Oborẹ Jihova Ruru Vwo Sivwin Irumwemwu rẹ Ihworakpọ

1-2. (a) Die yen umwemwu, mavọ yen avwanre se vwo phi umwemwu kparobọ? (Ni “Oborẹ ota nana mudiaphiyọ.”) (b) Die yen a cha ta ota kpahen vwẹ uyono nana kugbe iyono efa rehẹ Uwevwin Orhẹrẹ nana? (Ni “Ovuẹ Vwo Rhe Ihwo ri Se Ẹbe Avwanre” rọhẹ Uwevwin Orhẹrẹ nana.)

WỌ GUỌNỌ riẹn oborẹ Jihova Ọghẹnẹ vwo ẹguọnọ wẹn te? Idjerhe ọvo ru wọ sa vwọ riẹn ẹkpahọnphiyọ rẹ onọ yena yen: Wo vwo yono kpahen obo ro ruru ro vwo sivwin uwe nẹ umwemwu kugbe ughwu. Umwemwua ọyen ọvweghrẹn ra ghẹmrẹ, ru wo che se phikparobọ komobọ wẹẹn. Kẹdi kẹdẹ yen avwanre eje vwo ruẹ umwemwu, avwanre ji ghwẹ fikirẹ umwemwu. (Ro 5:12) Ẹkẹvuọvo, omamọ rẹ iyẹnrẹn herọ. Womarẹ ukẹcha ri Jihova, avwanre che phi umwemwu kparobọ. Vwọrẹ uyota, ophikparobọ avwanre muẹro den!

² Omarẹ ẹgbukpe 6,000 yen Jihova vwọ vwẹ ukẹcha kẹ ihworakpọ vwọ họnra vwọsua umwemwu re. Diesorọ? Kidie, o vwo ẹguọnọ avwanre. Nẹ ọtonphiyọ rhe yen o vwo vwo ẹguọnọ rẹ ihworakpọ, ọtiọyena, o ru erọnvwọn buebun vwọ cha ayen uko vwẹ ohọnre nana re. Ọghẹnẹ riẹnre nẹ umwemwu sua ughwu jẹ ọ guọnọre nẹ avwanre ghwuu. Ọ guọnọre nẹ a dia bẹdẹ. (Ro 6:23) Obo rọ guọnọ kẹ wẹ yen. Vwẹ uyono nana, avwanre cha fuẹrẹn enọ erha: (1) Iphiẹrophiyọ vọ yen Jihova vwọ kẹ irumwemwu rẹ ihworakpọ? (2) Die yen ihworakpọ re gbaree vwẹ awanre ruru vwọ mrẹ aroesiri ri Jihova? (3) Die yen Jesu ruru vwo sivwin ihworakpọ vwo nẹ abọ rẹ umwemwu kugbe ughwu?

IPHIẸROPHIYỌ VỌ YEN JIHOVA VWỌ KẸ IHWORAKPỌ?

3. Idjerhe vọ yen ọsẹ vẹ oni avwanre rẹsosuọ rhe vwọ dia irumwemwu?

³ Ọke rẹ Jihova vwọ ma ọshare vẹ aye rẹsosuọ, ọ guọnọre nẹ oma vwerhen ayen. Ọ kẹ ayen asan oyoyovwin nẹ ayen dia, ọ kẹ ayen okẹ rẹ orọnvwe kugbe omamọ rẹ iruo rọ kẹ ayen omavwerhovwẹn. Ọ guọnọre nẹ emọ rayen vọn akpọ na, ji ru akpọ na eje phiyọ iparadaisi kirobo rẹ ogba rẹ Idẹn hepha. Ọ da kẹ ayen iji ọvo rọ ghwa bẹẹn. O de si ayen orhọ nẹ ayen da vwẹ arogba vwọ gbevwọso urhi na, ayen che ghwu. Avwanre riẹn obo re phiare. Amakashe ọvo ro vwo ẹguọnọ rẹ Ọghẹnẹ yẹrẹ ayeen, da phiẹn ayen vwo gbevwọso Ọghẹnẹ. Adam vẹ Ivi de ru nene oborẹ amakashe na vuẹ ayen. Ayen vwẹroso Ọsẹ ro vwo ẹguọnọ rayen naa, ọtiọyena ayen de ru umwemwu. Kirobo ra riẹnre, oborẹ Jihova vuẹ ayen de rhi rugba. Vwo nẹ ẹdẹ yena yanran, kọyen ayen vwọ rioja rẹ oborẹ ayen ruru: ayen da rhe ghwo, ukuotọ rọyen ayen de ghwu.—Jẹ 1:28, 29; 2:8, 9, 16-18; 3:1-6, 17-19, 24; 5:5.

