Wo Muegbe wọ Vwọ Vwomakpahotọ kẹ Jihova?

1-2. Die yen ofori nẹ ohwo ru tavwen o ki bromaphiyame?

VWẸ uvwre rẹ ikpe iyorin re wanre na, ihwo re vrẹ oduduru ọvo yen bromaphiyame kerẹ Iseri ri Jihova. Kerẹ Timoti vwẹ ẹgbukpe ujorin rẹsosuọ, e yono buebun rẹ iniọvo nana uyota na “vwo nẹ ọkiemọ rhe.” (2 Ti 3:14, 15) Efa yono kpahen Jihova ọke rẹ ayen vwo te imiragua re, evo de rhe yono kpahen Jihova vwẹ ọke rẹ ọghwo rayen. Vwẹ ọke re wanre, aye ọvo ro yono Baibol na vẹ Iseri ri Jihova bromaphiyame rọ vwọ hẹ ẹgbukpe 97!

² Ọ da dianẹ wo yono Baibol na yẹrẹ ọsẹ vẹ oni re dia Iseri ri Jihova yen yọnrọn owẹ ghwanre, wo roro kpahan omaebrophiyame? Ọyen obo ri shephiyọ den! Ẹkẹvuọvo tavwen wo ki bromaphiyame, ofori nẹ wọ vwomakpahotọ kẹ Jihova. Uyono nana cha ta ota kpahen oborẹ omaẹvwọkpahotọ churobọ si. Ọ je cha vwẹ ukẹcha kẹ wẹ vwọ rien oboresorọ ọ vwọ dia obo ri shephiyọ wọ vwọ vwomakpahotọ ji bromaphiyame ọ da dianẹ wo muegbe wo vwo ru ọtiọyen re.

DIE YEN OMAẸVWỌKPAHOTỌ?

3. Djudje rẹ ihwo re vwomakpahotọ kẹ Jihova vwẹ Baibol na.

³ Vwẹ Baibol na, omaẹvwọkpahotọ mudiaphiyọ uphẹn rẹ ohwo vwori rọ vwọ wian owian rẹ oghẹresan. Izrẹl ọyen ẹgborho ra vwọ kpahotọ kẹ Jihova. Ẹkẹvuọvo o vwo evo usun rẹ ihwo rẹ ẹgborho rẹ Izrẹl na ra vwọ kpahotọ kẹ Jihova vwẹ idjerhe rẹ oghẹresan. Kerẹ udje, Erọn de ku oka rẹ omaẹvwọkpahotọ “ọfuanfon”​—rọ dia ọsete rẹ oro ro lo wronwron phiyọ obaro rẹ erhu rọyen. Ọsete rẹ oro yena djerephia nẹ a jẹ Erọn reyọ rọ vwọ ga vwẹ idjerhe rẹ oghẹresan​—kọyen rọ vwọ dia orherẹn rode vwẹ Izrẹl. (Li 8:9) Nazarait na jẹ ihwo re vwomakpahotọ kẹ Jihova vwẹ idjerhe rẹ oghẹresan. Ota na “Nazarait,” ọyen ota ri Hibru nazirʹ, ro mudiaphiyọ “Ohwo ra sane phiyọ akọkọ,” yẹrẹ “Ọ ra vwọ kpahotọ.” Ihwo re dia Nazarait na che yeren akpọ rayen nene odjekẹ rọhẹ Urhi ri Mosis.​—Uk 6:2-8.

4. (a) Idjerhe vọ yen ihwo re vwomakpahotọ kẹ Jihova vwọ dia ihwo ra jẹreyọ vwọ kẹ iruo rẹ oghẹresan? (b) Die yen o mudiaphiyọ wọ vwọ “sen” oma wẹn? (Ni uhoho na.)

