Oborerhiẹromrẹ

Gbe Arodọnvwẹ kẹ Ihwo Eje

Vwẹ ẹdẹ ọvo, oniọvo aye ọvo rọ dia New Zealand de ni ividio na “Have . . . Concern for One Another,” ro djerephia nẹ ọ dia Jihova de ria ehrọre ọvo-o, ẹkẹvuọvo ọ womarẹ obo ro ruẹ vwo djephia nẹ ọyen Ọghẹnẹ rẹ arodọnvwẹ. (Aiz 63:​7-9) O de brorhiẹn rọ vwọ reyọ obo ro yonori na vwo ruiruo je guọnọ ẹdia sansan rọ da sa vwẹ ukẹcha phia. Vwẹ ẹdẹ vuọvo yena ro vwo kpo eki ra dẹ erọnvwọn, ọ da mrẹ aye ọvo ro vwo uwevwin rọ dia-a, ọ da vuẹ nẹ ọyen cha dẹ emu kẹ ọ re. Aye na da rhọnvwe. Oniọvo na vwọ dẹ emu na kẹ nu, ọ da reyọ ọmọbe na Ojaẹriọ Che Ghine Vwoba? vwo ghwoghwota kẹ.

Oviẹ da va aye na abọ. Ọ da tanẹ orua rẹ Iseri ri Jihova yen a da yọnrọn ọyen ghwanre ẹkẹvuọvo ọyen vrẹn nẹ uyota na ikpe buebun rẹ. Jẹ o krinọ na-a, aye na tare nẹ ọyen nẹrhovwo rhe Jihova nẹ ọ cha ọyen uko ọ sa vwọ rhoma rhivwin rhe ukoko na. Oniọvo aye na da vwẹ Baibol kẹ ji ru ọrhuẹrẹphiyotọ rọ vẹ aye na vwo ru uyono ri Baibol kugbe.a

Avwanre sa vwẹrokere Jihova vwo gbe arodọnvwẹ kẹ ihwo, ji te ihwo rẹ orua rẹ avwanre kugbe iniọvo rẹ ukoko na. E ji se gbe arodọnvwẹ womarẹ a vwọ reyọ kuphẹn kuphẹn vwo ghwoghwota kẹ ihwo.