4. Diesorọ Jihova vwo vwo utuoma rẹ umwemwu, kẹ diesorọ ọ vwọ cha avwanre uko vwọ họnra vwọsuọ? (Rom 8:20, 21)

⁴ Jihova phi ikuegbe nana phiyọ Baibol na rere avwanre sa vwọ mrẹ erere norhe. Ọnana nẹrhẹ a riẹn oboresorọ o vwo vwo utuoma rẹ umwemwu mamọ. Umwemwu phi ohẹriẹ phiyọ uvwre rẹ avwanre vẹ Ọsẹ avwanre, ọ je sua ughwu. (Aiz 59:2) Ọyena yensorọ Idẹbono rọ so okpetu na eje vwo vwo ẹguọnọ rẹ umwemwu ji vwo tito. O se no nẹ ọyen phikparobọ vwẹ ogba rẹ Idẹn ọke rẹ Adam vẹ Ivi vwo gbevwọso Jihova nu. Ẹkẹvuọvo, o vwo ẹruọ rẹ obo ri Jihova vwo ẹguọnọ avwanre tee. Ọghẹnẹ nama wene ọhọre rọyen kpahen emọ rẹ Adam vẹ Ivii. O vwo ẹguọnọ rẹ ihworakpọ eje, ọtiọyena kpakpata ọ da vwẹ iphiẹrophiyọ kẹ ayen. (Se Rom 8:20, 21.) Jihova riẹnre nẹ evo usun rẹ emọ rẹ Adam che vwo ẹguọnọ rọyen je guọnọ ukẹcha rọyen vwọ họnre vwọso umwemwu. Kerẹ Ọsẹ kugbe Ọmemama rayen, ọ cha cha ayen uko vwọ vrabọ rẹ umwemwu ji si ayen te oma. Die yen Jihova che ru rere enana eje sa vwọphia?

5. Ọke vọ yen Jihova vwọ vwẹ iphiẹrophiyọ rẹsosuọ vwọ kẹ ihworakpọ? Djekpahọn. (Jẹnẹsis 3:15)

⁵ Se Jẹnẹsis 3:15. Ugege rẹ Jihova vwo brorhiẹn hwe Idẹbono nu, ọyen ọ vwọ kẹ ihworakpọ iphiẹrophiyọ rẹsosuọ. Ọghẹnẹ mraro rọyen phiyotọ nẹ o vwo “ọmọ” rọ cha kẹ avwanre iphiẹrophiyọ. Ukuotọ rọyen, ọmọ na kọ cha guọghọ Idẹbono, je rhuẹrẹ ebẹnbẹn eje rọ soro vwẹ Idẹn phiyọ. (1Jọ 3:8) Ẹkẹvuọvo, ọmọ na cha rioja o che vwo ru ọnana. Ẹsosuọ, Eshu rhovwerọ je so ughwu hwe. Ọnana da Jihova mamọ. Jẹ, obo ri che nẹ obuko rẹ omiamiavwe nana rhe yen ma rho, kidie e che sivwin ihworakpọ eje vrabọ rẹ umwemwu kugbe ughwu.

DIE YEN IHWORAKPỌ RE GBAREE VWẸ AWANRE RURU VWỌ MRẸ AROESIRI RI JIHOVA?

