Avwanre sa Dia Bẹdẹ

1. E de roro kpahan uve rẹ arhọ ri bẹdẹ rẹ Jihova veri na, die yen o mu avwanre vwo ruẹ?

JIHOVA veri nẹ ihwo re kerhọ rọyen che vwo “arhọ ri bẹdẹ.” (Rom 6:23) E de roro kpahen oborẹ Jihova vwọ kẹ avwanre, ẹguọnọ re vwo kpahọn kọ cha rha ganphiyọ. Di roro: Kidie nẹ Ọsẹ avwanre rọhẹ odjuvwu na vwo ẹguọnọ avwanre mamọ, avwanre vẹ ọyen rha cha hẹriẹ oma-a.

2. Idjerhe vọ yen uve rẹ arhọ ri bẹdẹ na vwọ chọn avwanre uko?

² Uve rẹ arhọ ri bẹdẹ rẹ Ọghẹnẹ veri na, chọn avwanre uko vwo chirakon rẹ edavwini enẹna. Ivwighrẹn da tobọ djẹ uguegue rẹ ughwu mu avwanre dede, avwanre cha sen ọyọnregan rẹ avwanre-e. Diesorọ? Emuọvo rọ sorọ yen, e de ghwu fikirẹ evun ẹfuọn avwanre, Jihova cha rhọvwọn avwanre nushi rhe rhe dia bẹdẹ. (Jọn 5:​28, 29; 1 Kọr. 15:​55-58; Hib. 2:15) Diesorọ o se vwo mu avwanre ẹro nẹ a cha dia bẹdẹ? E Jẹ a fuẹrẹn iroro evo re sorọ.

JIHOVA YERẸN BẸDẸ

3. Diesorọ o se vwo mu avwanre ẹro nẹ Jihova sa nẹrhẹ avwanre dia bẹdẹ? (Une Rẹ Ejiro 102:​12, 24, 27)

³ Avwanre riẹnre nẹ Jihova sa nẹrhẹ avwanre dia bẹdẹ, kidie obọ rọyen yen Ogbugbu rẹ arhọ hepha, o ji yerẹn bẹdẹ. (Une 36:9) Jokaphiyọ ẹkpo ri Baibol evo ri djerephia nẹ Jihova herọ nẹ awanre rhe nẹ ọ je cha dia bẹdẹ bẹdẹ. Une Rẹ Ejiro 90:2 tare nẹ Jihova herọ “nẹ irhiri re duvwu irhiri.” Une Rẹ Ejiro 102 je ta ota rọ họhọ ọyena. (Se Une Rẹ Ejiro 102:​12, 24, 27.) Ọmraro Habakọk ji si kpahen Ọsẹ rẹ avwanre rọhẹ odjuvwu na: ‘Ọ dia owẹ re herọ rhiri bẹdẹ, E Ọrovwohwo Ọghẹnẹ mẹ, Ọfuanfọn Ọvuọvo mẹ na? Wo che ghwu-u.’​—Hab. 1:12.

