Wọ sa Yanmu Ẹkẹn ru wo Bru kẹ Oma Vwẹ Ẹga ri Jihova

1. Egbabọse vọ yen avwanre buebun hirharokuẹ?

WO BRU ẹkẹn kẹ oma vwẹ ẹga ri Jihova jovwo re, jẹ ọ pha bẹnbẹn wọ vwọ yanmuo?b Ọ da dia ọtiọyen, ọ dia owẹ ọvo yen herọ-ọ. Kerẹ udje, Philip guọnọ nẹrhovwo vrẹ obo ri jovwo ọ je guọnọ nẹ ẹrhovwo rọyen nabọ ghwotọphiyọ, ẹkẹvuọvo ọ bẹn ọ vwọ mrẹ ọke vwọ nẹrhovwo. Ẹkẹn rẹ Erika bru kẹ oma yen rọ vwọ fobọ te asan re de ruẹ omevwa rẹ aghwoghwo; ẹkẹvuọvo, ọ yanmuẹ ọke-e. Tomáš davwẹngba abọ buebun ro vwo se Baibol na re. Ọ da ta: “Isese ri Baibol ghwa vwerhen ovwẹ oma-a. Me davwẹngba abọ erha soso mi vwo se re, jẹ ọbe ri Livitikọs yen mi sere te me ke dobọji.”

2. Ọ da dianẹ e bru ẹkẹn kẹ oma vwẹ ẹga ri Jihova ra je yanmu-u, diesorọ ofu vwo jẹ avwanre edje?

² Ọ da dianẹ o vwo ẹkẹn ru wo bru kẹ oma ru wọ je sa yanmu-u, wo jẹ ofu dje we-e. Ra vwọ yanmu ẹkẹn re niri nẹ ọ bẹnre-e reyọ ọke ọ je guọnọ ẹgbaẹdavwọn. Rọ vwọ dianẹ wọ je guọnọ yanmu ẹkẹn ru wo bru kẹ oma na, ọ yen odjephia nẹ wo ni oyerinkugbe wẹn vẹ Jihova ghanghanre wọ je guọnọ reyọ ẹgba wẹn eje vwọ ga. Jihova vwo ọdavwaro kpahen obo wo ruẹ. Vwọrẹ uyota, Jihova guọnọre nẹ wo ru vrẹ asan ẹgba wẹn teri-i. (Un 103:14; Mai 6:8) Ọtiọyena jẹ ẹkẹn ru wo bru kẹ oma, dia oborẹ wọ sa yanmu. Ọtiọyena, die yen wo se ru wọ vwọ yanmuo? Jẹ a ta ota kpahen iroroẹjẹ evo.

VWO OWENVWE ỌGANGAN WỌ VWỌ YANMU ẸKẸN WO BRU KẸ OMA

3. Diesorọ owenvwe vwọ dia obo re ghanre?

³ A sa vwọ yanmu ẹkẹn re bru kẹ oma, ofori nẹ e vwo owenvwe ọgangan. Ohwo ro vwo owenvwe ọgangan vwo ọdavwẹ rọ vwọ yanmu ẹkẹn ro bru kẹ oma. A sa vwẹ owenvwe ọgangan vwo dje odju ro mu okọ kpo asan rọ ra. Odju na de dje edjuo djuo, kọ cha nẹrhẹ ohwo ro bi okọ na te asan rọ ra. Odju ọgangan da herọ, kpakpata kọ fobọ te asan rọ ra. Ọtiọyen ọ je hepha, siẹrẹ owenvwe avwanre vwori da gan, ka cha fobọ yanmu ẹkẹn re bru kẹ oma. Oniọvo ọshare ọvo re se David rọ dia El Salvador da ta: “Siẹrẹ owenvwe ru wo vwori da gan, ku wọ cha wian ganphiyọ. Wọ cha davwẹngba rere kemu kemu vwo jẹ ẹkẹn ru wo bru kẹ oma e gbowọphiyọ.” Ọtiọyena, die wo se ru owenvwe wẹn vwọ ganphiyọ?

