Oborẹ Ẹrhovwo se Ru kẹ Wẹ
Pamela guọnọ ukẹcha rẹ idọktọ kidie ọ muọga rẹ ikansa. Ẹkẹvuọvo, ọ je nẹrhovwo kẹ Ọghẹnẹ ọ sa vwọ mrẹ ẹgba vwo chirakọn rẹ ẹdia na. Ẹrhovwo na chọn rọ uko?
“Pamela da ta: “Oshọ mu vwe mamọ ọke re vwo sivwin ikansa na. Jẹ ọke me vwọ nẹrhovwo rhe Jihova Ọghẹnẹ, ẹwẹn mẹ de rhi totọ, oshọ rhe mu vwe ọfa-a. Oma na je miavwan ovwẹ kọke kọke, dedena, ẹrhovwo chọn vwẹ uko vwọ vwẹ ẹro abavo vwo ni ẹdia mẹ na. Ihwo da nọ vwẹ kpahen oma mẹ, ke me vuẹ ayen ‘oma na ghwa ga-an, jẹ oma vwerhen ovwẹ!’”
Vwọrẹ uyota, ọ dia e che hirharoku ọga yẹrẹ ẹdia ọgangan tavwen a ke nẹrhovwo-o. Avwanre eje hirharokuẹ egbabọse sansan, te iride vẹ iritete, avwanre guọnọ ukẹcha e se vwo yerin ghene ayen yẹrẹ phi ayen kparobọ. Kẹ ẹrhovwo sa vwẹ ukẹcha phia?
Baibol na da ta: “Mu oghwa wẹn nyẹ Ọrovwohwo, kọ sẹro wẹ; ọ cha sa rhọvwe nẹ e ghwie ọvwata-a.” (Une Rẹ Ejiro 55:22) Ọnana nẹrhẹ ẹwẹn rẹ avwanre totọ dẹn! Mavọ kọyen ẹrhovwo sa vwọ chọn wẹ uko? Wọ da nẹrhovwo rhe Ọghẹnẹ vwẹ idjerhe ro fori, ọ cha kẹ wẹ obo wọ guọnọre wo se vwo yerin ghene egbabọse wẹn.—Ni ekpeti na “Erere ro nẹ Ẹrhovwo Cha.”