4. Ofori nẹ a ro ẹnwan siẹrẹ a da mrẹ bẹnbẹn re vwo vwo ẹruọ rọyen nẹ Jihova yerẹn bẹdẹ? Djekpahọn.

⁴ Wọ mrẹ bẹnbẹn ọ vwọ ro owẹ nẹ Jihova yerẹn “bẹdẹ”? (Aiz. 40:28) Ihwo buebun je mrẹ bẹnbẹn ayen vwo vwo ẹruọ rọyen. Elihu da ta kpahen Ọghẹnẹ: “A sa riẹn unu rẹ ẹgbukpe rọye-e.” (Job 36:26) Ẹkẹvuọvo, e rhe vwo ẹruọ rẹ orọnvwọ-ọn, ọ dia ọyen o vwo mudiaphiyọ nẹ orọnvwọn yena dia uyota-a. Kerẹ udje, a sa tanẹ ọnre herọ-ọ kidie nẹ a riẹn obo rọ wian wa-an? Ẹjo kakaka! Ọtiọyen ọ je hepha nẹ ihworakpọ cha sa nabọ vwo ẹruọ rẹ oborẹ Jihova sa vwọ dia nẹ awanre rhe vẹ obo rọ cha vwọ dia bẹdẹ-ẹ. Ẹkẹvuọvo, iroro tiọyena cha sa nẹrhẹ Ọghẹnẹ jẹ dia bẹdẹ-ẹ. Ọ dia obo ra riẹnre yẹrẹ re jẹ riẹn yen cha nẹrhẹ Ọghẹnẹ jẹ dia bẹdẹ-ẹ. (Rom 11:​33-36) Ọ herọ yerẹn tavwen ọ ke ma akpọneje, ọnre na vẹ isio na. O mu avwanre ẹro nẹ Jihova yen “vwẹ ogangan rọye ma akpọ na.” Vwọrẹ uyota, ọ herọ yerẹn tavwen ọ ke “riẹn idjuvwu [na] phihọ.” (Jer. 51:15; Iruo 17:24) Die yen emu ọfa rọ sorọ ro se vwo mu avwanre ẹro nẹ a cha dia bẹdẹ?

A MA AVWANRE RA VWỌ DIA BẸDẸ

5. Uphẹn vọ yen aye gbe ọshare rẹsosuọ na vwori?

⁵ Emama ri vwo arhọ rẹ Jihova mare vwẹ akpọ na cha sa dia bẹdẹ-ẹ, jokparẹ ihworakpọ ọvo. Ayen ọvo yen ọ kẹre uphẹn ayen vwọ dia bẹdẹ. Ẹkẹvuọvo, Jihova de si Adam orhọn: “Ẹkẹvuọvo urhe rẹ erianriẹn rẹ erhuvwu vẹ umiovwo na wọ riọọ, kidie ẹdẹ re wọ rerọ ku wo ghwu.” (Jẹn. 2:17) Mane kẹ Adam vẹ Ivi nyupho rẹ Jihova jovwo, ayen rhe ghwu-u. A sa tanẹ ọke vwọ yanran na, Jihova rha vwẹ uphẹn kẹ ayen nẹ ayen re “omamọ rẹ urhe rẹ arhọ na.” Uphẹn nana rhe mudiaphiyọ nẹ, Jihova kẹ ayen imuẹro ayen vwọ “dia bẹdẹ.”b​—Jẹn. 3:22.

6-7. (a) Die ọfa yen djerephia nẹ ọ diẹ a ma ihworakpọ rẹ ayen vwo ghwu-u? (b) Die yen wo vwo vwẹ ẹwẹn rẹ wọ guọnọ ru vwẹ obaro na? (Ni ihoho na.)

⁶ O gbe ohwo unu rẹ egbaerianriẹn vwọ tanẹ afọnrhe avwanre na sa sẹro rẹ evuẹ buebun ri bunọ uche rẹ avwanre sa sẹro rọyen vwẹ uchọke re vwo yerẹn enẹna. Vwẹ 2010, uyovwinrota ọvo vwẹ Scientific American Mind rọ dia ọbe rọ ghwa iyẹnrẹn tare nẹ, afọnrhe avwanre na sa reyọ evuẹ re hwori vwẹ inọke ri bun te iduduru 3 yẹrẹ evuẹ re hworo phiyọ TV ikpe re vrẹ 300. Ọ sa dianẹ afọnrhe avwanre na je sa sẹro rẹ evuẹ ri bun vrẹn ọtiọyen. Ẹkẹvuọvo, ovuẹ yena djerephia nẹ, Jihova ma afọnrhe avwanre na vwẹ idjerhe rọ da sa sẹro rẹ evuẹ vrẹn ikpe 70 yẹrẹ 80 ra dia akpọ te na.​—Une 90:10.

