“Ovwan Dia Ihwo ri Ruẹ Nene Ota Na”

1-2. Die yen nẹrhẹ oma vwerhen idibo rẹ Ọghẹnẹ? (Jems 1:22-25)

JIHOVA vẹ Ọmọ rọyẹn guọnọre nẹ oma vwerhen avwanre. Ohwo ro si Une rẹ Ejiro 119:2 tare nẹ: “Ebruphihọ kẹ ayen otu re yọnrọn iseri rọye, re vwẹ udu rayen ejobi guọnọ.” Jesu je tanẹ: “Omavwerhovwẹn dia vwọ kẹ ihwo ri nyo ota rẹ Ọghẹnẹ ri ji ruẹ nene!”​—Lu 11:28.

² Oma vwerhen idibo ri Jihova re vwẹ ẹga kẹ. Diesorọ? O vwo erọnvwọn buebun re nẹrhẹ oma vwerhen idibo ri Jihova, ẹkẹvuọvo ọ rọ ma ghanre yen, ayen vwo se Ota rẹ Ọghẹnẹ kọke kọke je davwẹngba vwo ruẹ nene oborẹ ayen se na.​—Se Jems 1:22-25.

3. Mavọ yen avwanre vwọ mrẹ erere siẹrẹ a da reyọ obo re seri vwẹ Ota rẹ Ọghẹnẹ vwo ruiruo?

³ O vwo idjerhe sansan rẹ avwanre vwọ mrẹ erere siẹrẹ avwanre da dia “ihwo ri ruẹ nene ota na.” Kerẹ udje, siẹrẹ avwanre da reyọ oborẹ avwanre yonori vwo nẹ Ota rẹ Ọghẹnẹ vwo ruiruo, ọ cha nẹrhẹ e ru obo re vwerhen Jihova oma. Ọ je cha nẹrhẹ oma vwerhen avwanre. (Agh 12:13) E de nene odjekẹ rọhẹ Ota rẹ Ọghẹnẹ, ọ cha nẹrhẹ oyerinkugbe avwanre vẹ ihwo rẹ orua avwanre kugbe iniọvo rehẹ ukoko na yovwinphiyọ. Ọ sa dianẹ ọnana phia kẹ wẹ vwẹ akpeyeren wẹn re. Vwọba, ọ cha nẹrhẹ a kẹnoma kẹ ebẹnbẹn sansan rẹ ihwo re rhọnvwe nene odjekẹ ri Jihovaa hirharokuẹ. Vwọrẹ uyota, avwanre rhọnvwephiyọ eta rẹ Ovie Devid. Rọ vwọ ta ota kpahen urhi, odjekẹ kugbe ẹdjọeguo ri Jihova vwẹ une rọ soro nu, ọ da vwẹ eta nana ku une na phiyọ: “A da yọnrọn ayen gba ughwẹ rode na herọ.”​—Un 19:7-11.

4. Diesorọ ọ vwọ bẹn ọkievo e vwo ru nene obo re seri vwẹ Ota rẹ Ọghẹnẹ?

⁴ Vwọrẹ uyota, ọ dia ọkieje ọ vwọ lọhọ re vwo ruẹ nene obo re seri vwẹ Ota rẹ Ọghẹnẹẹ. Dede nẹ o vwo erọnvwọn buebun rẹ avwanre ruẹ, ofori nẹ avwanre rhuẹrẹ ọke phiyọ vwo se ji yono Baibol na rere avwanre se vwo vwo ẹruọ oborẹ Jihova guọnọre nẹ e ru. Ọtiọyena, e jẹ a fuẹrẹn iroroẹjẹ evo re sa cha avwanre uko vwo se Baibol na ọkieje. A je cha fuẹrẹn obo re cha vwẹ ukẹcha kẹ avwanre vwo roro kpahen oborẹ avwanre se je guọnọ idjerhe sansan re se vwo ru nene obo re yonori vwẹ akpeyeren.

