efa vwọba obo ru wo si phiyotọ na ru wọ guọnọ yono kpahen na.
Ru ewene siẹrẹ o de fo. Davwẹngba vwo ru ewene vwẹ ọrhuẹrẹhiyotọ wẹn na, kerẹ udje kpahen ọke ru wọ cha ghwọrọ vwo yono yẹrẹ iyovwinreta ru wọ sanere na. Ọ dia ọke re vwo ruo, obo ro gron te yẹrẹ obo ru wo yono kpahen yen ma ghanree—ẹkẹvuọvo sẹ wo ruo ọkieje.
Vwọrẹ uyota, erere herọ siẹrẹ e de nene ọrhuẹrẹphiyotọ rẹ uyono ọkieje. Ọ nẹrhẹ avwanre siẹkẹrẹ Jihova phiyọ, bru erhiẹn rẹ aghwanre, je mrẹ ọbọngan.—Jos 1:8.