⁴ Wọ da vwomakpahotọ kẹ Jihova, kọyen wo brorhiẹn wọ vwọ dia odibo ri Jesu Kristi je rhọnvwe nẹ eruo rẹ ọhọre rẹ Ọghẹnẹ yen cha dia obo re ma ghanre vwẹ akpeyeren wẹn. Die yen omaẹvwọkpahotọ kerẹ Onenikristi churobọ si? Jesu da ta: “Ọ da dianẹ ohwo guọnọ nene uvwe, e jẹ ọ sen oma rọyen.” (Mt 16:24) Ota ri Grik ra fan phiyọ “e jẹ ọ sen oma rọyen” na ji se mudiaphiyọ nẹ “ọ cha ta nẹ ẹjo vwọ kẹ oma rọyen.” Kerẹ odibo ri Jihova rọ vwomakpahotọ kẹ re, wọ cha tanẹ ẹjo vwọ kẹ korọnvwọn korọnvwọn rọ vwọso ọhọre rọyen. (2Kọ 5:14, 15) Ọyena churobọ si ra vwọ tanẹ ẹjo vwọ kẹ “iruo rẹ ugboma,” na kerẹ ọfanrhiẹn. (Ga 5:19-21; 1 Kọ 6:18) Omaẹkẹnẹ vwọ kẹ iruemu ọtiọyena cha nẹrhẹ akpọ bẹn kẹ wẹ? Ẹjo ọ cha bẹn kẹ wẹẹ, ọ da dianẹ wo vwo ẹguọnọ ri Jihova ji vwo imuẹro nẹ irhi rọyen che fierere kẹ wẹ. (Un 119:97; Aiz 48:17, 18) Oniọvo ọshare re se Nicholas da ta, “Wo se nẹ iwan ri Jihova kerẹ egba rẹ uwodi re da wẹ obọ jẹ wo vwo jẹ obo wọ guọnọ ru eruo yẹrẹ egba re vwo ru uwevwin rẹ okpohrokpo vwọ sẹro wẹ nẹ imuoshọ.”

5. (a) Idjerhe vọ yen wọ vwọ vwomakpahotọ kẹ Jihova? (b) Die yen ofẹnẹ rẹ omaẹvwọkpahotọ kugbe omaebrophiyame? (Ni uhoho na.)

⁵ Idjerhe vọ yen wọ vwọ vwomakpahotọ kẹ Jihova? Wọ vuẹrẹ vwẹ ẹrhovwo nẹ ọyen ọvo yen wọ cha vwẹ ẹga kẹ nẹ eruo rẹ ọhọre rọyen yen wo che phi phiyọ ẹdia rẹsosuọ vwẹ akpeyeren wẹn. Vwọrẹ uyota, wo ve kẹ Jihova nẹ ọkieje yen wo che vwo vwo ẹguọnọ rọyen vẹ “ubiudu wẹn eje kugbe erhi wẹn eje kugbe iroro wẹn eje kugbe ogangan wẹn eje.” (Mk 12:30) Wẹ vẹ Jihova ọvo yen riẹn kpahen omaẹvwọkpahotọ wẹn ru wo ruru vwẹ ehoho. Vwọ fẹnẹ omaẹvwọkpahotọ, omaebrophiyame wẹn ọyen ọ rẹ azagba; ọyen odjephia vwọ kẹ ihwo efa nẹ wọ vwomakpahotọ nure. Omaẹvwọkpahotọ wẹn ọyen ive ọfuanfon ru wo ve kẹ Jihova, ọtiọyena ọ guọnọ nẹ wo yerin muo kirobo rẹ owẹ komobọ je riẹn.​—Agh 5:4, 5.

DIESORỌ O VWO FO NẸ WỌ VWOMAKPAHOTỌ KẸ JIHOVA?

6. Die yen mu ohwo vwọ vwomakpahotọ vwọ kẹ Jihova?

⁶ Orọnvwọn rẹsosuọ ro mu we vwọ vwomakpahotọ kẹ Jihova yen ẹguọnọ ru wo vwo kpahọn. Ọ dia oborẹ oma ru we ọvo yen mu we vwo vwo ẹguọnọ rọyeen. Ẹkẹvuọvo, fikirẹ “erianriẹn ọgbagba” kugbe “ẹruọ rẹ ẹwẹn”​—re dia obo ru wo yono kpahen Jihova, re nẹrhẹ ẹguọnọ ru wo vwo kpahọn ganphiyọ. (Kọl 1:9) Uyono ri Baibol na nẹrhẹ o muwẹro dẹn nẹ (1) Jihova herọ yerẹn, (2) nẹ ẹwẹn ọfuanfon Ọghẹnẹ yen e vwo si Baibol na, kugbe (3) nẹ ọ reyọ ukoko rọyen vwo ruẹ ọhọre rọyen.