RHUẸRẸ ỌKE PHIYỌ VWO SE OTA RẸ ỌGHẸNẸ

5. Ewian vọ yen ma reyọ ọke rẹ avwanre?

⁵ Buebun rẹ idibo ri Jihova vwo erọnvwọn buebun rẹ ayen ruẹ re reyọ ọke rayen. Ayen ghwọrọ ọke vwọ vwẹrote ewian ri Baibol na tare nẹ e pha ghanghanre. Kerẹ udje, buebun avwanre wian ewian vwọ vwẹrote oma rẹ avwanre kugbe orua rẹ avwanre. (1Ti 5:8) Inenikristi buebun vwẹrote ihwo rẹ orua rayen re muọga yẹrẹ e re kpakore. O ji fo nẹ a vwẹrote oma kpọkpọ rẹ avwanre, ọnana reyọ ọke. Vwọba enana eje rẹ avwanre ruẹ na, avwanre je vwẹrote ewian efa vwevunrẹ ukoko na. Owian ọvo rọ ma ghanre, ọyen avwanre vwo vwobọ vwẹ iruo aghwoghwo na vẹ oruru. Mavọ yen wọ sa vwọ rhuẹrẹ ọke phiyọ vwo se Baibol na ọkieje, roro kokodo kpahọn ji ru nene obo rọ tare vẹ ewian nana eje ru wo vwori na?

6. Mavọ yen wo se vwo phi isese ri Baibol phiyọ ẹdia rẹsosuọ vwẹ akpeyeren? (Ni uhoho na.)

⁶ Ọvo usun “erọnvwọn re ma ghanre” kẹ Inenikristi yen isese ri Baibol na, ọtiọyena ofori nẹ ọ dia emu rẹsosuọ vwẹ akpeyeren avwanre. (Fil 1:10) Vwọ kpahen ọshare rẹ oma vwerhan, ẹkpo rẹsosuọ vwẹ ọbe rẹ une rẹ ejiro da ta: “O vwo aghọghọ vwẹ evun rẹ urhi rẹ Ọrovwohwo urhi rọye na kọye o roro te ason te uvo.” (Un 1:1, 2) Ọnana mudiaphiyọ nẹ a cha rhuẹrẹ ọke phiyọ vwo se Baibol na. Ọke vọ yen o me vwo fo re vwo se Baibol na? Avwanre ọvuọvo yen cha rhuẹrẹ ọke ro me shephiyọ kẹ avwanre. Ẹkẹvuọvo, obo re ma ghanre yen, wọ vwọ rhuẹrẹ ọke phiyọ wo vwo ruo kẹdẹ kẹdẹ. Oniọvo ọshare ọvo re se Victor tare ne: “Urhiọke yen me je vwe mi vwo ru isese ri Baibol mẹ. Dede nẹ me ghwa fobọ guọnọ rhiọ vrẹn vwẹ urhiọkee, jẹ ọyen ọke rẹ asan eje vwọ dia riẹin. Ọtiọyena ki mi se muẹ ẹwẹn kpahan obo ri mi se, kidie o vwo emu vuọvo ro kpokpo uvwe ẹwẹn vwẹ ọke yenaa.” Ọtiọyen ọ je pha vwọ kẹ wẹ? Nọ oma wẹn, ‘Ọke vọ yen o me vwo fo kẹ vwẹ ri mi vwo se Baibol na?’

RORO KOKODO KPAHEN OBO RU WO SE

7-8. Die yen sa nẹrhẹ e jẹ erere ẹ mrẹ vwo nẹ oborẹ avwanre se? Djudje rọyen.

⁷ Vwọrẹ uyota, avwanre se se erọnvwọn buebun jẹ e vwo ẹruọ rẹ obo re seri naa. Wo se kpahen orọnvwọn ọvo jovwore jẹ ọmọke vwọ wan nu, wọ rha sa karophiyọ obo ru wo seri naa? Emu tiọyen phia kẹ avwanre ihwo eje re. Ọnana je sa phia siẹrẹ e de se Baibol na. Ọ sa dianẹ, e bru ẹkẹn kẹ oma re vwo se iyovwinreta evo vwẹ Baibol na kẹdẹ kẹdẹ. Ọyen obo ri shephiyọ. Ọtiọyena, e de bru ẹkẹn kẹ oma ofori nẹ a davwẹngba a vwọ yanmu ayen. (1Kọ 9:26) Jẹ, a da guọnọ mrẹ erere vwo nẹ isese ri Baibol na rhe, ofori nẹ e ru vrẹ e di vwo se.

