Fiudugberi Kerẹ Zadọk

1-2. Ono yen Zadọk? (1 Ikun Rivie 12:22, 26-28)

VWẸ ẹwẹn roro eshare buebun re vrẹ 340,000 ri bigba re guọnọ vwẹ Devid vwo muẹ ọvie rẹ Izrẹl ejobi. Ẹdẹ erha soso yen eshare nana vwọ hẹ enu rẹ igbenu re kẹrẹ Hebrọn, jẹ ayen gbikun, hwẹ, suine rẹ ujiri vwo rhe Jihova. (1Ik 12:39) Vwẹ usun rẹ ihwo nana, eghene ọshare ọvo herọ re se Zadọk, ihwo buebun tobọ noso nẹ ọ hẹ etiyiin. Ẹkẹvuọvo, Jihova guọnọre nẹ avwanre riẹn nẹ Zadọk hẹ etiyin. (Se 1 Ikun Rivie 12:22, 26-28.) Ono yen Zadọk?

² Zadọk ọyen orherẹn ro nene Orherẹn Rode Abiatar wian kugbe kpẹkpẹkpẹ. Zadọk ọyen ọmrorẹ ro vwo ẹgba vẹ aghwanre ro se vwo vughe ọhọre rẹ Ọghẹnẹ. (2Sa 15:27) Ihwo bru Zadọk ra siẹrẹ ayen da guọnọ uchebro rẹ aghwanre. Ọyen ohwo ro fiudugberẹ. Uruemu rọyen nana yen a cha tẹnrovi vwẹ uyono nana.

3. (a) Diesorọ o vwo fo ihwo re vwẹ ẹga kẹ Jihova vwo fiudugberi? (b) Die yen a cha ta ota kpahen vwẹ uyono nana?

³ Vwẹ ọke rẹ oba nana, ẹvwọsuọ rẹ Eshu kpahen ihwo rẹ Ọghẹnẹ rhoma ganphiyọ vrẹ obo ri jovwo. (1Pi 5:8) Ọtiọyena, ofori nẹ avwanre fiudugberi ra vwọ hẹrhẹ Jihova rọ cha vwọ ghwọrọ Eshu ji phioba phiyọ eyeren umwemwu rọyen na. (Un 31:24) E jẹ a ta ota kpahen idjerhe erha avwanre sa vwọ vwẹrokere uduefiogbere ri Zadọk.

BICHA UVIE RẸ ỌGHẸNẸ

4. Diesorọ idibo ri Jihova vwọ guọnọ uduefiogbere ayen se vwo bicha Uvie rẹ Ọghẹnẹ? (Ni uhoho na.)

⁴ Kerẹ idibo ri Jihova, avwanre cha vwẹ ubiudu rẹ avwanre ejobi vwo bicha Uvie rẹ Ọghẹnẹ, ẹkẹvuọvo a guọnọ uduefiogbere ọkieje e se vwo ru ọtiọyen. (Mt 6:33) Kerẹ udje, vwẹ akpọ umwemwu nana, avwanre guọnọ uduefiogbere e se vwo nene iwan ri Jihova ji ghwoghwo iyẹnrẹn esiri rẹ Uvie na. (1Tẹ 2:2) Akpọ na vwọ hẹriẹ phiyọ fikirẹ oseghe rẹ usuon na, a guọnọ uduefiogbere e vwo jẹ ẹbẹre ọvo rẹ akpọ na ẹka. (Jọ 18:36) Idibo ri Jihova buebun hirharokuẹ uweren ọgangan, e ji hwe ayen ehwe ugbobọ, yẹrẹ mu ayen phiyọ uwodi kidie ayen rhọnvwe vwobọ vwẹ oseghe rẹ usuon yẹrẹ vwomaba iruo rẹ isodjee.

5. Diesorọ Zadọk vwọ guọnọ uduefiogbere o se vwo bicha Devid?

⁵ Ọ dia Zadọk di kpo Hebrọn da ra re orẹ kidie nẹ a vwẹ Devid vwo mu oviee. Ọ choma yanran ji muegbe kẹ ofovwin. (1Ik 12:38) Ọ guọnọ nene Devid kpo ofovwin je chochọn rẹ Izrẹl vwo nẹ abọ rẹ ivwighrẹn rayen. Ọ sa dianẹ Zadọk tẹn ona rẹ ofovwin kerẹ isodjee, jẹ ọyen ohwo ro fiudugberẹ.