7. Die yen ofori nẹ e rhe ruẹ tavwen a ke vwomakpahotọ kẹ Ọghẹnẹ?

⁷ Ofori nẹ ihwo re vwomakpahotọ kẹ Jihova riẹn uyota kiriguo rehẹ Ota rọyen ji yeren akpọ nene iwan rọyen. Ayen vuẹ ihwo efa kpahen esegbuyota rayen te asan rẹ ẹgba rayen muru. (Mt 28:19, 20) Ẹguọnọ rẹ ayen vwo kpahen Jihova rhe rhophiyọ re, ọnana kọ nẹrhẹ ayen vwẹ ẹga ro nẹ otọ rẹ udu rhe vwọ kẹ Jihova ọvo. Ọtiọyen ọ je hepha kẹ wẹ? Wo de vwo oka rẹ ẹguọnọ nana, ọ cha nẹrhẹ wọ riẹn nẹ omaẹvwọkpahotọ kugbe omaebrophiyame dia obo re ruẹ kidie nẹ wọ guọnọ ru obo re cha vwerhen ohwo ro yono uwe Baibol na yẹrẹ ọsẹ vẹ oni wẹ omaa; ọ dia oborẹ wo ruẹ kidie nẹ igbeyan wẹn ji ruo ree.

8. Mavọ yen ẹwẹn ọdavwaro vwọ nẹrhẹ wo brorhiẹn wọ vwọ vwomakpahotọ kẹ Jihova? (Une rẹ Ejiro 116:12-14)

⁸ Ọyen obo ri fori wo vwo roro kpahen obo ri Jihova ru kẹ wẹ kidie o che mu we vwo brorhiẹn wọ vwọ vwomakpahotọ kẹ. (Se Une rẹ Ejiro 116:12-14.) Baibol na tare nẹ Jihova ọyen Ọghẹne rẹ “emu esiri eje kugbe okẹ ọgbagba ejobi.” (Jem 1:17) Okẹ rọ ma rho kparobọ rọ vwọ kẹ avwanre yen izobo rẹ ọmọ rọyen, Jesu. A mrẹ vwo dje okẹ nanaa! Ọtanhirhe na nẹrhẹ ọ lọhọ kẹ avwanre e se vwo vwo oyerinkugbe ọkpẹkpẹkpẹ vẹ Jihova. Ọ je kẹ avwanre iphiẹrophiyọ ra vwọ dia bẹdẹ. (1 Jọ 4:9, 10, 19) Omaẹvwọkpahotọ wẹn vwọ kẹ Jihova ọyen odjephia nẹ wo vwo ọdavwaro kpahen ẹguọnọ rọ ma rho ro djephia kẹ wẹ, eriyin ji te ebruphiyọ rọyen efa ri te we obọ re. (Urh 16:17; 2 Kọ 5:15) A ta ota kpahen oka rẹ ọdavwaro ọtiọyena vwẹ uyono 46 ẹkpo 4, rẹ ọbe ri Vwo Omavwerhovwẹn Bẹdẹ! na, ividio rẹ ibrero erha ro vwo uyovwinrota na Vwẹ Okẹ Wẹn Vwọ kẹ Ọghẹnẹ jehẹ evunrẹ uyona na.

WO MUEGBE WỌ VWỌ VWOMAKPAHOTỌ JI BROMAPHIYAME?

9. Diesorọ o vwo fo nẹ a gba ohwo vwọ vwomakpahotọọ?

⁹ Wo se no nẹ wo ji muegbe vwọ kẹ omaẹvwọkpahotọ kugbe omaebrophiyamee. Ọ sa dianẹ wọ je guọnọ ru ewene evo vwẹ akpeyeren rere wo se vwo yeren akpọ nene iwan ri Jihova, yẹrẹ wọ je guọnọ ọke wọ sa vwọ bọn esegbuyota wẹn gan. (Kọl 2:6, 7) Ọ dia ihwo eje ri yono Baibol na yen se vwo ẹruọ rọyen yẹrẹ yan obaro ẹsiẹvoo, ọ je dia ighene eje rehẹ ukpe vuọvo yen muegbe vwọ kẹ omaẹvwọkpahotọ kugbe omaebrophiyamee. Davwẹngba vwọ riẹn ewene ro fori nẹ wo ru vwo nene asan rẹ ẹgba wẹn muru wọ je vwẹ oma vwanvwẹ ohwo ọfaa.​—Ga 6:4, 5.

10. Die yen wo se ru ọ da dianẹ wo niro nẹ wo ji rhi muegbe vwọ kẹ omaẹvwọkpahotọ kugbe omaebrophiyamee? (Ni ekpeti na “Ihwo ra Yọnre Ghwanre Vwẹ Ukoko na.”)

¹⁰ Ọ da tobọ dianẹ wo ji muegbe wọ vwọ vwomakpahotọ kẹ Jihovaa, vwo vwẹ ẹwẹn nẹ wo che ru ọtiọyen ẹdẹ ọvo. Rẹ Jihova nẹ o bruba ẹgbaẹdavwọn wẹn ru wo se vwo ru ewene ra guọnọre eje. (Fil 2:13; 3:16) Jẹ o muwẹro nẹ ọ cha kerhọ je kpahenphiyọ ẹrhovwo wẹn.​—1 Jọ 5:14.

