Die Yen sa Chọn Avwanre Uko Vwo Yeren Akpọ rẹ Ofuvwegbe?

Kirobo ra ta ota kpahen vwẹ iyovwinreta re wanre na, ihwo buebun vwẹroso urhiẹvwe, ẹbe eyono, efe, ra vwọ dia omamọ rẹ ohwo rere ayen se vwo yeren akpọ rẹ ofuvwegbe. E de nenesi rẹ erọnvwọn nana kidie nẹ a guọnọ akpọ rẹ ofuvwegbe, ọ pha kerẹ ohwo rọ reyọ imapu ro miovwinri vwọ guọnọ asan ro ji te dẹvo-o. Kẹ ọnana mudiaphiyọ nẹ o vwo obo re sa chọn avwanre uko vwo yeren akpọ rẹ ofuvwegbe? Ẹjo!

ODJEKẸ VWO NẸ OBỌ RẸ OHWO RO ME KPENU

Siẹrẹ a da guọnọ brorhiẹn, ohwo rọ ma ghwanre rọ je kpako nẹ avwanre yen e brẹra. Vwẹ idjerhe vuọvo na, avwanre sa mrẹ uvi rẹ odjekẹ kpahen obaro na vwo nẹ obọ rẹ ohwo ro me vwo aghwanre je kpako nẹ avwanre. A sa mrẹ uchebro Rọyen se vwẹ ọbe re siri omarẹ ikpe 3,500 re wanre. Ọbe nana yen e se Baibol.

Diesorọ a vwọ vwẹroso Baibol na? Kidie obọ rẹ Ohwo ro me vwo aghwanre te akpọ te odjuvwu yen o nurhe. E djere phiyọ ọ “rọ Herọ nẹ Awanre Rhe” vwo “nẹ irhiri re duvwu irhiri.” (Daniẹl 7:9; Une Rẹ Ejiro 90:2) Ọyen “ma idjuvwu na (ọye Ọghẹnẹ) rọ mama otọ na.” (Aizaya 45:18) Ọ vuẹ avwanre oderhi rọyen, ọyehẹ Jihova.—Une Rẹ Ejiro 83:18.

Rọ vwọ dianẹ Baibol na obọ rẹ Ọmemama na yen o nurhe na, ọtiọyena o rhe titẹ ẹkuruemu yẹrẹ asan rẹ ohwo nurhe vwọ vrẹ ọfa-a. A da vwẹ uchebro ri Baibol na ruiruo, ọkieje yen o vwo fierere, ọ chọn ihwo buebun uko re. Ọ herọ vwẹ ejajẹ buebun, ọyen jẹ ọbe ra ma ghare vwọ vrẹ ọbe ọfa asaọkiephana.a Ọtiọyena, kasan kasan rẹ ihwo hepha eje, ayen se se ji nene odjekẹ rọyen. Ọnana rhọvwenphiyọ oborẹ Baibol na tare:

“Ọghẹnẹ ghwẹ oma hẹ abọvo jẹ ọvo vwo-o; ẹkẹvuọvo vwẹ ẹgborho kẹgborho ohwo rọ djẹ oshọ rọye ro de ru obo ri shehọ ọye ọ reyọ.”—IRUO RẸ IYINKỌN NA 10:34, 35.

Kirobo rẹ ọsẹ ro vwo ẹguọnọ vwẹ ukẹcha kẹ emọ rọyen, ọtiọyen Jihova Ọghẹnẹ rọ dia Ọsẹ rẹ ẹguọnọ womarẹ Ota rọyen rọ dia Baibol na vwọ vwẹ ukẹcha kẹ avwanre. (2 Timoti 3:16) Wọ sa vwẹroso Ota rọyen, kidie ọyen ma avwanre je riẹn obo re sa kẹ avwanre omavwerhovwẹn.

A SA VWẸROSO BAIBOL NA

Avwanre sa vwẹroso oborẹ Baibol na ta kpahen obaro na, kidie oborẹ ọ mraro rọyen omarẹ ikpe 2,000 re wanre phia enẹna.

ERỌNVWỌN RE CHA PHIA

“Ẹgborho che vrẹn vwọ so ẹgborho, uvie cha vwọ so uvie; oto che mu kpogho, owẹvwe che fi vwẹ asan buebu kugbe ọtiekọ.”—LUK 21:10, 11.

