Ru Ona rẹ Aghwoghwo Wẹn Yovwin Phiyọ​—Gbẹn Idjerhe Phiyotọ Vwọ Kẹ Orhivwinbrura

OBORESORỌ Ọ VWỌ GHANRE:

Avwanre guọnọ ku ame ku ibi rẹ uyota rẹ avwanre kọnre. (1 Kọr. 3:6) Avwanre da mrẹ ohwo ro dje omavwerhovwẹn phia, ofori nẹ avwanre nọ onọ ra cha kpahenphiyọ siẹrẹ avwanre de rhivwin ọke ọfa. Ọnana cha nẹrhẹ oruru rọyen ganphiyọ, je nẹrhẹ egbemuo avwanre vwọ kẹ orhivwinbrura na lọhọ. Ọke avwanre de rhivwin, avwanre sa vuẹ nẹ avwanre rhere rhe kpahenphiyọ onọ rẹ avwanre nọ rọ jovwo.

OBO RE CHE RUO WAN:

• Wo de muegbe rẹ aghwoghwo rẹ nẹ uwevwin kpo uwevwin, ji muegbe rẹ onọ ru wọ cha kpahenphiyọ ọke wo de rhivwin. Ọ sa dia onọ ra kpahenphiyọ vwẹ ọbe wo phi phiyọ ada vwẹ ẹdẹ yena. Yẹrẹ onọ ra kpahenphiyọ vwẹ ẹbe avwanre efa re vwo yono ihwo ru wọ guọnọ dje kẹ ohwo na ọke ọfa wo de rhivwin.

• Siẹrẹ wo de ku ota wẹn phiyotọ vẹ ohwo ro dje omavwerhovwẹn phia, vuẹ nẹ wọ guọnọ rhivwin rhe ọke ọfa rere wọ nọ onọ ru wo muegbe rọyen na. Ọ da dia obo wo se ru, reyọ odẹ vẹ adrẹsi rẹ ohwo na.

• Wo de se ọke kẹ ru wo che vwo rhivwin, yan mu ọke ru wo seri na.​—Mat. 5:37.