6. Die yen Ebẹl, Noa kugbe ihwo efa re fuevun ruru vwo sikẹrẹ Jihova?

⁶ Vwẹ ikpe ujorin evo re vwọ kpahọn, Jihova de dje phephẹn ememerha oborẹ irumwemwu rẹ ihworakpọ se vwo sikẹrẹ. Ebẹl rọ dia ọmọ rivẹ rẹ Adam vẹ Ivi, ọyen ohwo rẹsosuọ ro ke se Jihova gbuyota rẹ ayen vwo gbevwọsuọ vwẹ Idẹn nu. Kidie nẹ Ebẹl vwo ẹguọnọ ri Jihova ọ je guọnọ ru obo re vwerhọn oma, o de ze izobo rere o se vwo sikẹrẹ. Kerẹ osuigodẹ, ọ da reyọ imigodẹ rọyen evo ji hwe ayen, ọ da vwẹ ayen vwo ze izobo vwọ kẹ Jihova. Mavọ yen oma ru Jihova? O de “mu ọghọ kẹ izobo rẹ Ebel.” (Jẹ 4:4) Jihova ji vwo omavwerhovwẹn kpahen ọkpọ rẹ izobo ọtiọyen rẹ ihwo efa ri vwo ẹguọnọ rọyen re je vwẹrosuọ ruru kerẹ Noa. (Jẹ 8:20, 21) Jihova ji djephia nẹ, ihworakpọ re gbaree sa mrẹ aroesiri rọyen ji sikẹrẹ ọyen womarẹ izobo ọtiọyen ro rhiabọreyọ na.b

7. Die yen avwanre yono vwo nẹ owenvwe ro rhe Ebraham rọ vwọ reyọ ọmọ rọyen vwo ze izobo?

⁷ Jihova vuẹ Ebraham, ọshare vẹ esegbuyota ọgangan nẹ, o ru emu ọvo rọ pha bẹnbẹn, nẹ ọ reyọ ọmọ rọyen Aizik vwo ze izobo. Uyota nẹ oborẹ Jihova vuẹrẹ nẹ o ru na bẹn vwọ kẹ mamọ. Dedena, o de ru obo ra vuẹrẹ. Ukuko na, Ọghẹnẹ da da obọ ji. Ẹkẹvuọvo, udje yena yono ihworakpọ eje uyota ọghanghanre ọvo—nẹ Jihova vwo owenvwe rọ vwọ vwẹ Ọmọ rọyen vuọvo ro vwo ẹguọnọ kpahen vwọ kpahotọ rere o vwo ze izobo. Jihova vwo ẹguọnọ rẹ ihworakpọ mamọ.—Jẹ 22:1-18.

8. Die yen izobo buebun re zeri vwẹ otọ rẹ Urhi na rionbọ ra? (Livitikọs 4:27-29; 17:11)

⁸ Ikpe ujorin buebun vwọ wan nu, Urhi ra vwọ kẹ ẹgborho rẹ Izrẹl guọnọ izobo rẹ eranvwe rere a sa vwọ reyọ imwemwu rayen vwo ghovwo ayen. (Se Livitikọs 4:27-29; 17:11.) Izobo tiọyena rionbọ kpo izobo rọ ma rho, ro che sivwin ihworakpọ vwo nẹ abọ rẹ umwemwu kakare. Ẹwẹn ọfuanfon na mu emraro Ọghẹnẹ vwọ nabọ djefiotọ nẹ ọmọ rẹ ive na rọ rhe dia Ọmọ roghẹresan rẹ Ọghẹnẹ cha rioja, e mi ji hwe. E che hwe kerẹ ogodẹ re vwo ze izobo. (Aiz 53:1-12) Je vwẹ ẹwẹn roro: Jihova che ru ọrhuẹrẹphiyotọ a vwọ reyọ ọmọ rọyen ro vwo ẹguọnọ kpahen na vwo ze izobo rere o vwo sivwin ihworakpọ te owẹ vwo nẹ abọ rẹ umwemwu vẹ ughwu!

DIE YEN JESU RURU VWO SIVWIN IHWORAKPỌ?