4. Die yen a sa nẹrhovwo kpahen? (Filipae 2:13) (Ni uhoho na.)

⁴ Nẹrhovwo kpahen owenvwe ọgangan. Jihova sa nẹrhẹ wo vwo owenvwe wọ vwọ yanmu ẹkẹn ru wo bru kẹ oma womarẹ ukẹcha rẹ ẹwẹn ọfuanfon rọyen. (Se Filipae 2:13.) Ọkiọvo avwanre bru ẹkẹn kẹ oma kidie a riẹnre nẹ ọyen obo ro fori nẹ e ru, ọyena shephiyọ. Jẹ, ọ sa dianẹ owenvwe re vwo ruo herọ-ọ. Ọnana yen obo re ghwa phia kẹ oniọvo aye ọvo re se Norina rọ dia Uganda. O bru ẹkẹn kẹ oma ro vwo ru uyono ri Baibol, ẹkẹvuọvo owenvwe na herọ-ọ kidie o niro nẹ ọyen muwan kerẹ oyono-o. Die yen chọn rọ uko? Ọ da ta: “Ọkieje yen me vwọ rẹ Jihova nẹ ọ chọn vwẹ uko rere mi vwo owenvwe mi vwo ru uyono ri Baibol. Vwo nene ẹrhovwo mẹ, mi de ru ena rẹ uyono mẹ yovwinphiyọ. Emeranvwe evo vwọ wan nu, mi de rhi noso nẹ owenvwe mẹ da rhe ganphiyọ. Vwẹ ukpe vuọvo yena, mi de rhi vwo uyono ri Baibol ivẹ.”

5. Die yen e se roro kpahen rọ sa nẹrhẹ owenvwe avwanre ganphiyọ?

⁵ Roro kokodo kpahen oborẹ Jihova ru kẹ wẹ. (Un 143:5) Ọyinkọn Pọl roro kpahen uruemuesiri rẹ Jihova dje vwọ kẹ, ọnana da nẹrhẹ o vwo owenvwe rọ vwọ wian gangan kẹ Jihova. (1Kọ 15:​9, 10; 1Ti 1:​12-14) Vwẹ idjerhe vuọvo na, wo de roro kpahen oborẹ Jihova ru kẹ wẹ, owenvwe wọ vwọ yanmu ẹkẹn ru wo bru kẹ oma kọ cha ganphiyọ. (Un 116:12) Roro kpahen obo re chọn oniọvo aye ọvo rọ dia Honduras uko vwọ yanmu ẹkẹn ro bru kẹ oma kerẹ ọkobaro ọkieje. Ọ da ta: “Mi roro kpahen oborẹ Jihova vwo ẹguọno mẹ te. Ọ chọn vwẹ uko vwọ vwomaba ihwo rọyen. Ọ sẹro mẹ je vwerote vwe. Enana eje mi roro kpahen na, nẹrhẹ owenvwe vẹ ẹguọnọ mi vwo kpahọn ganphiyọ.”

6. Die ọfa yen sa chọn avwanre uko vwo ru owenvwe re avwanre ganphiyọ?

⁶ Tẹnrovi erere ro che norhe siẹrẹ wọ da yanmu ẹkẹn ru wo bru kẹ oma. Vwo oniso rẹ obo re vwẹ ukẹcha kẹ Erika re djunute siẹvure vwọ yanmu ẹkẹn ro bru kẹ oma. Ọ da ta: “Me mrẹvughe nẹ ọ diẹ omọrhiẹn erọnvwọn yen pho vwe vrẹ siẹrẹ me rha fobọ te asan re de ruẹ omẹvwa iruo aghwoghwo na-a. Ẹkẹvuọvo me da fobọ te etiyin, me sa nabọ yeren iniọvo na ji nene ayen ghwọrọ ọke kuẹgbe. Ke me je sa kerhọ kẹ iroroẹjẹ sansan re cha chọn vwẹ uko vwọ riavwerhen ji ru iruo aghwoghwo mẹ yovwinphiyọ.” Erika tẹnroviẹ erere ro che norhe siẹrẹ ọ da fobọ te asan ra da vwoma, ọ da je yanmu ẹkẹn ro bru kẹ oma na. Erere vọ yen wọ sa tẹnrovi? Ọ da dianẹ ẹkẹn ru wo bru kẹ oma ọyen wo vwo ru isese ri Baibol yẹrẹ ẹrhovwo ẹnẹ wẹn yovwinphiyọ, roro kpahen obo rọ sa vwọ nẹrhẹ oyerinkugbe wẹn vẹ Jihova kpẹkpẹ phiyọ. (Un 145:​18, 19) Ọ da dianẹ re vwo vwo uruemu rẹ Onenikristi ọvo yen ẹkẹn ru wo bru kẹ oma, tẹnrovi obo rọ sa vwọ nẹrhẹ oyerinkugbe wẹn vẹ ihwo efa yovwinphiyọ. (Kọl 3:14) Diesorọ wo rhe siẹ oboresorọ wọ vwọ guọnọ yanmu ẹkẹn ru wọ bru kẹ oma na phiyotọ-ọ? Vwẹ ọkieje ni oborẹ wo si phiyotọ na. Tomáš, re djunute siẹvure da ta: “Kidie nẹ me riẹn oboresorọ me vwọ guọnọ yanmu ẹkẹn ri mi bru kẹ oma, kọ bẹn me vwọ kpairoro vrẹ.”