6. Udje rẹ uduefiogbere vọ yen Devid phi phiyotọ kẹ Zadọk? (Une rẹ Ejiro 138:3)

⁶ Ihwo vọ yen Zadọk yono uduefiogbere mie? Eshare re goma ri ji fiudugberẹ yen riarierẹ phiyọ. Aphro herọọ nẹ o yono vwo nẹ udje rayen. Kerẹ udje, ọ mrẹ obo ri Devid fiudugberi ‘sun ihwo rẹ Izrẹl kpo ifovwin rayen,’ ọnana da nẹrhẹ ihwo rẹ Izrẹl ejobi bicha Devid vẹ udu rayen eje. (1Ik 11:1, 2) Ọkieje yen Devid vwọ vwẹroso Jihova nẹ ọ cha vwẹ ukẹcha kẹ ọyen vwọ họnre so ivwighrẹn rọyen. (Un 28:7; Se Une rẹ Ejiro 138:3.) Ihwo efa herọ ri Zadọk yono uduefiogbere mie—ihwo kerẹ Jehoyada kugbe ọmọ rọyen Benaya rọ dia ọgbofovwin ji te isun 22 efa ri bicha Devid ọke rẹ ayen vwo phi ofovwin. (1Ik 11:22-25; 12:26-28) Eshare nana jowọ kpakpata vwo bicha usuon ri Devid.

7. (a) Idje rẹ uduefiogbere vọ vwẹ ọke rẹ avwanre na yen avwanre se yono nu rhe? (b) Kirobo re djunute vwẹ ividio na, die yen wo yono vwo nẹ udje rẹ Oniọvo Nsilu rhe?

⁷ E de roro kpahen idje rẹ ihwo ri fiudugberi vwo bicha usuon ri Jihova, ọnana kẹ avwanre ẹgba ji mu avwanre vwo fiudugberẹ. Ovie avwanre Jesu Kristi senre rọ vwọ vwomaba usuon rẹ Eshu ọke rọ vwọ hẹ otọrakpọ na. (Mt 4:8-11; Jọ 6:14, 15) Ọkieje yen ọ vwọ vwẹroso Jihova nẹ ọ cha kẹ ọyen ẹgba. Avwanre ji vwo idje rẹ ighene eshare buebun vwẹ ọke rẹ avwanre na re senre karekare nẹ ayen cha vwomaba isodje yẹrẹ vwobọ vwẹ irueru rẹ usuoon. Wo se se kpahen ikuegbe rayen vwẹ jw.org.a

VWẸ UKẸCHA KẸ INIỌVO WẸN

8. Ọke vọ yen ekpako na vwọ guọnọ uduefiogbere rere ayen sa vwọ vwẹ oborẹ iniọvo na guọnọre vwọ kẹ ayen?

⁸ Idibo ri Jihova vwẹ ukẹcha kẹ ohwohwo. (2Kọ 8:4) Jẹ, ọ guọnọ uduefiogbere e se vwo ru ọtiọyen ọkievo. Kerẹ udje, ọke re de phi ofovwin, ekpako na riẹnre nẹ iniọvo na guọnọ ọbọngan, obicha, emuọre, Baibol kugbe ẹbe rẹ ukoko na. Kidie nẹ ayen vwo ẹguọnọ rẹ iniọvo na, ekpako na phi arhọ rayen phiyọ ẹdia rẹ imuọsho ayen sa vwọ vwẹ oborẹ iniọvo na guọnọre vwọ kẹ ayen. (Jọ 15:12, 13) Ayen de ru ọtiọyen, kọyen ayen vwẹrokere uduefiogbere ri Zadọk.