OBORESORỌ EVO VWO SIOMAUKO

11. Mavọ yen Jihova vwọ vwẹ ukẹcha kẹ avwanre vwọ fuevun kẹ?

¹¹ Ihwo evo ri muegbe vwọ kẹ omaẹvwọkpahotọ vẹ omaebrophiyame ji siomauko. Ayen se roro, ‘Kẹ ọ da rha dianẹ mi ru umwemwu ọgangan je nẹrhẹ a djẹ vwẹ nẹ ukoko vwo?’ Ọ da dianẹ oshọ ọtiọyen mu we, jẹ o muwẹro nẹ Jihova cha kẹ wẹ kemu kemu wọ guọnọre rere wọ sa vwọ “yan vwẹ idjerhe ro shephiyọ vwẹ ẹro ri Jihova.” (Kọl 1:10) Ọ je cha kẹ wẹ ẹgba wo vwo ru obo ri shephiyọ. O djerephia jovwo re nẹ o se ru ọtiọyen womarẹ obo ro nene ihwo efa buebun yerin wan. (1 Kọ 10:13) Ọnana yen emuọvo rọ sorọ ọ vwọ dianẹ imihwo krẹn yen a djẹ nẹ ukoko rẹ Inenikristi. Jihova muegbe rẹ ihwo rọyen rere ayen vwọ fuevun kẹ ọkieje.

12. Idjerhe vọ yen a sa vwọ kẹnoma kẹ eruo rẹ umwemwu ọgangan?

¹² Ihworakpọ eje re gbaree hirharokuẹ ọdavwini rẹ ayen vwo ru obo re chọre. (Jem 1:14) Ẹkẹvuọvo, wẹwẹ ọvo yen che brorhiẹn rẹ obo ru wo che ru wo de hirharoku ọdavwini. Vwọrẹ uyota wẹ komobọ yen che brorhiẹn rẹ obo ru wo che yeren akpọ wẹn wan. Dedena ihwo evo sa tanẹ ọyen ofian, jẹ wo se yono obo ru wo se vwo sun urhurusivwe ọchọchọ yena. Ọ da tobọ dianẹ urhurusivwe evo vwomaphia, wo se sun oma wẹn wo vwo jẹ ayen eruo. Ọtiọyena, rha nẹrhovwo kẹdi kẹdẹ. Vwo omamọ rẹ ọrhuẹrẹphiyotọ rẹ uyono ri Baibol romobọ. Rhe kpo uyono. Vuẹ ihwo efa kpahen obo ru wo segbuyota. Wo de ru enana ọkieje, ọ cha kẹ wẹ ẹgba ru wo se vwo yerin mu ive rẹ omaẹvwọkpahotọ wẹn. Jẹ o muwẹro nẹ Jihova cha vwẹ ukẹcha kẹ wẹ wo se vwo ru ọtiọyen.​—Ga 5:16.

13. Omamọ rẹ udje vọ yen Josẹf phiyotọ kẹ avwanre?

¹³ Ọ cha lọhọ wo vwo yerin mu ive rẹ omaẹvwọkpahotọ wẹn siẹrẹ wo de brorhiẹn phiyotọ kpahen obo ru wo che ru wo de hirharoku ọdavwini. Baibol na vuẹ avwanre kpahen ihwo evo ri ghini ru ọtiọyen dede nẹ ayen jẹ ihwo kerẹ avwanre re gbaree. Kerẹ udje, aye ri Pọtifa davwẹngba vwọ riẹriẹ Josẹf abọ buebun ro vwo nene gbe ọfanrhiẹn. Ẹkẹvuọvo o vwo ẹwẹn ivivẹ kpahen obo ro fori nẹ o ruu. Baibol na vuẹ avwanre nẹ “ọ da se,” je tanẹ: “Komavọ mi ru emu ọbrabra nana, ri mi ru umwemwu kpahe Ọghẹnẹ?” (Jẹ 39:8-10) O phẹnre dẹn nẹ Josef riẹn obo ro che ru tavwen aye ri Pọtifa ke rhe davwọn ni. Ọnana kọ nẹrhẹ ọ lọhọ vwọ kẹ ro se vwo ru obo ri shephiyọ ro vwo hirharoku ọdavwini na.