7. Die yen vwẹ ukẹcha kẹ Julio vẹ aye rọyen vwọ yanmu ẹkẹn rẹ ayen bru kẹ oma?

⁷ Nene ihwo re sa nẹrhẹ wọ yanmu ẹkẹn ru wo bru kẹ oma ghwọrọ ọke kugbe. (Isẹ 13:20) Vwo oniso rẹ obo re vwẹ ukẹcha kẹ Julio vẹ aye rọyen vwọ yanmu ẹkẹn rayen vwo ru bunphiyọ vwẹ iruo aghwoghwo na. Ọ da ta: “Avwanre mu igbeyan re sa chọn avwanre uko vwọ yanmu ẹkẹn avwanre bru kẹ oma, avwanre ji nene ayen ta ota kpahọn. Buebun rayen yanmu ẹkẹn ọtiọyena jovwo re, eriyin na kẹ ayen sa reyọ iroroẹjẹ ro fori vwọ kẹ avwanre. Igbeyan avwanre nọ mie avwanre oborẹ avwanre ru te re, ayen me je kẹ avwanre ọbọngan ro fori.”

SIẸRẸ OWENVWE RHA HERỌ-Ọ

8. Die yen sa phia ọ da dianẹ ọke re vwo vwo owenvwe ọvo yen a vwọ wian kpahen ẹkẹn re bru kẹ oma? (Ni uhoho na.)

⁸ Vwọrẹ uyota, o vwo ọkievo rẹ oma vwo jẹ avwanre ẹkparọ. Ọnana ko mudiaphiyọ nẹ a rha cha sa wian kpahen ẹkẹn re bru kẹ oma na-a? Ẹjo. Re vwo djudje rọyen: Odju vwo ẹgba ọgangan ro vwo mu okọ kpo asan rọ ra. Ẹkẹvuọvo, o vwo ọkievo rẹ odju na vwọ gan, jẹ ọke ọfa a rha tobọ mrẹ odju na-a. Ọnana ko mudiaphiyọ nẹ ohwo ro bi okọ na rhe che se bio-o? Ọ dia ọtiọyen ọ hepha-a. Kidie ekọ evo vwo ijini ra vwọ gua ayen yẹrẹ uvi re vwo bio. Ohwo ro bi okọ na sa reyọ erọnvwọn nana vwo bi okọ na te asan rọ ra. A sa reyọ owenvwe avwanre vwo dje odju na; ọkievo ọ gan, ọke ọfa o mi rhe shekpotọ. Owenvwe ra vwọ yanmu ẹkẹn re bru kẹ oma se jẹ avwanre e rhe vwẹ ẹdẹ evo. Ọtiọyena ọ da dianẹ ọke rẹ owenvwe na vwo rhe avwanre ọvo yen a vwọ wian kpahen ẹkẹn re bru kẹ oma, a cha sa yanmuo-o. Kirobo rẹ ohwo ro bi okọ na guọnọ idjerhe efa ro vwo te asan rọ ra ye, avwanre je sa wian kpahen ẹkẹn re bru kẹ oma ọ da tobọ dianẹ owenvwe na herọ-ọ. Dede nẹ ọnana cha guọnọ omaesuon, a mrẹ vwo dje erere rọye-en. Tavwen a ke ta ota kpahen obo re se ru, e jẹ a ka ta ota kpahen onọ ọvo rọ sa vwomaphia.

9. Ọ chọre ra vwọ wian kpahen ẹkẹn re bru kẹ oma ọ da tobọ dianẹ owenvwe na rhe avwanre-e? Djekpahọn.