9. Vwo nene obo rehẹ 2 Samuẹl 15:27-29, die yen Devid vuẹ Zadọk nẹ o ru? (Ni uhoho na.)

⁹ Arhọ ri Devid hẹ ẹdia rẹ imuoshọ. Ọmọ rọyen Absalọm davwẹngba rọ vwọ reyọ uvie na mie. (2Sa 15:12, 13) Ọnana kọ nẹrhẹ Devid guọnọ djẹ nẹ Jerusalẹm kpakpata! Ọ da ta kẹ idibo rọyen: “E vrẹn ra djẹ; ọ dia ọtiọye-e ma gbe sa vabọ rẹ Absalọmu-u!” (2Sa 15:14) Ọke ri Devid vẹ idibo na vwọ yanran, ọ da rhe mrẹvughe nẹ ofori a vwọ yanjẹ ohwo vwo rọ cha vuẹ ayen oborẹ Absalọm che ru. Ọtiọyena, ọ da vuẹ Zadọk vẹ irherẹn efa nẹ ayen rhivwin kpo ra rhẹrẹ Absalọm. (Se 2 Samuẹl 15:27-29.) Ofori nẹ ayen nabọ jomaotọ. Obo ri Devid vuẹ irherẹn na nẹ ayen ru na se phi arhọ rayen phiyọ imuoshọ. Vwẹ ẹwẹn roro oborẹ Absalọm—ohwo vẹ ọkon, ro ruẹ orukeri, rọ je kparoma—rhe ru Zadọk vẹ irherẹn ri chekọ na ọ da dianẹ ọ riẹnre nẹ ayen rhẹrẹ ọyen rere ayen sa vwọ chochọn ri Devid!

10. Mavọ yen Zadọk kugbe irherẹn ri chekọ na vwọ sẹro rẹ arhọ ri Devid?

¹⁰ Devid da jiroro ọvo, ọ da vuẹ Zadọk kugbe ugbeyan rọyen ọfa rọ fuevun re se Hushai kpahọn. (2Sa 15:32-37) Vwo nene oborẹ ayen tare, Hushai da jiroro kẹ Absalọm kpahen obo rọ sa vwọ kpare ofovwin bru Devid ra, ọnana da nẹrhẹ Absalọm vwẹrosuọ ji rhie uphẹn phiyọ Devid vwọ mrẹ ọke vwo muegbe. Ọnana vwọ wan nu, Hushai da vuẹ Zadọk kugbe Abiatar kpahen iroroẹjẹ na. (2Sa 17:8-16) Eshare ivẹ nana da vwẹ ovuẹ rhe Devid. (2Sa 17:17) Womarẹ ukẹcha ri Jihova, Zadọk vẹ irherẹn ri chekọ na wianre gangan vwọ sẹro rẹ arhọ ri Devid.—2Sa 17:21, 22.

11. Mavọ yen avwanre sa vwọ vwẹrokere uduefiogbere ri Zadọk siẹrẹ a da vwẹ ukẹcha kẹ iniọvo rẹ avwanre?

¹¹ Mavọ yen avwanre se vwo fiudugberi kerẹ Zadọk siẹrẹ a da vuẹ avwanre nẹ a vwẹ ukẹcha kẹ iniọvo rẹ avwanre vwẹ ọke rẹ imuoshọ? (1) Nene odjekẹ. Ọyen obo re ghanre ra vwọ dia vwọrẹ okugbe ọkieje vwẹ ọke yena. Nene odjekẹ ro nẹ oghọn ukoko rọhẹ ẹkuotọ wọ hepha rhe. (Hib 13:17) Ọkieje yen o vwo fo nẹ ekpako fuẹrẹn ọrhuẹrẹphiyotọ ro shekpahen egbemuo vwọ kẹ oghwọrọ ri kpregede, ọtiọyen ji te odjekẹ ro nẹ ukoko rhe kpahen obo re ru siẹrẹ emu ri kpregede da vwomaphia. (1Kọ 14:33, 40) (2) Fiudugberi wo ji gbẹrophiyotọ. (Isẹ 22:3) Wo gbe ẹkpaa. Wo phi arhọ wẹn phiyọ ẹdia rẹ imuoshọọ. (3) Vwẹroso Jihova. Karophiyọ nẹ Jihova guọnọre nẹ wọ sẹro rẹ arhọ wẹn ọtiọyen ji te ọ rẹ iniọvo wẹn. Ọ sa vwẹ ukẹcha kẹ wẹ vwo bicha iniọvo wẹn vwẹ idjerhe ro fori.

12-13. Die yen wo yono vwo nẹ ikuegbe ri Viktor kugbe Vitalii na? (Ni uhoho na.)

