Wọ Riẹnre Jovwo?
Diesorọ erhorha vwọ vwomaba isodje rẹ Ovie Devid?
EVO usun rẹ ihwo re dia erhorha re vwomaba isodje ri Devid yen Zelek ohwo rẹ Amọn, Yuraya rẹ ohwo ri Het, kugbe Itmah ohwo ri Moab.a (1Ik 11:39, 41, 46) “Ihwo ri Kẹrẹt . . . , kugbe ihwo ri Pẹlẹt, kugbe ihwo ri Git” jehẹ usun rẹ ituofovwin ri Devid. (2Sa 15:18) A riẹn ihwo ri Kẹrẹt kugbe ihwo ri Pẹlẹt phiyọ ihwo re vẹ ihwo ri Filistia dia iniọvo re kẹrẹre mamọ. (Izi 25:16) Ọ sa dianẹ Gat rọ dia orere ri Filistia yen ihwo ri Git nurhe.—Jos 13:2, 3; 1Sa 6:17, 18.
Die yen sa nẹrhẹ Devid rhọnvwe nẹ erhorha vwomaba isodje rọyen? O vwo imuẹro dẹn nẹ ayen fuevun kẹ ọyen, ma rho kparobọ, ayen fuevun kẹ Jihova. Kerẹ udje, shekpahen ihwo ri Kẹrẹt kugbe ihwo ri Pẹlẹt, The New Interpreter’s Dictionary of the Bible da ta: “Ayen fuevun kẹ Devid vwẹ ọke rẹ erọnvwọn ma vwọ gan kẹ vwẹ ọke ro vwo suẹn kerẹ ovie.” Idjerhe vọ? Ọke rẹ “ihwo rẹ Izrẹl ejobi” vwọ sen Ovie Devid re nene “Sheba” rọ dia ohwo rẹ okpetu na, ihwo ri Kẹrẹt kugbe ihwo ri Pẹlẹt fuevun kẹ Devid je cha uko vwọ dobọ rẹ ẹvwọsuọ ri Sheba ji. (2Sa 20:1, 2, 7) Vwẹ ẹdia ọfa, ọmọ rẹ Ovie Devid re se Adonija davwẹngba rọ vwọ reyọ usuon na. Ẹkẹvuọvo, ihwo ri Kẹrẹt kugbe ihwo ri Pẹlẹt fuevun kẹ Devid je reyọ Solomọn vwo mu ovie rọ dia ohwo ri Jihova jẹreyọ rọ cha reyọ ẹdia ri Devid.—1Iv 1:24-27, 38, 39.
Ọrhorha ọfa rọ je nabọ fuevun kẹ Devid yen Itai ohwo ri Git. Itai vẹ ituofovwin rọyen ri bun te 600 bicha Ovie Devid ọke rẹ Absalọm vwọ reyọ vwọsuọ je riẹriẹ ihwo rẹ Izrẹl ejobi vwọsuọ. Ẹsosuọ Devid vuẹ Itai nẹ ọna dia ohọnre rọyeen kidie ọrhorha yen o ruẹ. Ẹkẹvuọvo Itai da ta: “Ọtiobo rẹ Ọrovwohwo herọ na kugbe obo rẹ ọrovwovwe ovie herọ na, asan kasan rẹ ọrovwovwe epha, owere ọ dia ughwu eyẹrẹ arhọ etiyin odibo wẹn je dia rhe!”—2Sa 15:6, 18-21.
Itai fuevun kẹ Devid, rọ dia Ovie ri Jihova vwo mu
Dede nẹ ihwo ri Kẹrẹt, ihwo ri Pẹlẹt, kugbe ihwo ri Git erhorha, jẹ ayen riẹnre nẹ Jihova yen Ọghẹnẹ rẹ uyota na ayen je riẹn nẹ Devid ọyen ohwo rọ jẹreyọ. O muẹro dẹn nẹ oma vwerhen Devid kidie nẹ ihwo tiọyen re fuevun na bicha.
a Urhi rẹ Ọghẹnẹ re si phiyọ Urhi Rivẹ 23:3-6 tare nẹ e jẹ ihwo rẹ Amọn kugbe ihwo ri Moab vwomaba ukoko rẹ Izrẹẹl. Ẹkẹvuovọ, ọ họhọre nẹ e vwo vwo uturhi rẹ ọmotọ rẹ Izrẹl vwori yen urhi na ta ota kpahan, ọ dia ọ gharọ nẹ erhorha nana kuomakugbe yẹrẹ dia ohri rẹ ihwo rẹ Ọghẹnẹẹ. Ni Insight on the Scriptures, Ukori 1, aruọbe 95.