⁹ Jihova guọnọre nẹ a ga ọyen nẹ otọ rẹ ẹwẹn rhe vẹ omavwerhovwẹn. (Un 100:2; 2Kọ 9:7) Ofori ra vwọ wian kpahen ẹkẹn re bru kẹ oma ọ da dianẹ owenvwe na rha herọ-ọ? Roro kpahen udje rẹ ọyinkọn Pọl. Ọ tare nẹ: “Me vwẹ oja ria oma mẹ ji suon kerẹ ọviẹn.” (1Kọ 9:​25-27, NW ) Ọ da tobọ dianẹ Pọl vwo owenvwe ro vwo ru oborẹ Jihova guọnọre-e, kọ gba oma vwo ruo. Kẹ Jihova rhiabọreyọ ẹga ri Pọl? E! Jihova je hwosa kẹ fikirẹ ẹgbaẹdavwọn rọyen.​—2Ti 4:​7, 8.

10. Erere vọ yen no cha a da wian kpahen ẹkẹn re bru kẹ oma siẹrẹ owenvwe na rha herọ-ọ?

¹⁰ Vwẹ idjerhe vuọvo na, oma vwerhen Jihova siẹrẹ ọ da mrẹ nẹ a wian kpahen ẹkẹn re bru kẹ oma dede nẹ owenvwe na rhe avwanre-e. Ọ da tobọ dianẹ avwanre vwo omavwerhovwẹn kpahen obo re ruẹ na-a, oma vwerhọn kidie Ọ riẹnre nẹ avwanre ruo fikirẹ ẹguọnọ re vwo kpahọn. Kirobo rẹ Jihova bruba kẹ Pọl, o ji che bruba ẹgbaẹdavwọn rẹ avwanre. (Un 126:5) Avwanre vwọ mrẹ ebruphiyọ ri Jihova ye, ọnana sa nẹrhẹ owenvwe avwanre ganphiyọ. Oniọvo aye ọvo re se Lucyna rọ dia Poland da ta: “Ọkievo, me guọnọ kpo aghwoghwo-o, marho oma da ghwọrọ ovwẹ. Ẹkẹvuọvo, a mrẹ vwo dje aghọghọ re me mrẹ siẹrẹ mi de kpo aghwoghwo-o.” Ọtiọyena e jẹ a ta ota kpahen obo re se ru siẹrẹ owenvwe na rha herọ-ọ.

11. Mavọ yen Jihova sa vwọ chọn avwanre uko vwo vwo uruemu rẹ omaẹriẹnsuon?

¹¹ Nẹrhovwo kpahen omaẹriẹnsuon. Omaẹriẹnsuon ọyen ẹgba re se vwo suẹn iroro vẹ oborẹ ohwo ruẹ. Ota na mudiaphiyọ re vwo suẹn oma ohwo e vwo jẹ obo re brare eruo. Jẹ, a je guọnọ omaẹriẹnsuon e se vwo ru obo ri yovwirin, marho ọ da dianẹ obo re che ru na bẹnre yẹrẹ owenvwe na rhe avwanre-e. Karophiyọ nẹ omaẹriẹnsuon ọyen ọvo usun omamọ rẹ ẹwẹn na, ọtiọyena rẹ Jihova nẹ ọ chọn wẹ uko womarẹ ẹwẹn ọfuanfon na wo se vwo vwo uruemu ọghanghanre yena. (Lu 11:13; Ga 5:​22, 23) David, re djunute vwẹ obenu na, ta ota kpahen oborẹ ẹrhovwo chọn ọyen uko wan. Ọ guọnọ vwẹ ọkieje vwo ru uyono romobọ. Ọ da ta: “Me rẹ Jihova nẹ ọ chọn vwẹ uko vwo vwo omaẹriẹnsuon. Womarẹ ukẹcha rọyen, me da rhe tọn ọrhuẹrẹphiyotọ rẹ uyono romobọ ọkieje ro je shefia phiyọ.”

