AKPEYEREN RẸ INENIKRISTI
Obo ra sa Vwọ Dia Ohwo rọ Nabọ Yono Baibol Na
Wọ guọnọ fuevun vwẹ ọke rẹ ọdavwini kerẹ Daniẹl? Daniẹl nabọ yono Ota rẹ Ọghẹnẹ, orọnvwọn ọvo rọ nabọ yono yen aroẹmrẹ. (Dan. 9:2) Wọ vwọ nabọ yono Baibol na sa nẹrhẹ wọ dia ohwo rọ fuevun. Idjerhe vọ? Ọ sa nẹrhẹ esegbuyota wẹn kpahen ive rẹ Jihova ganphiyọ. (Jos. 23:14) Ọ je sa nẹrhẹ ẹguọnọ wẹn kpahen Ọghẹnẹ ganphiyọ, o mi mu we vwo ru obo ri yovwirin. (Une 97:10) Ẹkẹvuọvo, tivọ wọ da tonphiyọ? Roro kpahen iroroẹjẹ nana.
Die mi che yono? Ọrhuẹrẹphiyotọ re vwo muegbe rẹ obo re che yono vwẹ uyono ọkieje yovwirin mamọ. Wọ sa mrẹ erere vwo nẹ isese rẹ Baibol rẹ kudughwrẹn kudughwrẹn na siẹrẹ wo de ru ehiahiẹ rẹ ẹkpo wo vwo ẹruọ rọye-en. Vwọba, ihwo evo jẹ ojẹ rẹ ayen vwo yono aroẹmrẹ rẹ Baibol, ẹbẹre sansan rẹ omamọ rẹ ẹwẹn rẹ Ọghẹnẹ, oyan rẹ aghwoghwo rẹ ọyinkọn Pọl, yẹrẹ emama rẹ Jihova. Kọke kọke wọ da karophiyọ onọ rẹ Baibol ọvo, sio phiyotọ rere wọ reyọ vwo ru uyono romobọ wẹn.
Tivọ me da sa mrẹ evuẹ? Ni ividio rẹ Erọnvwọn ra sa Vwọ Hiẹ Guọnọ Efe na Mrẹ vwọ kẹ iroroẹjẹ evo. Wọ vwọ riẹn asan rẹ erianriẹn wẹn teri, ru ehiahiẹ kpahen oborẹ eranvwe re vwo dje ẹgba rẹ usuon vwẹ Daniẹl uyovwin 7 mudiaphiyọ.
Mavọ yen ọke mi che vwo ru uyono na gron te? Uyono rẹ ọkieje ọyen orọnvwọn ọvo rọ nẹrhẹ esegbuyota ohwo gan. Ẹsosuọ, wo se yono emerha, ọke vwọ yanran na, jẹ wo yono buẹnphiyọ. Re vwo yono Ota rẹ Ọghẹnẹ họhọ efe ra tọn nẹ otọ; wọ vwọ tọn mrẹ efe buebun na, ẹwẹn wọ vwọ tọn ọkieje ko che rhe we! (Isẹ 2:3-6) Urhurhu rẹ Ota rẹ Ọghẹnẹ che si we ọkieje, uyono rẹ Baibol rẹ ọkieje je cha dia ẹbẹre ọvo rẹ akpeyeren wẹn.—1 Pita 2:2.
DIE YEN ERANVWE RA TA OTA KPAHEN VWẸ DANIẸL UYOVWIN 7 NA MUDIAPHIYỌ?
ENỌ EFA:
Mavọ yen Daniẹl 7:8, 24 rugba wan?
OBO WO CHE YONO ỌKE ỌFA:
Die yen eranvwe ra ta ota kpahen vwẹ Ẹvwọphia uyovwin 13 na mudiaphiyọ?