⁷ Jihova je ma avwanre vẹ owenvwe ọgangan re vwo yerin bẹdẹ. Baibol na ta kpahen ihworakpọ nẹ, Ọghẹnẹ “phi iroro rẹ arhọ ri bẹdẹ phihọ” ubiudu rayen. (Aghwo. 3:11) Ọyen emu ọvo rọ sorọ avwanre vwo nẹ ughwu kerẹ ọvweghrẹn. (1 Kọr. 15:26) Avwanre de shero okpọga, e ghwe phioma otọ kẹ ọga na rere e vwo je sivwo? Ẹjo. Emuọvo avwanre ruẹ ọkieje yen, e vwo bru idọktọ ra yẹrẹ ọkiọvo a me reyọ ihuvwun ri che sivwin ọga na kpo. Vwọrẹ uyota, avwanre ruẹ erọnvwọn eje ri fori nẹ e ru re vwo jeghwo. Ohwo re vwo ẹguọnọ kpahen de ghwu, te ọ dianẹ eghene yẹrẹ ọmare, a mrẹ vwo dje ọmiaovwẹ rọ sua kẹ avwanre vwẹ ọke grongro-on. (Jọn 11:​32, 33) Vwọrẹ uyota, ọ rha dia ọhọre rẹ ọmemama ro vwo ẹguọnọ na ra vwọ dia bẹdẹ-ẹ, ọ rha kẹ avwanre ẹgba kugbe owenvwe re vwo ru ọtiọye-en. Ẹkẹvuọvo, o ji vwo iroro efa re sorọ avwanre vwo vwo imuẹro nẹ, e se vwo arhọ ri bẹdẹ. E jẹ a fuẹrẹn oborẹ Jihova ruru ọke rọ wanre vẹ obo ro ruẹ enẹna ri djerephia nẹ ọhọre rọyen kẹ ihworakpọ ji rhi wene-e.

ỌHỌRE RẸ JIHOVA JI RHI WENE-E

8. Imuẹro vọ yen Aizaya 55:11 kẹ avwanre kpahen ọhọre rẹ Jihova kẹ avwanre?

⁸ Dede nẹ Adam vẹ Ivi ru umwemwu rẹ emọ rayen da je riuku rẹ ughwu mie ayen, jẹ ọhọre ri Jihova ji rhi wene-e. (Se Aizaya 55:11.) Rhi te ọke nana, ọhọre rọyen yen Ọ vwọ vwẹ uphẹn kẹ ihwo re fuevun ayen vwọ dia bẹdẹ. A cha mrẹvughe nẹ ota yena ghini uyota ọke a da fuẹrẹn oborẹ Jihova tare ro ji rure, rere ọhọre rọyen se vwo rugba.

9. Die yen Ọghẹnẹ veri? (Daniẹl 12:​2, 13)

⁹ Jihova veri nẹ ọyen cha rhọvwọn ihwo ri ghwuru nushi je kẹ ayen arhọ ri bẹdẹ. (Iruo 24:15; Tai. 1:​1, 2) Job rọ dia ohwo rọ fuevun vwo imuẹro nẹ Jihova rhẹro rẹ ọke rọ cha vwọ rhọvwọn ihwo ri ghwure. (Job 14:​14, 15) Ọmraro Daniẹl je riẹn nẹ a cha rhọvwọn ihworakpọ ri ghwuru nushi, ayen mi ji vwo uphẹn rẹ ayen vwọ dia bẹdẹ. (Une 37:29; se Daniẹl 12:​2, 13.) Ihwo ri Ju rehẹ ọke rẹ Jesu je riẹn nẹ Jihova sa kẹ idibo rọyen re fuevun “arhọ ri bẹdẹ.” (Luk 10:25; 18:18) Jesu ta ota kpahen ive rẹ arhọ ri bẹdẹ na abọ buebun, Ọsẹ rọyen da je rhọvwọn nushi.​—Mat. 19:29; 22:​31, 32; Luk 18:30; Jọn 11:25.