9. Die yen Jọn ro Brẹ Ihwo Phiyame ta kpahen Jesu? (Hibru 9:22; 10:1-4, 12)

⁹ Vwẹ ukpe ri 29 C.E., Jọn ro Brẹ Ihwo Phiyame vwọ mrẹ Jesu ri Nazarẹt, ọ da ta: “Nighere, Omogodẹ rẹ Ọghẹnẹ ro siẹ umwemwu rẹ akpọ na no!” (Jọ 1:29) Eta nana djerephia nẹ, Jesu yen ọmọ roghẹresan rẹ Ọghẹnẹ mraro rọyen phiyotọ na. Ọ cha vwẹ arhọ rọyen vwo ze izobo. Enẹna, ihworakpọ rhi vwo uvi rẹ iphiẹrophiyọ re, rẹ Jesu che vwo sivwin ihwo ji phi umwemwu kparobọ kakare.—Se Hibru 9:22; 10:1-4, 12.

10. Idjerhe vọ yen Jesu vwo djephia nẹ irumwemwu rẹ ihwo yen o “rhi se”?

¹⁰ Ihwo rẹ umwemwu kru oghwa nyẹ yen Jesu ma tẹnrovi, o de durhie ayen nẹ ayen rhe dia idibo rọyen. Ọ riẹnre nẹ umwemwu yen sua oja rẹ ihworakpọ eje. Ọtiọyena, ọ da vwẹ ukẹcha kẹ eya vẹ eshare ra riẹn phiyọ irumwemwu. O kpe itẹ ọvo nẹ: “Ihwo rẹ oma rayen ganre guọnọ ọbo-o, ẹkẹvuọvo ihwo rẹ oma rayen jẹ gan yen guọnọ ọbo.” Ọ da vwọba: “Me rhere rhi se evwata-a, ẹkẹvuọvo irumwemwu.” (Mt 9:12, 13) Jesu ru nene eta yena. Ọ reyọ imwemwu rẹ aye rọ vwẹ ameoviẹ kpọrhọ awọ rọyen vwo ghovwo. (Lu 7:37-50) O yono aye ri Sameria na iyota eghanghanre dede nẹ, ọ riẹnre nẹ ọvwọfanrhiẹn ọyen o ruẹ. (Jọ 4:7, 17-19, 25, 26) Ọghẹnẹ tobọ vwẹ ẹgba kẹ Jesu ro vwo siẹ ughwu rọ dia osa rẹ umwemwu no. Vwe idjerhe vọ? Jesu kpare ihwo nushi te eya te eshare te imitete te imiragua.—Mt 11:5.

11. Diesorọ irumwemwu rẹ ihwo vwọ guọnọ sikẹrẹ Jesu?

¹¹ Ọnana yensorọ ihwo buebun ri ruẹ obo re brare vwọ guọnọ sikẹrẹ Jesu. Jesu vwo ẹruọ rẹ ẹdia rẹ ayen hepha, ọtiọyena o de dje erorokẹ vwọ kẹ ayen. Oshọ rẹ ayen vwo sikẹrẹ mu ayeen. (Lu 15:1, 2) Ọtiọyena, Jesu de jiri ayen ji bruba kẹ ihwo tiọyena ri sere gbuyota. (Lu 19:1-10) Jesu dje kẹ ihwo obo rẹ arodọnvwẹ ri Jihova rho te. (Jọ 14:9) Ọ vwẹ ota vẹ uruemu djephia kẹ ihwo nẹ Ọsẹ rọyen ro gbe arodọnvwẹ rọ je re ehrọre na, vwo ẹguọnọ rẹ ihwo, nẹ ọ je guọnọ vwẹ ukẹcha kẹ ohwo ọvuọvo vwo phi umwemwu kparobọ. Jesu vwẹ ukẹcha vwọ kẹ irumwemwu rẹ ihwo re guọnọ ru ewene vwẹ akpeyeren rayen ji nene.—Lu 5:27, 28.

12. Die yen Jesu yono avwanre kpahen ughwu rọyen?

¹² Jesu riẹn obo re cha vwẹ obaro na. Abọ buebun yen ọ vuẹ idibo rọyen nẹ a cha shẹ ọyen ji hwe ọyen mu urhe rẹ oja. (Mt 17:22; 20:18, 19) Kirobo rẹ Jọn vẹ emraro na tare, ọ riẹnre nẹ ughwu rọyen che si umwemwu rẹ akpọ na no. Jesu je tanẹ siẹrẹ ọyen de ghwu, ọyen “che si koka koka rẹ ihwo te oma.” (Jọ 12:32) Ọtiọyena, irumwemwu rẹ ihworakpọ ki se ru obo re vwerhen Jihova oma siẹrẹ ayen de rhiabọreyọ Jesu kerẹ Ọrovwori rayen womarẹ ayen vwo nene iji rọyen. Ayen de ru ọtiọyen, ke che si ayen nẹ “obọ rẹ umwemwu” kakare. (Ro 6:14, 18, 22; Jọ 8:32) Ọtiọyena, Jesu de fiudugberi je vwomakpahotọ vwo ghwu ughwu rẹ oja rere o se vwo sivwin avwanre.—Jọ 10:17, 18.