⁸ Roro kpahen udje nana: Ekankọn guọnọ ame kerẹ ame osio ayen sa vwọ rhọ. Ẹkẹvuọvo osio na da rhọ gan nọ vwẹ uvwre rẹ ọke evo, ame na se bun nọ. Ọke yena re, ekankọn na rhe che yovwiin. Jẹ osio na da rhọ emerha ọ me ka, ọke yena ame na kọ sa ro ọtọ na, ọnana kọ nẹrhẹ ekankọn na rhua. Vwẹ idjerhe vuọvo na, ofori nẹ a kẹnoma kẹ uruemu re vwo se Baibol na vẹ okpakpa te ẹdia rẹ a rha sa mrẹ ọke vwo roro kpahan je karophiyọ obo re seri a sa vwọ reyọ vwo ruiruoo.​—Jem 1:24.

9. Die yen ofori nẹ avwanre ru siẹrẹ e de vwo uruemu re vwo se Baibol na vẹ okpakpa?

⁹ Wo niroso nẹ wo se Baibol na ọkiọvo vẹ okpakpa? Die yen ofori nẹ wo ru? Wo brokpakpaa. Davwẹngba vwo roro kpahen obo ru wo se yẹrẹ wo se nu na. Ofori nẹ ọnana bẹn vwọ kẹ wẹẹ. Wo se phiba ọke ru wọ ghwọrọ vwo ruẹ uyono wẹn rere wọ mrẹ ọke vwo roro kokodo kpahen obo ru wo yono na. Ọ je sa dianẹ ẹkpo ri Baibol ru wo che se che ghwe buun, rere wọ sa vwọ mrẹ ọke vwo roro kpahen obo ru wo seri na. Victor ra ta ota kpahen siẹvure da ta. “Mi ruẹ isese ri Baibol mẹ kprẹn, ọkiọvo uyovwinrota ọvo. Kidie nẹ edegburhiọke yen mi vwo ruẹ isese mẹ, ọnana kọ nẹrhẹ mi se roro kpahan oborẹ mi seri vwẹ ẹdẹ yena.” O toro ọke ru wo vwo ruẹ isese ri Baibol wẹẹn, obo re ma ghanre yen wo vwo roro kpahen obo ru wo seri na je mrẹ erere norhe.​—Un 119:97; ni ekpeti na “Enọ re che roro kpahen.”

10. Djudje rẹ obo ru wọ sa vwọ reyọ obo ru wo se vwo ruiruo. (1 Tẹsalonaika 5:17, 18)

¹⁰ O toro ọke ru wo vwo ruẹ isese ri Baibol yẹrẹ uchọke ru wọ ghwọrọ phiyọọ, ofori nẹ wọ guọnọ idjerhe sansan vwọ reyọ obo ru wo se na vwo ruiruo. Siẹrẹ wo de se ẹkpo ọvo vwẹ Baibol na, nọ oma wẹn ‘Mavọ yen me sa vwọ reyọ obo ri mi se na vwo ruiruo enẹna yẹrẹ vwẹ obaro na?’ Kerẹ udje, vwẹ ẹwẹn roro nẹ wo se 1 Tẹsalonaika 5:17, 18. (Se.) Wo de se ẹkpo ri Baibol ivẹ na nu, wọ sa domaji ji roro kpahen uchabọ ru wọ nẹrhovwo kugbe oborẹ ẹrhovwo wẹn ghwotọ te. Wo se roro kpahen erọnvwọn ri se mu we vwo dje ọdavwaro phia. Ọ sa dianẹ wo vworo vwẹ ẹwẹn nẹ wọ cha kpẹvwẹ Jihova fikirẹ erọnvwọn erha kiriguo ro ru kẹ wẹ. Ọ da tọbọ dianẹ ibrẹro evo yen wo vwo roro kpahen obo ro ru kẹ wẹ na, ọnana sa nẹrhẹ wo vwo ẹruọ rẹ Ota rẹ Ọghẹnẹ ji ru nene obo rọ tare. Siẹrẹ wọ da reyọ obo ru wo se vwẹ Baibol na vwo ruiruo ọkieje, ọke vwọ yanran na ku wọ cha dia uvi rẹ odibo ri Jihova! Kẹ, die yen ofori nẹ wo ru ọ da rha dianẹ o vwo erọnvwọn buebun ro fori nẹ wọ wian kpahen?