IRUEMU RẸ IHWO CHE DJEPHIA

“Vwẹ oba rẹ ẹdẹ na ẹdẹ ebrabra cha rhe. Kidie ihwo cha guọnọ omaobọ rẹ ayen nọ, e cha guọnọ igho nọ, i che phuoma nọ, i che ni oma rhuarho nọ, e cha harhe ekan nọ, i gbi che mu ọghọ kẹ esẹ vẹ ini-i, e gbe cha riẹn ẹse-e, e gbe cha guọnọ ẹfuọ-ọn, i gbi vwo omaeririo-o, e gbi se fue ọhọre rẹ aye-en, ri miovwi odẹ rẹ ihwo, ke vẹn ro umwemwu, ke djoma, ki tuoma rẹ emu esiri, ke shẹ ihwo, zighi zighi, ke vọn vẹ ophiẹvwe, ke guọnọ omavwerhe jẹ ẹguọnọ rẹ Ọghẹnẹ vwo.”—2 TIMOTI 3:1-4.

Mavọ yen Baibol na sa vwọ mraro obo re cha phia phiyotọ gbagba? Aphro herọ-ọ nẹ wọ cha rhọvwenphiyọ oborẹ ọshare ọvo re se Leung, ohwo ri Hong Kong tare: “E si aroẹmrẹ rehẹ Baibol na phiyotọ ọke grongron re wanre. Ọ pha bẹnbẹn rẹ ihworakpọ ghevweghe sa vwọ mraro kpahen erọnvwọn tiọyena e me dia gbagba abavo. Obọ rẹ ohwo ro vwo aghwanre vrẹ avwanre yen Baibol na ghini nurhe.”

Baibol na vọnre vẹ aroẹmrẹ buebun ri rugba re.b Enana djephia nẹ Baibol na Ota rẹ Ọghẹnẹ. Jihova da ta: “Mẹvwẹ Ọghẹnẹ, ọfa rọ họhọ ovwẹ gbe herọ-ọ, ro dje oba na nẹ ẹtuọhọ rọye rhe.” (Aizaya 46:9, 10) Ọtiọyena, wọ sa vwẹroso oborẹ Baibol na ta kpahen obaro na fikirẹ iroro nana eje.

WỌ SA MRẸ ERERE NẸ BAIBOL NA ENẸNA RE TE BẸDẸ

Wo de nene uchebro rọhẹ evun rẹ Baibol na, wọ cha mrẹ erere. Roro kpahen idje evo.

VWẸ ẸRO ABAVO VWO NẸ IGHO VẸ OWIAN

“Oyovwi kẹ obọ ọvo rọ vọnre vẹ ufuoma nọ abọ ivẹ rọ vọnre vẹ owian vẹ odju re nene họnra.”—AGHWOGHWO 4:6.

AKPEYEREN RẸ ORUA

“E jẹn ohwo ọvuọvo guọnọ aye rọye kerẹ omobọ rọye, e gbe rhe jẹn aye vwẹ oma kpotọ kẹ ọshare.”—ẸFESỌS 5:33.

OBORẸ A VẸ IHWO SE VWO YERINKUGBE

“Jẹ ivuemiovwo vwo, rere wo jẹ ophu vwo! Wọ phariẹ-ẹ ọ da nẹrhẹ owẹ ru imwemwu.”—UNE RẸ EJIRO 37:8.

Wọ da reyọ oborẹ Baibol na tare vwo ruiruo, ọ cha nẹrhẹ wo yeren omamọ akpọ enẹna ji rhie uphẹn ru wo vwo yeren akpọ rẹ omavwerhovwẹn vwẹ obaro. Vwẹ Baibol na, avwanre sa mrẹ ive rẹ Ọghẹnẹ kpahen obaro na, kerẹ

UFUOMA KUGBE OFUVWEGBE

“Vwe evun rẹ oyovwe rode kọye ayen da gọlọ.”—UNE RẸ EJIRO 37:11.

IWEVWIN KUGBE EMUỌRE

“Ayen ke bọn iwevwi kẹ ayen dia evun rayen, ayen ke kọn ogba ri vain kẹ ayen re emamọ rọye.”—AIZAYA 65:21.

ỌGA VẸ UGHWU GBE CHA DIA-A

“Ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a”—ẸVWỌPHIA 21:4.

Die yen ofori nẹ wo ru wo se vwo yeren oka rẹ akpọ tiọyena vwẹ obaro? Ni uyovwinrota rọ vwọ kpahen ọnana.

a Wọ da guọnọ mrẹ evuẹ efa kpahen efanfan vẹ obo ra ghare Baibol na, kpo www.jw.org rere wo kpo BIBLE TEACHINGS > HISTORY & THE BIBLE.

b Wọ da guọnọ evuẹ efa, kpo uyovwinrota 9 rẹ ọbe na The Bible—God’s Word or Man’s? rẹ Iseri ri Jihova teyenre. Wọ sa mrẹ vwẹ www.jw.org. Kpo LIBRARY > BOOKS & BROCHURES.