13. Mavọ yen Jesu ghwu wan, kẹ die yen ughwu rọyen yono avwanre kpahen Jihova Ọghẹnẹ? (Ni uhoho na.)

¹³ Ugbeyan rọ kẹrẹ Jesu shẹrẹ, e muro, a hanrhe rọ, e gun efian nyẹ, e de rhe brorhiẹn hwe ji gboja kẹ re. Isodje sunro kpo asan re de che hwe, ayen da kanrọ mu urhe rẹ oja. Ọke rọ vwọ fuevun chirakon rẹ oja nana eje, o vwo ohwo rẹ oja na da re mamọ, ọyen Jihova Ọghẹnẹ. O vwo ẹgba rọ vwọ dobọ rẹ oja na ji, ẹkẹvuọvo o ru ọtiọyeen. Diesorọ? Die yen sa nẹrhẹ Ọsẹ ro vwo ẹguọnọ ru ọtiọyen? Ẹguọnọ. Jesu da ta: “Ọghẹnẹ vwo ẹguọnọ rẹ akpọ na mamọ te ẹdia ro de siobọnẹ Ọmọ rọyen ọvuọvo, rere kohwo kohwo ro vwo esegbuyota kpahọn vwo jẹ ẹghwọrọ, ẹkẹvuọvo ko vwo arhọ ri bẹdẹ.”—Jọ 3:16.

14. Die yen izobo ri Jesu na yono uwe?

¹⁴ Izobo ri Jesu na odjephia rẹ oborẹ Jihova vwo ẹguọnọ rẹ emọ rẹ Adam vẹ Ivi te. Ọyena ji djephia nẹ Jihova vwo ẹguọnọ wẹn mamọ. O ru erọnvwọn buebun ji chirakon rẹ ọmiaovwẹ o se vwo sivwin uwe vwo nẹ abọ rẹ umwemwu vẹ ughwu. (1Jọ 4:9, 10) Vwọrẹ uyota, ọ guọnọ vwẹ ukẹcha kẹ avwanre ọvuọvo vwọ họnre vwọso umwemwu ji phio kparobọ!

15. Die yen ofori nẹ e ru a sa vwọ mrẹ erere vwo nẹ okẹ rẹ ọtanhirhe rẹ izobo ri Jesu ro nẹ obọ rẹ Ọghẹnẹ rhe na?

¹⁵ Okẹ rẹ Ọghẹnẹ rọ dia izobo rẹ ọtanhirhe rẹ Ọmọ rọyen vuọvo na, nẹrhẹ a sa reyọ imwemwu avwanre vwo ghovwo avwanre. Ẹkẹvuọvo a sa vwọ mrẹ evwoghovwo rẹ Ọghẹnẹ, o fori nẹ e ru emu ọvo. Die yen e che ru? Jọn ro Brẹ Ihwo Phiyame vẹ Jesu Kristi vuẹ avwanre obo re che ru: “Ovwan kurhẹriẹ, kidie Uvie rẹ idjuvwu na sikẹre re.” (Mt 3:1, 2; 4:17) Okurhẹriẹ ọyen orọnvwọn ọvo kiriguo ra guọnọre a sa vwọ họnre vwọso umwemwu ji sikẹrẹ Ọsẹ avwanre ro vwo ẹguọnọ na. Re vwo kurhẹriẹ die yen o churobọ si, kẹ mavọ yen ọ sa vwọ cha avwanre uko vwọ họnre vwọso ẹdia rẹ umwemwu avwanre hepha? A cha kpahenphiyọ onọ yena vwẹ uyono rọ vwọ kpahen ọnana.