¹² Roro kpahen udje rẹ ekpako ivẹ Viktor kugbe Vitalii, re wianre gangan vwo mu emu vẹ ame vwo rhe iniọvo na vwẹ Ukraine. Viktor da ta: “Avwanre guọnọ emu nene asan eje. Ọkieje yen e vwo nyo edo rẹ ihwunu ra sa kẹrẹ asan rẹ avwanre hepha. Oniọvo ọvo toro emu vwo nẹ ushoghwa rọyen vwọ kẹ iniọvo na. Ọnana nẹrhẹ iniọvo buebun sa mrẹ emu re vwẹ uvwre ọkievo. Ọke re avwanre vwo mu eghwa phiyọ imoto rẹ avwanre, ibọmbu de she phiyọ asan rọ vwẹ ichiyin 66 vwo sherabọ kẹ avwanre. Vwẹ ẹdẹ yena, me rẹ Jihova nẹ ọ kẹ wẹ uduefiogbere re me guọnọre me sa vwọ vwẹ ukẹcha kẹ iniọvo na ọkieje.”

¹³ Vitalii tare nẹ, “Oyan mẹ rẹsosuọ reyọ ovwẹ inọke 12 soso. Ọnana guọnọ uduefiogbere mamọ. Ọkieje yen me vwọ nẹrhovwo rhe Jihova.” Vitalii fiudugberi, ọ je nabọ gbẹrophiyotọ. Ọ da je ta: “Ọkieje yen me vwọ rẹ Jihova nẹ ọ kẹ vwẹ aghwanre je cha vwẹ uko vwọ riẹn asan rẹ ẹgba mẹ teri. Idjerhe rẹ igọmẹti rhọnvwephiyọ nẹ a djẹ imoto wan ọvo, yen me gua wan. Me vwọ mrẹ oborẹ iniọvo na wian kuẹgbe esegbuyota mẹ da rhe ganphiyọ. Ayen mu erọnvwọn ri shegbere idjerhe no, kẹ avwanre oborẹ iniọvo na guọnọre ji nene avwanre mu eghwa phiyọ imoto, ji ru ọrhuẹrẹphiyotọ rẹ emu kugbe asan rẹ avwanre de se rovwoma vwẹ idjerhe.”   

FUEVUN KẸ JIHOVA ỌKIEJE

14. Mavọ yen oma se ru avwanre ọ da dianẹ ohwo re vwo ẹguọnọ kpahen yanjẹ Jihova vwo?

¹⁴ Ọvo usun rẹ ebẹnbẹn re ma nẹrhẹ ofu dje avwanre yen ohwo rẹ orua yẹrẹ ugbeyan rọ kẹrẹ avwanre da yanjẹ Jihova vwo. (Un 78:40; Isẹ 24:10) Ọ sa bẹn re vwo rhiabọreyọ ẹdia na siẹrẹ oyerinkugbe avwanre vẹ ohwo na da kpẹkpẹ mamọ. Ọ da dianẹ emu ọtiọyen phia kẹ wẹ jovwo re, udje rẹ evun-ẹfuọn ri Zadọk sa vwẹ ọbọngan kẹ wẹ.   

15. Diesorọ Zadọk vwọ guọnọ uduefiogbere ọ sa vwọ fuevun kẹ Jihova? (1 Ivie 1:5-8)

¹⁵ Zadọk fuevun kẹ Jihova ọke rẹ ugbeyan rọyen Abiatar rọ kẹre rẹ mamọ vwọ yanjẹ Jihova vwo. Ọnana phiare vwẹ oba rẹ usuon ri Devid. Ọke ri Devid vwọ hẹ ehwa rẹ ọga, ọmọ rọyen Adonija davwẹngba vwọ reyọ usuon na ri Jihova guọnọre nẹ Solomọn de sun kerẹ ovie. (1Ik 22:9, 10) Abiatar brorhiẹn ro vwo bicha Adonija. (Se 1 Ivie 1:5-8.) Fikirẹ obo ro ruru na, Abiatar rha fuevun kẹ Devid vẹ Jihovaa! Wọ sa vwẹ ẹwẹn roro oborẹ ọnana da Zadọk te ọke rẹ Abiatar vwo kuophiyotọ? Ikpe ujuvẹ gbẹ yen Abiatar vẹ Zadọk vwọ wian kugbe kerẹ irherẹn. (2Sa 8:17) Ayen ihwo ivẹ na vwẹrote ‘okọ rẹ ọphọ rẹ Ọghẹnẹ’ na kugbe. (2Sa 15:29) Ẹsosuọ, ayen ihwo ivẹ na bicha usuon ri Devid—ji ru erọnvwọn efa vwẹ ẹga ri Jihova.—2Sa 19:11-14.