10. Die yen evrẹnushi re phia wanre na djephia? (Ni uhoho na.)

¹⁰ Jihova yen kẹ ohwo arhọ, o ji vwo ẹgba rọ vwọ rhọvwọn ihwo nushi. Ọ kẹ ọmraro Ilaija ẹgba rọ vwọ rhọvwọn ọmọ ayeuku rẹ Zarafẹt. (1 Ivie 17:​21-23) Ọke vwọ yanran na, womarẹ ukẹcha rẹ Ọghẹnẹ, ọmraro Ilaesha da je rhọvwọn ọmọ aye rẹ Shunẹm. (2 Ivie 4:​18-20, 34-37) Evrẹnushi yena vẹ efa re phiare na djerephia nẹ Jihova vwo ẹgba rọ vwọ rhọvwọn ihwo ri ghwuru nushi. Ọke rẹ Jesu vwọ hẹ otọrakpọ na, o djerephia nẹ Ọsẹ rọyen vwẹ ẹgba yena kẹ. (Jọn 11:​23-25, 43, 44) Asaọkiephana, Jesu hẹ odjuvwu re, a je kẹ “ogangan ejobi re hẹ odjuvwu vẹ akpọ.” Ọtiọyena, ko se ru ive yena gba rọ cha vwọ rhọvwọn “irivwi re hẹ evun rẹ ishi” vẹ uphẹn rẹ ayen vwọ dia bẹdẹ.​—Mat. 28:18; Jọn 5:​25-29.

11. Idjerhe vọ yen ọtanhirhe na sa vwọ nẹrhẹ a dia bẹdẹ?

¹¹ Diesorọ Jihova vwọ vwẹ uphẹn kẹ Ọmọ ọghanghanre rọyen na nẹ o ghwu ughwu roja? Jesu dje oboresorọ rọ vwọ ta: “Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo je ghwọrọ ẹkẹvuọvo ko vwo arhọ ri bẹdẹ.” (Jọn 3:16) Womarẹ Ọmọ rọyen rọ vwọ kẹ avwanre kerẹ ọtanhirhe ro rhurhu imwemwu rẹ avwanre na, Ọghẹnẹ de ruo avwanre se vwo vwo arhọ ri bẹdẹ. (Mat. 20:28) Ọyinkọn Pọl dje ọhọre rẹ Ọghẹnẹ nana rọ pha ghanghanre na fiotọ ro vwo si: “Kidie kirobo rẹ ughwu wan oma rẹ ohwo ọvo rhe, ọtiọye evrẹnushi rẹ otu ri ghwuru je wan oma rẹ ohwo ọvo rhe. Kidie kirobo rẹ ihwo ejobi wan oma rẹ Adamu ghwu, ọtiọye rhe vwẹ oma ri Kristi ihwo ejobi ke cha rhọ.”​—1 Kọr. 15:​21, 22.

12. Mavọ yen Jihova cha reyọ Uvie na vwo ru ọhọre rọyen kẹ avwanre gba?

¹² Jesu yono idibo rọyen nẹ ayen nẹrhovwo nẹ e jẹ Uvie rẹ Ọghẹnẹ rhe, e ji ru ọhọre rẹ Ọghẹnẹ vwẹ otọrakpọ na. (Mat. 6:​9, 10) Ihworakpọ vwọ dia otọrakpọ na bẹdẹ, ọyen ẹbẹre ọvo rẹ ọhọre rẹ Ọghẹnẹ. Jihova vwẹ Ọmọ rọyen vwo mu Ovie rẹ Uvie ri Mesaya na rere ọhọre rọyen yena vwo rugba. Ọghẹnẹ ji koko ihwo 144,000 nẹ evunrẹ akpọ na ri che nene Jesu wian vwo ru ọhọre rọyen gba.​—Ẹvwọ. 5:​9, 10.

13. Die yen Jihova ruẹ asaọkiephana, kẹ, ẹkẹn vọ yen te we?

¹³ Asaọkiephana, Jihova si “urogho rẹ ihwo buebu” koko, o ji yono ayen rere ayen sa vwọ dia otọ rẹ Uvie na. (Ẹvwọ. 7:​9, 10; Jems 2:8) Dede nẹ ofovwin vẹ utuoma hẹriẹ ihwo buebun vwẹ akpọ na, jẹ “urogho rẹ ihwo buebu” na wian gangan ayen vwo si koka koka rẹ utuoma nẹ ohri rayen. Ka sa ta nẹ ayen duvwun elọkọ rayen phiyọ ighwro. (Maika 4:3) Ukperẹ ayen vwo vwobọ vwẹ ifovwin re ghwa ughwu cha, kẹ ayen yono ihwo kpahen Ọghẹnẹ rẹ uyota na vẹ ọhọre rọyen rere ayen se vwo vwo uvi rẹ arhọ. (1 Tim. 6:19) Kidie nẹ ayen biẹcha Uvie rẹ Ọghẹnẹ, ihwo rẹ orua sa vwọso ayen, ayen ji se hirharoku ebẹnbẹn rẹ igho ẹkẹvuọvo Jihova kẹ ayen erọnvwọn eje rẹ ayen ghene guọnọ. (Mat. 6:​25, 30-33; Luk 18:​29, 30) Uyota yena kẹ avwanre imuẹro nẹ Uvie rẹ Ọghẹnẹ herọ nẹ o ji che rhe ruẹ ọhọre rẹ Jihova gba.