12. Mavọ yen obo rehẹ Aghwoghwo 11:4 sa vwọ chọn avwanre uko vwọ yanmu ẹkẹn re bru kẹ oma?

¹² Wọ hẹrhẹ ọke rẹ erọnvwọn eje vwo shephiyọ tavwe-en. Vwẹ akpọ nana re de yerẹn na, o vwo ọke vuọvo erọnvwọn eje che vwo shephiyọ-ọ. A da hẹrhẹ ọke erọnvwọn eje vwo shephiyọ, a cha sa yanmu ẹkẹn re bru kẹ oma-a. (Se Aghwoghwo 11:4.) Oniọvo ọshare ọvo re se Dayniel da ta: “O vwo ọke vuọvo erọnvwọn che se vwo shephiyọ enẹna-a. Ọtiọyena e jẹ a ghwọrọ ọke-e, reyọ kẹdia kẹdia ro fori vwọ tonphiyọ.” Oniọvo ọshare re se Paul rọ dia Uganda vuẹ avwanre orọnvwọn ọfa rọ sorọ e vwo jẹ eghẹrẹ e gbe: “Ọ da tobọ dianẹ egbabọse herọ a da tonphiyọ nu, Jihova cha vwẹ ukẹcha kẹ avwanre.”​—Mal 3:10.

13. Erere vọ yen se norhe siẹrẹ a da vwẹ ẹkẹn itete vwọ tonphiyọ?

¹³ Reyọ erọnvwọn itete vwọ tonphiyọ. Avwanre se jẹ owenvwe e vwo e de no nẹ ọ cha bẹn ra vwọ yanmu ẹkẹn re bru kẹ oma. Ọ da dia ọtiọyen yen ẹdia wẹn hepha, wọ sa reyọ erọnvwọn itete vwọ tonphiyọ? Ọ da dianẹ ẹkẹn wo bru kẹ oma ọyen wo vwo vwo uruemu oyoyovwin ọvo, diesorọ wo rhe djephia vwẹ idjerhe sansan? Ọ da dianẹ ẹkẹn wo bru kẹ oma ọyen wo vwo se Baibol re, wọ sa rhuẹrẹ ọke vwọ tuọnphiyọ ememerha? Ọ bẹn kẹ Tomáš re ke djunute vwẹ obenu na, rọ vwọ yanmu isese ri Baibol ro bru kẹ oma vwẹ ẹgbukpe ọvo. Ọ da ta: “Me rhe mrẹvughe nẹ uyovwinrota ọvo ri mi se ẹdọke na gron nọ. Ọtiọyena me da rhoma tuọnphiyọ, udje nana, ẹkpo evo kọyen mi se kẹdẹ kẹdẹ ji roro kpahan. Ọke vwọ yanran na, ke me riavwerhen rẹ isese na.” Omavwerhovwẹn ri Tomáš vwọ ganphiyọ ye, ko se se ẹkpo re pha grongron. Ukuotọ rọyen, o de rhi se ọsoso ri Baibol na re.c

WỌ RHA SA YANMUO-O WO JẸ OFU DJE WE-E

14. Ebẹnbẹn vọ yen avwanre se vwo?

¹⁴ Ọ da ohwo mamọ nẹ a da riẹn oma sun, owenvwe na da je herọ dede, a je sa yanmu ẹkẹn re bru kẹ oma-a. Kerẹ udje, “uphe” kọyen obo re rhẹro rọye-en sa reyọ ọke ro fori nẹ a vwọ wian kpahen ẹkẹn re bru kẹ oma. (Aghw 9:11) E se hirharoku ebẹnbẹn rọ sa nẹrhẹ ofu dje avwanre ji mie avwanre ẹgba. (Isẹ 24:10) Jẹgba avwanre sa nẹrhẹ e ru erọnvwọn re sa nẹrhẹ ọ bẹn e vwo jẹ ẹkẹn re bru kẹ oma ẹ yanmuo. (Ro 7:23) Yẹrẹ oma sa tobọ bru avwanre ku dede. (Mt 26:43) Die yen sa chọn avwanre uko vwo phi ebẹnbẹn nana kparobọ?

15. O da dianẹ a rha yanmu ẹkẹn re bru kẹ oma na-a, ọnana ko mudiaphiyọ e rhe che se ru vrẹ ọtiọye-en? Djekpahọn. (Une rẹ Ejiro 145:14)