BRU ẸKẸN RU WỌ SA YANMU

11. Die yen sa nẹrhẹ ọ bẹn ọkievo wo vwo ru ewene? Djudje rọyen.

¹¹ Siẹrẹ wo de se Baibol na, ofu se dje we ọkievo kidie wo niro nẹ o vwo erọnvwọn buebun ro fori nẹ wọ wian kpahen ru wo se vwo ru yovwinphiyọ. Roro kpahen udje nana: Ẹdẹ ọvo wo vwo se Baibol na, wo de se kpahen odjekẹ ra vwọ kẹnoma kẹ uruemu re vwo nẹ ihwo ruẹ. (Jem 2:1-8) Wọ da rhe mrẹvughe nẹ wo se ru yovwinphiyọ vwẹ oborẹ wẹ vẹ ihwo efa yerẹn wan, ọtiọyena wo de brorhiẹn ru wo vwo ru ewene evo. Ọyena shephiyọ! Ẹdẹ ọfa vwo te, wo de rhe se asan ọfa vwẹ Baibol na rọ ta ota kpahen ọghanrovwẹ ru wo vwo sun ẹrẹnvwe wẹn. (Jem 3:1-12) Wọ da rhe mrẹvughe nẹ ọkievo eta wẹn vwerhen ihwo omaa. Ọtiọyena, wọ da vuẹ oma wẹn nẹ wọ cha ta eta rẹ ọbọngan re je vwerhen ihwo oma. Vwẹ ẹdẹ rerha, wo de rhe se kpahen orhọesio re vwo jẹ ugbeyan rẹ akpọ na ẹdia. (Jem 4:4-12) Wo de rhi noso nẹ ofori wọ jomaotọ sanẹ erọnvwọn ra vwọ diotọ. Vwẹ ẹdẹ rẹ ẹne, wo se no nẹ ọ cha bẹn ru wo vwo ru ewene nana eje.

12. Ọ da dianẹ isese ri Baibol nẹrhẹ wọ mrẹ asan ro fori wo de ru ewene, diesorọ ofu vwo ju we e dje? (Ni eta rehẹ obotọ.)

¹² Wo de noso nẹ o vwo ẹdia ọvo ro de fo nẹ wo ru ewene yẹrẹ ru yovwinphiyọ, wo jẹ ofu dje wee. Ọnana odjephia nẹ wo vwo ẹwẹn esiri. Ohwo rẹ uyota rọ je vwomakpotọ, se Baibol na je guọnọ asan ro de se ru yovwinphiyọ.a Karophiyọ nẹ, ọkieje yen e che vwo “ku uruemu ọkpokpọ na” phiyọ. (Kọl 3:10) Die yen cha vwẹ ukẹcha kẹ wẹ vwo ru nene Ota rẹ Ọghẹnẹ ọkieje?

13. Mavọ yen wọ sa vwọ reyọ oborẹ wo seri vwo ruiruo? (Ni uhoho na.)

¹³ Ukperẹ wo vwo ru ewene eje ẹsiẹvo vwo nene obo ru wo se kpahen, bru ẹkẹn ru wọ sa yanmu kẹ oma. (Isẹ 11:2) Wọ sa davwen ona nana: Si erọnvwọn ru wọ guọnọ wian kpahen na phiyotọ, rere wọ sane ọvo yẹrẹ ivẹ ru wọ guọnọ ka wian kpahen, wọ yanjẹ i ri chekọ vwo te ọke ọfa. Tivọ yen ofori nẹ wọ da tonphiyọ?