16. Die yen a sa tanẹ ọ vwẹ ukẹcha kẹ Zadọk vwọ fuevun?

¹⁶ Dede nẹ Abiatar brorhiẹn rọ vwọ yanjẹ Jihova vwo, jẹ Zadọk fuevun kẹ Jihova ọkieje. Devid nama vwo ẹwẹn ivivẹ kpahen evun-ẹfuọn ri Zadọkuu. Ọke rẹ Devid vwọ riẹn kpahen oborẹ Adonija guọnọ ruẹ, ọ da vuẹ Zadọk, Netan, kugbe Bẹnaya nẹ ayen vwẹ Solomọn vwo mu ovie. (1Iv 1:32-34) Zadọk mrẹ ọbọngan kidie ọ vẹ idibo ri Jihova re fuevun kerẹ Netan kugbe efa ri bicha Ovie Devid wian kugbe. (1Iv 1:38, 39) A vwọ vwẹ Solomọn vwo mu ovie nu, o de “phi Zadọk rẹ orherẹn na phihọ asan rẹ Abiatar nuru.”—1Iv 2:35.

17. Mavọ yen wọ sa vwọ vwẹrokere Zadọk siẹrẹ ohwo rọ kẹrẹ owẹ da yanjẹ Jihova vwo?

¹⁷ Mavọ yen wọ sa vwọ vwẹrokere Zadọk? Siẹrẹ ohwo rọ kẹrẹ owẹ da yanjẹ Jihova vwo, djephia nẹ wọ guọnọ fuevun kẹ Jihova. (Jos 24:15) Jihova cha kẹ wẹ ẹgba kugbe uduefiogbere ru wọ guọnọre. Nẹrhovwo rhe Jihova wo ji sikẹre idibo rọyen re fuevun ga ọkieje. Jihova ni evun-ẹfuọn wẹn ghanghanre, ọ je cha hwosa kẹ wẹ fiki rọyen.—2Sa 22:26.

18. Die yen wo yono vwo nẹ obo re phia kẹ Marco vẹ Sidse rhe?

¹⁸ Roro kpahen udje ri Marco vẹ aye rọyen Sidse, rẹ emetẹ rayen ivẹ nẹ ukoko na. Marco da ta: “Ghwe vwo nẹ ẹdẹ ru wo vwiẹ emọ wẹn, yen wo vwo ẹguọnọ rayen mamọ. Wo che ru kemu kemu vwọ sẹro rayen vwọ vrabọ rẹ imuoshọ. Ọtiọyena, ọke rẹ ayen vwọ yanjẹ Jihova vwo, ọ da avwanre mamọ. Ẹkẹvuọvo, Jihova vẹ avwanre herọ. Jihova ruro rẹ me da vwiẹrẹ kọ vwẹ ẹgba kẹ aye mẹ, aye mẹ da rha vwiẹrẹ kọ vwẹ ẹgba kẹ vwẹ.” Vwọba, Sidse da ta: “Avwanre rhe se chirakoon ọ da dianẹ Jihova kẹ avwanre ẹgba rẹ avwanre guọnọree. Ẹwẹn mẹ kpokpo uvwe kidie mi roro nẹ mẹvwẹ yen sorọ, ọtiọyena me da vuẹ Jihova kpahen oborẹ oma ru uvwe. Ọmọke vwọ wan nu, oniọvo aye ọvo re me je mrẹ ikpe buebuun de bru vwe rhe, ọ da ghwabọ kpahen igabọ mẹ, o de ni vwe je tanẹ, ‘Sidse karophiyọ, ọ dia owẹ yen sorọọ!’ Womarẹ ukẹcha ri Jihova me da davwẹngba vwọ sẹro rẹ aghọghọ mẹ vwẹ ẹga rọyen.”

19. Die yen wo brorhiẹn ru wo vwo ru?

¹⁹ Jihova guọnọre nẹ idibo rọyen eje re vwẹ ẹga kẹ fiudugberi kerẹ Zadọk. (2Ti 1:7) Ẹkẹvuọvo, Ọ guọnọre nẹ avwanre vwẹroso ọyen, ọ dia ẹgba romobọ rẹ avwanree. Ọtiọyena, wọ da mrẹ oma wẹn vwẹ ẹdia ru wọ da guọnọ uduefiogbere, vwẹroso Jihova. Jẹ o muwẹro nẹ ọ cha nẹrhẹ wo fiudugberi kerẹ Zadọk!—1Pi 5:10.