¹⁵ Karophiyọ nẹ wọ rha sa yanmu ẹkẹn ru wo bru kẹ oma na-a, ọ dia ọyen o vwo mudiaphiyọ nẹ wo rhe che se ru vrẹ ọtiọye-en. Baibol na tare nẹ avwanre che rhe hirharokuẹ ebẹnbẹn. Ẹkẹvuọvo, o ji jẹ avwanre riẹn nẹ e se phi ayen kparobọ, marho womarẹ ukẹcha ri Jihova. (Se Une rẹ Ejiro 145:14.) Oniọvo Philip re djunute siẹvure tare nẹ: “Ọ dia uchabọ ri mi jẹ ẹkẹn ri mi bru kẹ oma na ẹ yanmuo yen me tẹnroviẹ-ẹ. Ukperẹ ọtiọyen, obo re me sa vwọ rhoma yanmu ẹkẹn ri mi bruru na.” David re djunute vwẹ obenu da je ta: “Mi ni oboresorọ me rha yanmu ẹkẹn ri mi bru kẹ oma yẹrẹ ẹdẹ rẹ oma kpare ovwẹ-ẹ kerẹ obẹnbẹ-ẹn, me reyọ phiyọ uphẹn ri mi vwori mi vwo djephia kẹ Jihova nẹ mi vwo ẹguọnọ rọyen.” E, wọ da yanphiaro dede nẹ wo hirharoku ebẹnbẹn, jẹ wo djephia kẹ Jihova nẹ wọ guọnọ ru obo re vwerhọn oma. Mavọ yen oma cha vwerhen Jihova te siẹrẹ ọ da mrẹ nẹ wọ davwẹngba wọ vwọ yanmu ẹkẹn ru wo bru kẹ oma!

16. Die yen e se yono vwo nẹ ebẹnbẹn avwanre rhe?

¹⁶ Ni oboresorọ wọ rha sa yanmu ẹkẹn ru wo bru kẹ oma na-a kerẹ uyono. Roro kpahen oboresorọ wọ rha sa yanmu ẹkẹn ru wo bru kẹ oma na-a, wọ nọ oma wẹn, ‘O vwo obo ri mi se ru me vwọ kẹnoma kẹ oboresorọ me rha yanmu ẹkẹn ri mi bru kẹ oma na-a vwẹ ọke ọfa?’ (Isẹ 27:12) Ọkievo, oboresorọ wọ rha sa yanmu na-a, ọyen odjephia nẹ wo vwo ẹgba rọye-en. Ọ da dia ọtiọyen, gba rhoma fuẹrẹn ẹkẹn ru wo bru kẹ oma na sẹ wọ sa yanmuo.d Wo no nẹ Jihova cha vwẹ ẹro okueku vwo ni we ọ da dianẹ ẹgba wẹn rhe mu ẹkẹn ru wo bru kẹ oma na-a.​—2Kọ 8:12.

17. Diesorọ e vwo roro kpahen oborẹ avwanre ru re?

¹⁷ Roro kpahen oborẹ wo ru re. Baibol na tare nẹ “Kidie Ọghẹnẹ dia orharhe rẹ ohwo ro jẹ iruo esiri . . .  ẹkarohọ.” (Hib 6:10) Ọtiọyena wo jẹ oborẹ wo ru re chọrọ owẹ ẹro-o. Re roro kpahen oborẹ wo ru re​—ọ sa dia oyerinkugbe rẹ ọkpẹkpẹkpẹ ru wọ vẹ Jihova vwori, wọ vwọ ta ota kẹ ihwo efa kpahọn, yẹrẹ omaebrophiyame wẹn. Kirobo ru wọ yanmu ẹkẹn ru wo bru kẹ oma vwẹ ẹga ri Jihova vwẹ obuko re, wọ je sa yanmu ẹkẹn ru wo bru kẹ oma enẹna.​—Fil 3:16.

18. Die yen ofori nẹ a karophiyọ siẹrẹ a da wian kpahen ẹkẹn re bru kẹ oma? (Ni uhoho na.)

¹⁸ Womarẹ ukẹcha ri Jihova, wọ sa yanmu ẹkẹn ru wo bru kẹ oma, kerẹ ohwo ro bi okọ rẹ oma vwerhan ro te asan rọ ra. Je karophiyọ ne, ihwo buebun ri bi okọ vwo omavwerhovwẹn vwẹ oyan na. Vwẹ idjerhe vuọvo na, wọ vwọ wian kpahen ẹkẹn ru wo bru kẹ oma vwẹ ẹga ri Jihova ye, wo jẹ oborẹ Jihova ru kẹ wẹ vẹ ebruphiyọ rọyen chọrọ owẹ ẹro-o. (2Kọ 4:7) Wọ rha dobọ ji-i, wọ cha mrẹ ebruphiyọ gbidiki.​—Ga 6:9.