14. Die yen wọ sa vwọ tonphiyọ?

¹⁴ Wọ sa reyọ ọ rọ ma lọhọ vwọ tonphiyọ. Yẹrẹ wọ sa davwẹngba vwọ wian kpahen ẹdia ro de me fo nẹ wo ru ewene. Wọ da riẹn asan ro fori nẹ wọ wian kpahen nu, gba reyọ ẹbe rẹ avwanre kerẹ Watch Tower Publications Index yẹrẹ Research Guide for Jehovah’s Witnesses vwo ru ehiahiẹ. Nẹrhovwo rhe Jihova kpahen obo wọ guọnọ ru ewene kpahen, wọ je rẹ nẹ ọ kẹ wẹ “owenvwe vẹ ẹgba” wo vwo ruo. (Fil 2:13) Wo de ru eyena nu, gbe ru nene oborẹ wo yonori na. Ọ da dianẹ wọ yanmu ẹkẹn rẹsosuọ ru wo bru kẹ oma, ọnana sa nẹrhẹ wo vwo owenvwe ru wọ vwọ wian kpahen ọfa. Vwọrẹ uyota, wo de ru yovwinphiyọ yẹrẹ vwo omamọ uruemu ọvo ra guọnọ mie Inenikristi, ọnana sa nẹrhẹ ọ lọhọ vwọ kẹ wẹ ru wo vwo ru yovwinphiyọ vwẹ ẹdia efa.

JẸ OTA RẸ ỌGHẸNẸ “RUIRUO VWẸ OMA RẸ OVWAN”

15. Idjerhe vọ yen idibo ri Jihova vwọ fẹnẹ ihwo buebun ri se Baibol na? (1 Tẹsalonaika 2:13)

¹⁵ Ihwo evo tanẹ ayen se Baibol na abọ buebun re. Ẹkẹvuọvo, ayen ghini se obo ri Baibol na tare gbuyota? Ayen reyọ obo rẹ ayen seri na vwo ruiruo yẹrẹ vwẹ uphẹn kẹ nẹ o wene akpeyeren rayen? Ọ da ohwo nẹ, buebun rẹ ihwo nene odjekẹ ri Baibol naa. Ọnana fẹnẹ obo rẹ idibo ri Jihova ruẹ! Kerẹ Inenikristi rẹ ẹgbukpe ujorin rẹsosuọ, avwanre rhiabọreyọ odjekẹ ri Baibol na “kirobo rọ hepha dẹn, kerẹ ota rẹ Ọghẹnẹ.” Ọtiọyena, avwanre davwẹngba vwọ reyọ obo re yonori vwo ruiruo vwẹ akpeyeren.​—Se 1 Tẹsalonaika 2:13.

16. Die yen sa vwẹ ukẹcha kẹ avwanre vwọ dia ihwo ri ruẹ nene Ota na?

¹⁶ Ọ dia ọkieje yen ọ vwọ lọhọ re vwo se ji ruẹ nene Ota rẹ Ọghẹnẹẹ. Ọ sa bẹn ra vwọ rhuẹrẹ ọke phiyọ vwo se Baibol na. Yẹrẹ e se se Baibol na vẹ okpakpa jẹ e vwo ẹruọ rẹ obo re se naa. Ofu ji se dje avwanre fikirẹ ewene buebun ro fori nẹ avwanre ru. O toro ebẹnbẹn ru wo hirharokuẹẹ, wo se phio kparobọ. Womarẹ ukẹcha ri Jihova wo se ru ayen eje wiẹn. Ọtiọyena, e jẹ avwanre davwẹngba vwo rhiabọreyọ ukẹcha ri Jihova je dia ihwo ri ruẹ nene Ota na, ọ dia ihwo rọ chọrọ ẹroo. Aphro herọọ nẹ, e de se Ota rẹ Ọghẹnẹ je reyọ vwo ruiruo vwẹ akpeyeren, oma cha rha vwerhen avwanre.​—Jem 1:25.