UVI RẸ AKPEYEREN RỌ HẸRHẸ AVWANRE VWẸ OBARO NA

14-15. Mavọ yen ive rẹ Jihova veri nẹ o che si ughwu no bẹdẹ che rugba wan?

¹⁴ Asaọkiephana, Jesu Ovie rẹ Uvie rẹ Ọghẹnẹ vwẹ odjuvwu, o che ru ive rẹ Ọghẹnẹ eje gba. (2 Kọr. 1:20) Rhanvwe 1914 rhe na, yen Jesu vwo phiẹ ivwighrẹn rọyen kparobọ. (Une 110:​1, 2) O rhe che kri-i, Jesu vẹ otu ri che nene sun na ke cha ghwọrọ irumwemwu na eje no kakare ji phikparobọ.​—Ẹvwọ. 6:2.

¹⁵ Jesu cha rhọvwọn ihwo ri ghwuru vwẹ uvwre rẹ Usuon rẹ Ẹgbukpe Uriorin rọyen na je chọn ihworakpọ ri nyẹme uko rere ayen sa vwọ dia ihwo re gbare. Ọdavwini rọ koba na da wan nu, ihwo rẹ Jihova brorhiẹn kẹ nẹ evwata ke cha re “ughwẹ rẹ otọ na, kọ dia enu rọye bẹdẹ.” (Une 37:​10, 11, 29) Ọ rọ ma vwerhen oma, ughwu rọ dia ọvweghrẹn rọ koba na ka “cha ghwọrọ.”​— 1 Kọr. 15:26.

16. Ọrhọ yen iroro ọvo rọ ma ghanre ro muẹ avwanre vwọ ga Jihova?

¹⁶ Kirobo ra fuẹrẹn cha re na, e mu iphiẹrophiyọ ra vwọ dia bẹdẹ na kpahen Ota rẹ Ọghẹnẹ. Iphiẹrophiyọ yena sa chọn avwanre uko vwọ fuevun ọkieje vwẹ ẹdẹ re koba nana rọ bẹn eyeren na. Ẹkẹvuọvo, ọ dia owenvwe rẹ avwanre vwori ra vwọ dia rhinrin ọvo yen muẹ avwanre vwo ruẹ obo re vwerhen Jihova oma-a. Ẹguọnọ okokodo re vwo kpahen Jihova vẹ Jesu yen obo re ma ghanre kẹ avwanre ro muẹ avwanre vwọ fuevun kẹ ayen ọkieje. (2 Kọr. 5:​14, 15) Ẹguọnọ yena mu avwanre vwọ vwẹrokere ayen ji ghwoghwo iphiẹrophiyọ nana kẹ ihwo efa. (Rom 10:​13-15) Avwanre vwo yono obo re se vwo jẹ urhuru e vwo je dia ihwo ri ruẹse na, ka cha dia eka rẹ ihwo ri Jihova se vwo ru igbeyan bẹdẹ.​—Hib. 13:16.

17. Orhiẹn vọ yen avwanre ohwo ọvuọvo che bru? (Matiu 7:​13, 14)

¹⁷ Avwanre cha dia usun rẹ ihwo ri che vwo arhọ ri bẹdẹ? Jihova kẹ avwanre uphẹn re vwo brorhiẹn yena asaọkiephana. Enẹna, avwanre yen che brorhiẹn sa cha yan vwẹ idjerhe ro sun ohwo kpo arhọ na. (Se Matiu 7:​13, 14.) Ọke ra da cha dia bẹdẹ na, mavọ yen akpeyeren cha dia? A cha fuẹrẹn ẹkpahọnphiyọ rẹ onọ yena vwẹ uyono rọ cha na.