14. Mavọ yen a sa vwọ sen ọdavwini?

¹⁴ Mavọ wọ sa vwọ vwẹrokere Josẹf vwo ru obo ri shephiyọ siẹrẹ wo de hirharoku ọdavwini? Wo se brorhiẹn rẹ obo ru wo che ru enẹna siẹrẹ ọdavwini da vwomaphia. Yono obo ru wo se vwo brokpakpa sen erọnvwọn ri Jihova vwo utuoma kpahen, wọ nama roro kpahan ayeen. (Un 97:10; 119:165) Wo de ru ọtiọyen wo rhe che shephiyọ ufi na siẹrẹ ọdavwini da vwomaphiaa. Kidie wọ riẹn obo ro fori nẹ wo ru nure.

15. Idjerhe vọ yen ohwo se vwo djephia nẹ ọ “nabọ guọnọ” Jihova? (Hibru 11:6)

¹⁵ Vwọ kẹ wẹ, o se muwẹro nẹ wọ mrẹ uyota na vughe re, nẹ wọ guọnọ ga Jihova vẹ udu wẹn eje, ẹkẹvuọvo o vwo orọnvwọn ọvo rọ nẹrhẹ wo jẹ omaẹvwọkpahotọ ji bromaphiyame. Wo se ru obo rẹ Ovie Devid ruru. Wọ sa rẹ Jihova nẹ: “Hiẹn vwẹ, E Ọghẹnẹ, re wọ riẹn udu mẹ! Daovwẹ ni re wọ riẹn iroro mẹ. Re wọ mrẹ se emu umwemwu hẹ idjerhe mẹ, rere wo sun vwe vwẹ idjerhe ri bẹdẹ.” (Un 139:23, 24) Jihova hwosa kẹ ihwo “re nabọ guọnọ.” Wọ da wian kpahen obo wọ sa vwọ vwomakpahotọ ji bromaphiyame, kọyen wo djephia kẹ Jihova nẹ wo vwo ẹwẹn ru wo vwo ru ọtiọyen.​—Se Hibru 11:6.

SIKẸRẸ JIHOVA ỌKIEJE

16-17. Idjerhe vọ yen Jihova vwo siẹ ihwo ra yọnre ghwanre vwẹ ukoko na te oma? (Jọn 6:44)

¹⁶ Jesu tare nẹ Jihova yen siẹ idibo rọyen te oma. (Se Jọn 6:44.) Roro kpahen oborẹ ọyena vwerhen oma te kugbe obo ro mudiaphiyọ vwọ kẹ wẹ. Jihova mrẹ orọnvwọn ro yovwirin vwẹ oma rẹ ohwo ọvuọvo ro si te oma. O nẹ ohwo ọvuọvo kerẹ “oghẹrẹ rẹ ohwo.” (Urh 7:6.) Ọtiọyen o ji ni we.

¹⁷ Ọ sa dianẹ owẹ eghene ra yọnre ghwanre vwẹ ukoko na. Ọtiọyena wo se no nẹ fikirẹ ọsẹ vẹ oni wẹn yen nẹrhẹ wọ ga Jihova. Jẹ, Baibol na tare nẹ: “Sikẹrẹ Ọghẹnẹ, ko sikẹre owẹ.” (Jem 4:8; 1Ik 28:9) Wọ da jowọ wo vwo sikẹrẹ Jihova, kẹ o sikẹre owẹ. Ọ dia Jihova ni we kerẹ ohwo rọ vwomaba ẹko rẹ ihwoo. O siẹ ohwo ọvuọvo te oma​—ọtiọyen ji te ohwo ra yọnre ghwanre vwẹ ukoko na. Ohwo ọtiọyen da jowọ ro vwo sikiẹrẹ Jihova, vwo nene obo rehẹ Jems 4:8, Jihova ko ji siẹkẹrẹ.​—Ni 2 Tẹsalonaika 2:13.

18. Die yen a cha ta ota kpahen vwẹ uyono rọ vwọ kpahen ọnana? (Une rẹ Ejiro 40:8)

¹⁸ Wọ da vwomakpahotọ ji bromaphiyame, kọyen wo djephia nẹ wọ vwẹrokere Jesu. Ọ vwẹ oma rọyen kpahotọ vwo ru oborẹ Ọsẹ rọyen vuẹrẹ eje vwo nẹ otọ rẹ udu rhe. (Se Une rẹ Ejiro 40:8; Hib 10:7) Vwẹ uyovwinrota rọ vwọ kpahen ọnana, a cha ta ota kpahen obo re cha vwẹ ukẹcha kẹ wẹ vwọ fuevun ga Jihova ọkieje siẹrẹ wọ de bromaphiyame nu.